Xalqımız İlham Əliyevin şəxsində sabitliyi təmin edən rəhbəri görür
Aprelin 11-də Azərbaycanda növbəti prezident seçkiləri keçirildi. Bu
seçkiləri yerli müşahidəçilər, KİV nümayəndələri və vətəndaş cəmiyyəti yaxından
izlədi. Həmçinin müxtəlif ölkələrdən və təşkilatlardan beynəlxalq müşahidəçilər
həm seçkiqabağı mühit, həm də seçki günü ilə bağlı öz müşahidələrini aparıb,
münasibətlərini bildirdilər. O cümlədən, seçkilərdə ölkədə fəaliyyət göstərən
siyasi partiyaların bir hissəsi öz namizədi ilə iştirak etdi. Lakin elə
partiyalar oldu ki, bu marafona qatılmadı.Seçkinin nəticələri isə Azərbaycan xalqının iradəsini açıq şəkildə
özündə əks etdirdi və Yeni Azərbaycan Partiyasının namizədi İlham Əliyev böyük
səs çoxluğu ilə öz qələbəsini təmin etdi.Prezident seçkilərinə qatılmayan siyasi partiyaların seçkinin
nəticələri ilə bağlı münasibəti nədən ibarətdir?
Mövzu ilə bağlı "Kaspi” qəzetinə açıqlamasında Demokratik İslahatlar Partiyasının (DİP) sədri, millət vəkili Asim
Mollazadə bildirdi ki, DİP seçki günü müşahidə həyata keçirib: "Həm
seçkiqabağı və həm də seçki günü müşahidələr aparılıb. DİP-dən olan
müşahidəçilər də ölkə üzrə 125 seçki dairəsini və müvafiq olaraq 1000-dək seçki
məntəqəsini əhatə ediblər. Onların verdiyi məlumatlara görə, namizədlərin qeydə
alınması prosesində hər hansı qanun pozuntusu müşahidə olunmayıb. Bütün
namizədlərə elektron və çap kütləvi informasiya vasitələrinə çıxış imkanları
yaradılıb. Siyasi qüvvələrin sərbəst
toplaşmaq hüququ məhdudlaşdırılmayıb. MSK-nın seçkiləri yüksək səviyyədə təşkil etməsi, seçki maarifləndirməsi sahəsində gördüyü işlər, məntəqələrə müşahidə
kameralarının yerləşdirilməsi, seçki günü ictimaiyyətin operativ şəkildə nəticələrlə
bağlı məlumatlandırılması, KİV-ə, QHT-lərə,
siyasi partiyalara, beynəlxalq təşkilatların nümayəndələrinə seçkiləri müşahidə
etmək üçün normal şəraitin yaradılması təqdirəlayiqdir.Mən özüm də bir sıra məntəqələrdə oldum. Ümumilikdə seçki prosesində,
eləcə də səsvermə zamanı hər hansı qanun pozuntuları, seçicilərlə seçki
komissiyalarının üzvləri arasında gərginlik müşahidə etmədik. Hesab edirəm ki,
seçki Azərbaycan xalqının iradəsini ifadə edir və biz bu münasibətlə prezidenti
təbrik edirik”.
Azərbaycan Vəhdət
Partiyasının sədri (AVP), deputat Tahir Kərimli ilkin nəticələrə görə
qalib gələn prezident İlham Əliyevi təbrik edib: "Məhz dövlət başçısının
dövründə Azərbaycan sabitliyə, təhlükəsizliyə sahib olub və ölkəmizin
beynəlxalq nüfuzu artıb. Əminəm ki, İlham Əliyevin növbəti prezidentlik
dövründə dövlət suverenliyimiz tam bərpa olunacaq. Bu seçkilərin nəticəsi ona
görə realdır ki, məhz dövlət başçısının rəhbərliyi dönəmində Azərbaycan
böhrandan çıxdı, dünya iqtisadi böhranı ölkəmizə çox təsir etmədi və xeyli iri
layihələrin əsası qoyuldu. Faktiki olaraq, böyük sənaye və aqro parklar,
logistika mərkəzləri inşa edilir, yeni dəmiryol, neft-qaz xətləri çəkilir.
Eləcə də avtomobil zavodları, gəmi limanları tikilir və bu obyektlərin hələ bir
çoxu istifadəyə verilməyib. Kənd təsərrüfatı sahəsində xeyli nailiyyətlər əldə
olunub. Düşünürəm ki, bunun faydasını Azərbaycan xalqı bir neçə ildən sonra
görəcək. Təbii ki, İlham Əliyevə səs vermək elə səsvermənin ən obyektiv şərhi
olardı”.
T.Kərimli nə İlham Əliyevə, nə də Yeni Azərbaycan Partiyasına
alternativ namizəd və partiya olmadığını əvvəldən bəyanat etdiyini dilə
gətirdi: "Hesab edirəm ki, seçkinin nəticələri qanunauyğundur. Əlbəttə ki, vətəndaşların
böyük əksəriyyəti İlham Əliyevə səs verəcəkdi. Çünki insanlarımız İlham
Əliyevin şəxsində Azərbaycanı Suriyaya çevirməyə imkan verməyən, sabitliyi
təmin edən bir rəhbər gördülər. Azərbaycan xalqına da təşəkkür edirəm ki, bunu
başa düşdü və seçkidə öz səsini prezidentə verdi. İnanıram ki, İlham Əliyevin
dövründə Azərbaycan hələ çox nailiyyətlər əldə edəcək, neftdən asılı olmayan
iqtisadiyyatını da quracaq, ölkədə vətəndaş cəmiyyəti də inkişaf edəcək. Əminəm
ki, yeni komanda formalaşaraq, islahatlar davam edəcək”.
Demokratik Maarifçilik
Partiyasının (DMP) sədri, millət vəkili Elşən Musayev seçki ilə
bağlı gözləntilərinin, hesablamalarının özünü doğrultduğunu vurğuladı:
"Düşünürdüm ki, prezident çox böyük səslə öndə olacaq və qalibiyyət əldə
edəcək. Bu sevgini illər boyu görmüşük. Hələ təbliğat-təşviqat dönəmində
Zaqatalada olarkən bunun əyani şahidi oldum. İnsanlar ehtiramla, qeyri-adi bir
sevgi ilə dövlət başçısına bağlıdırlar. Elə prezident tərəfindən də bu hörmət
və ehtiram qarşılıqlıdır. Aprelin 11-də Bakıda çox qəribə hisslər yaşadım. Bu
təkcə Yeni Azərbaycan Partiyasının təşkil etdiyi şənliklə bağlı deyil. Ümumən,
Azərbaycanda və paytaxtda xoş mənzərənin şahidi oldum. İstər öz avtomobili ilə,
istərsə də piyada küçələrdə gəzişən insanlar Azərbaycan bayrağını, İlham
Əliyevin şəklini, YAP-ın emblemi olan bayraqları həvəslə, qeyri-adi şövqlə
əllərində gəzdirirdilər”.
E.Musayev əlavə etdi ki, insanlar öz liderinin qələbəsini ayrı bir
hisslə qarşılayır: "Radikal xətdə duran alternativlərə baxanda görürəm ki,
onlar 25 ildir uğursuzluq yaşayırlar. Bundan sonra hələ 200-300 il ərzində də onlar
bu uğursuzluğu yaşayacaq. Çünki Azərbaycan Heydər Əliyev siyasətinə varlığı
qədər dəyər verəcək. Bu fərqə baxıram və fikirləşirəm ki, nə yaxşı Allah
xalqımıza doğru düşüncəni verib. Hesab edirəm, bu da ayrı bir xoşbəxtlikdir.
Məhz qəzetiniz vasitəsilə prezident İlham Əliyevi təbrik edirəm”.
Bəxtiyar MƏMMƏDLİ