“Türk filmləri həftəsi” başa çatdı
Noyabrın 16-da
Nizami Kino Mərkəzində 3-cü "Türk filmləri həftəsi”nə start verilmişdi.
Noyabrın 20-də başa çatan 5 günlük həftədə biri-birindən maraqlı anlar yaşanıb.
5 günlük film
bayramı
Bu beş gün ərzində
tamaşaçılara hər gün 5 türk filmi təqdim olundu. Tamaşaçılar "Yeni dünya”,
rejissor Bilal Babaoğlunun "Aşık”, Sinan Sertelin "Bir gün bir çoçuk”, Alper
Çağların "Dağ-2”
və Emre Konukun "Çırak” filmlərini ödənişsiz izləmək imkanı qazandılar."Ortaq mədəniyyət,
ortaq kino” şüarı ilə keçirilən festivalın əsas məqsədi Türkiyə filmlərinin
Azərbaycanda, Azərbaycan istehsalı olan ekran işlərinin isə Türkiyədə geniş
şəkildə təbliğinə nail olmaqdan ibarət idi. Bu məqsədlə film həftəsi
çərçivəsində Bakıda səfərdə olan türkiyəli rejissor, prodüser və tanınmış
aktyorların azərbaycanlı həmkarları ilə görüşləri keçirildi, birgə kino
layihələrinin reallaşdırılması istiqamətində danışıqlar aparıldı.Sözügedən film
həftəsi Türkiyənin Yerli Düşüncə Dərnəyinin təşkilatçılığı, Türkiyə Mədəniyyət
və Turizm Nazirliyi, bu ölkənin Azərbaycandakı səfirliyinin mədəniyyət və
təbliğat müşavirliyi, Türk Əməkdaşlıq və Koordinasiya Agentliyi (TİKA) və Bakı
Yunus Əmrə İnstitutunun dəstəyi ilə reallaşdı.
"Layihənin davamı gözlənilir”
Mədəniyyət və Turizm Nazirliyinin kinematoqrafiya şöbəsinin sektor
müdiri Yusif Şeyxov bizimlə söhbətində bu layihə ilə hər iki ölkə üçün
böyük nəticələr əldə edildiyini dedi: "Əvvəla onu deyim ki, "Ortaq mədəniyyət,
ortaq kino” şüarı ilə hazırlanan festivalın əsas hədəfi Türkiyə filmlərinin
Azərbaycanda, Azərbaycan istehsalı olan ekran işlərinin Türkiyədə geniş şəkildə
təbliğinə nail olmaqdır. Bu məqsədlə film həftəsi çərçivəsində Bakıda səfərdə
olan türkiyəli rejissor, prodüser və tanınmış aktyorların azərbaycanlı
həmkarları ilə görüşlərinin keçirilməsi çox təqdirəlayiq haldır. Bu layihə
çərçivəsində hər iki ölkənin yaradıcı insanları birgə kino layihələrinin
reallaşdırılması istiqamətində danışıqlar apardı. Kino aləmində yaradıcılıq
mübadilələri edildi. Bu layihənin davamı da gözlənilir. Baxmayaraq ki 3
ildir davam edir, biz ümidvarıq ki, bundan sonra da onlarla sıx əməkdaşlıq
edəcəyik. Dostluğumuz daha uzunömürlü olacaq. Siz özünüz də gördünüz ki, tədbirin
açılışında hər iki ölkənin mədəniyyət nazirliyi, səfirliyi iştirak etdi.
Proqrama nəzər yetirdikdə, Türkiyənin Mədəniyyət və Turizm Nazirliyinin ötən il
ərzində çəkilmiş filmləri proqrama daxil edilməsinin şahidi olduq. Bu nəinki
bizim, hətta tamaşaçıların da marağına səbəb olub”.
Y.Şeyxov əlavə
etdi ki, dövlətlərarası mədəni əlaqələrin möhkəmləndirilməsi ilə bağlı saziş
imzalanıb: "Bu layihə həmin saziş çərçivəsində həyata keçirilir. İstənilən
nəticə, əlbəttə ki, əldə olundu. Azərbaycan tamaşaçıları maraqlı kino nümunələri
ilə tanış oldular”.
"Türk filmləri
həftəsi”nə maraq gözləniləndən artıq olub
"Türk filmləri həftəsi”nin ümumi koordinatoru Qılınc bəy "YeniŞafak” saytına açıqlamasında
bildirib ki, festivala maraq gözlədiklərindən də artıq olub: "Gələn il
çəkdiyimiz bütün filmləri ən böyük salonlarda göstərməyi nəzərdə tuturuq. Bəlkə
də növbəti ildə iki film salonundan istifadə etdik. Çünki bu dəfəki
tədbirimizdə bəzi filmsevərlərin yer tapmayıb geri döndüyünü, bəzilərinin də
filmləri ayaq üstə izlədiklərinin şahidi olduq. Buna görə də növbəti günlər
üçün nəzərdə tutduğumuz filmlərin nümayişi üçün daha böyük salonlar danışmalı
olduq. Hətta 500 nəfərlik salonu danışıb, filmlərin bəzisini orada nümayiş
etdirdik”.
Azərbaycan və Türkiyənin
birgə mədəniyyətə sahib olduğunu xatırladan Qılınc bəy Türkiyədən gələn prodüserlərin
və rejissorların da bu layihədə iştirak etdiyini deyib: "Gələcəkdəki
hədəflərimizdən biri də Azərbaycanın sənət adamları ilə birlikdə bir layihəyə
imza atmaqdan ibarətdir. Türk dünyasında filmlə bağlı layihələrimiz daha çox
olacaq. Bundan sonra da bu dostluq münasibəti daha sıx və mədəni yaradıcılıq
imkanları çərçivəsində davam edəcək”.
"Bu "həftə”miz
böyük coşqu içərisində keçdi”
Nizami Kino
Mərkəzinin kino işləri üzrə direktor müavini Arzu Əhədova "Kaspi”yə
açıqlamasında bildirdi ki, "Türk filmləri həftəsi”nə tamaşaçılar tərəfindən
böyük maraq var idi: "Bu film həftəsində tamaşaçılar gözlədiyimizdən də artıq
müraciət etdilər. Biz 80 nəfərlik zal ayırmışdıq. Gördük ki, tamaşaçıların sayı
həddən artıq çoxdur. Hətta oturacaqlarda yer tükənmişdi, tamaşaçıların bu qədər
gələcəyini gözləmirdik. Pilləkənlərdə belə tamaşaçıların filmləri izlədiyinin
şahidi olduq. Ona görə bazar günü tamaşaçı sıxlığını nəzərə alıb, "Dağ 2” filminin nümayişini böyük
zalda təşkil etdik. Bu zalda 300-dən çox tamaşaçı var idi. İştirak edən bütün
filmlərdə bu cür canlanma oldu”.
A.Əhədova bildirdi
ki, bu "həftə”yə yerli rejissor və aktyorlarımız da təşrif buyurmuşdu: "Bizim
yerli məşhurlar da bu layihədə iştirak etdilər. Onlara da nümayiş olunan
filmlər maraqlı idi. Bundan başqa, film
həftəsində türk aktyor və rejissorlarının özləri də iştirak ediblər. Onlar
filmin sonunda tamaşaçılarla söhbət edir, fikir mübadilələri aparırdılar.
Qısası, sizə onu deyə bilərəm ki, bu "həftə”miz böyük coşqu içərisində keçdi.
Bizim üçün də çox maraqlı və rəngarəng bir tədbir oldu”.
Xəyalə Rəis