“Vətən sevgisi ən birincidir”
26
iyun Azərbaycan tarixinin şanlı, şərəfli günlərindən biridir. Bu gün Azərbaycan
Milli Ordusunun yaranmasından 100 il keçir. Bir əsrlik tarixi yol keçən ordumuz
hər birimizin qürur mənbəyidir. Ordu quruculuğu
dövlətin diqqət mərkəzində olan bir nömrəli məsələdir. Yalnız Silahlı
Qüvvələrin müasir silahlarla təchizatı, texniki təminatı deyil, hərbçilərin
sosial problemləri də nəzərə alınır və uğurla həll edilir. Prezident İlham
Əliyevin 2011-ci ildə imzaladığı sərəncama əsasən, indiyədək 900-ə yaxın hərbi
qulluqçu müxtəlif regionlarda dövlət vəsaiti hesabına tikilmiş mənzillərlə
təmin olunub. Vətən keşikçilərinin nəinki mənzil, eyni zamanda xidmət şəraiti
də yaxşılaşdırılır. Hərbi hissələr, hərbi şəhərciklərdə təmir-bərpa işləri
aparılır, yeni hərbi bazalar tikilir.
Azərbaycan müdafiə sənayesinin inkişafına da böyük diqqət ayırır.
Dövlət sifarişi əsasında hərbi texnika, silah, mühəndis texnikası, ehtiyat
hissələri, döyüş sursatları və digər mindən çox adda hərbi təyinatlı məhsullar
istehsal edilir. Və indi ölkəmiz hərbi məhsulları həm də ixrac edir. Dövlətimiz
iqtisadiyyat və sənaye sahəsində olduğu kimi, hərbi sahədə də böyük
nailiyyətlər əldə edib, böyük uğurlara imza atıb. Aprel döyüşləri bunun ən
bariz nümunəsidir. Prezident İlham Əliyevin qeyd etdiyi kimi, aprel döyüşləri
tarixdə bizim böyük hərbi qələbəmiz kimi qalacaq. Bu qələbə ilə düşmən
Azərbaycan Silahlı Qüvvələrinin nəyə qadir olduğunu aydın şəkildə gördü və
anladı ki, artıq Azərbaycanla hesablaşmaq vaxtı çatıb, bizə heç kim şərt qoya
bilməz: "Ordu quruculuğu prosesi, təbii ki, təkcə maddi-texniki təminatla
məhdudlaşmır. Döyüş qabiliyyəti, əsgər-zabit heyətinin mənəvi-psixoloji durumu
mühüm yer tutur. Mən tam əminliklə deyə bilərəm ki, bu baxımdan Azərbaycan
Ordusu güclü ordular sırasındadır. Döyüş qabiliyyəti artır, orduda
mənəvi-psixoloji vəziyyət çox müsbətdir, vətənpərvərlik ruhu, nizam-intizam
yüksək səviyyədədir. Əlbəttə, bütün bu amillər bizim hərbi gücümüzü daha da
artırır. Mən son illər ərzində dəfələrlə qeyd etmişəm ki, bu gün Azərbaycan
Ordusu dünya miqyasında güclü ordular sırasındadır və aprel döyüşləri bunu bir
daha sübut etdi. Bütün dünyaya sübut etdi ki, bu gün Azərbaycanla hesablaşmaq
lazımdır”.
Bir çoxları əsgərlik dövrünü əsl kişilik məktəbi kimi qiymətləndirir
və hər bir kişinin həmin məktəbi keçməsinin gərəkdiyini deyir. Bu dəfəki
yazımızda həmişə müxtəlif mövzularda həmsöhbət olduğumuz ekspertlərlə
ordumuzdan, onların əsgərlik dövrlərindən danışacağıq.
Millət vəkili Fəzail İbrahimli bildirir ki, ordu dövlətin müstəqilliyinin
təminatıdır. Çünki ordun varsa, dövlətinə olan təcavüzün qarşısını ala
bilərsən, müstəqilliyini qoruyarsan: "Mənim ordu sıralarına getməyim bir az maraqlı
əhvalatla yadda qalıb. Demək, o dövrdə aspiranturada əyani oxuyanlar orduya
çağırılmırdı. Mən də 24 yaşımda aspiranturaya qəbul oldum. Elə həmin il necə
oldusa, qərar çıxdı ki, aspiranturada oxuyanlar da əsgərliyə getməlidir. Digər
bir məqam isə budur ki, bizim dövrə qədər ali təhsillilərin hərbi xidmət
müddəti 1 il idi, amma mənim bəxtimdən o da ilyarım oldu. 1986-1988-ci illərdə
Moskva kənarında bir yerdə xidmət keçdim. Hamımızın bildiyi kimi, əsgərliyin
yazılmamış qayda-qanunları var. Amma ali təhsilli biri olaraq hərbiyə
yollandığım üçün həmin yazılmamış qayda-qanunları mənim üzərimdə tətbiq edə
bilmədilər”.
Hazırda müstəqil Azərbaycan ordusunda xidmət edən gənclərimizi çox
şanslı saydığını deyən millət vəkili bildirir ki, əvvəlki dövrlə bu gün
arasında çox ciddi fərqlər var: "Gənclərimiz müstəqil Azərbaycan ordusunda
xidmət etdikləri üçün çox şanslıdırlar. Mənim oğlum da həmin şanslı
gənclərdəndir. Millət vəkili olduğum dövrdə oğlum bir gün belə hərbi xidmətdən
yayınmadan orduda qulluq edib. Bu hər bir vətən oğlunun mənəvi borcudur”.
Nəqliyyat məsələləri üzrə ekspert
Elməddin Muradlı deyir ki, ordumuz
daim bizim qürur yerimizdir: "Ölkəmizin, vətəndaşlarımızın təhlükəsizliyini
təmin edən güclü ordumuz var. Aprel döyüşləri də bunu bir daha sübut etdi. Mən
əminəm ki, bu gün ordumuz həm mənəvi, həm də texniki baxımdan döyüşə hazırdır.
Mübariz İbrahimovla bağlı hadisə baş verdikdən sonra cəbhə bölgəsinə yollandım.
Komandirlərlə söhbət zamanı onlar bildirdilər, həmin hadisənin təsiri ilə nə
qədər əsgər gecə məktub yazıb qoyaraq, düşmən tərəfə keçməyə cəhd edib.
Düşünürəm ki, Mübariz İbrahimov və digər qəhrəmanlarımız gənclərimiz üçün gözəl
nümunədir. Mən 2001-2002-ci illərdə Daxili Qoşunlarda xüsusi təyinatlı dəstədə
xidmət etmişəm. Müxtəlif əməliyyatlarda yaxından iştirak etmişəm”.
Modern.az saytının rəhbəri Elşad
Eyvazlı qeyd edir ki, hazırda ordumuz kifayət qədər böyük
gücə sahibdir: "Azərbaycan Ordusuna olan hörmət, ehtiram daimidir. Ali Baş Komandanın
hərbiyə göstərdiyi qayğı və diqqət nəticəsində ordumuz günü-gündən inkişaf
edir. Ordumuz nəinki regionda, hətta deyərdim ki, dünyada böyük gücə sahibdir.
2016-cı ilin aprel hadisələri də bunun bariz nümunəsidir. Həmin hadisələr bir
daha sübut etdi ki, Azərbaycan Ordusu nəyə qadirdir. Azərbaycan əsgərində olan
ruh yüksəkliyi, Vətən sevgisi başqa heç bir ölkənin əsgərində yoxdur”.
Elşad bəy deyir ki, insanın həyatında unudulmaz xatirələrin bəziləri
də əsgərlik dövründə yaranır: "Mən Kəlbəcər rayonundanam. Əsgərlik dövrüm Sovet
ordusunun vaxtına təsadüf edir. Həmin dövrün bir hissəsini Rusiyada, qalan
hissəsini isə Azərbaycanda keçirmişəm. Bizim kənddə əsgərliyə gedib gələn hər
kəs kənd camaatını başına yığıb, orada baş verənləri nəql edərdi. Və gələn hamı
deyirdi ki, əsgərlikdə kimisə döyüb. Mənə maraqlı gəlirdi ki, görəsən bu necə
olur. Böyük səbirsizliklə əsgərliyə getməyi gözləyirdim. Amma gedəndə gördüm
ki, heç də danışıldığı kimi deyil. Həmin an düşündüm ki, ya onlar yalan
danışıblar, ya da mənim gücüm çatmır kimisə döyəm. Əsgərlikdən qardaşıma məktub
yazıb vəziyyəti danışdım. Onda mənə cavab verdi ki, "boş ver, fikir çəkmə,
hamımız əslində elə olmuşuq”. Yəni o vaxt kim gəlib nə danışırdı, ona da
inanırdıq. Rusiyada olan əsgərlik dönəmimdən isə rus qızları ilə söhbətlərimiz
yadda qalıb”.
Marketoloq, "Comunical”
şirkətinin rəhbəri Tural Abbaslı deyir ki, əsgərliyin hər günü xatirədir: "Əsgərlik hər bir kişinin
keçməli olduğu məktəbdir. Orada insanları tanımaq olur. İnsana səbirli, əzmkar,
dözümlü, iradəli olmağı, yaranmış problemləri öz gücünə həll etməyi öyrədir. Mənim
ordudan tərxis olunduğum gündən bu günə ordumuzda həqiqətən müsbət istiqamətdə
çox ciddi dəyişikliklər olub. Və 2016-cı ildəki aprel döyüşləri də bu inkişafın
bariz nümunəsidir. Bu gün ordumuz texniki baxımdan olduqca irəlidədir, kifayət
qədər inkişaf edib. Onu da qeyd edim ki, bir vətəndaş kimi, ordumuza böyük
inamım var. Hərbi xidmətlə bağlı xatirələrim çoxdur. Amma ən yaddaqalanı 14
fevral Sevgililər Günündə poliqona getməyimdir. Və o zaman anladım ki, bütün
sevgilər boşdur, əsas Vətən sevgisidir. Vətən sevgisi hər şeydən üstündür”.
Günel Azadə