TUR, DAR, NUR
Ucalıq
müqayisənin övladı deyil. Əgər belə olsaydı, o zaman mənəvi və maddi aləmdə
alçaq qalmazdı. Çünki, bütün alçaqlar bir başqa alçaqla müqayisədə ucadır. Bəli,
ucalıq, həqiqətən də fərqli bir kateqoriyadır. Zira, ucalar alçaqları üzə
çıxarmaq üçün ucalmırlar. Müqayisəyə gələn ölçülər yaranışın gərəyidir. Xilqət
mütləq kamilliyə sahib olduğu üçün onları qiyaslamaq özü naqislikdir. Lakin
yaranış yarananın yox, yaradanın fədakarlığıdır. Ucalıq isə xilqətin cəbri
deyil, məxluqun ixtiyarıdır. Yəni nə qədər qəribə səslənsə də, alçaqlar kimi,
ucalar da İlahi qanunları pozanlardır. Lakin bir fərqi var ki, birincilər, yəni
alçaqlar yaranışı məhv edir, ikincilər, yəni ucalar isə yaranışı bir də
yaradır. Nəticə olaraq, bunu görürük ki, məxluq yarandığı kimi yaşamır. O, ya
alçalır, ya ucalır. Xilqətdən başqa hər şey özünü təyin etmə səlahiyyətinə
sahibdir. Onu alçaldan da, ucaldan da məxluqun özüdür. Bu baxımdan, əgər Tanrı
varsa, onun görünən adı yalnız "Xaliq"dir. Digər ünsürlərdə Onun
iştirakı görünmür. Bu görünməyəni zorla və digər vasitələrlə görünən edən, yenə
də məxluq özüdür. Yenə də hər şeyi Onun cəbrinə bağlayan, ancaq bütün həyatını
və fəaliyyətini öz fərdi ixtiyarına təslim edən həmin bu yaradılışdır.
İxtiyar cəbrin içindən sıyrılmaqdır. Ucalar isə
özünə tərəf yox, Ona tərəf sıyrılanlardır. Ucalar xilqətin gərəyinə doğru can
atanlardır. Bu tərsinə gedişin səbəbi isə odur ki, yaranışın özü ixtiyarın
doğuluşudur. İstəsək də, istəməsək də məxluq olduqdan sonra Xaliqin cəbrindən
çıxırıq. Bunun özü də məhz elə xilqətin gərəyidir. Xaliqi aramaq məxluqun Xaliqə
dönüşü ilə mümkündür. Başqa dürlü arayış nəticəsiz, əvvəli şirin, sonu acı və
boşluğa dönüşən əfsanələrdən ibarətdir. Əfsanə isə bir şeyə xidmət edir: həqiqəti
yox etmək. Heç bir peyğəmbər din gətirmədi. Hamısı ucalıq gətirdi. Onların
ucalığını dinə çevirənlər alçaqlar oldu. Ona görə də, Musadan başqa Tura,
İsadan başqa Dara, Məhəmməddən başqa Nura çıxan olmadı. Bəli, məhz onlar
çıxdılar, yəni qalxdılar, ucaldılar. Onlar insanı gerçək olan Tanrıya, yəni
özünə çağırdılar. İnsanlar isə özlərindən ayrılıb, yalan olan Tanrıya doğru
getdilər. Bəli, ucalar, məhz özlərinin alçaq olmadıqlarını dərk edənlərdir.
Xaliq niyə dərk edilmək istənilir? Bunu məxluqdan kim istədi? Bunu istəyənlər əlbəttə
ki, cəbrin içindən sıyrılanlardır. Lakin, onların fədakarlığını yola, cərəyana,
qanuna, ehkama çevirənlər isə kütlələri yönəldənlər oldu. Maraqlıdır, əgər
ucaların məqamı yaxşıdırsa, biz niyə ucalmırıq? Yox, əgər pisdirsə, onlar niyə
ucaldılar? Yox, onların ucaldığı yerə biz ucala bilməriksə, deməli, biz
alçağıq? O zaman ucaların yolunu necə gedirik? Alçaq ola-ola, necə olur ki,
özümüzü ucaların yolunun talibi, onların davamçısı olaraq görürük? Bu absurd
deyilmi? Axı onlar seçilmək üçün ucalmamışdılar. Onlar ucalmamışdılar ki, bizi
alçaltsınlar. Özümüzü onlardan seçən və alçaldan bizik. Tənhalıqda, sonsuz göz
yaşlarının və o mağaralara sığmayan eşqin nəticəsi olan ucalıqlar necə olur ki,
biz alçaqların halal malı olur? Axı o ucalığı onlar qazandılar, biz yox. Demək,
belə çıxır ki, bir nəfərin ucalığı milyonların alçaqlığını idarə etmək
üçündür?! Hər kəs Musa, hər kəs İsa, hər kəs Məhəmməd olmayacaqdısa, onlar niyə
Tura, Dara, Nura çıxdılar? Məsələ burasındadır ki, ucalıq Turdan, Dardan,
Nurdan gələnləri qanuna, ehkama çevirib, din yaratmaq və bu yolla növbəti kütlə
hakimiyyətinə sahib olmaq deyil, məhz və yalnızca Tura, Dara və Nura çıxmaqdır.
Oralara qalxanlar düşünsəydilər ki, buradan enəndən sonra həmin vəhyləri, ayələri
qılınca çevirib, insanların gözünə soxsunlar, o zaman o vəhy, o ayələr onlara gəlməzdi
və ümumiyyətlə, onlar o yerlərə çıxa bilməzdilər. Bir dəfə anlamaq lazımdır ki,
onlar vəhy almaq üçün dağa çıxmadılar, dağa çıxdıqları üçün vəhy aldılar!
Bunlar fərqli-fərqli şeylərdir. Özü də bu fərq nə az, nə çox, düz Tanrı ilə şeytan
arasındakı fərq qədərdir!
Tənhalıq məxluqdan qaçmaq deyil, Xaliqə
qaçmaqdır. Bunlar da fərqli şeylərdir. Çünki məxluqdan qaçan heç bir zaman
Xaliqə tərəf qaça bilməz. Həmin qaçışın niyyəti və səbəbi fərqlidir. Xaliqə tərəf
qaçışın səbəbi məxluqun yox, nəfsin basqısı olmalıdır. Çünki nəfsin özü cəbridir,
onun basqısı ixtiyari. Məxluq bu anlamda heç kimdir. Alçalan da bizik, ucalan
da. Ucalmaq istəyənin məxluqla bir dərdi olmadığı üçün məxluqdan qaçar kimi
görünür. Ancaq bu sadəcə bir görüntüdür. Gerçəklik isə bir qədər dərindədir.
Özünüdərkin mərhələli və əzablı yolları, nəticədə, Xaliqin dərkinə gətirib çıxarır.
Bu yolun başqa sonu yoxdur. Ancaq dediyimiz kimi, onlar bunu aşağıya enmək üçün
etmədilər. Belə olsaydı, hərəsinin qoltuğuna hazır bir kitab verib göndərərdilər.
Heç kimi heç yerə göndərmədilər. Gedişat belə oldu. Son peyğəmbərin sağlığında
hələ Qurani-Kərimi bir yerə toplayıb nəşr etməmişdilər. Eşqin ayələrini dövlətin
qanunlarına çevirmək o aşiqlərin heç ağlına da gəlmirdi. Onların gözündən
baxanda adam demək istəyir: biz nə düşünürük, siz nə düşünürsünüz?! Acıdır, həqiqətən
çox acıdır!
Biz isə düşünürük ki, Həllac Mənsurla Həzrəti
İsanın arasında elə də ciddi məqam fərqi yoxdur. Hətta onlar eyni zatın
görüntüləridir. Hətta və hətta, Həzrəti Mənsurun məqamı Həzrəti İsadan
üstündür. Səbəbi isə budur ki, Məsihanı dara çəkənlər bir az sonra onu
"Allah" elan etdilər (onlar bunu bütün peyğəmbərlər üçün ediblər -
istisnasız olaraq). Çünki onu başdan-ayağa təhrif etdilər. Ancaq Həllac Mənsuru
təhrif etmək mümkün olmadı və onu dara çəkənlər bu gün də (və hər zaman) ona
"kafir" deyirlər. Böyük Hafiz qəzəllərinin birində Mənsur haqqında
"səri-dari-bolənd" ifadəsini işlədir. Çox maraqlı bir məqamdır.
"Sər" başdır, "dar" dar ağacıdır, "bolənd"
ucaltmaq deməkdir. Hafiz deyir ki, dar ipi Mənsur boynunu, yəni boyunu ucaltdı.
Burada həm fiziki mənada iplə dartılaraq yuxarıya doğru çəkilən baş, həm də mənəvi
anlamdakı ucalmaq və ən əsası ucaltmaq mənaları ortaya çıxır. Bəli, alçaqlar
ucaları öldürərkən, həmişə onları hər iki mənada özlərindən yüksəyə
qaldırıblar. Bu mənzərə, bu səhnə, istəsələr də, istəməsələr də hər zaman belə
alınıb. Ucaların yolunu alçaqlar tamamlayır. Çünki dünya üzündəki ucalığın bir
həddi var. O həddə yetişmək ölməklə, daha doğrusu, öldürülməklə bitir. Bu isə
alçaqların görəvidir. Ucaların eşqinə yetişə bilməyənlər onların canına qəsd
edir. Tarixdə bir nəfər də olsun, ixtiyar sahibi uca insan görmək mümkün deyil
ki, dünyəvi həyatı fəlakətlə davam edib, faciə ilə bitməsin! Alçaqlar ucalmayacaq, ucalar isə
alçalmayacaq. Ona görə də, bu təzad və onun acı nəticələri əbədi savaşın bitməyən
görüntüləri olaraq qalacaq.
Canımı cananə verdim, canə yoxdur minnətim,
Canı canan eylədim, cananə yoxdur minnətim.
Cümlə əşyavü dəlil varlıq səbəbkarım deyil,
İnü andan keçmişəm, insanə yoxdur minnətim.
Olmadım rahində əsla müddəi, sultanımın,
Dərgəhində bir qulam, sultanə yoxdur minnətim.
Zülfünün küfrü salıb gözdən, nəzərdən dinimi,
Kafəri-eşqəm gülüm, imanə yoxdur minnətim.
Mən ki, yandım atəşi-eşqində hər sübhü məsa,
Canıma rəhm etməsin, Rəhmanə yoxdur minnətim.
Hiyləvü rindanəlikdə çünki "xeyrül-makir"əm,
Məkri-ali məndədir, şeytanə yoxdur minnətim.
Zati-mehmani-Xudavənd olmuş idim donbadon,
Zati-Qürsəm indi mən, mehmanə yoxdur minnətim.
Çərxi-dövranın bəlavü möhnətindən fariğəm,
Çərxi pamal etmişəm, dövranə yoxdur minnətim.
Qeyr qurbanə nə hacət eydi-əkbərdə, könül,
Canı qurban etmişəm, qurbanə yoxdur minnətim.
İstəsə zundanə salsın dəhri-kəcrəftar məni,
Təndən azad olmuşam, zindanə yoxdur minnətim.
Cümlə müşkül tərki-eşq ilə olur asan, vəli,
Mən elə müşküldəyəm, asanə yoxdur minnətim.
Qareyi-rüxsarınam, vird eylərəm ol müshəfi,
Görmüşəm xalu xətin, Quranə yoxdur minnətim.
Saliməm, eşqin yolunda qanım axsın durmadan,
Çünki Sarullahəm ey dil, qanə yoxdur minnətim.
Lakin
həyat belə bir kilidlənmə ilə davam edə bilməyəcəyi üçün adına "Allah"dan
tutmuş "təbiət"ə qədər hər şey dediyimiz mütləq kamillik mənbəyi olan
həmin o Xaliq, ucalıqdan alçaqlığa yol qoymayıb, ancaq alçaqlardan ucalara gedən
yolu açıq qoyub. Çünki məsələ şəxslərdə deyil, məqamlardadır - yəni nə ucalar
var, nə alçaqlar. Ucalıqlar və alçaqlıqlar, yəni uca yerlər və alçaq yerlər
vardır. Bu yerlərə, bu məqamlara gəlib çıxmaq isə ixtiyarın işi olduğu üçün,
yollar açıqdır. Ancaq dediyimiz kimi, ucalıqdan geriyə yol yoxdur. Yol ancaq irəliyə,
ucalığadır. Elə Xaliqin var olduğu həqiqəti də məhz buradan məlum olur. Çünki
Allah olmasaydı, hərəkətin istiqaməti olmaz, gedişlərin və dönüşlərin qaranlıq
xaosu yaranar, batini istəyin güclü, qarşısıalınmaz axını hər şeyə üstün gəlməzdi.
Bəli, tanrısallıq məhz geriyə yolun olmadığı anlamında mövcuddur. Hərəkətsizlik
zatən gerilikdir. Bunun üçün ayrıca olaraq, geriyə doğru hərəkətə ehtiyac
yoxdur. Alçaqlar günü-gündən alçalmır. Nisbətdə ucalar günü-gündən ucaldığı
üçün iki nəsnə arasındakı məsafə get-gedə böyüyür. Alçaqları hər zaman buraxdığınız
yerdə gəlib tapacaqsınız. Görəcəksiniz ki, heç nə dəyişməyib. Onlar yenə öz
dediklərindədir. Bu mənada, nə qədər gülünc olsa da, Əbu Cəhl Peyğəmbərdən daha
sabitqədəm idi; ömrü boyu dedi ki, Məhəmməd yalan danışır. Çünki o, alçaqda
dayanmışdı - həm də mümkün olan ən alçaqda. Dediyimiz kimi, hərəkətin
dialektoloji istiqamətindəki icbari qanunauyğunluq irəliyə doğru olduğu üçün Əbu
Cəhl və bütün "cəhlin atası" olanlar ondan daha aşağıya düşə bilməzdilər.
Niyə? Bəli, bunun başqa bir niyəsi də budur ki, uca Yaradan həm də Rəhmandır. Yəni,
əbu cəhllərin də ucalığa yolu açıqdır. Onların da bir gün anlamaq imkanı var
ki, taleyin,qəzavü-qədərin bilinməzliyinin tək səbəbi həyatın yoldan ibarət
olduğudur. Yol isə müəmmanın babasıdır.
Bilinən yeganə şey odur ki, bütün
yollar əvvəl-axır işığa və qurtuluşa doğrudur. Bunun üçün isə, ancaq və ancaq
yola çıxmaq lazımdır. Mövlana buyurur ki, sizi hərəkətə gətirməyən imanın sizi
Siratdan keçirməsinə imkan yox. Böyük ustad gizli şəkildə demək istəyir ki, nə
varsa, bu dünyada, bu həyatdadır. Dünyası hərəkətsiz, həyatı yolsuz olanın axirəti
əfsanə, cənnəti nağıldır. Dünyadakı hərəkətin, həyatdakı yolun mənzilinə yetişənlər
üçün isə ikinci bir Sirat körpüsünə, ikinci bir cənnətə ehtiyac yoxdur. Allahın
dadı xəlvətin sirrində, göz yaşının şirinliyindədir. Kimsəsiz olmayanın kimsəsi
olmaz. Kimsəsiz qalmadıqca, O Kimsə gəlməz! Halal gülüş ağlamaqla əldə edilir.
Dünyəvi xoşbəxtlik elə dünyəvi bədbəxtliyin öz bətnindədir. Lakin bütün bədbəxtlər
o xoşbəxtliyə yetişə bilmir. Çünki bədbəxtliyin hərəkət səbəbi, yol başlanğıcı
olduğunu hər kəs bilmir. Dünya həyatının bir ucunda şeytan gözləyir, bir ucunda
Allah. Ancaq bu ucların bir fərqi var; şeytana tərəf getməyə gərək yoxdur.
Çünki o zatən var. Ancaq Allaha doğru getmək üçün hərəkət və ixtiyar lazımdır.
Başından da dediyimiz kimi, məxluq yaradıldığı kimi qalmadığı üçün, insan
seçimlə üzbəüzdür. Yəni, yaradılış nə qədər kamil və gözəl olsa da, onun həyatı
bir o qədər naqis və xaotikdir. Bu qanunauyğunluq isə İlahinin özünü həyat səhnəsindən
vurub çıxarır. Naqislər və çirkinlərin yaratdıqları Tanrı isə əfsanəyə, nağıla
çevrilir. Bərbəzəkli, ehtişamlı tanrılardan, dinlərdən heç bir şey çıxmadı.
Onlar heç kimi qurtara bilmədilər. Qurtulan hər kəs özü qurtuldu. Bəli,
Mövlananı Quran xilas etdi. Ancaq niyə təkcə Mövlananı? Bəlkə Mövlana o Quranı
naqislərdən və yobazlardan xilas etdi?! Axı Allah da, Onun mütləq və müəyyən
olunmuş əlamət və nişanələri də feliyyət səbəbi olduğu kimi, feliyyət də
onların davamiyyətinə səbəb olur. Yəni, belə demək mümkünsə, insanı yaradan Tanrıdır, ancaq Tanrını yaşadan insandır! Həm də
dolayısı ilə, Tanrını öldürən də insandır. Xaliqin həyatı da ölümü də məxluqun
şüurunda baş verir. Onun insana faydalılıq əmsalı insanın Onu dərk etmə əmsalı
ilə düz mütənasibdir. Xəlvətin sirri göz yaşının və sıyrılmanın fərdiliyində və
ixtiyarla edilmiş fədakarlıqdadır. Sirrin sirri ancaq və ancaq ucaların
alçaqlar qarşısındakı çarəsiz susqunluğundadır. Çünki Turun da, Darın da, Nurun
da sirri o mərtəbəyə yetişməklə açılır. Alçaqlar üçün hər görünən sirdir,
ucalar üçün hər sirr görünəndir!
Fəxrəddin Salim