Türkiyədə münsifləri heyran edən azərbaycanlı
Təəssüf
ki, bu gün gənc ifaçılarımız özlərini realizə etmək üçün daha çox xarici musiqi
arenalarına üz tuturlar. Bizə isə onları əcnəbi kanallardan izləyərək "Afərin”
demək düşür. Belə arenalardan biri də TV-8 kanalında yayımlanan, Türkiyədə populyar
olan "O sss Türkiyə” yarışmasıdır. Bu yarışmaya nəinki Azərbaycanda, dünyanın
müxtəlif ölkələrində izlənilir və reytinqlərdə hər zaman ön sırada yer alır.
Sevindirici məqam odur ki, bizim istedadlı gənclərimiz həmin yarışmada münsif
kürsüsündə əyləşənləri heyran edirlər. Bir neçə gün əvvəl azərbaycanlı ifaçı
Nofəl Aslanov da bu müsabiqəyə qatılaraq, özünü təsdiq etdi. İtalyan dilində
ifa etdiyi "Caruso” mahnısı ilə nəinki zalda əyləşən tamaşaçıları, hətta ekran qarşısında
onu izləyən bütün izləyiciləri valeh etdi.
Münsiflər heyəti ilk dəfə idi ki, opera ifaçısını klassik geyimdə
gördüklərini və bunun iştirakçımıza gözəl yaraşdığını qeyd etdilər. Böyük
müzakirələrə səbəb olan azərbaycanlı ifaçını taparaq, ondan təəssüratlarını soruşduq.
Nofəl Aslanov bizimlə söhbətində öz yaradıcılığına da işıq salaraq, təhsilindən,
musiqi karyerasından danışdı. Məlum oldu ki, musiqi ilə bərabər basketbolla da
məşğul olub. Bu sahədə kifayət qədər də uğur qazanıb.
- Öncə sizi, gözəl çıxışınıza görə təbrik
edir, növbəti mərhələlərdən də uğurla keçməyinizi arzulayırıq.
- Təşəkkür edirəm.
- İstərdik
ki, sizi daha yaxından tanıyaq.
-
1990-cı il, fevralın 4-də Bakıda anadan olmuşam. 164 saylı orta məktəbdə təhsil
almışam. Təhsil aldığım məktəbdə basketbol bölməsi fəaliyyət göstərirdi və mən
həmin bölməyə yazıldım. Elə məktəb illərindən basketbolla məşğul olmağa
başladım. Həmin vaxtdan etibarən basketbola
böyük marağım oyandı və bu idman növü ilə peşəkar səviyyədə məşğul olmağa
başladım. Basketbolla uşaqlıqdan, daha dəqiq desəm,
5 yaşından, "Renat” idman klubunda məşğul olmağa başlamışam. İlk məşqçim
Tahir Urazayev olub. Azərbaycan Dövlət Bədən Tərbiyəsi və İdman Akademiyasının
"Basketbol” fakültəsinin məzunuyam. "Azəri”, "U-17”, "Qərb Universiteti” və
"AzTop” komandalarının və gənclərdən ibarət Azərbaycan milli komandasının şərəfini
qorumuşam. Bu sahədə müxtəlif
nailiyyətlərim oldu. Xarici ölkələrdə Azərbaycanı təmsil etməyə
başladıq. 2015/16 mövsümunda "AzTop”
komandasının heyətində Azərbaycan çempionu adını qazanmışam. Gənclər yığmamızın
tərkibində isə "C” divizionunda Avropa çempionu olmuşam. Bacardığımız qədər
bu idman növü üzrə ölkəmizi vətəndən kənarda təmsil edirdik.
- Bəs,
musiqiyə olan həvəsiniz necə yarandı?
-
İdmanla bərabər daxilimdə elə uşaqlıqdan
musiqiyə böyük həvəs var idi. Tədbirlərdə, ad günlərində çalışırdım ki,
səhnəyə çıxıb, mahnı ifa edim. Daha sonra Üzeyir Hacıbəyli adına Milli Konservatoriyada
dahi sənətkarımız, SSRİ xalq artisti Xuraman Qasımovanın sinfində oxumuşam. Hətta
bir dəfə mən onun qarşısında imtahanda çıxış etmişəm. Məni yüksək balla qiymətləndirmişdi.
Müəlliməm isə Jalə Qarayeva olub. Onlar iki il mənə vokal dərsi keçiblər.
- Ailənizdə sizin sənətinizə olan münasibəti necədir?
Ümumiyyətlə ,ailənizdə incəsənətlə məşğul olan varmı?
- Ailəmizdə
məndən başqa incəsənətlə məşğul olan yoxdur. Buna baxmayaraq, onlar mənim
seçimimə qarşı çıxmırlar. Əksinə, əllərindən gələni əsirgəmirlər, məni hər
zaman dəstəkləyiblər. Valideynlərim hər zaman mənə "Ancaq irəli, davam etməlisən,
Azərbaycanın adını daima yüksəklərə qaldırmalısan” deyərək, ruh yüksəkliyi
verirlər. Mən də buna nail olmağa çalışıram. Bunun üçün əlimdən gələni edirəm.
- Necə oldu ki, təhsilinizi İtaliyada davam etdirməyə
qərar verdiniz?
-
Oxuduğum janr klassik vokal, yəni estrada vokalıdır. Janr daha çox İtaliyaya
yaxın olduğu üçün oranı seçdim. "Saint Louis” musiqi kollecində "Estrada
vokalı” ixtisasından təhsil alıram.
Sevinirəm ki, məhz İtaliyada təhsil alıram. İnanıram ki, gələcəkdə
bundan da yaxşı nailiyyətlərə imza atacağam. Bunun üçün də öz üzərimdə çox
çalışıram.
- İtaliyadakı təhsillə bizim təhsil arasında
hansı fərqlər var?
- Əslində
o qədər də böyük fərq yoxdur. Musiqinin
dili olmur. Musiqi geniş məvhumdur. Hər ölkənin də bir təhsil sistemi var. Hazırda təhsil aldığım kollecdə dünyanın müxtəlif
ölkələrindən olan ifaçılar oxuyur. Azərbaycanda isə yerli şagirdlərimiz daha
çox üstünük təşkil edirdi. Bunu mən müsbət hal kimi dəyərləndirirəm.
- Musiqi sərhəd tanımır deyirlər. Orda Azərbaycan
musiqisindən xəbəri olan varmı?
- Əlbəttə!
Azərbaycan musiqisi elədir ki, istər-istəməz o, hər bir yerdə tanınır.
İtaliyada otaq yoldaşım italyandır. Mən
ona xalq mahnımız "Sarı gəlin”i öyrətmişəm. Biz onunla "Sarı gəlin” mahnısını səsləndirmişik. Bu videonu da
sosial şəbəkələrdə yayımlamışıq. Bacardığım qədər Azərbaycanın adını İtaliyada
qaldırmağa çalışıram və bu yöndə hər yola əl atıram. Çünki mən üç aya yaxındır
ki, İtaliyada, evimdən uzaqdayam. Bura gəlməyimin bir məqsədi var, o da Azərbaycan
musiqisini tanıtmaq və beynəlxalq arenalarda milli musiqimizi səsləndirməkdir.
- İtalyan mahnılarının çox qəliz olduğunu qeyd
edirsiniz. Bəs belə olan halda həmin mahnıları səsləndirmək, xüsusilə də o dildə
təhsil almaq çətin deyilmi?
- Təbii
ki, çox çətindir. İtalyan dilinin çətinlikləri var. Çətin olduğu qədər də bu
dil çox gözəldir. İtalyan dili musiqi dilidir. Bu dil məni valeh edir. Hətta
danışanda belə hiss olunur ki, musiqi danışır. Yəni italyan dili adamın ürəyinə
yatır. Burada təhsil almaq çox çətindir. Hazırda italyan müəllimlərindən dərs
alıram. İtalyan dilini təkmilləşdirmək üçün kurslara gedirəm. Bacardığım qədər
italyan dilində danışıram ki, dilim öyrəşsin. İnanıram ki, gələcək aylarda
italyan dilində sərbəst şəkildə danışa biləcək və musiqi biliklərimi daha da
artıracağam.
- Gələk sizi bir neçə dəqiqədə tanıdan "O səs
Türkiyə” mahnı müsabiqəsinə. Necə oldu ki, bu müsabiqədə iştirak etmək qərarına
gəldiniz?
- Bir dəfə
"Facebook”da gördüm ki, "O səs Türkiyə” yarışması gedir. Mən də özümü sınamaq
üçün həmin müsabiqə üçün qeydiyyatdan keçdim. Əslində gözləmirdim ki, həmin
müsabiqədən zəng edərlər. Düşündüm ki, gecikdiyimə görə yəqin ki, zəng etməyəcəklər.
Axşam saat 9-un yarısında mənə zəng gəldi. Həmin vaxt məşqdə idim. Bildirdilər
ki, 6-cı gün - yəni sabah sizə yaxın
olan Almaniyanın Münhen şəhərində məşq olacaq. Sizi orada gözləyirik. Mən də təyyarəyə
bileti aldım, dedikləri ünvana gedib, mahnı ifa etdim və geri qayıtdım. Açığını
desəm, orada olanda yol yorğunluğu var idi üzərimdə. Saat 12-də gəlib otelə
çatmışdım. Elə foyedə bir balaca mürgüləmişdim ki, dedilər "O səs Türkiyə”
artıq başlayıb. Gözüm yuxulu çıxdım oxudum. Üstündən haradasa iki həftə keçdikdən
sonra zəng eləyib bildirdilər ki, siz sözügedən müsabiqəyə dəvətlisiniz. Biletləriniz
alınacaq və filan tarixdə İstanbulda olmalısınız.
- Bəs nə üçün o müsabiqədə Azərbaycan deyil,
İtalyan mahnısı ifa etdiniz?
- Həmin
müsabiqədə iştirakçıların səsləri ilə
Tarık hoca məşğul olurdu. Onlara təqdim etdiyim 6 mahnıdan 3-ü Azərbaycan
mahnısı idi. Nəticədə onlar "Caruso” mahnısını məsləhət gördülər.
- Deyəsən, hələ də təbrikləri qəbul etməkdə davam
edirsiniz.
- Elədir.
İndiyə qədər də həmyerlilərim tərəfindən təbrik mesajları alıram. Çox sevinirəm. Bu hissi sözlə ifadə etmək mümkün
deyil. Hamıya ayrı-ayrılıqda dərin təşəkkürümü bildirirəm. Hətta sosial şəbəkələr
vasitəsilə hər bir şərhi oxuyuram və çalışdığım qədər cavablandırıram. Təbii
ki, çıxışımı narazı qarşılayanlar da olub. Allah onların da canını sağ eləsin.
Çünki onlar da mənim həmyerlilərimdir. İnşallah gələcəkdə daha yaxşı çıxışlar
olacaq və daha da yaxşı münasibətlər və təbriklər alacağam. Çalışacağam mümkün
olanı da, olmayanı da edim ki, yəviyyəyə çata bilim.
- Sizcə, bu müsabiqə tanınmağınızda kömək edə
bildimi?
- Əlbəttə,
çox kömək oldu. Bununla bağlı çox danışmaq istəmirəm. Bu, musiqi karyeramda olan
ən böyük dəyişikliklərdən biridir.
- Belə müsabiqələrin gənc ifaçıların tanınmasında nə
qədər rol oynayır?
- Bu tip
müsabiqələr gənc ifaçılara böyük stimul verir. Hər bir musiqiçi, vokalçı istəyir
ki, siması, səsi tanınsın. Çünki bu, onların işidir və bunun öhdəsindən də
bacarıqla gəlirlər.
Xəyalə Rəis