Tullantıları əhalinin özünün çeşidlədiyi qəsəbə - Fotolar
Onların yaşadığımız bölgənin, ümumiyyətlə şəhərin təmizliyində
birbaşa rolları var. Söhbət hər gün səhərin sübh çağında, biz hələ yuxudaykən tullantılarımızı yığan insanlardan gedir. Hər
gün aidiyyəti üzrə müəyyən ərazilərə yollanır, hava işıqlanana qədər işlərini
bitirirlər. Amma bir ərazi var ki, burada tullantılar şəhərin bir çox yerlərindən
fərqli olaraq, çeşidlənərək atılır və yığılır. Üstəlik burada çeşidlənmə əhalinin
iştirakı ilə aparılır. Söhbət Avropanın hansısa ölkəsindən yox, Bakının Qala qəsəbəsindən
gedir.
Qəsəbədə tullantıların yığılması və daşınması
prosesində son texnologiyadan istifadə olunur. Bu xidmət Heydər Əliyev Fondunun
təşəbbüsü ilə "Təmiz Şəhər” ASC-nin həyata keçirdiyi "Təmiz Qala” pilot layihəsi çərçivəsində göstərilir.
Biz də son texnologiya ilə tullantıların çeşidlənmə və yığılma prosesini izləmək
üçün qəsəbəyə yollanırıq.
Göy və yaşıl
qutuların sirri...
Ərazidə gəzərkən tullantılar üçün hazırlanmış
xüsusi qutular diqqətimizi çəkir. Göy və yaşıl rəngli tullantı qutularının üzərində
maarifləndirici lövhə yerləşdirilib. Əhali məişət tullantılarını 2 yerə bölərək
üzvi (qida) tullantılarını yaşıl qutuya, qeyri-üzvi (qeyri-qida) tullantıları
isə göy rəngdəki qutulara atır. Üstəlik, həmin qutulardakı tullantıları da
uyğun rəngdə olan avtomobillər yığaraq "Təmiz Şəhər” ASC-nin Balaxanıda yerləşən
tullantıların çeşidlənməsi zavoduna daşıyır.
Təmiz Şəhər ASC-nin mətbuat
xidmətinin rəhbəri Elmar Məlikov deyir ki, bu cür çeşidlənərək yığılan tullantının
təkrar emal zamanı məhsuldarlığı daha çox olur: "2010-cu ildən etibarən "Təmiz
Qala” layihəsinin icrasına başlanılıb. Layihənin məqsədi Qala qəsəbəsi ərazisində
əmələ gələn tullantıların kompleks idarə edilməsi – tullantıların yığılması,
daşınması və utilizasiyası proseslərini müasir şəkildə təşkil edilməsidir. Təşkil
olunan işlərin mahiyyəti haqqında əhali arasında mütəmadi olaraq genişmiqyaslı
maarifləndirmə işləri aparılır, tullantı konteynerlərindən necə istifadə etmələri
barədə bukletlər paylanılır, görülən işlər haqqında əhalinin və təşkilatların
iştirakı ilə sorğular keçirilir. Magistral yollarda tullantıların yol kənarlarına
atılmaması barədə reklam lövhələri quraşdırılıb”.
Səhər saat 5-dən tullantıları yığmaq üçün
avtomobillər hazır vəziyyətdə gözləyir. Hər avtomobildə isə biri sürücü, iki fəhlə
öz xüsusi geyimlərində gözləyirlər. Qeyri-üzvi tullantıları yığmaq üçün göy
zolaqlarla rənglənmiş avtomobil, uyğun olaraq göy konteynerə yaxınlaşır. İki fəhlə
konteyneri avtobusa yerləşdirir, tullantını boşaltdıqdan sonra yerinə qoyur.
İnsan zibil daşısa
da...
Onlar işlərini bitirdikdən sonra söhbətləşmək üçün
yaxınlaşırıq. Göy rəngli avtomobilin sürücüsü
Sərdar Qasımov 21 ildir bu sahədə işləyir. Sərdar dayı elə Qalada yaşayır.
Deyir ki, tullantıların çeşidlənməsi, yığılması qəsəbəyə xüsusi təmizlik gətirib:
"Qızım, əvvəllər qəsəbədə zibillər yığılıb, günlərlə qalırdı. Pis qoxu ətrafı
bürüyürdü. Bu layihə qəsəbəmizə təmizlik gətirib. Hər səhər tullantılar
yığılır, çeşidlənir uyğun avtomobillərdə
göndərilir. Burada insanlar anlayır ki, xarici ölkədə olduğu kimi, bizdə də
tullantıları çeşidləmək mümkündür”.
İşinin çətinliyinə gəldikdə isə Sərdar dayı deyir
ki, həyatda yaşamaq üçün mübarizə aparmaq lazımdır: "Hər gün saat 5-də evdən
çıxıram. 21 ildir ki, belədir. Əgər işini sevirsənsə, heç bir çətinlik yoxdur.
İnsan zibil də daşısa, iş işdir və o, gördüyü işi sevməlidir. Hər dəfə sənət
sevgisi ilə bağlı danışanda, "Titanik” filmindən bir kadr yadıma düşür. Gəmi
batmaq üzrədir, hamı can hayındadır, amma musiqiçilər ifalarını saxlamırlar. Ölənə
qədər ifa edirlər. İşini sevmək budur”.
"Bizim işimiz tökmək,
sizinki yığmaqdır”
Şamil Rəhimov fəhlədir. Onu işi konteyneri götürmək, boşaltmaq, ərazini
təmiz saxlamaqdır. Deyir ki, layihənin ilk günlərində qəsəbə sakinlərinin çoxu
qaydalara riayət etmirdilər: "Əvvəllər çox çətin olurdu. İndi zibil yeşikləri də böyükdür. Kənara çox zibil
düşmür. Layihədən öncə əhali zibilləri yeşiyə deyil, eləcə qutunun yanına
boşaldıb gedirdilər. Bəzilərinə irad bildirəndə isə deyirlər ki, bizim işmiz
tökmək, sizin işiniz yığmaqdır. Biz hökumətə pul ödəyirik, istədiyimizi edə bilərik.
Amma indi əvvəlki ilə müqayisədə fərq çoxdur. Artıq insanlar çeşidlənməyə
alışıblar”.
Məlumat üçün bildirək ki, tullantıların daşınması
üçün müasir standartlara cavab verən tullantı daşıyan nəqliyyat vasitələri
istifadə edilir. Həmin nəqliyyat vasitələri xüsusi GPS sistemi ilə təchiz
edilib və 24 saat ərzində mərkəzi nəzarət sistemi tərəfindən idarə edilir. "Təmiz
Şəhər” ASC Qalada meydançalarda əmələ gələn tullantıların illik, rüblük və
aylıq, həmçinin fəsillərə uyğun daşınmasını planlaşdırır. Həm bu proqramlar, həm
mümkün ani dəyişikliklər barədə məlumat tullantı avtomobillərində quraşdırılmış
planşetlərə ötürülür və sürücülər həmin məlumat əsasında hərəkət edirlər. Həmçinin,
sürücülər də qarşılaşdıqları hansısa problemləri kabinələrdəki GPS-danışıq
sensorları ilə dispetçerə ötürə bilir.
Yaşıl və göy rəngli yeşiklər müvafiq avtomobillərə
boşaldıldıqdan sonra dezinfeksiya maşını vasitəsilə tullantı konteynerləri
yuyulur və xüsusi məhlulla dezinfeksiya olunur. Yuyulduqdan sonra isə fəhlələr
yenidən konteynerləri yerləşdirir və açarla bağlayırlar.
"Konteynerləri
yandırırlar”
Əlvan İsaxanov da 6 ildir bu sahədə işləyir. Onun narazılığı
konteynerlərin yandırılması ilə bağlıdır: "Konteynerləri bilərəkdən
yandırırlar, əridirlər. Yanan siqareti, yaxud kağızları bilərəkdən konteynerə
atırlar. Qəsəbədə belə təmizlik, şərait yaradılıb. Lakin bəzi insanları görünür təmizlik də
narahat edir. Zibili qablara yox, eləcə yerə atıb gedirlər. Əvvəllər aylarla
tullantılar yığılırdı, gəlib aparan yox idi. İndi tərtəmizdir. Amma insanlar
kömək etməlidirlər. Uşağın əlinə arabanı verib zibil atmağa göndərirlər. Uşağın
da gücü çatmır, boşaldır yerə. Belə olmaz axı... İnsanlarımız boş qutu ola-ola,
zibil torbalarını yerə atırlar. "Ay xanım, zibil qutuya atın!” deyəndə, " bəs
siz nəyə lazımsız, götür də” deyib gedirlər. Bu zibilləri də toplayan insanlar
var axı...”
Tullantılar maşınlara yığıldıqdan sonra "Təmiz Şəhər”
ASC-nin Balaxanıda yerləşən tullantıların çeşidlənməsi zavoduna yollanırlar.
Biz də qəsəbəni gəzib, zibil yeşiklərini müşahidə edirik. Yazıdan da məlum olur
ki, yaşadığımız ərazinin təmiz qalmasını istəyiriksə, onlarla yanaşı biz də
çalışmalıyıq. Tək onlarla iş bitmir... Atalarımızın da dediyi kimi, tək əldən səs
çıxmaz. Zibilləri təkcə, Qalada yox, yaşadığımız hər yerdə çeşidlənmiş formada
atsaq, həm ərazi təmiz olar, həm də təmizlik üçün gecəsini gündüzünə qatan
işçilərin işləri yüngülləşər.
Sonda məlumat üçün bildirək ki, "Təmiz Qala” layihəsi
çərçivəsində Qala ərazisində tullantıların toplanması üçün 150 tullantı
meydançası quraşdırılıb, 630 ədəd konteyner yerləşdirilib, müntəzəm yığım və
daşınma işi təşkil olunub. Qəsəbə ərazisində əhalinin və turistlərin sıx
toplaşdığı yerlərdə ümumilikdə 45 ədəd zibil qutusu, iri istehsal müəssisələri ərazisində
isə 200-dən çox konteyner yerləşdirilib.
Aygün ƏZİZ