Ukrayna NATO-ya üzvlüklə bağlı referendum keçirmək niyyətindədir
Ukraynanın
şərqində hərbi əməliyyatlar müvəqqəti olaraq səngiyib. Bazar günündən başlanan
atışma Ukraynada 10-dan çox adamın ölümünə səbəb olub, onlarla yaralı var.
Münaqişə ölkənin şərqində, Avdeyevka və separatçıların nəzarətində olan Donetsk
ətrafında qızışıb. Avdeyevka rəhbərliyi şəhərin humanitar fəlakətlə üzləşdiyini
deyib. Donetskdəki qiyamçılar şəhəri "Qrad”lardan atəşə tutub, döyüşlər əraziyə
göndərilən humanitar yardımın yolunu kəsib. Münaqişəni hansı tərəfin
alovlandırdığı bəlli deyil. Kiyev separatçıların arxalandığı Moskvanı, Moskva
isə Kiyevi ittiham etməkdədir.
Maraqlıdır
ki, son günlərə kimi heç kimin ağlına gəlməzdi ki, burada hərbi əməliyyatlar
start götürə bilər. Belə ki, burada bir sıra strateji obyektlər yerləşir - yəni
burada vəziyyətin sabit qalmasında hər iki tərəf maraqlı olub. Bura gətirilən
kömür Ukraynanın metallurgiya müəssisələrinə daşınır. Maraqlı açıqlama Ukrayna
müdafiə nazirinin müavini İqor Pavlovskidən gəlib. O, Donbasda hücum həyata
keçirdiklərini etiraf edib. "Övladlarımız qəhrəmanlıqla, addım-addım
irəliləməyi bacarıblar”, - Pavlovski bildirib. Yaranmış gərgin durumda
prezident Petro Poroşenko Milli təhlükəsizlik və müdafiə şurası yanında Hərbi
Kabinetin toplantısını keçirib. "Mən ölkəmin NATO-ya üzv olmaq istəməsiylə
bağlı referendum keçirmək niyyətindəyəm”, - deyə prezident söyləyib. "4 il
əvvəl Ukraynanın NATO-ya üzvlüyünü əhalinin 16 faizi dəstəkləyirdi. İndi isə bu
rəqəm 54 faizdir. Mən prezident kimi xalqın rəyi ilə hərəkət edirəm. NATO-ya
üzvlüklə bağlı referendum keçirmək niyyətindəyəm”, - prezident bildirib.
Ukrayna
XİN Donbas regionunda vəziyyətin gərginləşməsi ilə əlaqədar bəyanat yayıb: "XİN
məsələ ilə bağlı dərin narahatlıq keçirir. Son günlər Rusiya işğalçı qüvvələri
bütün silah növlərindən, o cümlədən Minsk razılaşmalarına görə, istifadəsinə
qadağa qoyulan "Qrad” reaktiv yaylım atəşi sistemindən, 152 və 155 mm kalibrli
artilleriya qurğularından, 120 və 82 mm kalibrli minaatanlardan, tanklar və
atıcı silahlardan istifadə edib. Regionda yaşayan 400 mindən çox sakin su və
elektriksiz qalıb”. Bəyanatda qeyd olunur ki, pis hava şəraiti və silahlıların davamlı
atəşi nəticəsində regionda humanitar vəziyyət pisləşir: "Kremlin bu hərəkətləri
hərbi cinayət, 12 avqust 1949-cu il Cenevrə konvensiyasının kobud pozulması,
hərbi zərurət olmadan əmlakın qanunsuz və səbəbsiz məhvi kimi
qiymətləndirilməlidir. Aydındır ki, Donbasda hazırkı gərginlik Rusiya
Federasiyasının Minsk razılaşmaları çərçivəsində üzərinə götürdüyü öhdəliklərə
məhəl qoymamasıdır. Məqsəd vəziyyətin sabitləşməsinə, təhlükəsizlik və
humanitar sahədə hər hansı irəliləyişin əldə olunmasına imkan verməməkdir.
Bununla əlaqədar olaraq Ukrayna XİN Rusiya Federasiyasından döyüşləri dərhal
dayandırmağı və atəşkəs rejiminə riayət etməyi tələb edir. Ukrayna XİN
beynəlxalq təşkilatlara müraciət edərək, Donbasda təhlükəli eskalasiyanı
dayandırmaq və regionda humanitar faciədən qaçmaq üçün rəsmi Kremlə
siyasi-diplomatik təzyiqi artırmağı xahiş edir”.
Belə
bir vəziyyətdə "CBSNews” nəşri gözlərin D.Tramp administrasiyasına dikildiyini,
yeni rəhbərliyin baş verənlərə necə təpgi göstərəcəyinin maraqla izləndiyini
yazır. Nəşr D.Tramp administrasiyasının Ukraynanı müdafiə etdiyini iddia edib. Belə
ki, fevralın 1-də Nyu-Yorkda keçirdiyi mətbuat konfransında Ukraynanın BMT-dəki
təmsilçisi Volodimir Yelçenko deyib ki, ABŞ onların ərazi bütövlüyünü tam
dəstəkləyir və Rusiyanın Krımı ilhaq etməsiylə heç vaxt razılaşmayacaq. Vaşinqtonun
Ukraynayla bağlı mövqeyini V.Yelçenkoya ABŞ-ın BMT-dəki səfiri Nikki Haley
çatdırıb. Onlar Nyu-Yorkda görüşüblər və V.Yelçenkonun dediyinə görə, ABŞ
təmsilçisinin Ukrayna haqda dedikləri onu tam razı salıb. O, ABŞ-ın Rusiyayla
münasibətlərini yoluna qoysa belə, bunu Ukraynanın hesabına etməyəcəyinə
əminliyini vurğulayıb.
İki
il öncə əldə edilən Minsk razılaşması Ukrayna və Rusiyanın münaqişə
bölgəsindəki ağır silahlarını geri çəkməsini, məsələni sülh yoluyla həll
etməsini nəzərdə tutur. Ancaq atəşkəsə heç vaxt tam əməl olunmur,
separatçılarla cəbhə xəttində ara-sıra atışmalar baş verirdi. İndi isə
münaqişəni, Moskvanın dediyinə görə, Kiyev, həm də bilərəkdən qızışdırıb. "Avdeyevka
qəsəbəsində yaşanan gərginliyin səbəbi Kiyevdir. Onlar ABŞ-ın Ukrayna ordusuna
dəstək verib-verməyəcəyini yoxlayırlar”. Bunu Rusiya prezidentinin beynəlxalq
məsələlər üzrə köməkçisi Yuri Uşakov bildirib. O, "baş verənlərin Ukraynanın
son təxribatı olduğuna inanırıq. Kiyevin istədiyi tək şey, yeni ABŞ
rəhbərliyinin onlara dəstək verməyə hazır olub-olmadığını yoxlamaqdır", -
söyləyib. Uşakov Kiyevin razılaşmalara əməl etmək istəmədiyini, məhz bu
səbəbdən iki ildir ki, münaqişənin həlli istiqamətində irəliləyiş əldə
edilmədiyini bildirib. "CBSNews” yazır ki, Moskva separatçıların gücünü
göstərməklə Vaşinqtona ismarış göndərir, regionda nüfuzunu saxladığını,
Ukraynada sülh istəyənlərin Moskvaya güzəştə getməli olduğunu bildirmək
istəyir. Kremlin sözçüsü Dmitri Peskov isə deyib ki, münaqişənin qızışması
Rusiyayla Amerika arasında dialoqun tezliklə bərpası üçün bəhanə ola bilər.
Tərəflər
arasında qarşılıqlı nifrət durmadan artır. Bunu keçirilən rəy sorğuları da
sübut edir. Məsələn, "Levada Sentr” şirkətinin keçirdiyi sorğudan bəlli olub
ki, rusların 33 faizi Ukraynaya xoş münasibət bəsləsə də, 54 faiz hələ də
özlərinə qardaş olan xalqa nifrət edir. Rusiyanın Liberal Demokrat Partiyasının
lideri Vladimir Jirinovski isə hətta prezident seçkilərində qələbə qazanacağı
halda, Ukraynanı məhv edəcəyini bildirib. Jirinovski söz verib ki, Kremlə daxil
olduqdan üç gün sonra bütün Ukrayna hökumətini həbs edəcək. "Hələ Putini
xatırlayacaqsınız ki, o, xeyirxah idi. Hər şeyi məhv edəcəyəm! Heç bir Ukrayna
olmayacaq! Hamı həbs ediləcək! Və yalnız hərbi yolla! Prezident seçiləcəyim
halda bunu edəcəyəm!” – Jiriniovski bildirib.
Azər