Bakı 24°C
Xalq artisti Rafiq Əzimovun 80 illik yubileyi qeyd edilib
Bakı Şəhər Mədəniyyət Baş İdarəsinin təşkilatçılığı ilə Mərdəkan Mədəniyyət Sarayında Azərbaycanın xalq artisti, görkəmli aktyor Rafiq Əzimovun 80 illik yubileyinə həsr edilmiş yubiley tədbiri keçirilib.
Trend-in məlumatına görə, tədbirdə xalq artistləri Nurəddin Mehdixanlı, Hacı İsmayılov, Məleykə Əsədova, əməkdar artist Elşən Rüstəmov ,tarix elmləri doktoru, professor Təvəkkül Səlimov və digər qonaqlar iştirak ediblər.
İlk öncə Sarayın foyesində aktyorun çəkildiyi rolları əks etdirən foto sərgiyə baxış keçirilib. Tədbirn aparıcısı aktyorun həyat və yaradıcılığı haqqında geniş məlumat verdikdən sonra Rafiq Əzimov səhnəyə dəvət olunub. O, tədbir təşkilatçılarına və tamaşaçılara öz minnətdarlığını bildirib və bu sarayda onun yublleyinin belə yüksək səviyyədə keçirildiyinə görə qürur duyduğunu söyləyib. R.Əzimov Bakı Şəhər Mədəniyyət Baş İdarəsinin diplomu ilə təltif olunub.
Daha sonra aktyorun sənət dostları çıxış edərək, görkəmli sənətkarın həm teatr həm də televiziyada qoyulan tamaşalardakı rollarından danışıblar. Bildirilib ki o, səhnədə yaratdığı obrazlarla yanaşı kino sahəsində də böyük uğurlar əldə edib. Peşəkar səhnəmizin ustad sənətkarlarından sayılan R.Əzimov S. Rəhmanın "Toy” komediyasında Mirzə Hüseyn, "Yalan”da Zəki, "Nişanlı qız”da Qasım, H.Cavidin "Şeyx Sənan”ında Anton, "İblis”də Kiçik zabit, C.Cabbarlının "Oqtay Eloğlu”sunda Oqtay, "Aydın”ında Mirzə Cavad, "Ulduz, yaxud Ədirnə fəthi”ndə Şeyx, M.F.Axundovun "Xırs quldurbasan”ında Frans Fok, "Müsyo Jordan və Dərviş Məstəli şah”ında Müsyo Jordan, C.Məmmədquluzadənin "Dəli yığıncağı”nda Həmzad Qurban, "Anamın kitabı”nda Rüstəm bəy, Anarın "Səhər yuxuları”nda Doktor Mahmud, "Adamın adamı”nda Fənd Bağır, "Sizi deyib gəlmişəm”ində Mozalan, S.Səxavətin "Qızıl teşt”ində Aleksandr Petroviç, "Gecə döyülən qapılar”da Qəni müəllim və sairə, bir-birindən maraqlı, yadda qalan obrazlar yaradıb.
Tədbirdə aktyorun çəkildiyi "Yeddi oğul istərəm, "Axırıncı aşırım”, "Göz həkimi”, "Buta” filmlərindən fraqmentlər nümayiş olunub. Populyar müğənnilər İzzət Bağırovun, Ümmanın musiqiləri tamaşaçılarda xoş ovqat yaradıb.
Sonda xalq Artisti Rafiq Əzimovun iştirakı ilə Xorvat dramaturqu Miro Qabranin pyesi əsasında səhnələşdirilmiş "Qəribə, qəribə, çox qəribə əhvalat” tamaşasının təqdimatı olub. Qeyd edək ki, tamaşanın bədii rəhbəri Akademik Milli Dram Teatrının direktoru, xalq Artisti Azər Paşa Nemətov, səhnə əsərinin quruluşçu rejissoru Əlif Cahangirlidir.
