Turizmin “qara siyahısı”nın yaradacağı məsuliyyət
Azərbaycan Turizm Assosiasiyası turizm sənayesi
iştirakçılarının "Qara siyahı”sını tərtib edəcək.
Trend-in məlumatına görə, Azərbaycan Turizm Assosiasiyasının
sədri Nahid Bağırov bildirib ki, əvvəllər də belə siyahını hazırlayırdılar.
İndi isə onu bərpa etmək qərarına gəliblər. Bu siyahıya bütün turizm sənayesi
iştirakçıları – tələbləri pozan turizm şirkətləri, otellər, aviaşirkətlər və
hətta arzuolunmaz turistlər də daxil ediləcək: "Siyahıya dəyişiklikləri ancaq
AZTA üzvləri edə biləcəklər. Hər bir təklif olunan məlumat diqqətlə
öyrəniləcək, ancaq bundan sonra siyahıya əlavə olunacaq. Belə təcrübə bir çox
ölkələrdə tətbiq olunur və yarana biləcək risklərin, eləcə də digər bazar
iştirakçılarının mənfi nüfuzunun formalaşmasının qarşısını almaq üçün kifayət
qədər səmərəli vasitədir”.
N.Bağırov assosiasiyanın iştirakçıları haqqında da
məlumat verib. O bildirib ki, Azərbaycan Turizm Assosiasiyası 2009-cu ildən
fəaliyyət göstərir və onun aktiv üzvlərinin sayı 100-ə yaxındır. Və assosiasiyaya ancaq turizm
qanunvericiliyinə uyğun fəaliyyət göstərən və turistlərin hüquqlarını təmin
edən şirkətlər üzv ola bilər.
Maraqlıdır turizmin bu qədər inkişaf etdiyi,
ölkəyə turist axının ən yüksək səviyyədə
olduğu bir dövrdə, "qara siyahı” hansı effekti verə, turizm sahəsindəki hansı
problemləri həll edə bilər? Bu, turizm
sahəsində fəaliyyət göstərən şirkətlərin məsuliyyətini artıracaqmı? Bu kimi
suallara cavab tapmaq üçün ekspertlərə müraciət etdik.
Azərbaycan Turizm Assosiasiyası sədrinin müşaviri Müzəffər
Ağakərimov "qara siyahı” məsələsinin
hələ ki, müzakirədə olduğunu bildirdi: "Hələ ki, konkret olaraq hansı turizm
şirkətlərinin, otellərin, aviaşirkətlərin, turistlərin həmin siyahıya əlavə
olunacağını deyə bilmərik. Bu
qaydaları isə biz qoymamışıq. Bu, ümumi
olaraq beynəlxalq standartlara uyğun müəyyənləşdirilən tələblərdir və onlara əməl
etmək mütləqdir. Özünü apara bilməyən turist, vətəndaşları və gələn turistləri
aldadan, fırıldaqçılıqla məşğul olan turizm şirkətləri həmin siyahıya əlavə
olunacaqdır. Amma hələ ki, bu mövzu ətrafında müzakirələr gedir. Dəqiq bir şey
dəmək üçün tezdir. Bunu da qeyd edim ki, görülən bu kimi tədbirlər turizmin
inkişafı naminə edilir”.
"Luna Travel” Turizm Agentliyinin direktoru, hüquqşünasRəhman
Quliyev qeyd etdi ki, qara
siyahı bütün dünya praktikasında var: "Əgər ölkəyə bir turist gəlib 100 dollar
pul xərcləyib, amma ölkənin imicinə zərər gətirən nalayiq hərəkətlər edirsə,
bəzi daxili proseslərə, siyasi məsələlərə qarışırsa, birbaşa olaraq arzuolunmaz
şəxslər siyahısına salınmalıdır. Hətta turistlərin ölkəmizə axın etdiyi ilk
gündən çağırışım ondan ibarət oldu ki, onlar arasında çox ciddi yoxlamalar
aparılmalıdır. Müharibə şəraitində
yaşayan ölkə olaraq, bu kimi mövzularda diqqətli olmaqda fayda var. Lazım gələrsə, lap sərhədlərimizi bağlayarıq.
Yetər ki, müstəqilliyimizə, suverenliyimizə, ölkəmizin imicinə zərər gəlməsin.
Bugünkü gündə 5-10 turistin gəlməsi ölkəmizdən önəmli deyil. Şəxsən bir turizm şirkətinin nümayəndəsi
olaraq deyirəm ki, mənə o çörək lazım deyil. Əgər mənim dövlətimə, insanlarıma
bir ziyan dəyəcəksə, mən o pulu istəmirəm. Mənə o cür turistlərdən gələn pul
gərək deyil. Düşünürəm ki, bu siyahı
məsələsinin də turizm sahəsinə heç bir mənfi təsiri olmayacaq. Çünki individual olaraq, fərdi qaydada tətbiq
ediləcək. Tutaq ki, bir ərəb və ya
iranlı turist qrupu gəlibsə, onların içindən bir nəfər "qara siyahı”ya düşürsə,
bu demək deyil ki, həmin qrupun adamları da siyahıya daxil olur. Bunun qrupla bir əlaqəsi yoxdur. Biz
qonaqpərvər millətik, digər turistlərin başımız üstündə yeri var. Sadəcə, tək
istəyimiz ölkə imicinə zərər verəcək hərəkətlərin edilməməyidir.
Müsahibimizdən
"qara siyahı”ya əlavə olunacaq turizm şirkətləri haqqında da soruşduq: "Cənab
prezidentimiz sahibkarlığa dəstək məqsədi ilə lisenziyalaşmanı ləğv edib.
Bundan da bir çox şirkətlər
sui-istifadə edərək, səriştəsiz və
səmərəsiz fəaliyyət göstərirlər. Bunun da nəticəsində həm ölkəyə gələn, həm
gedən turistlər çox böyük əziyyətlər çəkir.
Bu cür şirkətlər daşıdığı məsuliyyəti dərk etmirlər. Bizim o şirkətləri
sıxışdırıb ortadan çıxartmaq kimi bir fikrimiz yoxdur. Sadəcə, xəbərdarlıq
edirik. Əgər xəbərdarlıqdan sonra da
onlar öz fəaliyyətlərini düzəltmirlərsə, bu zaman qara siyahıya əlavə
olunurlar. Turist bizim ölkəni seçib
gəlirsə, o yaxşı istirahət eyməyə layiqdir. Biz çalışırıq ki, nə Azərbaycana
gələn, nə də ölkəmizdən gedən turist
aldansın. Həmin insanların hüquqları pozulmasın. İnsanlara çağırış edirəm ki, diqqətli
olsunlar. Özünü turizm şirkəti kimi
təqdim edən hər kəsin sözünə aldanmasınlar. Elələri var ki, heç ofisləri,
işçiləri belə yoxdur. İnsanlar istirahət etmək istəyir, nəyəsə əsəbiləşmək,
pullarını boşa xərcləmək istəmirlər. Yəni bu "qara siyahı” əslində çox yaxşı
fikirdir. Biz iclaslarda da bunu müzakirə etmişik. Həmin turizm şirkətlərini
bağlatmaq assosiasiyanın görə biləcəyi bir iş deyil. Sadəcə olaraq "qara
siyahını” mətbuat, sosial media
vasitəsilə ictimaiyyətə təqdim edərək, insanları maarifləndirməyə çalışırlar. Bununla
da həmin şirkətlərin fəaliyyətinə görə, assosiasiyanın heç bir məsuliyyət
daşımadığını bildirirlər”.
Günel
Azadə