Tovuzda toplantı keçirilib
"Ruh”
Jurnalistlərin Müdafiəsi ictimai birliyinin Azərbaycan Respublikasının
Prezidenti yanında Qeyri-Hökumət Təşkilatlarına Dövlət Dəstəyi Şurasının
maliyyə yardımı ilə reallaşdırdığı "Elektron mediada və sosial şəbəkələrdə insan
hüquq və azadlıqlarının müdafiəsi ilə bağlı ictimai fəallığın artırılması”
layihəsi çərçivəsindəki ilk toplantı Tovuz rayonunda baş tutub.
Toplantını giriş sözü ilə açan Tovuz Rayon
Gənclər Mərkəzinin direktoru Rauf Rüstəmov layihə çərçivəsində müzakirə edilən
mövzunun əhəmiyyətini vurğulayıb. O bildirib ki, "Ruh”
Jurnalistlərin Müdafiəsi ictimai birliyinin, eləcə də digər qeyri-hökumət
təşkilatlarının keçirdikləri tədbirlər cəmiyyətin müxtəlif təbəqələri arasında
sosial şəbəkələrdən düzgün istifadə vərdişlərinin yaranmasına əhəmiyyətli
dəstəkdir.
"Ruh”
Jurnalistlərin Müdafiəsi ictimai birliyinin sədri Əvəz Rüstəmov "Elektron mediada və sosial şəbəkələrdə
insan hüquq və azadlıqlarının müdafiəsi ilə bağlı ictimai fəallığın
artırılması” layihəsinin məqsəd və vəzifələrindən söz açıb. O bildirib ki,
elektron media və sosial şəbəkələr günümüzün ayrılmaz tərkib hissəsinə
çevrilib. "Əlbəttə, bu, yaxşı haldır. Çünki vətəndaş jurnalistikası inkişaf
edir. Bu isə bütövlükdə cəmiyyətdə yaranan problemlərin aradan qaldırılması
baxımından vacibdir. Eyni zamanda hər bir şəxs söz və ifadə azadlığından
bəhrələnir. Ancaq bəzən mövcud müstəvidə kimlərinsə özünü təsdiqləmək istəyi
bir başqalarının hüquqlarının pozulması ilə nəticələnir. Bundan itirən isə hər
birimizik. Layihəmiz bir növ həmin itkilərdən sığortalanmaq, onların qarşısını
almaq məramından qaynaqlanır”, - deyən Ə.Rüstəmov əlavə edib ki, layihə çərçivəsində Tovuzla yanaşı Masallı, Balakən və Şabran
rayonlarında maarifləndirici xarakterli "dəyirmi masa”ların təşkili nəzərdə
tutulur.
"Elektron mediada və sosial şəbəkələrdə
insan hüquq və azadlıqlarının müdafiəsi ilə bağlı ictimai fəallığın
artırılması” layihəsinin eksperti, "Jurnalist Araşdırmaları Mərkəzi” İctimai
Birliyinin sədri Seymur Verdizadə elektron media və sosial şəbəkələrlə bağlı
yerli və beynəlxalq qanunvericilikdə rast gəlinən müddəalar, Azərbaycanda
elektron medianın və sosial şəbəkələrin vəziyyəti, bu məkanda müzakirə edilən
mövzuların spesifikası, informasiya təhlükəsizliyi və şəxsi həyatın
toxunulmazlığı baxımından mənfi meyllər barədə ətraflı məlumat verib,
iştirakçıların suallarını cavablandırıb.