Vətəndən güc alıb, vətəni gücləndirən soydaşlarımız - Fotolar
Azərbaycan mədəniyyəti, dili, mətbəxi, musiqisi, incəsənəti dünyanın harasında
varsa, orada vətənimizin kiçik bir hissəsi yaşayır. Əgər insan öz torpağını,
doğulduğu ölkəni sevirsə, ona cani-könüldən bağlıdırsa, hara gedirsə-getsin, hər
yerdə Azərbaycanın bir parçasını özünün timsalında nümayiş etdirəcək. Burada
mühüm olan bir məqam da vətəni sevməklə yanaşı, bu sevgini əməllərlə sübuta
yetirməkdir.
Ölkəmizin inkişafı, dünyada tanıdılması istiqamətində dövlət səviyyəsində
görülən işlər, atılan addımlar göz önündədir. Bir ölkəni dünyanın istənilən
yerində tanıtmaq üçün onun incəsənətinin, mədəniyyətinin üzərinə böyük yük
düşür. Bu mənada, qəlbləri vətən eşqi, yurd həsrəti ilə döyünən, dünyanın müxtəlif
ölkələrində milli musiqimizi, incəsənətimizi təbliğ edən soydaşlarımızdan
danışmaq istəyirik. Onlar yaşadıqları ölkədə kiçik Azərbaycan yaradır, vətəni qəlblərində
sevməklə yanaşı, fəaliyyətlərində də təbliğ edirlər. Dünyanın müxtəlif ölkələrində
yaşayan həmin incəsənət nümayəndələrindən bir neçəsini axtarıb-tapdıq, Azərbaycanla
bağlı etdiklərini xəbər aldıq.
Uzun müddətdir ki, Parisdə yaşayan azərbaycanlı vokal ifaçısı Təranə Allahverdiyeva-Monbarbü bizimlə
söhbətində bildirdi ki, sənətlə, musiqi ilə qurulan əlaqə çox güclü olur. Çünki
musiqi sərhəd tanımır və birbaşa olaraq insanların ürəyinə toxunur: "Siyasət elə
bir şeydir ki, hər kəs öz ölkəsinin və ölkəsinin dostlarının tərəfini saxlayır.
Ancaq musiqi ürəkdən-ürəyə olan bir əlaqədir və ona görə də hər zaman onun təsiri
güclü olur. Bundan istifadə edərək konsertlərimdə ölkəm haqqında geniş məlumat
verirəm. 20 faiz torpaqlarımızın işğal olunduğunu fransızların nəzərinə
çatdırdıram. Bəzən olur ki, fransızlar sonradan mənə yaxınlaşır və deyirlər ki,
sizin konsertdən sonra gedib Azərbaycan haqqında maraqlandıq. Sən demə, sizdə 9
iqlim qurşağı var imiş, ölkəniz təbiətin bütün zənginlikləri ilə təmin olunub və
s.”
Əslən qarabağlı olan Təranə xanım "Paris Təranə, Paris Baku” ləqəbi
ilə Fransanın müxtəlif bölgələrində konsert proqramları ilə çıxışlar edir.
Deyir ki, o, iki ölkə arasında bir növ mədəni körpü rolunu oynayır. Bunu özü
üçün böyük bir missiya hesab edir. Fransada ermənilərin çoxluq təşkil etdiyini
deyən müsahibimiz onlarla mübarizə aparmağın heç də asan olmadığını vurğuladı: "Hərə
öz sənəti ilə problemlər barədə danışsa, sözünü deməyi bacarsa, dünya səsimizi
eşidər. Ermənilərin uşaqlıqdan beyinlərinə yeridiblər ki, "türk sənin düşmənindir”,
"Qarabağ bizimkidir”, "türklər bizim torpaqlarımızı zəbt edib” və s. Onlar böhtan
atmaq, yalanlarla yaşamağa artıq öyrəşiblər. Yalançı soyqırımları quraşdırıb,
onu fransızlara başqa cür təqdim edirlər. Bəzən fransızlar mənə deyir ki, biz
elə bilirdik, siz işğalçı xalqsınız. Mən danışandan sonra deyirlər ki, sən demə,
ermənilər sizə hücum edib, torpaqlarınızı əlinizdən alıb. Fransızların əksəriyyəti
20 faiz torpağımızın işğalda olmasından, bir milyon qaçqınımızdan xəbərsizdir. Burada
erməni lobbisi çox güclüdür. Onlar artıq bir neçə nəsildir ki, Fransada
yaşayırlar. Deputatların arasında, televiziyada, jurnalistikada erməni mənşəli
fransızlar çoxdur. Bilirsiniz ki, jurnalistlər dördüncü hakimiyyətdir. Onların
da tərkibində erməni mənşəlilər olduğuna görə, məsələ daha da qəlizləşir.
Fransızların əksər ifaçıları da erməni mənşəlidir. Ancaq biz də boş oturmuruq və
fəaliyyətimiz yavaş-yavaş da olsa, öz nəticəsini göstərir. Əsas odur ki, ermənilərin
yalanlarından fərqli olaraq, həqiqət bizim yanımızdadır”.
Norveçdə yaşayan və orta məktəbdə musiqi pedaqoqu olaraq çalışan həmyerlimiz
Aygün Səfərli Acar isə Oslo şəhərində
türk xanımlardan ibarət xora bədii rəhbərlik edir. O, xor qrupu ilə mütəmadi
olaraq konsert proqramları təşkil edir. "Alaturka” türk qadın xoru Oslo musiqi
mədəniyyətində az da olsa tanınır. Onu
da qeyd edək ki, həmin xor qrupu Norveç xorlar birliyinin üzvü olmaqla yanaşı,
orada türk klassik musiqisini ifa edən yeganə musiqi qrupudur.
Norveçdə mədəni tədbirlərdə mütəmadi şəkildə iştirak edən Aygün xanım
deyir ki, Norveçdəki diasporumuz "Azərbaycan evi”nin timsalında Vətənimizi uzaq
Norveçdə tanıtmaq üçün bir sıra tədbirlərə imza atır. Bu fəaliyyətlər sırasında
20 Yanvar və Xocalı faciələri qurbanlarını anma mərasimlərini, Novruz şənliklərini,
eləcə də Azərbaycan musiqisinin təbliği məqsədini güdən konsert və digər tədbirləri
qeyd etmək olar.
Müsahibimiz deyir ki, Azərbaycan incəsənəti Osloda kifayət qədər tanınır
və oradakı diasporumuz bunun üçün əlindən gələni əsirgəmir: "Bakıdan gələn
musiqi qrupları Oslo Universitetində yüksək səviyyəli tədbirlərlə yanaşı, Oslo
xalq festivallarında da fəal iştirak ediblər. Bu tədbirlərdə Azərbaycan
musiqisi çox gözəl səviyyədə tərənnüm və təbliğ edilib”. Norveçdə Azərbaycan
musiqilərini təbliğ edən ifaçımız deyir ki, norveçlilər çox mədənidirlər, gözəl
musiqini qiymətləndirirlər. Ona görə də azərbaycanlılara gözəl münasibət bəsləyirlər.
2008-ci ildən Yaponiyada yaşayan klassik musiqi ifaçımız Gülnara Azuma Səfərova ilə də mövzumuzla
bağlı söhbət etdik. O, Yaponiyada Azərbaycan mədəniyyəti haqqında musiqi
leksiyaları təşkilatçısıdır. "Ongakuno-ie Musigi Evi” adlı bir qrup yaradıb
və ona rəhbərlik edir. Yaponiyada Azərbaycan musiqisini təbliğ edən yeganə
musiqiçimiz bizimlə söhbətində təəssüf hissi ilə qeyd etdi ki, Yaponiyada mədəniyyətimiz
haqqında çox az məlumatlıdırlar: "Son illər ölkəmizə yaponlar tərəfindən böyük
maraq yaranıb. Çox təəssüf ki, mən burada Azərbaycan musiqisini təbliğ edən yeganə
musiqiçiyəm. Yapon musiqiçilər bizim musiqimizə, incəsənətimizə marağı olanları
öz konsertlərinə əlavə edirlər. Mən də bir azərbaycanlı olaraq onlara əlimdən gələn
hər bir köməkliyi edirəm. Belə ki, milli musiqilərimizə marağı olan yapon
dostlarıma bizim məşhur milli alətlərimizi hədiyyə edir, orkestr rəhbərlərinə əsərlərimizin
notlarını tapmaqda kömək edirəm”.
Müsahibimiz deyir ki, Yaponiyadakı Azərbaycan səfirliyi onların davamlı
olaraq təşkil etdikləri tədbirlərə gəlir və dəstək olmağa çalışır: "Yaponiyada
təzəlikcə bizim diasporumuz yaradılıb və aktiv fəaliyyətə başlayıb. Hələ ki, Yaponiyada
bizim mədəniyyətimizin tanıdılması mənim və yapon dostlarımızın şəxsi təşəbbüsü ilə reallaşır. Başqa sözlə, bunların
hamısı bizim öz vəsaitlərimizin hesabına həyata keçirilir. Azərbaycan mədəniyyətinin
Yaponiyada tanıdılması istiqamətində bir addım da bu yaxınlarda atıldı. Belə
ki, bu payız Tokioda mənim ilk CD albomum işıq üzü gördü. Əslində mən klassik
piano ifaçısı olsam da, bizim milli musiqimizi təbliğ etmək məqsədilə klassik
deyil, milli musiqilərimizdən ibarət disk hazırladım. Çox maraqlı bir albom
alınıb. Albomu noyabrın 1-də Tokioda təqdim etdik. Həmin təqdimatda səfirlik də
qonaq qismində iştirak etdi. Bu albom yapon və Azərbaycan musiqisi tarixində yeni
bir musiqi körpüsüdür”.
Müsahibimizin sözlərinə görə, maliyyə çətinlikləri olduğu üçün adətən
musiqiçilərimiz Yaponiyaya getmirlər: "Biz Azərbaycan musiqisini Yaponiyada
tanıtmağa davam etmək fikrindəyik. Hazırda Tokioda yerləşən Türk Mədəniyyət Mərkəzi
ilə danışıqları aparıram ki, "Azərbaycan milli mahnıları” qrup dərsi
yaradılsın, bu dərslərdə yaponlar bizim mahnılarımızı öyrənsinlər və ifa etsinlər”.
Qardaş ölkə Türkiyəni hər nə qədər öz ölkəmizdən ayırmasaq da, Azərbaycanın
daha yaxından tanıdılması, qardaşlıq bağlarının gücləndirilməsi baxımından
orada da təbliğat fəaliyyəti böyük önəm daşıyır. Hazırda Türkiyədə xeyli Azərbaycan
sənətçiləri yaşayır və fəaliyyətlərini orada davam etdirirlər. Onların bir çoxu
sənət fəaliyyətlərində, mətbuata verdikləri müsahibələrdə Azərbaycan mədəniyyətinin,
incəsənətinin təbliğ olunması xəttini əsas götürürlər. Elə məşhur türkiyəli müğənnilərin
repertuarlarına tez-tez Azərbaycan musiqilərini əlavə etmələri də çox əhəmiyyətlidir.
Bütün bunları nəzərə alıb, Türkiyə və Azərbaycan arasında mədəni körpü rolunu
oynayan, fəaliyyəti Türkiyə prezidenti Rəcəb Tayyib Ərdoğan tərəfindən də qiymətləndirilənəməkdar artist Məlahət Abbasova ilə
danışdıq.
Məlahət xanım deyir ki, hər il çalışdığı teatrda bir Azərbaycan əsəri
səhnələşdirir. İlk səhnələşdirdikləri - Bəxtiyar Vahabzadənin "İkinci səs” əsəri olub: "O əsəri də mən tərcümə etdim. Türkiyədə
türk kitabxanasına gedəndə, müraciət etdim ki, hansısa bir Azərbaycan əsərini mənə
versinlər. Təəssüflər olsun ki, türk dilində bir dənə də olsun Azərbaycan əsəri
yox idi. Türkiyənin indiki prezidenti Rəcəb Tayyib Ərdoğan da bu məsələdə bizə
çox kömək etdi. Demək olar ki, o indiyə kimi heç bir tamaşada iştirak etməyib.
Bəxtiyar Vahabzadənin "İkinci səs” tamaşasını izləmək üçün isə böyük bir tort
alıb, teatra gəlmişdi. Teatr müdirinin də bundan xəbəri yox idi. Mənə söylədilər
ki, tamaşanı beş dəqiqə gec başlayaq, səbəb isə baş nazirin teatrımıza gəlməsidir.
«İkinci səs» həm də mənim həmin teatrda ilk rejissorluq işim idi. O, Bəxtiyar
Vahabzadəni çox sevir. Tamaşa bitdikdən sonra kulisə keçdi və bütün yaradıcı
heyəti təbrik etdi. Yaradıcı heyətlə bərabər çay süfrəsinə əyləşdi. Mənə söylədi
ki, "sən iki ölkə arasında mədəniyyət körpüsü rolunu oynayırsan. Sənə verdiyim
ilk vəzifə isə iki ölkə arasında mədəniyyət elçisi olacaq. Bunun üçün əlimdən gələn
bütün köməkliyi göstərəcəm”. Həmin gündən etibarən mənim ikitərəfli fəaliyyətlərim
başladı və hələ uzun müddət davam edəcək...”
Dünyanın müxtəlif
coğrafiyalarında yaşayan dörd soydaşımızın Azərbaycanın tanıdılması, mədəniyyətimizin
təbliği istiqamətində gördükləri işi bir yazıda əks etdirməyə çalışdıq. Əlbəttə,
belə nümunələr onlarla, yüzlərlədir. Müsahiblərimizin fikirlərindən də aydın olduğu
kimi, vətən ərazi baxımından sərhəddə bitirsə, daha böyük mənada həm də sərhəddən
dünyanın hər tərəfinə doğru başlanır. Harada yaşamağından asılı olmayaraq, ürəyi
vətənlə döyünən hər bir azərbaycanlı ölkəmizlə bağlı ədalətsizliklərin aradan
qaldırılması, həqiqətlərin yayılması naminə əlindən gələni etməlidir. Biz
çoxuq. Yetər ki, hər birimiz bir işin qulpundan yapışaq!
Xəyalə Rəis
Yazı Azərbaycan Respublikasının Prezidenti
yanında Kütləvi İnformasiya Vasitələrinin İnkişafına Dövlət Dəstəyi Fondunun 31
dekabr - Dünya Azərbaycanlılarının Həmrəyliyi Günü və Yeni il münasibətilə
keçirdiyi fərdi jurnalist yazıları müsabiqəsi üçün nəzərdə tutulmuşdur.