“Valideynlərim ən böyük dəstəkçilərimdir” - Debüt
"Debüt”
rubrikamızın bugünkü qonağı güclü səs imkanlarına malik olan 12 yaşlı skripka
ifaçısı Nail Qurbanovdur. Nail yaşının az olmasına baxmayaraq, insanları öz
səsinin sehrinə toplamağı bacarır. Vətəndən uzaqda yaşasa da, qəlbinin hər
zaman Azərbaycan üçün döyündüyünü deyir.
Hələ uşaq
yaşlarından ölkəmizdə keçirilən bir çox tədbirlərdə vokal imkanlarını
göstərməyi bacaran Nail gələcəkdə beynəlxalq arenalarda ölkəmizi təmsil etmək
arzusundadır. Bunun üçün əlindən gələni etdiyini deyir. Hazırda Amerikada
təhsilini davam etdirən kiçik müsahibimiz öz istəyinə zərrə-zərrə yaxınlaşır
da. Belə ki, istedadlı yeniyetmə Amerikada keçirilən bir neçə beynəlxalq festivalda
ölkəmizi təmsil edib. İndi isə dünya üzrə keçirilən ən reytinqli müsabiqələrdə
Azərbaycan bayrağını dalğalandırmağı arzu edir. İtaliyan, ingilis, rus və
fransız dillərində sərbəst danışan müsahibimizin arzuları bitib-tükənmək
bilmir. Deyir ki, ən böyük dəstəkçisi anası Sevinc Səfərovadır.
Beləliklə, 12
yaşlı müsahibimiz bizə özü haqqında danışır.
- 2005-ci il
dekabrın 14-də Bakıda anadan olmuşam. Uşaqlıqdan musiqiyə və idmana böyük
marağım olub. Anam hər zaman mənim maraqlarıma görə hərəkət edib. Belə ki,
hansı sahəyə marağım olubsa, məni o istiqamətə yönəldib, bu sahə üzrə ən yaxşı
müəllimləri tutub. Mənə isə yalnız öz arzularımın arxasınca getmək qalıb. Bu günə
qədər bir çox filmlərə, reklam çarxlarına
çəkilmişəm. Musiqidən başqa, 7 yaşımdan fizika, kimya, astronomiya və
coğrafiya elminə hədsiz maraq göstərməyə başlamışam. Bakı şəhəri A.S.Loginov
adına 8 nömrəli tam orta məktəbdə təhsil almışam. 2012-ci ildən Rəşid Behbudov
adına 2 nömrəli musiqi məktəbində təhsil almışam. Bundan başqa, pianino
dərslərində iştirak edib, bu sahəni də mənimsəmişəm. Əsas ixtisasım skripka
ifaçısı olsa da, onunla bərabər, pianino və vokal dərsləri də almışam. Eyni
zamanda, idman gimnastikası ilə məşğul olmuşam, həm də peşəkar şahmat
oyunçusuyam. Bu sahə üzrə bir çox müsabiqələrdə iştirak etmişəm. 2017-ci ildən
etibarən təhsilimi Amerikada davam etdirirəm. Hazırda Los Angelosda Emerson
Middle Scoll-da 7-ci sinifdə oxuyuram.
- Həyata keçirmək istədiyin hansı arzuların var?
- Məqsədim 15
dildə danışmaqdır. İndi dörd dildə danışmağı bacarıram. Ancaq bu mənə kifayət
etmir. Dil öyrənmək və əcnəbi dildə danışmaq mənim hobbimdir. Asudə
zamanlarımda dil imkanlarımı genişləndirmək üçün internet vasitəsi ilə dərslər
alıram. Ən böyük arzum isə Milanda təhsil almaq, kvant fizikasını dərindən
öyrənməkdir.İnanıram ki, gec-tez mən bu arzumu həyata keçirəcəyəm.
- Səs imkanların çox genişdir. Mahnı ifa edərkən nəyə daha çox önəm
verirsən və repertuarında kimlər böyük
yer tutur?
- Mahnı ifa
edərkən ilk növbədə səs imkanlarımı nəzərə alıram. Repertuarımda Luciano
Pavarotti, Robertino Loretti, Alessandro Safina, Rəşid Behbudov, Müslüm
Maqomayev, Üzeyir Hacıbəyov, Niyazi, Bax, Vivaldi, Şubert kimi dahilərin
əsərlərinə yer verirəm.
- Nə zamandan hiss etdin ki, güclü səs
imkanların var?
- Gözümü açandan
klassik musiqinin içində böyümüşəm.
- Necə?
- Biz Üzeyir
Hacıbəyov nəslinin davamçısıyıq. Üzeyir Hacıbəyov atamın anasının
dayısıdır. Nənəm mənə ondan çox bəhs edirdi. Bizim evdə
hər zaman Üzeyir bəyin bəstələri səslənib. Nənəm onunla bağlı xatirələrini
danışırdı. Biz hara gediriksə, Üzeyir Hacıbəyovun bəstələrini xarici
vətəndaşlara dinlətdiririk. Şərqin ilk opera yazarının məhz Üzeyir bəy olduğunu
deyirik. Çünki Üzeyir Hacıbəyovu musiqinin atası hesab etmişik. Anam bizə hər
zaman onun bəstələrini təbliğ edib. Biz onun musiqiləri ilə böyümüşük. Bacılarımın
ikisi də klassik musiqi ilə məşğul olur. Bu istedad insana gendən gəlir
deyirlər. Bəlkə də belədir.
- Musiqi sənin üçün nədir?
- Musiqi mənim
üçün həyatdır. Musiqi ruhdur, nəfəsdir və özünü izah etməyin ən gözəl yoludur. Mənim üçün musiqi hər şeydir - hava, su, həyat, sevgi
- hər şey. Bu mənim şəxsi münasibətimdir. Bir qədər bədii formada ifadə etsək,
musiqi Yaradanın bizə müraciətidir, Tanrının bizimlə ünsiyyət
dilidir.Bundan başqa, mənim üçün musiqi ölkəmi tanıtmaq üçün bir
vasitədir.
- Necə musiqiləri sevirsən?
- Klassik
musiqiləri sevirəm.
- Kumirin kimlərdir?
- Luciano
Pavarotti, Robertino Loretti.
- Azərbaycanda uzun müddət yaşamısan. Bu müddət ərzində haralarda
çıxışlar etmisən?
- Heydər Əliyev
Sarayında ulu öndərimiz Heydər Əliyevə və Rəşid Behbudova həsr olunmuş simfonik
və kamera orkestri ilə konsertlərdə çıxışlar etmişəm. Dövlət Filarmoniyasında
Rauf Abdullayevin dirijorluğu altında kamera orkestri ilə konsertlərim olub.
2017-ci il fevralın 12-də "Americans got talant” beynəlxalq musiqi festivalında
çıxış etmişəm. 2017-ci ilin 28 iyulunda "Beverly Hills” beynəlxalq musiqi
festivalında iştirak etmişəm və orada sertifikata layiq görülmüşəm. Təbii ki,
bu festivalda mən tək olmamışam. Bacım Elvina Qurbanova da sonuncu
festivallarda iştirak edib. Biz ölkə xaricində iştirak etdiyimiz festivallarda
Azərbaycanımızı təmsil etmişik. Xaricilərə Azərbaycan musiqilərinin nə qədər
zəngin və çoxşaxəli, qədim köklərə malik olduğu barədə məlumatlar vermişik.
- Belə kiçik yaşında bir çox uğura imza atmısan.
Musiqi ilə yanaşı, idmanla da məşğul olursan. Yəqin ki, bu işləri belə az
yaşında etməkdə yaxşı köməkçin var.
- Əlbəttə. Bütün
işlərimdə əsas yardımçım anamdır. Valideynlərim mənim ən böyük
dəstəkçilərimdir. Mən onları çox sevirəm. Anam mənim həyat dostumdur. Hər bir
addımımda yanımda olub. Anama çox təşəkkürümü bildirirəm. Bütün uğurlarımı
anama borcluyam. Bir də mənim iki mələyim var: Elvina və Emilya Qurbanova.
Onlar mənim uğur mələklərimdir. Anamdan sonra əsas dəstəkçilərimdir. İki
bacının bir qardaşı olmaq həqiqətən də maraqlıdır. Çünki üzərimdə üç qadın
birlikdə əsir. Mənim üçün hər şeyin ən yaxşısının olmasını istəyirlər.
Skripkada yaxşı ifama görə isə skripka müəllimim Yelena Rzaquliyevaya
təşəkkürümü bildirirəm. Onun da üzərimdə çox haqqı var.
- Gələcəyə doğru hədəflərin nələrdir?
- Gözümüzü açandan bəri anamız bizə hər zaman deyib ki,
bizi bu torpaq yetişdirib. Deyib ki, dünyanın harasına istəyirsinizsə gedin,
ancaq unutmayın ki, siz burada doğulmusunuz. Çörəyini yeyib, suyunu içmisiniz.
Harada olmağınızdan asılı olmayaraq, siz Azərbaycanı təmsil edirsiniz. Bizim
ailəmiz çox vətənpərvərdir. Hazırda uzaqda yaşasaq da, ürəyimiz vətən eşqi ilə
döyünür. Ona görə də ən birinci hədəfim
Azərbaycanımızı bütün dünyada təmsil etmək, səsimi dünyaya tanıtmaqdır. Hesab
edirəm ki, mənim üçün bundan böyük xoşbəxtlik ola bilməz. İnanıram ki, gün
gələcək, mən bu istəyimə nail olacağam.
Xəyalə Rəis