Türkiyədə yaşayan erməni əsilli iqtisadçı soydaşlarını necə şoka saldı?
Ermənistanın baş naziri Nikol Paşinyanın qısa zaman
kəsiyində ölkə iqtisadiyyatını dirçəldəcəyi, korrupsiyanın kökünü kəsəcəyi barədə
verdiyi vədlər, deyəsən, elə arzu olaraq qalacaq. İnqilabdan üç ay keçsə də,
ortada heç nə yoxdur. Əvəzində populist bəyanatlar və boşboğazlıqlarla dolu bəyanatlar
var. Əhali isə artıq bunlara dözmək istəmir.
Onlar yeni hökuməti, verdiyi vədləri
yerinə yetirməməkdə günahlandırırlar. Məsələn, başıbəlalı "Nairit” müəssisəsinin
işçiləri növbəti dəfə etiraz aksiyasına qalxıblar. 7 aylıq əmək haqlarını yeni
hökumətdən tələb edən işçilər, Paşinyan hökumətini onları aldatmaqda ittiham
edib. Yeri gəlmişkən, baş nazir hakimiyyətə gələrkən üzünü xaricdəki varlı və
imkanlı ermənilərə tutaraq, Ermənistanın düşdüyü ağır iqtisadi durumdan çıxmaq
üçün yardım istəmişdi. Və bu cavab da özünü çox gözlətməyib. Ermənistanın
nüfuzlu "Jamanak” qəzeti belə bir xəbər yayıb ki, dünyaca məşhur erməni əsilli
iqtisadçı Taron Əcəmoğlu Ermənistan iqtisadiyyatının bərpası və inkişaf
etdirilməsinə kömək etmək qərarına gəlib. Lakin buna, heç də vətənpərvərlikdən
deyil, maddi baxımdan razılıq verib. Türkiyədə yaşayan iqtisadçı öz əməyini nə
az, nə çox, düz 300 min dollar müqabilində qiymətləndirib. Yəni ermənilərə demək
istəyib ki, ölkənin taleyi onu da dərindən narahat edir, amma əsas məsələ bu əməyinin
necə qiymətləndirilməsidir. Bununla da erməni mediasının tənqidlərinə tuş gəlib.
Məsələn, "1in.am” saytı yazır ki, görəsən Ermənistan hakimiyyəti iqtisadçıya
vermək üçün bu pulu hardan tapacaq – büdcə vəsaitləri və yaxud digər mənbələrin
hesabına? Lakin sayt yazır ki, bunlar məsələnin başqa tərəfidir. Əhəmiyyətli
olan əvvəllər də, elə indi də faktiki olaraq davam edən yanaşmadır – nüfuzlu
ermənilərə, diaspora, xilasedicilər və digərlərinə müraciət edilməsi
tendensiyası. Ölkənin inkişaf məsələləri ilə bağlı onlardan yardım istənilməsi
tendensiyası davam edir. "Konkret olaraq Taron Əcəmoğlunu götürək - bu şəxs
dünyaca məşhur iqtisadçıdır, çoxsaylı kitab müəllifidir. Lakin bu şəxs Ermənistanı
tanımır, buranın ab-havasını bilmir. Buradakı durumu, eləcə də, buradakı
ictimai-siyasi, iqtisadi reallıqlardan xəbərsizdir. Onun nəzəri bilikləri və məlumatları
kifayət etmir. Bu səbəbdən də Ermənistanı bilməyən, onun problemlərindən xəbərsiz
birisi iqtisadiyyatı dirçəldə bilməz”, - deyə müəllif yazır. Və bu qənaətə gəlinir
ki, inkişaf potensialı, ölkənin iqtisadi inkişafı elə ölkənin özündədir. Ölkənin
kiçik, orta və iri biznesmenlərinə müraciət edilməsini məqbul sayan məqalə müəllifi,
xaricdən cəlb edilən iqtisadçıların heç nəyə nail olmayacaqları qənaətindədir.
Ermənistanın daxilindəki iş adamları, biznesmenlər korrupsiya və rüşvət üzərində
nəyəsə nail olublar, eləcə də, bu illər ərzində bir-birini əvəzləyən repressiv
hakimiyyətləri yaşayıblar. Yəni, Ermənistana yaxşı, pis bələddirlər. Müəllif yazır
ki, iqtisadiyyatın inkişaf etdirilməsi üçün iqtisadi prioritetlərə əsaslanan
strateji konsepsiya işlənib hazırlanmalıdır. Müəllif xüsusi qeyd edir ki, bu
hallar Ermənistanda mövcud deyil. Mövcud hakimiyyət yeni də olsa, perspektivdə
nəyəsə nail olacağı üçün resursları yoxdur. Ümid Qərbə idi, lakin o da
Paşinyanın ümidlərini puça endirdi. Sözsüz ki, Ermənistan üçün çıxış
yollarından biri işğal altında olan Azərbaycan torpaqlarının azad edilməsidir.
Bu həqiqətdir ki, ermənilər üçün bu torpaqlar ziyandan başqa heç bir xeyir gətirməyib.
Bu illər ərzində qlobal əhəmiyyətli enerji, infrastruktur layihələrindən,
milyardlarla dollarlardan məhrum oldular və sadə erməni insanı da bunu gözəl
anlayır. Lakin gec də deyil. Yeni rəhbərlik isə hələ də vəziyyətdən çıxış
yolunu populist bəyanatlar səsləndirməkdə görür. Bu da ona Sarkisyanın taleyini
yaşada bilər.
Saytda dərc olunan materialda bu fikirlər əks
olunmasa da, hər halda həqiqət budur ki, ermənilər 20 ildən artıq işğal siyasəti
ilə çox şey itiriblər. Gün gələcək ki, erməni xalqı bunun hesabını öz rəhbərlərindən
tələb edəcək. Materialda xüsusi qeyd edilir ki, iqtisadi siyasətin əsasını
korrupsiya ilə mübarizə, ədalətli məhkəmə sistemi təşkil edir. Bu fikri baş nazir
Nikol Paşinyan da bəyan edib. Lakin bu
mübarizə sisteminin necə və nə cür olacağını heç özü də bilmir. Maraqlı olan
odur ki, yeni hakimiyyət büdcə və iqtisadiyyatı bərpa etmək üçün özünəməxsus
metoda əl atıb. Korrupsiya ilə milyonlar əldə etmiş şəxslərdən vəsaitləri zorla
qoparmaq.
Lakin elə erməni iqtisadçıları da bu yolun düzgün olmadığı qənaətindədirlər.
Əldə ediləcək vəsait o qədər cüzi olacaq ki, nəinki iqtisadi problemləri həll
etməyə, hətta xırda işləri görməyə belə bəs etməz. Səbəb də odur ki, onlar
çoxdan mənimsədikləri vəsaitləri xaricə daşıyıblar. Digər tərəfdən, bu mənbə də
bir gün tükənəcək. Korrupsiya ilə mübarizə adı altında bu vəsaiti toplamaq mümkün olmayacaq. Ölkədə mövcud olan
20 illik korrupsiya sxemi Ermənistanı bərbad günə qoyub. Vəsaitlərin böyük bir
qismi korrupsioner məmurlar tərəfindən ölkədən çıxarılıb. Məqalədə daha sonra
vurğulanır ki, maliyyə və bank sistemində radikal islahatlar aparılmadan
iqtisadiyyatda uzunmüddətli və perspektivli inkişafa nail olmaq mümkün deyil. Hətta
bu inkişaf proqramlarını Karl Marks və Con Neş yazsa belə. O ki qaldı ədalətli
məhkəmə sisteminə - bundan heç danışmağa dəyməz. Hakim korpusunun əksəriyyəti
Sarkisyan rejiminin məhsullarıdır, rüşvət və korrupsiyaya bulaşıblar. Onları dəyişmək
üçün isə zaman gərəkdir. Bir sözlə, müəllif ölkənin iqtisadi inkişaf
perspektivlərinin dumanlı olduğu qənaətinə gəlir.
Müəllifin sonda gəldiyi qənaət
maraqlıdır. Onun qənaətincə, erməni diasporunun Əcəmoğlu kimi üzvlərinə pul ödənilməsi
- bütün əzab və məhrumiyyətlərə baxmayaraq, ölkədə qalan erməni vətəndaşları üçün təhqirdir. "Onlar
Tarem Əcəmoğlu kimi, ölkəsini tərk edib bahalı təhsil müəssisələrində oxumağa
getməyib, ölkələrində qalmağa üstünlük veriblər”, - deyə müəllif fikrini
tamamlayıb.
Azər NURİYEV