Tillersonun uğursuz Türkiyə səfəri
ABŞ dövlət katibi Reks Tillersonun Türkiyə səfəri,
müzakirə olunan məsələlər dünya mediasının gündəmindədir. Onun türkiyəli
həmkarı Mövlud Çavuşoğlu ilə keçirdiyi görüşdə və birgə mətbuat konfransında
İŞİD və Fətullah Gülənin ekstradisiyası gündəmdə olub.
R.Tillerson ABŞ tərəfini daha çox maraqlandıran
əsas müzakirə mövzularını açıqlayıb. O bildirib ki, bu məsələlər İŞİD terror
təşkilatını məğlub etmək, bölgədə sabitlik və əməkdaşlıq, Türkiyə ilə hərbi
əməkdaşlığın davam etməsi, ortaya çıxa biləcək yeni terror təhdidlərini
önləməkdən ibarətdir: "Türkiyə Suriyaya xaricdən döyüşçülərin axınının
qarşısını aldı, Türkiyənin İŞİD-lə mübarizə üzrə koalisiyaya faydasını bir
kənara qoya bilmərik. Türkiyənin bu bölgədəki bütün fəaliyyətləri bizim üçün
çox önəmli oldu. Türkiyə qaçqınların problemlərini həll etmək üçün səy
göstərdi. Türkiyənin 6 illik dövrdə sülhsevər fəaliyyətini təqdir edirik”.
R.Tillerson ABŞ-la Türkiyə arasında iqtisadi
əməkdaşlığı genişləndirmək istədiklərini vurğulayıb: "ABŞ və Türkiyənin bir çox
ortaq hədəfləri var. Bu sırada İranın zərərli fəaliyyətinin qarşısını almaq,
iraqlıların demokratiyaya keçidinə kömək etmək də var. Bu çətinliklərin
qarşısını birlikdə almağa çalışırıq”.
Mətbuat konfransında R. Tillersona ABŞ-ın PKK
terror təşkilatınınSuriya qolu olan PYD/YPG ilə əməkdaşlığının Türkiyə
ilə münasibətlərə təsirinə dair sual ünvanlanıb. ABŞ dövlət katibi suala
konkret cavab verməkdən yayınıb: "Bu gün Türkiyədə keçirdiyimiz görüşlərdə bu
məsələ müzakirə mövzusu idi. "Suriyada uzunmüddətli nəticəyə necə nail ola
bilərik”, "suriyalıların ölkələrinə qayıdışı necə olacaq”, kimi məsələlər
müzakirə olundu. Bunlar çətin qərarlar, çətin seçimlərdir, amma müzakirəsi
faydalıdır. ABŞ terrorla mübarizə koalisiyasının ortağı olmağa davam edəcək.
Birlikdə çox addımlar atacağıq”.
Dövlət katibi Türkiyəyə səfəri çərçivəsində
prezident Rəcəb Tayyib Ərdoğanla da görüşüb. Prezident iqamətgahında keçirilən
qapalı görüş 2 saatdan çox davam edib. "Hürriyət” görüşdə Suriya və İraqda
terror təşkilatları ilə mübarizənin davam etdirilməsinin vacibliyinin, müştərək
tədbirlər görülməsinin mümkünlüyünün vurğulandığı barədə məlumat yayıb. Bu
terror təşkilatları arasında ilk hədəf İŞİD-dir. Ərdoğan terrorla mübarizədə
tərəf-müqabilinin düzgün seçilməsinin önəmindən danışıb. Görüşdə FETÖ terror
təşkilatı rəhbərinin Türkiyəyə ekstradisiyası ilə bağlı prosedurlar, onun
ABŞ-da fəaliyyətinin qarşısının alınmasına dair məsələlər müzakirə olunub.
Baş nazirin müavini Numan Kurtulmuş isə Tillersonla görüşü zamanı
Fətullah Gülənin qaytarılması mövzusunda fikir mübadiləsi apardıqlarını söyləyib.
N. Kurtulmuş F.Gülənin Kanada və Cənubi Afrikaya gedəcəyi ilə bağlı kəşfiyyat
məlumatı əldə etdiklərini nəzərə çatdırıb.
Onu da qeyd edək ki, R.Tillersondan sonra katibliyin müşaviri Tomas
Şannon da Türkiyəyə gələcək. Bu barədə Türkiyə Xarici İşlər Nazirliyi məlumat
yayıb. Nazirlik müşavirin aprelin 3-4-ü Ankaraya gələcəyini bildirib. Amerikalı
diplomatın səfəri zamanı iki ölkə arasındakı münasibətlər və beynəlxalq
vəziyyət müzakirə olunacaq.
Yeri gəlmişkən, Qərb mətbuatı ABŞ dövlət katibinin səfərinə
böyük önəm verib. "Reks Tillersonun Ankara ziyarəti Türkiyə ilə ABŞ arasındakı
gərginliyi azaltmaqda uğursuz olub”. Bu iddianı İngiltərənin"Financial
Times” (FT) qəzeti irəli sürüb. Tillersononun bu səfəri ABŞ prezidenti Donald
Trampın işə başlamasından bu yana Vaşinqtondan Ankaraya edilən ən yüksək səviyyəli
ziyarət kimi qiymətləndirilir. Səfərin nəticələrini şərh edən "FT”-in yazdığına
görə, Donald Trampın prezident seçilməsindən sonra ABŞ-la əlaqələrin yenidən
nizamlanacağını düşünənAnkaradakı diplomatik qaynaqlar Tillersonun bu
səfərinin xəyal qırıqlığı yaratdığını etiraf ediblər. İrəli sürülən bu iddianı
tərəflərin görüşlərdən sonra keçirdikləri mətbuata konfransında dilə gətirilən
fikirlər də təsdiqləyir. Qeyd edilir ki, fərqli mövqelər əsasən Tillerson və
Çavuşoğlunun mətbuat konfransında özünü büruzə verib. "Tillerson mətbuat
konfransındakı çıxışında nə PYD və YPG-dən danışıb, nə də bununla əlaqədar
suallara cavab verib. Suriya prezidenti Bəşər Əsədin gələcəyi ilə əlaqədar
suala cavabı isə Ankara və Suriyanın "mülayim müxalifləri” üçün əsl sürpriz
olub: "Əsədin gedib-getməyəcəyini Suriya xalqı qərar verəcək”, - deyə o
bildirib. "Sözsüz ki, bu etiraf ABŞ üçün Bəşər Əsədin hakimiyyətdən
uzaqlaşdırılması məsələsinin artıq bağlanmış səhifə olduğundan xəbər verir”, -
deyə qəzet yazıb.
Qəzet onu da yazır ki, Tillersonun mətbuat
konfransında Rakka əməliyyatında Türkiyənin əməkdaşlıq təklifiylə əlaqədar
ABŞ-ın son qərarı hələ vermədiyini açıqlaması da Ankaranın ürəyincə olmayıb. "Üstəlik,
Tillerson bir suala cavab verərkən, Raqqa əməliyyatında YPG-ni dəstəkləməyin
qaçılmaz olduğunu vurğulayıb. Ankarada xəyal qırıqlığı yaradan bu ziyarətin
ardınca Suriyadan gələn xəbərlər ABŞ-ın bu mövqeyinin kürd separatçılarını
xeyli həvəsləndirdiyini gözlər önünə sərir”, - deyə qəzet yazır.
Azər