Universitetlər üçün əlavə qazanc mənbəyi, yoxsa ali təhsili əl çatan edən amil?
Təhsil Nazirliyinin (TN)
müəyyən etdiyi ali təhsil müəssisələri və ixtisaslar üzrə bakalavriat
səviyyəsində birillik ödənişli hazırlıq qrupları təşkil olunacaq.
Trend-in məlumatına görə,
bu məsələ "Ali təhsil müəssisələrinin hazırlıq qruplarında tədrisin təşkili”
qaydalarında öz əksini tapıb. Qaydalara əsasən, hazırlıq qruplarında təhsil
əyani formada aparılır. Tədris ili 2 semestrdən ibarətdir və oktyabr ayının
1-də başlayır. Hər semestrdə 15 həftə nəzəri tədris üçün, birinci semestrin
sonunda 2 həftə tələbələrin biliyinin aralıq qiymətləndirilməsi üçün, ikinci
semestrin sonunda isə 2 həftə buraxılış imtahanları üçün nəzərdə tutulur.
Birinci semestrin sonunda tələbələrin biliyinin qiymətləndirilməsi və tədrisin
keyfiyyətinin monitorinqi məqsədi ilə ali təhsil müəssisələri tərəfindən aralıq
imtahanları keçirilir. Aralıq imtahanlarının nəticələrindən asılı olmayaraq,
tələbələr ali təhsil müəssisəsinin hazırlıq qruplarından xaric olunmur və
təhsillərini tədris ilinin sonunadək davam etdirirlər. Aralıq imtahanları
qaydalara uyğun olaraq keçirilən tələbə qəbulu imtahanlarına müvafiq formada
təşkil edilir. Tələbə ali təhsil müəssisəsinin intizam qaydalarını kobud
şəkildə pozduqda və ya tədris aparıldığı semestrdə fənlər üzrə ayrılmış ümumi
saatların 25 faizindən çoxunda iştirak etmədikdə, ali təhsil müəssisəsinin
hazırlıq qrupundan xaric olunur.
Keçid
ballarını DİM müəyyən edəcək
Hazırlıq qrupları
qaydalarla müəyyən olunmuş ali təhsil müəssisələrinə qəbul aparılan ixtisas
qrupları üzrə formalaşdırılır və hər qrupda tələbələrin sayı 20 nəfərdən çox
olmamalıdır. Ali təhsil müəssisələrinin hazırlıq qruplarında tədris olunan
fənlər üzrə qrup birləşmələrinə icazə verilmir. Hazırlıq qruplarında ixtisaslar
üzrə tələbə qəbulu Nazirlər Kabineti tərəfindən müəyyən edilir. Qaydalara
əsasən, müsabiqənin nəticələri elan olunduqdan sonra TN-nin müəyyən etdiyi ali
təhsil müəssisələri və ixtisaslar üzrə bakalavriat səviyyəsində hazırlıq
qruplarının yerləri elan edilir, ali təhsil müəssisələrinə qəbul olmayan
abituriyentlər tərəfindən ixtisas seçimi həyata keçirilir və Dövlət İmtahan
Mərkəzi tərəfindən müsabiqə yolu ilə yerləşdirilmə aparılır. Onlar barədə
məlumat "Tələbə-Məzun” dövlət elektron məlumat sisteminə daxil edilir. Hazırlıq
qruplarına keçid balları nazirliklə razılaşdırılmaqla, DİM tərəfindən müəyyən
edilir.
Ali təhsil müəssisələrinin
bakalavriat səviyyəsində hazırlıq qruplarında tədris bitdikdən sonra ali təhsil
müəssisələrinin birinci kursuna qəbul olunmayan tələbələr barədə "Tələbə-Məzun”
dövlət elektron məlumat sistemində müvafiq qeyd aparılır.
Ümidsiz
abituriyentlərin köməyinə 1 illik hazırlıq qrupları gələcək
Məlumat üçün qeyd edək ki, ali
məktəblərə qəbul olunmağa imkan verəcək hazırlıq qrupları bütün ali təhsil
müəssisələrində yaradılmayacaq. Ali məktəblərdə bakalavriat səviyyəsində birillik hazırlıq qrupları
yalnız müvafiq icra hakimiyyəti orqanının müəyyən etdiyi ali təhsil
müəssisələri və ixtisaslar üzrə təşkil olunacaq. Dövlət İmtahan
Mərkəzinin yaydığı məlumata görə, ötən il, yəni 2017- ci il qəbul
imtahanlarında iştirak edən abituriyentlərin 50.6 faizi 200 baldan yuxarı
nəticə göstərib. Bu isə o anlama gəlir ki, yerdə qalan 49.4 faiz abituriyentin
ali təhsil almaq imkanları məhdudlaşıb. Amma belə ümidsiz abituriyentlərin
köməyinə ali məktəblərin nəzdində fəaliyyət göstərəcək 1 illik hazırlıq
qrupları gələcək. Təhsil haqqında qanuna edilən dəyişiklikdən sonra ödənişli
qrupların yaradılması nəzərdə tutulub. Hazırlıq qruplarına keçid balını
keçməmiş, aşağı nəticə göstərərək ixtisas seçimində iştirak etməyən
abituriyentlər qəbul ediləcək.
Hər bir ali məktəb öz
profilinə uyğun ixtisaslar üzrə hazırlıq qrupları təşkil edə bilər. Keçid
balını keçməmiş abituriyentlərin hazırlıq qruplarına qəbul edilib-edilməməyini
ali məktəblərin özləri müəyyənləşdirəcəklər. Təbii ki, bu zaman müraciət
edənlər arasında seçim aparılacaq. Hazırlıq qruplarının ödənişi ali məktəblər
tərəfindən müəyyən ediləcək. Bir sözlə, standart qiymətlər tətbiq edilməyəcək.
Bir məqamı nəzərə almaq lazımdır ki, qarşıdakı il ali təhsil almaq yenə də
abituriyentin özündən asılı olacaq.
Təhsil sahəsində atılan bu
addımın nə dərəcədə əhəmiyyətli olduğunu, hansı effekti verəcəyini öyrənməyə
çalışdıq.
Təhsil
üçün xaricə gedənlərin sayı azalacaq
Təhsil eksperti Nadir İsrafilov bildirir
ki, cəmiyyətdə bu məsələyə münasibət birmənalı deyil: "Hər şeydən əvvəl onu
qeyd edim ki, hələ bir il bundan qabaq ölkəmizin ali təhsil müəssisələrində
ixtisaslar üzrə bakalavriat səviyyəsində bir illik hazırlıq qruplarının təşkili
ilə bağlı Milli Məclisin növbədənkənar plenar iclasında müzakirə edilən və qəbul
edilən dəyişiklik cəmiyyətdə heç də birmənalı qarşılanmamış və geniş
müzakirələrə səbəb olmuşdu. Qeyd olunurdu ki, hazırlıq qrupları yaradılarkən
müəyyən təcrübədən istifadə edilməli, onlar yüksək səviyyədə təşkil
olunmalıdır. Eyni zamanda, hazırlıq qruplarının yaradılması ilə xarici ölkələrə
gedən gənclərin axınının qarşısının alınacağı ehtimal edilirdi. Qəbul edilən
dəyişiklik birmənalı qarşılanmamaqla bərabər, daha çox "ölkədə bu qədər
hazırlıq kursları fəaliyyət göstərdiyi halda, ali məktəblərin nəzdində hazırlıq
qruplarının yaradılmasına ehtiyac varmı” sualını da ortaya çıxarmışdı.
Cəmiyyətdə yeni dəyişikliyə "savadsızlığın artacağı”, "yeni pul
mənbəyi” kimi iradlarla yanaşı, "müsbət hal” kimi reaksiya verənlər də var
idi”.
Ali təhsilin əl çatanlığı
Ekspert
hesab edir ki, bu, hər şeydən əvvəl ali təhsilin hamı üçün əlçatan olması
barədə dövlətin təhsil sahəsindəki kursundan irəli gələn bir məsələdir: "Əgər
ali məktəblərə qəbul imtahanları üçün abituriyentlərə iki dəfə şans verilirsə,
universitetlərin nəzdində hazırlıq kurslarının açılması da təhsilin
əlçatanlığına xidmət edəcək. Biz dünya ölkələri ilə müqayisədə adambaşına düşən
ali təhsillilərin sayına görə geridəyik. Bu mənada, belə bir dəyişiklik həmin
geriliyi aradan qaldırmaq, həm də əhalinin əsas hissəsinin ali təhsillə əhatə
olunması baxımından effektli ola bilər. Onsuz da valideynlərin əksəriyyəti
övladlarının ali məktəblərə hazırlıqları üçün müxtəlif repititorlara və
hazırlıq kurslarına üz tuturlar. Elə isə belə kurslar niyə məhz universitetlərin
öz nəzdində olmasın? Bu, tələbələrin ali məktəblərə adaptasiya olunmasına,
məşğulluqlarının təmin olunmasına, həmin ali məktəblərə qəbul şansının
artmasına təkan verməklə yanaşı, həm də universitetlərin maddi imkanlarının
artırılmasında yardımçı olar. Həmçinin gənclərimizin xaricdə oxumağa
getmələrinin, kapital və beyin axınının qarşısı müəyyən qədər alınar. Yaranacaq
kursların digər problemlərin aradan qaldırılmasında da rolu ola bilər”.
N. İsrafilov son olaraq qeyd etdi ki, "Təhsilin inkişafı üzrə Dövlət
Strategiyası”nda, əgər məktəbəhazırlıq kurslarının genişləndirilməsi
prioritetdirsə, nə üçün ali məktəblərə hazırlıq məsələsi şübhə ilə
qarşılanmalıdır? Bu baxımdan, ali məktəblərə hazırlıq da ağlabatan məsələdir.
Abituriyentlər universitetlərlə yaxından tanış
olacaqlar
Təhsil eksperti, BMU-nun prorektoru Elçin
Süleymanov deyir ki, bu kimi hazırlıq qrupları Sovet
dövründə də var idi: "Universitetlərdə 1 illik hazırlıq mərhələsi olurdu.
Ölkəmizdə təhsil alan xarici tələbələrin yaxşı öyrənməsi üçün bu sistem tətbiq
edilirdi. Əslində bu, indi də bəzi universitetlərdə qalmaqdadır. Digər tərəfdən,
qəbul imtahanından keçid balını toplaya bilməyən abituriyentlər xarici ölkələrə
üz tuturlar deyə universitetlərimizdə kifayət qədər boş yerlər qalır. Bu prosesin
də qarşısını almaq üçün gənclərə şans verilir ki, bir daha hazırlaşıb öz
universitetlərimizi seçsinlər. Bəzən sual olunur ki, bunun digər hazırlıq
kurslarından nə fərqi olacaq? Fərq o olacaq ki, abituriyentlər universitetlərlə
yaxından tanış olacaqlar. Universitetdəki dərs prosesinə, oradakı mühitə
yaxından bələd olacaqlar. Beləcə, onların düşüncələrində universitet anlayışı
formalaşacaq. Bəlkə də bu, onun gələcəkdə universitet seçiminə təsir edəcək.
Yəni ola bilər ki, abituriyent növbəti il elə hazırlığa getdiyi universiteti
seçsin.
Ekspert
bildirir ki, "Təhsil haqqında” qanunda universitetlərin müəyyən seminarlar,
kurslar təşkil etməklə əlavə qazanc əldə etmək hüququ var. O, bu qərarın da
həmin hüququn rəsmiləşmiş forması olduğunu düşünür.
Günel Azadə