AZE | RUS | ENG |

Turizm obyektləri vergidən azad edilə bilərmi?

Turizm obyektləri vergidən azad edilə bilərmi?
Ekspertlərin fikrincə, bu məsələ reallaşarsa, müsbət nəticələr əldə olunacaq

Azərbaycan hökuməti turizm obyektlərinin vergidən azad olunması məsələsinə baxa bilər. "Trend”in məlumatına görə, bunu vergilər nazirinin müavini Sahib Ələkbərov Bakıda mətbuat konfransında deyib. S.Ələkbərov bildirib ki, sözügedən məsələ Vergilər Nazirliyinin səlahiyyətinə daxil deyil, əgər bu, ölkənin sosial-iqtisadi siyasətinə uyğun olacaqsa, bu addımı atmaq olar. Onun sözlərinə görə, turizm obyektlərinin vergidən azad edilməsinə kompleks şəkildə baxmaq lazımdır ki, ayrı-ayrı şəxslər güzəştlərdən sui-istifadə etməsinlər: "Bu addım atılsa, ölkə əhalisinin xeyrinə olmalı, dövlət büdcəsinə daxilolmaların artmasına gətirib çıxarmalıdır".

Qeyd edək ki, son illər turizmin inkişafı mühüm prioritet istiqamətlərdən bir hesab olunur. Azərbaycanda turizm sahəsinə yerli və xarici investisiyaların cəlb edilməsi, xidmətlərin keyfiyyətinin daha da yaxşılaşdırılması və müasir standartlara cavab verən infrastrukturun yaradılması üçün müxtəlif addımlar atılır. Turizmin inkişafı həm də ölkəmizin beynəlxalq miqyasda tanınmasında və Azərbaycanın müsbət imicinin formalaşmasında çox mühüm rol oynayır. Məlumat üçün qeyd edək ki,  2016-2019-cu illər ərzində turizm sektorunun orta hesabla 12,5 faiz artacağı proqnozlaşdırılır. Bəs turizm obyektlərinin vergidən azad olunması fikri nə dərəcədə real görünür? Bunun ölkəmizdə turizmin inkişafı baxımından hansı faydaları ola bilər və əhəmiyyəti nədən ibarətdir? Dünya təcrübəsində də belə bir hal varmı? 

Azərbaycan Turizm Assosiasiyasının İdarə Heyətinin sədri Nahid Bağırov "Kaspi”yə açıqlamasında bildirdi ki,  sözügedən məsələ öz təsdiqini taparsa, bu, Azərbaycanda turizmin inkişafına böyük dəstək olacaq. Müsahibimizin fikrinə görə,  bu həm də Azərbaycanın regionda bu sahədə üstünlüyünü artırmış olacaq: "Əgər bu məsələ qanunvericilikdə öz təsdiqini taparsa, Azərbaycan turizmi Cənubi Qafqazda rəqabətdə qalib gələr. Çünki turizm obyektlərindən alınan vergi ləğv edilərsə, bu, Azərbaycanda olan hotellərin qiymətinin ucuzlaşmasına səbəb olacaq. Həmçinin bu addım hotel seçimlərinin  artmasına da gətirib çıxaracaq. Hotellərin qiymətinin ucuz olması isə imkan verəcək ki, ölkəyə gələn turistlərin sayı artsın. Belə ki, regiona gəlməzdən əvvəl turist burada olan mövcud hotellərin qiymətinə fikir verir. Təbii ki, onun üçün hər şeydən əvvəl qalacağı hotelin qiymətinin əlverişli olması vacibdir. Bu isə Gürcüstan və Ermənistan turizmi ilə müqayisədə Azərbaycanın bu sahədə liderliyinə və  rəqabətdə qalib gəlməsinə səbəb olacaq”.  

N.Bağırov həmçinin bildirdi ki, güzəştlərdən sui-istifadə hallarının qarşısını almaq üçün turizm obyektlərinin vergidən azad edilməsinə kompleks şəkildə baxmaq əslində çox düzgündür: "Ölkə turizminə dəstəyin dövlət tərəfindən olması çox müsbət haldır. Təbii ki, bu məsələyə çox ciddi şəkildə yanaşmaq və ehtiyatlı davranmaq lazımdır. Bu gün bu təcrübə dünya praktikasında özünü doğruldub. Misal olaraq,  elə yaxın qonşu Türkiyəni misal göstərmək olar. Türkiyə turizminin inkişafına təkan olan ən böyük amillərdən biri də turizm obyektlərinin vergidən azad edilməsi olub. Bunun üçün bizim kifayət qədər geniş potensialımız var. Bu gün ölkəyə kifayət qədər turist gəlir. Bu isə bir daha onu sübut edir ki, bu məsələnin reallaşması aktual məsələlərdən biridir”. 
İqtisadçı ekspert Pərviz Heydərov qəzetimizə açıqlamasında qeyd etdi ki, qeyri-neft sektorunun ən mühüm sahələrindən biri də turizmdir. Mövcud iqtisadi  vəziyyətdə  turizmin inkişafına dövlət dəstəyinin göstərilməsi çox mühümdür: "Ölkədə qeyri-neft sektorunun inkişafı hazırda prioritet təşkil edir. Turizm isə onun mühüm bir tərkib hissəsi sayılır. Bütövlükdə qeyri-neft sektorunun inkişafı konkret olaraq hansı addımlar atmaq lazım gəldiyini tələb edirsə, bu, onun bütün seqmentlərinə və sahələrinə də aid edilməlidir”.

P.Heydərov qeyd etdi ki, turizm obyektlərinin vergidən azad edilməsi  xidmət keyfiyyətlərinin də artmasına səbəb olar: "Eyni zamanda qeyd etməliyəm ki, sözügedən addımların  əsasını ilk növbədə  stimullaşdırıcı tədbirlər təşkil edir. Turizmin də inkişafı üçün belə stimullaşdırıcı tədbirlərin həyata keçirilməsi çox  vacibdir. Lakin bu tədbirləri həyata keçirərkən əvvəlcədən mühüm nüanslar nəzərə alınmalı və   yaxşı  düşünülmüş şəkildə həyata keçirilməlidir. Turizm obyektlərinin vergidən azad olunması, hesab edirəm ki, təkcə qiymətlərin aşağı düşməsi ilə nəticələnməməlidir. Bu addım eyni zamanda ölkədə turizm sahəsində xidmət keyfiyyətinin artmasına da gətirib çıxarmalıdır. Odur ki, fikrimcə, vergilər nazirinin müavini Sahib Ələkbərovun da qeyd etdiyi kimi, turizm obyektlərinin vergidən azad edilməsinə kompleks şəkildə baxmaq lazımdır”.

Şəbnəm Mehdizadə 


Paylaş:

Facebook-da

Reklam

Xəbər lenti

Valyuta məzənnəsi

Tipi Ədə. Adı AZN
USD 1 1 ABŞ dolları 1.7000
EUR 1 1 Avro 1.9314
GEL 1 1 Gürcüstan larisi 0.6377
GBP 1 1 İngiltərə funt sterlinqi 2.1474
IRR 100 100 İran rialı 0.0040
SEK 1 1 İsveç kronu 0.1875
CHF 1 1 İsveçrə frankı 1.7103
KWD 1 1 Küveyt dinarı 5.5887
TRY 1 1 Türkiyə lirəsi 0.3176