TÜRKSOY “İmadəddin Nəsimi ili - 2019”un açılışını keçirəcək
Beynəlxalq Türk Mədəniyyəti Təşkilatı (TÜRKSOY) "İmadəddin Nəsimi ili - 2019”un keçirəcək. Böyük şairin
650 illik yubileyi münasibətilə keçiriləcək tədbir Türkiyə Cümhuriyyətinin
Mədəniyyət Nazirliyi, Azərbaycanın Mədəniyyət Nazirliyi və TÜRKSOY-un
təşkilatçılığı ilə baş tutacaq. Martın 6-da təşkilatın Ankaradakı ofisində baş
tutacaq tədbirdə mədəniyyət naziri Əbülfəs Qarayevin rəhbərliyi ilə nümayəndə
heyəti iştirak edəcək. AMEA-nın vitse-prezidenti, akademik İsa Həbibbəyli, akademik Nizami
Cəfərov, professor Kərim Tahirov və b. alimlər Nəsiminin Azərbaycan
ədəbiyyatındakı mövqeyi və yaradıcılığı haqqında məruzələrlə çıxış edəcəklər. Tədbirin bədii hissəsində Azərbaycan Muğam
qrupunun ifası nəzərdə tutulur.Azərbaycan Milli Kitabxanası Nəsiminin əsərlərindən ibarət kitab sərgisini de orada nümayiş etdirəcək.
Nəsimi İlinin açılışına həsr olunan növbəti tədbir İstanbulda
keçiriləcək.
Qeyd edək ki, keçən ilin dekabr ayında Türkiyənin Kastamonu şəhərində
keçirilən TÜRKSOY-un 25 illik yubileyi mərasimi və "Türkdilli ölkələrin
mədəniyyət nazirlərinin toplantısı”nda 2019-cu ildə böyük şairimiz İmadəddin Nəsiminin anadan olmasının 650
illiyi çərçivəsində "Nəsimi ili”nin keçirilməsi təklifi qəbul olunub. TÜRKSOY
bu məqsədlə il boyu Azərbaycan şairinin həyat
və yaradıcılığının tanıdılması və təbliği məqsədilə təşkil olunacaq tədbirlərə
geniş yer ayıracaq.
Prezident İlham Əliyevin 2019-cu
ili "Nəsimi ili” elan etməsi isə TÜRKSOY-un fəaliyyət proqramına ayrı bir
stimul olacaq.