Təslimçilik hissindən məhrum olan çempion - Portret
İslam Həmrəyliyi Oyunları Azərbaycan idmançılarının gücünü bir daha
bütün dünyaya sübut etdi. Bakıda təşkil edilən yarışda taekvondoçularımızın
uğurlu çıxışı xüsusilə diqqət çəkdi. Belə ki, 16 çəki dərəcəsindən 12-də təmsil
olunan taekvondo yığmamız ümumilikdə, 6 qızıl, 2 gümüş və 1 bürünc medal
qazanaraq, yarışı komanda hesabında 1-ci sırada başa vurdu. Taekvondo millimizin uğuruna "qızıl”la töhfə verən idmançılarımızdan
biri də Ramin Əzizov oldu. 29 yaşlı idmançı uzunmüddətli zədədən sonra
qatıldığı ilk mötəbər yarışda 1-ci olaraq, gələcək yarışlar üçün ümid verdi.
5 yaşlı uşağın seçimi
Ramin Əzizov 1988-ci il fevralın 8-də Lənkəranda dünyaya gəlib. Orta
təhsilini məhz cənub şəhərində alıb. O, cəmi 5 yaşında taekvondonun sirlərinə
yiyələnməyə başlayıb. Evləri stadionun, idman məktəbinin yaxınlığında
olduğundan, Raminin uşaqlığı məhz burda keçib. O, hələ idmana yazılmamışdan
əvvəl də atası ilə birgə idman klubuna gedir, onunla birgə məşq edirdi.
Beləliklə, balaca Ramində də idmana həvəs yaranır.
Qarabağ müharibəsinin könüllü iştirakçısı olmuş atası müxtəlif
əlbəyaxa döyüş idman növləri ilə məşğul olduğundan, oğlunun da idmançı olmasını
istəyirdi. Lakin onu hansı idman növünə yazdıracağı ilə bağlı qərar verməmişdi.
O, oğlunu Lənkərandakı yerli idman məktəbinə aparır və ona istədiyi idman
növünü seçməklə bağlı azadlıq verir. 5 yaşlı gələcək çempionun seçimi isə
taekvondo olur. İlk məşqçisi Vüqar Sultanov olan Ramin, hələ də onunla çalışır.
Sultanov hazırda onun şəxsi məşqçisidir. Ramin məşqçisi əsgərlikdə olan zaman -
7-8 yaşlarında kunq-fu, karate kimi başqa idman növlərilə də məşğul olub. O, bu
idman növlərində nəticə qazanmağa nail olsa da, məşqçisi hərbi xidmətdən qayıtdıqdan
sonra yenidən doğma taekvondoya qayıdır.
İlk uğurlar
Qarabağ müharibəsində yaralanan ata Əzizov, oğlunu əsl vətənpərvər
ruhda böyüdüb. O, hətta oğlunun hərbçi olmasını da istəyirdi. Ramin Naxçıvanski
adına hərbi məktəbə təhsil də alıb. Bir neçə il burda təhsil alan Əzizov,
sonradan idmançı karyerasını davam etdirmək üçün təhsildən ayrılmalı olur.
Hələ kiçik yaşlarından qatıldığı yarışların əsas favoritlərindən olan
Ramin, 2004-cü ildə gənclər arasında respublika çempionatında üçüncü olur.
Növbəti ildə isə medalın əyarı "bürünc”dən "qızıl”a çevrilir. 2005-ci il həm də
Ramin üçün beynəlxalq arenada ilk ciddi uğurla əlamətdar olur. O, Bakıda təşkil
edilən gənclər arasında Avropa çempionatını "bürünc”lə başa vurur.
Bu, Raminin gənclərin turnirində son çıxışı olur. Növbəti ildən isə
o, kişilərin yarışlarında çıxış etməyə başlayır. 2006-cı ildə kişilərin
yarışında qüvvəsini sınayan gənc taekvondoçu, debüt ilində üçüncü olur. Lakin
o, sonrakı illərdə bu "bürünc”ü "qızıl”a dəyişməyi bacarır. Özü də, bir yox,
bir neçə dəfə.
Beynəlxalq uğurlar
Raminin uğurları təkcə ölkə sərhədləri ilə məhdudlaşmır. Onun
beynəlxalq arenada da yetərincə uğurları var. O, kişilər arasında ilk ciddi
uğurunu 2011-ci ildə qazanıb. London olimpiadasına təsnifat turnirini çempion
kimi başa vuran Əzizov, elə həmin ildə Cənubi Koreyanın Qyeonqju şəhərində
keçirilən dünya çempionatında üçüncü olur. Bu, taekvondoçularımızın Uzaq
Şərqdəki dünya çempionatında yeganə medalı olur.
2012-ci ildə London olimpiadasının iştirakçısı olan Əzizov, burda 1/4
finala qədər irəliləsə də, italiyalı rəqibinə uduzaraq, medalsız qalır. Ramin
2012-ci ildə İngiltərənin Mançester şəhərində keçirilən Avropa çempionatını
2-ci, 2 il sonra paytaxtımızda keçirilən analoji yarışı isə fəxri kürsünün 3-cü
pilləsində başa vurur.
"Bütün sümüklərim sınsa da,
döyüşəcəyəm”
Beynəlxalq miqyasda uğurlarını davam etdirən Əzizova Bakıda
keçiriləcək ilk Avropa Oyunlarında ümid çox idi. Lakin Ramin 2015-ci ilin
əvvəllərində yarışa hazırlıq zamanı hər bir idmançının kabusu olan zədə ilə
üzləşir. Yanvarda məşq zamanı ayağı qırılan Əzizov, tatamidən çox kənarda
qalmır. O, Avropa Oyunlarını buraxmalı olsa da, tezliklə məşqlərə başlayır.
Lakin zədə onu yenə haqlayır. Belə ki, Ramin elə həmin ilin avqustunda məşq
zamanı yenidən ağır zədə alır. Onun yenicə sağalan sağ ayağı yenə eyni yerdən
qırılır. Bu dəfə isə o, uzun müddət tatamidən kənarda qalır.
Əzizov indi də zədəsi barədə danışarkən "həmin günləri xatırlamaq
belə istəmirəm” deyir. Bir çox idmançı bu cür zədədən sonra karyerasını başa
vurardı. Lakin əzmkar Ramin bu sınaqdan üzüağ çıxmağı bacarır. O, karyerasını
davam etdirmək qərarına gəlir. Baxmayaraq ki, dost-tanışın çoxu "daha bəsdir”
deyirdi. Ramin isə tam başqa fikirdə idi. O, həmin günləri xatırlayarkən,
"təklikdə qalıb düşünəndə, belə qərara gəldim ki, bütün sümüklərim sınsa da,
döyüşəcəyəm qərarını verdim” deyir. Bu zədə Ramini 2 ilə yaxın tatamidən
kənarda qoysa da, ona böyük əzmkarlıq dərsi də aşılayır.
İslam Oyunlarının qalibi
2016-cı ilin ortalarından məşqlərə başlayan Ramin, Rio olimpiadasını
buraxmalı olur. Əzizov zədədən sonra ilk sınağına bu ilin əvvəllərində
Türkiyədə çıxır. O, qardaş ölkədə baş tutan iki beynəlxalq turnirdən bir
"bürünc” və bir "gümüş”lə ayrılır. Daha sonra isə Hollandiyada keçirilən
beynəlxalq turniri çempion kimi başa vurur. Məhz bu turnirdən sonra onda, artıq
tam hazır olduğuna dair şübhə qalmır. Qarşıda isə zədədən sonra ilk ciddi sınaq
- İslam Həmrəyliyi Oyunları var idi:"İslam Oyunlarından öncə içimdə bütün qarşılaşmalardan böyük hesablı
qələbə ilə ayrılacağım barədə bir hiss var idi. Bəlkə də bu, hazırlığımla bağlı
idi”.
Yarış elə Raminin gözlədiyi kimi də keçir. O, rəqiblərini bir-bir
sıradan çıxararaq, qızıl medal qazanır.
Dənizi, balıq ovunu,
mütaliəni sevən çempion
Gərgin yarışlar, sıx məşq qrafiki, uğur qazanmaq və formada qalmaq
üçün fərdi məşqlər... İdmançı həyatı çox gərgin olur. Bu cür gərgin qrafikdə
çalışan idmançılar çox nadir hallarda kitab oxumağa vaxt tapırlar. Lakin gərgin
məşqlərə, sıx qrafikə rəğmən, Ramin mütaliədən imtina etmir. Özünün sözlərinə
görə, hətta orta məktəbdə oxuduğu dövrdə də məşqlər onun dərslərinə mane
olmayıb. O, ən çox fəlsəfi janrda və tarixi şəxsiyyətlərin bioqrafiya
kitablarını oxumağı sevir. Ronda Bern, Deyl Karnegi və s. kimi yazıçıların
kitablarını oxuyub.
Sahillərini Xəzər dənizinin yuduğu Lənkəranda doğulan Ramin, "dənizi
sevirəm” deyir. Bundan əlavə, o, balıq ovunu da xoşlayır. Ən çox isə sualtı
balıq ovunu sevir.
Digər idman növlərindən isə daha çox qaydasız döyüş izləməyi
xoşlayır.
Lənkərandan söz düşmüşkən, yerli əhali Raminə həmişə dəstək olub.
Onun hər uğuruna sevinib, uğursuzluğuna isə kədərləniblər. Son İslam Həmrəyliyi
Oyunlarından sonra isə Ramin doğma şəhərində əsl qəhrəman kimi qarşılanıb.
Təhsil
Ramin orta məktəbə idmanla məşğul olmağa başlayandan 2 il sonra
gedib. Lakin gərgin məşqlər onun təhsilinə mane olmayıb. Deyir ki, məktəbdə müəllimi həmişə "güclü idmançı olmaq
üçün, ilk növbədə yaxşı oxumalısan” fikrini ona aşılayıb. Məşqçisi Vüqar Sultanov da onun dərslərinə
diqqət ayırmasına daim nəzarət edib. Hətta o, məşqlərdən əvvəl yetirməsinin
gündəliyini də yoxlayırmış.
Həm müəlliminin, həm valideynlərinin, həm də məşqçisinin güclü
nəzarəti Ramini sinfin ən yaxşı oxuyan şagirdlərindən edib. Hansısa dərsdən
"axsayanda” isə onun dadına anası çatırdı. Ramin anası barədə danışarkən, "o
mənim evdəki müəllimim idi” deyir. Ailəsi onun dərslərində geri qalmamağına
ciddi önəm verirdilər. Dərslərdə geriləmə müşahidə olunan kimi isə ənənəvi -
"həyətə düşməmə” cəzası qüvvəyə minirdi.
Gərgin nəzarət öz bəhrəsini verir. Belə ki, Ramin heç bir əlavə
hazırlıq olmadan Azərbaycan Dövlət Pedaqoji Universitetinə qəbul olur.
Hədəf - çempionluq!
Ramin gələcək barədə çox düşünməyi, uzunmüddətli planlar qurmağı
sevmir. Hazırda isə o, əsas diqqətini bir neçə gün sonra Cənubi Koreyada baş tutacaq dünya çempionatına
yönəldib. Hədəf isə "qızıl”dı. "Hazırda karyeram ərzində ən yüksək formadayam”
- Raminin bu sözləri isə onun iddiasından xəbər verir.
Portreti
Səmimi, söhbətcil, yüksək intellektə malik Raminin əsas xüsusiyyəti
əzmkarlığı, heç vaxt təslim olmamağıdır. O, özü barədə danışarkən, "ömür boyu
məndə təslim olmaq hissi olmayıb” deyir. Əzizov bunu ardıcıl iki ağır zədədən
xilas olaraq, tatami üzərinə qayıtması və çempion olması ilə sübut etdi.
Qarşıda isə onu daha böyük uğurlar gözləyir. "Zədədən öncəkindən də yaxşı
formadayam” deyən Ramin, bu əzmkarlığını, inamını davam etdirəcəyi təqdirdə,
hələ uzun müddət beynəlxalq yarışlardakı medal ümidimiz olacaq.
Elnur