Türkiyə ilə oyunda bütün Ukrayna səfərbər olunacaq
Ukrayna Futbol Federasiyasının prezidenti Andrey Pavelko 2017-ci il,
sentyabrın 17-də dünya çempionatının seçmə mərhələsində Türkiyə ilə keçiriləcək
oyun barədə danışıb.
Kaspi.az xəbər verir ki, federasiya rəhbəri bu qarşılaşma üçün bütün
Ukraynanın səfərbər olunacağını deyib. O, qarşılaşmanın hansı şəhərdə
keçiriləcəyinin müzakirələrdən sonra bəlli olacağını deyib:
"Bu qarşılaşmaya hüquq-mühafizə orqanları, səfirlər, yerli
hakimiyyətlə birgə hazırlaşacağıq. Bütün Ukrayna səfərbər olacaq ki, hər hansı
bir qarşıdurma yaşanmasın. Oyunun hansı şəhərdə keçiriləcəyi isə müzakirələrdən
sonra bəlli olacaq.
Bütün variantları nəzərdən keçirəcək, təhlükəsizlik üçün ən uyğun
stadionu seçəcəyik. Bu qarşılaşmaya görə təşkilat komitəsi və xüsusi komissiya
yaradılacaq. Türkiyə komandası ilə əvvəlki oyunlarda yaşanmış insidentlər bir
daha təkrarlanmamalıdır.
Biz dünya çempionatına getmək istəyirik və çox istəyirik ki,
çempionat Rusiyada keçirilməsin. Gəlin əvvəlcə dünya çempionatına vəsiqə
qazanaq, sonra Rusiyaya gedib-getməyəcəyimizi müzakirə edək. Bu müddətdə çox
şey dəyişə bilər”.
Kaspi.az