Uğur anlayışı onun üçün fərqlidir. Deyir ki, "mən
uğurluyam” deyə bilmək ən böyük uğursuzluqdur. İnsanın daim özü ilə yarışda
olmasının tərəfdarıdır. O, hər gün dünəninə baxır, bu günlə müqayisə edir və gələcəyə
doğru addımlayır. Düşünür ki, özünü digər uğurlu şəxslərlə deyil, elə özünlə
müqayisə edib, inkişaf etməlisən.
Müsahibimiz İmeks
şirkətinin beynəlxalq münasibətlər üzrə meneceri Günay Həsənovadır. Günay
Bakı Dövlət Universitetində bakalavr, ADA, Estoniyanın Tartu Universitetində
magistr təhsili alıb və Kaliforniyada təqaüdü qazanıb. Uzun müddət Milli Məclisdə
köməkçi, tərcüməçi işləyib, Avropa İttifaqının Azərbaycan nümayəndəliyində və
UNİCEF-də layihə iştirakçısı olub. Rus, ingilis, ispan dillərini bilir.
- Bakalavr, magistr,
xaricdə təhsil, təqaüdlər... Sizcə, uğurlu karyerada ilk addım təhsildirmi?
Dünya təcrübəsində təhsili olmayan uğurlu şəxslər də mövcuddur...
- Yalnız karyerada deyil, gündəlik həyatda yaşamaq
üçün təhsil əhəmiyyətlidir. Düzdür, həyatda uğurlu, təhsil olmayan insanlar
var. Amma bir çox hallarda uğurlu hesab etdiyimiz insanlar sadəcə, daha çox pul
qazanırlar. Mənə görə, karyera quran insanla, çox pul qazanan insanın arasında
fərq var. Uğurlu karyeranın olması üçün təhsil mütləq və mütləq lazımdır. Amma
məqsədin çox pul qazanmaqdırsa, təhsilsiz də ola bilərsən. Təhsilsiz uğur
qazanan insanların biznes beyinləri kariyerist insanlardan fərqli inkişaf edir.
Amma heç vaxt təhsilsiz bir insan yaxşı həkim, cərrah ola bilməz. Məsələn,
Virgin Atlantic brendinin yaradıcısı Richard Branson dünyada ən uğurlu
biznesmendir. Amma məktəbi 15 yaşında tərk edib. Təhsilin karyerada əhəmiyyəti
bəzən seçdiyin sahədən də asılıdır.
- "İnsan gərək həmişə
plan üzrə hərəkət etsin” bu fikirlə razısınızmı? Ümumiyyətlə, plan qurursunuz
yoxsa, hər şeyi axarına buraxırsınız?
- Mükəmməlliyyətçi insanam. Buna görə də mənim üçün
plan qurmaq çox önəmlidir. Nəinki karyeramı, hər günümü belə planlamağa
çalışıram. Əlbəttə, həyatda hər şey bizim planlarımıza uyğun olmur. Bunu da
normal qəbul edirəm. Amma düşünürəm ki, özlərini həyatın axarına buraxanlar məqsədsiz
insanlardır. Əgər həyatda hansısa məqsədlərimiz
varsa, normal olaraq, o məqsədə addımlamaq üçün planlamaq lazımdır. Mən bu
vaxta qədər hər şeyi planlayıb, inandığım insanlardan məsləhət almışam. Məsləhət
almaq mənim üçün kiminsə fikirləri ilə hərəkət etmək, öz istəklərimdən əl çəkmək
deyil, məndən təcrübəli olan insanların təcrübəsindən yararlanmaq deməkdir.
Düşünürəm ki, planlamaq bizi məqsədimizə daha çox yaxınlaşdırır və qarşıya
çıxan əngəllərdən sığortalayır. Həmişə çalışıram ki, qısa müddətli planlar
qurum. Hazırda Şotlandiyada Edinburg Universitetində doktorantura oxumağa
hazırlaşıram.
- Gənclərin bəziləri
öz həmyaşıdlarının uğur qazanmasına təəccüblənir, bunun mümkünsüz olduğunu
düşünürlər. "day-day”ın, pulun varsa, uğurlusan” kimi düşüncələr onları passivləşdirir.
Siz necə düşünürsünüz?
- Hər şey ailədən başlayır. Hamımız eyni ölkədə
yaşayır, bağçadan, məktəbdən məzun oluruq. Ailənin sənə nə dərəcədə dəstək
olması, təhsilin önəmini aşılaması, səni yönləndirməsi çox vacibdir. Mən 4
yaşımdan hərfləri yazmağı bilirdim və 5 yaşımda məktəbə getdim. Ailəmin verdiyi
bacarıqlara görə, həmyaşıdlarımdan bir pillə yuxarıda idim. Əslində insan
yolunu ailənin körpəlikdən verdiyi siqnallarla tapır. Ailə uşağa təhsilin əhəmiyyətini
anlatmaqdan çox, göstərməlidir. Əgər ailə düşünürsə ki, "day-day”sız karyera
qurmaq mümkün deyil, həmin ailədə böyüyən gəncə də bu fikir sərf edəcək və dəstəkləyəcək.
Amma o qədər uğurlu insanlar var ki, çox çətin, kasıblıq içində böyüyüb, öz
gücləri ilə zirvəyə qalxıblar. Düzdür, bəzi gənclər var ki, çox yaxşı kadrdır,
amma karyerası istədiyi kimi getmir. Səbir etmək, çalışmaq, müsbət düşünmək
lazımdır. Təslim olmaq insanı geri aparır. Həyatda həmişə heç nə mütləq düz xətlə
getmir. Bəzən arxa-arxaya uğursuzluq baş verir. Amma bu son demək deyil. Səbrli
olmaq, yıxılanda durmağı bacarmaq lazımdır. Ətrafdakı insanlardan sözün yaxşı mənasında
yararlanmaq lazımdır. "Mən hər şeyi bilirəm”, "mənim fikirlərim düzdür” desək,
inkişaf etməyəcəyik. Yeni biliklərə, məsləhətlərə açıq olmaq, özünə inanmaq və
daim irəli baxmaq lazımdır. İnsanın ən böyük "day-day”ı arzuları və məqsədləridir.
- 5 yaşınızdan məktəbə
getmisiniz. Sizcə, karyeranın yaşı varmı?
- Karyera qurmaq əmək, uzun illər tələb edir.
Oxumağın, insanın özünü inkişaf etdirməsinin yaşı yoxdur. Amma karyera yolu
insanın özünün nə istədiyini anlamasından sonra başlayır. Nə istədiyimizi nə qədər
tez bilsək, o qədər tez uğur qazanarıq.
- Uğursuzluqla
tez-tez qarşılaşdığınızı vurğuladınız. Hər gününü dünəni ilə müqayisə edən biri
bununla necə başa çıxır?
- Həqiqətən,
istər karyerada, istər şəxsi həyatda uğursuzluqla çox qarşılaşmışam. Bu, normal
haldır. Uğursuzluq uğurun ən birinci şərtidir. Mənə elə gəlir ki, insan hansısa
pis hadisəylə rastlaşanda mütləq, arxasınca daha yaxşısı gəlir. Bu zaman mənə
kömək edə biləcək insanlarla məsləhətləşir, onlardan dəstək alıram. Özümü tez ələ
alır, bilirəm ki, dünyanın sonu deyil. Həyatda heç nə daimi olmadığı kimi,
uğursuzluq da daimi deyil. Nə həmişə uğurlu, nə də uğursuz olmaq mümkündür. Belə
hallarda mənə planlama çox kömək olur. Öz-özümə deyirəm ki, bu artıq baş verdi.
Geri qaytara bilməyəcəyim hadisə üçün pis olmamalı, qarşıya baxmalıyam. Düzəlməsi
üçün ilk addımımın nə olması haqqında düşünürəm.
- Günay xanım, Avropa
parlamentində, UNİCEF-də layihələriniz olub. O layihələr haqqında məlumat verərdiniz.
- Avropa parlamentindəki layihəm Avropa parlamenti və Azərbaycan parlamenti arasındakı dostluq
münasibətlərini gücləndirmək məqsədi daşıyırdı və bu, mənim işimlə əlaqəli idi.
UNİCEF-dəki layihəni isə ADA Universitetində oxuyarkən qrup şəklində 3 nəfərlə
birlikdə işlədik. Bizim komanda yoldaşlarımızdan biri ağdamlı idi. Həmişə
qaçqın uşaqların bugünkü vəziyyətini müzakirə edirdik. O qız bizimlə danışanda
Ağdamı görmədiyi üçün ağlamışdı. Həyata onun çərçivəsindən baxmaq istədik. Kənardan
baxanda çox insana asan gəlir. Bir insan üçün nənəsinin, babasının yaşadığı
torpaqlarda olmamaq emosional haldır. Biz müxtəlif rayonlara getdik, qaçqın və
məcburi köçkün həmyaşıdlarımızla danışdıq. Onların nə fikirləşdiyini, hamısının
necə torpaqlarına qayıtmaq istədiyini, vətən sevgisini gördük. Layihəmiz araşdırma
xarakteri daşıyırdı. Biz hansısa məqamlar tapırdıq və gələcəkdə problemin həll
olunmasına çalışırdıq. Tapdığımız nəticələrə əsasən də UNİCEF bizə köməklik
göstərirdi.
- CV-də ictimai
aktivliyiniz qeyd olunub. Ümumiyyətlə, ictimai işlərdə iştirak etmək bir gəncə
nə qazandırır? Adətən universitet tələbələri vaxt azlığından şikayətlənirlər...
- Dərslər, işlər çox olanda ictimai işlərlə məşğul
olmaq insana çətin gəlir. Mənə görə, uğurlu karyera qurmaq istəyən hər bir şəxs
üçün ictimai aktivlik önəmlidir. Həyata keçirdiyiniz layihələr, iştirak
etdiyiniz tədbirlər vasitəsilə yaxşı əlaqələr qurmaq mümkündür. Monoton şəkildə,
saatlarla dərs oxumaqla, uğur qazanmaq mümkün deyil. İctimai aktivlik səni
monotonluqdan uzaqlaşdırır. Mən hər bir tədbirdən sonra özümü yaxşı hiss edir,
işimə daha çox bağlana bilirəm. Hər zaman nə qədər çox işimiz olsa da, hansısa əlavə
hobbiyə, yaxud bizi xoşbəxt edən məşğuliyyətlərə vaxt ayırmalıyıq.
- Ənənəvi sualımız.
Uğur sirriniz nədir?
- Mən hələ özümü uğurlu hesab etmirəm. Məncə, uğur
qazanmaq istəyən insan heç vaxt "mən uğurluyam” deyə bilməz. "Mən uğurluyam”
demək uğursuzluğa gətirib çıxarır. Həmişə qarşıya baxıram. Məqsədlərimin
ardınca gedir və ən əsası özümü başqaları ilə müqayisə etmirəm. Dünənimə baxır,
bu günlə müqayisə edir, gələcəyə doğru addımlayıram. Başqalarının əldə etdiklərini
görüb, özünü uğursuz hesab etmək səni ancaq demotivasiya edə bilər. Mənə görə,
uğurun növbəti ən böyük şərti ünsiyyətcil olmaqdır. Öz fikirlərini ifadə edə
bilməsən, kiminsə səni görməsi, bacarıqlarını bilməsi qeyri- mümkündür.
İnsanların sənin ünsiyyətindən aldığı emosiyalar sənin haqqında fikir
formalaşdırır. İnsana özünü təqdim etməsi çox vacibdir və bunu ancaq ünsiyyət
yolu ilə etmək mümkündür. Məncə, ünsiyyətcil insanlar həyatda bir addım öndə
olurlar. Aygün ƏZİZ
Bakı 25°C
