“Təhsil həmişə sənayedən, əmək bazarından geridədir” – Gör-götür
Qaçay Mirzəyev:
"Gənclər peşə seçərkən daha dərrakəli seçim etmələrini, 3-5 il qabağa baxaraq
prioritetlər müəyyən etməyi tövsiyə edərdim”
İqtisadiyyatda
yeni texnologiyaların tətbiqi çox önəmlidir. Deyir ki, vaxtında müasir
texnologiyaları tətbiq etməyən şirkətlər bu gün rəqabətdə uduzub müflisləşiblər.
Ən son və müasir texnologiyaları birinci tətbiq edən şirkətlər isə daha böyük
uğur əldə edirlər.
Müsahibimiz "Microsoft
Azerbaijan”şirkətinin baş meneceri Qaçay Mirzəyevdir.
- Bakalavr təhsiliniz iqtisadi kibernetika üzrədir.
Bu gün üçün maraqlı və zamanla tələbin artdığı sahədir. Maraqlıdır, bu seçim öz
istəyinizlə olmuşdu, yoxsa istiqamətləndirmə ilə?
- Nəinki bakalavr, magistr təhsilim də
iqtisadi kibernetika üzrədir. Aspiranturanı isə xalq təsərrüfatının
iqtisadiyyatı istiqamətdə oxumuşam. Sadəcə, informasiya texnologiyalarına
marağım daha çox olduğu üçün iqtisadiyyatın ardınca getmədim, İT sahəsində beynəlxalq
sertifikatlar əldə edərək daha uğurlu oldum.
O vaxt
seçim edərkən məsləhət ala biləcəyim etibarlı bir insan yox idi. Eyni zamanda,
test üsulu yenicə tətbiq edildiyindən TQDK imtahanından əvvəl bir neçə ixtisas
seçirdin, imtahanda topladığın bal hansına çatsa, o ixtisasa da düşürdün.
Fikirləşirəm ki, mənim bəxtim digərlərindən fərqli olaraq burada gətirib. 2-ci
yazdığım ixtisasa düşmüşdüm. Birinci yazdığım iqtisadi nəzəriyyə idi. Amma
görürəm ki, məndən nəzəriyyəçi olmaz, elə bir insanam ki, hər məsələni təcrübədə
yoxlamaq istəyirəm. Məhz iqtisadi kibernetika ixtisası mənə belə bir imkan
yaradıb.
- Siz təhsil aldığınız dönəmlərdə iqtisadi kibernetika
bizdə yeni tədris olunurdu. O vaxt bu sahədə təhsil prosesi necə idi?
- Biz
iqtisadi kibernetika ixtisasının 5-ci buraxılışı idik. Qrupumuz da İK-5
adlanırdı. Əslində, bu, eksperimental bir ixtisas idi. 1996-cı ildə informasiya
texnologiyaları bu səviyyədə deyildi. Universitetdə heç müasir kompüterlər yox
idi. Dərsləri nəzəri keçir, proqramlaşdırma məsələlərini kağız üzərində həll
edirdik. Amma elə təhsil aldığım illərdə sürətli inkişaf, bir-birini əvəzləyən
innovasiyalar məni və qrupumuzda təhsil alan uşaqları daha da həvəsləndirdi.
Bizə dərs deyən əksər müəllimlər Bakı Dövlət Universitetinin 100 illiyi münasibəti
ilə Cənab Prezident tərəfindən ən dəyərli şəkildə mükafatlandırıldı.
Biz təhsil
alan zaman dərslər çox fərqli və qarışıq idi. Düşünürəm ki, indi daha düzdür –
dar ixtisaslaşma daha keyfiyyətli nəticələr verməlidir.
- Təhsilinizi başa vuranda, öyrəndikləriniz o dövr
üçün nə dərəcədə aktual idi?
- Biz
ali məktəbi bitirəndə, informasiya texnologiyaları sahəsində öyrəndiklərimizin
70 faizi artıq köhnə idi və daha istifadə edilmirdi.
Düşünürəm
ki, öz marağım olmasaydı və qarşıma mənə düz istiqamət verəcək səriştəli,
müdrik insanlar çıxmasaydılar, bugünkü nailiyyətləri əldə edə bilməzdim.
- Bugünkü təhsil də elədir, universiteti başa
vuranda, tələbələr oxuduqlarının bir çoxunun köhnəlmiş olduğunu deyirlər. Bunun
səbəbi nədir?
- Bir məsələni
hər kəs dəqiq anlamalıdır: Təhsil həmişə sənayedən, əmək bazarından geridədir.
Bu, tək bizim ölkədə belə deyil. Başqa ölkələrdə də sən təhsili başa vuranda, artıq
öyrəndiklərin tam və ya qismən köhnəlmiş olur. Ölkəmizdə də bunu müşahidə
edirik. Nəzərə alsaq ki, təhsilə tətbiq edilən dəyişikliklər o dəqiqə deyil,
bir müddət sonra nəticə verir, deməli, ləngimənin səbəblərindən birini müəyyən
etmiş olarıq. Digər səbəbləri də var, belə ki, bizim müəllimlərin öz üzərində
işləmələri üçün müvafiq şəraitləri yoxdur. Hər gün dərsə gəlib eyni mövzuları
danışırlar, inkişafa vaxt qalmır. Əgər buna şərait yaradılsa, düşünürəm ki,
daha faydalı olar.
- Şirkətlərdə texnologiyaların tətbiqindən danışaq.
Eyni ölçüdə iki şirkət götürək. Biri texnologiyaların tətbiqində maraqlıdır,
digəri o qədər də yox. Bu zaman onların sonrakı durumu necə dəyişəcək?
- Bu
suala cavab vermək üçün tarixə və statistikaya nəzər salmaq kifayətdir. Vaxtında
müasir texnologiyaları tətbiq etməyən şirkətlər bu gün rəqabətdə uduzub müflisləşiblər.
Ancaq
bir məsələ də var ki, şirkətin daxilində xaosdursa, ora texnologiya və
innovasiya tətbiq etdikdə heç bir yaxşı nəticə əldə etmək mümkün deyil.
Texnologiya – alətlər toplusudur, eyni işi daha məhsuldar icra etməyə kömək
edir. Deməli, əvvəlcə şirkətdə biznes proseslər qaydasında olmalıdır, ondan
sonra müasir texnologiyalar tətbiq edilməlidir. Tətbiqlə də iş bitmir. Bundan
sonra mütləq bu müasir texnologiyalar ilə işləyən insanları maarifləndirmək,
ixtisasartırma kursu keçirmək məqsədəuyğundur. Müasir texnologiyanın verdiyi
imkanlara bələd olan mütəxəssislər ondan maksimum fayda götürə bilərlər.
- Yeni çıxan bütün texnologiyanı tətbiq etmək
lazımdır, yoxsa burda da düzgün strategiya olmalıdır?
- Əgər
biz qlobal dünya təcrübəsinə baxsaq görərik ki, ən son və müasir
texnologiyaları birinci tətbiq edən şirkətlər daha böyük uğur əldə edirlər. Əlbəttə,
burada da müəyyən risklər mövcuddur. Ona görə də iri şirkətlər müasir
texnologiyanı dərhal bütün şirkətə tətbiq etmirlər. Startap tipli şöbələr olur,
onlar birinci yoxlayırlar, nəticə yaxşıdırsa, bu texnologiyaya yatırılan sərmayə
özünü doğruldursa, onda kütləvi tətbiqə başlayırlar.
Strategiya
hər sahədə olmalıdır. Marketinq strategiyası, inkişaf strategiyası, bazara
daxil olma strategiyası və s. Müasir texnologiyaların tətbiqi də fərqli
strategiyaların tərkib hissəsi ola və ya ayrıca strategiya şəklində tətbiq edilə
bilər.
Bir də
fikir vermisinizsə, iri şirkətlərin hamısının daxilində Elmi Araşdırmalar və
İnkişaf (Research&Development) departamenti olur. Bunlar da daim
axtarışdadırlar.
- Biz ümumi şirkət deyirik. Amma kiçik, orta və
böyük şirkətlər var. Şirkətlərin miqyasına görə texnologiyaların tətbiqində
hansısa fərqlər olmalıdırmı?
-
Haqlısınız. Mən əmək fəaliyyətim dövründə bir neçə cür şirkətdə, eləcə də dövlət
və özəl qurumlarda çalışmışam. Fərq ondadır ki, kiçik şirkətlər daha çevikdirlər.
Orada müasir texnologiyanın tətbiqi daha tez və sürətlə baş verir. Orta və iri
şirkətlər nisbətən ləngdirlər. Dövlət müəssisələrində bürokratiya və müəyyən məhdudiyyətlər
ola bilər, eləcə də konservativ olurlar. Özəl şirkətlər nisbətən daha müasir
texnologiyaların tətbiqinə meyllidirlər. Əlbəttə, şirkətin qazancı və hədəfləri
onun hansı texnologiyanı tətbiq edəcəyini müəyyənləşdirir.
- Məlumdur ki, texnologiyaları tətbiq etmək heç də
ucuz başa gəlmir. Ona görə müəssisə rəhbərləri texnologiyaya pul xərcləyəndə,
ilk olaraq gəlir məsələsini düşünürlər. Texnologiyanın tətbiqi gəlirə nə qədər
vaxt sonra təsir edir?
- Əslində,
bunu (Return on İnvestment, Total Cost of Ownership) əvvəlcədən hesablamaq
mümkün olduğundan, tətbiq edək və ya etməyək qərarına da təsir edir. Elə müasir
texnologiyalar var ki, o tətbiq edildiyi andan şirkətə gəlir gətirə və ya xərcləri
azalda bilər. Elələri də var ki, nəticə yalnız bir müddət sonra mümkündür. Məsələn,
bulud həllərinin və texnologiyasının tətbiqi dərhal xərcləri aşağı saldığı, məhsuldarlığı
artırdığı üçün təsiri tətbiq edildiyi andan hiss edilir. Ancaq süni intellekt
layihələri zəruri verilənlərin toplanması, təmizlənməsi, nizamlanması, modelləşdirilməsi
və s. mərhələlər keçdiyindən gəlirə təsiri bir müddət sonra baş verir.
- Mövzunu "Microsoft Azərbaycan”a bağlayaq. Şirkət
ölkədəki şirkətlərə texnologiyaların tətbiqi ilə bağlı nələr təqdim edir?
-
"Microsoft” korporasiyasının missiyası daha böyük nailiyyətlər üçün hər bir
insanın və hər bir təşkilatın imkanlarını genişləndirməkdir. "Microsoft”
140-dan çox ölkədə təmsil olunub. Biz də Azərbaycanda bu missiyaya sadiq
qalaraq yerli özəl və dövlət şirkətlərinə yerli və beynəlxalq tərəfdaşlarımızla
birlikdə onları daha uğurlu edə biləcək həll və texnologiyalar təqdim edirik.
Adətən, bizimlə görüşən yerli şirkətlər öz istəklərini bildirdikdə, onlarla əlimizdə
olan qlobal təcrübəni paylaşır, innovasiyaların tətbiqi ilə rəqəmsal
transformasiya etmələrinə töhfə veririk. Mən 2012-ci ildən "Microsoft”da
çalışıram. 2012-ci ildə "Microsoft” aksiyalarının dəyəri təxminən 42 USD idi.
Bu gün aksiyaların dəyəri 150 USD-dən artıqdır. Bu da bir daha onu sübut edir
ki, Microsoft müştərilərin ehtiyacı olan həllər və texnologiyalar tədarük edir,
bunlar da öz növbəsində müştərilərin daha uğurlu olmasına kömək edir. Biz əməkdaşlığa
açıq şirkətik. Bunları nəzərə alaraq müasir texnologiyalar tətbiq etmək istəyən
bütün şirkət və qurumları əməkdaşlığa dəvət edirik.
- Texnologiya sürətlə yenilənir. Bəs kadrlarımızın
bilik və bacarıqları texnologiyanın sürəti ilə nə dərəcədə ayaqlaşır?
- Bu,
çox aktual məsələdir. Həqiqətən də texnologiyalar çox sürətlə inkişaf edir.
Ancaq bu texnologiyaları tətbiq edəcək müvafiq kadrlar yoxdur. Burada bir neçə
problem var. Biri dil baryeridir. Bilirsiniz ki, informasiya texnologiyaları
sahəsində uğurlu olmaq üçün ingilis dili vacibdir. Digər tərəfdən, məlumat həddən
artıq çoxdur. Buna hövsələ və səbir lazımdır ki, oturub diqqətlə araşdırasan.
Ən əsası da motivasiya lazımdır. Biz müşahidə edirik ki, əməkdaşların əmək
haqqı az olan yerlərdə bəzi insanlar yeni texnologiyaları öyrənməyə meyilli
deyillər. Çünki düşünürlər ki, onsuz da vəziyyətə heç bir təsiri olmayacaq. Digər
qrup insanlar isə əksinə, yeni texnologiyaları öyrənirlər ki, daha yaxşı şirkətlərdə
daha yüksək əmək haqqı olan vəzifələrə iddia edə bilsinlər.
Bir məsələni
xüsusi vurğulamaq istərdim ki, indi elə zəmanədə yaşayırıq ki, hər gün nə isə
oxumalı və öyrənməlisən. Əks təqdirdə, sən öz rəqabətqabiliyyətli olmağını itirə
bilərsən. İnsan gərək öz inkişafının, təkmilləşməsinin sahibi özü ola, heç kəsdən
gözləməyə ki, gəlib məni öyrədəcəklər. Özü öyrənməyə, inkişafa həvəsli olan
insanlar bir qayda olaraq daha uğurlu olurlar.
- Bir də texnologiya inkişaf etdikcə insan əməyinə
tələb azalacağı, hətta bu tələbin minimumlaşa biləcəyi deyilir.
- Əslində,
belə bir tendensiya müşahidə edilməkdədir. Ancaq birinci dəfə deyil ki, bəşəriyyət
belə texnoloji sıçrayışlar, inqilablar yaşayır. Buxar maşını, elektrik də kəşf
ediləndə, mexaniki işlər görən çox insan işsiz qaldı, ancaq bunlar özü ilə
görün nə qədər yeni sahələr və peşələr gətirdi, cəmiyyət nə qədər inkişaf etdi.
İndi də müasir texnologiyalar bəzi peşələri əvəzləsələr də, özləri ilə çoxlu
yeni sahələr gətiriblər. Mən bu haqda bir çox proqnozlar nəzərdən keçirmişəm və
bəzi peşələrin süni intellekt və robotlar ilə əvəz edildiyini müşahidə edirəm.
Ona görə də gənclər peşə seçərkən daha dərrakəli seçim etmələrini, 3-5 il
qabağa baxaraq prioritetlər müəyyən etməyi tövsiyə edərdim.
Aygün
Asimqızı