Terroru dəstəkləyənlər ən sərt şəkildə cəzalandırılmalıdır
Rusiya vətəndaşı Yunis Səfərov bu il
iyulun 3-də Gəncə şəhər İcra Hakimiyyətinin başçısı Elmar Vəliyev və Gəncə
şəhər Baş Polis İdarəsinin əməkdaşı, polis serjantı Qasım Aşbazova odlu
silahdan atəş açaraq müxtəlif dərəcəli bədən xəsarətləri yetirib. Hadisəni
törədən şəxs Gəncə polisi tərəfindən saxlanılıb, barəsində cinayət işi
qaldırılıb.
Hüquq-mühafizə orqanlarının
həyata keçirdiyi istintaq hərəkətləri və əməliyyat-axtarış tədbirləri nəticəsində
aydın olub ki, Y.Səfərovun bu cinayəti məqsədyönlü şəkildə həyata keçirilən,
əvvəlcədən planlaşdırılmış terror aktıdır. Onun 2016-cı ildə İrana gedərək 8 ay
Qum şəhərində yaşadığı, bu müddət ərzində Azərbaycan vətəndaşı Rasim Əsədovla birgə
Suriya ərazisində
olan silahlı birləşmələrin tərkibində döyüş təlimi keçdiyi də müəyyən edilib.
Normal halda xalqına,
dövlətinə, dövlətçiliyinə, millətinə bağlı olan hər bir kəs Y.Səfərovun bu
əməlini ən sərt şəkildə qınamalıdır. Sevindirici haldır ki, ölkə ictimaiyyətinin
mütləq əksəriyyəti məhz bu cür münasibət sərgiləyir. Lakin radikal müxalifət
tərəfdarları və xaricdə olan antimilli ünsürlər Gəncədə baş verən cinayət
hadisəsi ilə bağlı təqsirləndirilən Y.Səfərovu ilk gündən "qəhrəman” obrazında
cəmiyyətə təqdim etməyə, onun cinayət əməlinə haqq qazandırmağa
çalışırlar. Xarici qüvvələrin əlində maşa olan bu şəxslər hətta iddia edirdilər
ki, Y.Səfərov saxlanılandan sonra işgəncə verilərək öldürülüb. Amma terroru
törədən şəxs sonradan kamera qarşısında öz əməlini etiraf edərək, hüquq-mühafizə
orqanı əməkdaşları tərəfindən hər hansı fiziki işgəncəyə məruz qalmadığını,
vəkillə təmin olunduğunu bəyan edib.
Sapı özümüzdən olan
baltalar yalanlarının üzə çıxdığını görüncə başqa təbliğat vasitəsinə əl
atıblar. Onlar sosial şəbəkə vasitəsilə paylaşımlar edərək, Gəncə sakinlərini
iğtişaşa, qanunsuzluğa, terror törədən bir şəxsi müdafiə etməyə səsləyiblər. Bununla
da özlərini qərbpərəst, demokratiya carçısı, hüququn aliliyinin tərəfdarı hesab
edən radikallar və onların ətrafında olanlar, həmçinin xaricdən maliyyələşən
antimilli ünsürlər söylədikləri ilə daban-dabana zidd mövqe ortaya qoyublar.
Qeyd edək ki, Y.Səfərovun
terror aktını törətməkdə əsas məqsədi Azərbaycanda şəriət qanunları ilə idarə
olunan islam dövləti qurmaq, bunun üçün bir neçə tanınmış dövlət məmurunu
öldürməklə respublikada ajiotaj, xaos, vahimə yaratmaq, nəticə etibarilə
hakimiyyətin zorla ələ keçirilməsini təşkil etmək olub. Sosial şəbəkədə qaragüruhçuluq
edən, dövlətə və xalqa qarşı çağırışlar edən "demokratlar”, söz pəhləvanları da
Y.Səfərova dəstəkçi olmaqla əsl mahiyyətlərini ortaya qoyublar. Bu amil nəzərə
alınaraq, terrorçunu müdafiə etməklə terrora dəstək verənlər, cinayətkarla eyni
mövqeni bölüşənlər, Azərbaycanın konstitusion quruluşuna qarşı çıxanlar, ölkəmizdə
sabitliyi, əmin-amanlığı pozmaq istəyənlər ən sərt şəkildə cəzalandırılmalıdırlar.
Rufik
İSMAYILOV