Tikinti üçün icazə verən qurumun dəyişdirilməsi nəyi dəyişəcək?
Nazirlər
Kabinetinin "Müfəssəl plan olmadığı və ya onun müddəti bitdiyi hallarda
tikintiyə icazə verilməsi və ya məlumatlandırma icraatı məqsədləri üçün tikinti
layihələrinin onların həyata keçiriləcəkləri ərazinin planlaşdırılması
sənədlərinə (baş planlara və (və ya) ümumi planlara), habelə müfəssəl planın
hazırlanması zamanı nəzərə alınan tələblərə uyğunluğunun müəyyənləşdirilməsi
Qaydaları”nda dəyişiklik edilib. "Report” xəbər verir ki, bu barədə qərarı
Baş nazirNovruz Məmmədov imzalayıb.
Dəyişikliyə
görə, sifarişçi tikintiyə icazə almaq üçün müvafiq icra hakimiyyəti orqanına və
ya müvafiq icra hakimiyyəti orqanının yaratdığı quruma ərizə ilə müraciət
etdiyi zaman torpaq sahəsi üzərində mülkiyyət, icarə və ya istifadə hüququnu
təsdiq edən sənədin surəti ilə yanaşı, tikinti layihəsini də təqdim etməli
olacaq. Həmçinin şəhərsalma əsaslandırılması bu Qaydaların 2-ci hissəsinin
tələblərinə uyğun işlənilərək yerli icra hakimiyyəti orqanının, Bakı şəhərinin
və digər şəhərlərin inzibati ərazisində isə Azərbaycan RespublikasıDövlət
Şəhərsalma və Arxitektura Komitəsinin qərarı ilə təsdiq ediləcək. Digər dəyişikliyə
görə, şəhərsalma əsaslandırılması dörd nüsxədə işlənilməlidir. Bir nüsxə
layihəçidə qalacaq, bir nüsxə sifarişçiyə veriləcək, digər nüsxələri isə
tikintiyə icazə verən orqanda (qurumda) və Azərbaycan Respublikasının Dövlət
Şəhərsalma və Arxitektura Komitəsində saxlanılacaq.
Bəs
görəsən qanunvericiliyə edilən bu dəyişikliyin hansı əhəmiyyəti var? Bu sahədə
olan problemlərin həllinə yardımçı olacaqmı?
Əmlak üzrə ekspert Rəşad Əliyevdeyir ki, dəyişikliyin nə dərəcədə effektiv olacağını indidən söyləmək olmaz:
"Qanuna edilən dəyişikliyə əsasən,
tikintiyə icazə verən orqan dəyişdirilib. Ümumi yanaşmada bu, ciddi dəyişiklik
demək deyil. Amma bütün hallarda, düşünürəm ki, dəyişikliyin nəticəsi kimi, bundan
sonra sözügedən sahədə daha peşəkar yanaşma müşahidə ediləcək. Səlahiyyətlər
adı çəkilən quruma verildikdən sonra prosedurlarda müəyyən dəyişikliklər edilə
bilər. Amma hələlik bununla bağlı konkret fikir bildirmək bir qədər tezdir.
Gələcəkdə yeni təkliflərin irəli sürüləcəyi də istisna deyil”.
"MBA Group”
konsaltinq şirkətinin baş direktoru, Azərbaycan Qiymətləndiricilər Cəmiyyətinin
İdarə Heyətinin sədri Nüsrət İbrahimov söylədi ki, əvvəllər bu
icazə sənədini almaq üçün bir neçə quruma müraciət edilirdisə, indi Şəhərsalma
və Arxitektura Komitəsi bu məsələyə məsul qurum kimi təyin edilib: "Bu
proseslərin bir əldən tənzimlənməsi şəhərsalma məsələsində norma və standartların
gözlənilməsi baxımından çox vacibdir. Bu mənada hesab edirəm ki, belə bir
addımın atılması bu sahədə olan bəzi problemlərin aradan qaldırılmasında
effektiv rol oynayacaq”.
Azərbaycan Dövlət
Rəssamlıq Akademiyasının dosenti, əməkdar memar Feyzulla Quliyevqeyd etdi ki, sözügedən
qurumda kadr islahatları aparılıb: "Bundan sonra bütün layihələrə orada
baxılacaq və icazə verildikdən sonra
tikinti işləri aparılacaq. Əvvəllər də tikinti layihələrinə bu qurumda baxılır
və nəzarət edilirdi. Şəhərsalma ilə bağlı müəyyən çatışmazlıqların olduğu göz
qabağındadır. Təkcə Bakıda deyil, Azərbaycanın əksər şəhərlərində problemlərin
olduğu aşkardır. Bununla bağlı bir neçə ildir ki, dövlət səviyyəsində işlər
görülür. Milli Məclis tərəfindən şəhərsalma və tikinti məcəlləsi qəbul olundu.
Məcəlləyə əsasən 3 şəhərsalma sənədi var. Ümumi plan respublikanın regionları
üzrə planlamanı əhatə edir. Daha sonra şəhərlərin və qəsəbələrin baş və
müfəssəl planı var. Bu, dünya təcrübəsində də var. Müfəssəl plana əsasən
şəhərsalma və kadastr layihələndirmədə isə bütün funksional zonalar dəqiq
şəkildə qeyd olunub. Amma son dövrlərdə isə bəzi tələblər yerinə yetirilmir. Şəhərsalma və Arxitektura Komitəsi
pilot layihə hazırladı. Amma bu layihə də effektiv olmadı. Bütün bunlar xaotik
bir şəkildə idi. Düşünürəm ki, neqativ halların qarşısının alınmasında
dəyişikliyin böyük rolu olacaq. Bununla bağlı geniş müzakirələr aparılır.
Dəyişikliyin edilməsində əsas məqsəd nəzarətin gücləndirilməsidir”.
Şəbnəm Mehdizadə