Təcavüzkar dövlətin sülhsevər imicini yaratmaq cəhdi
Ermənistan-Azərbaycan,
Dağlıq Qarabağ münaqişəsinin ədalətli həlli rəsmi İrəvanın qeyri-konstruktiv
mövqeyi səbəbindən indiyə qədər yubanır. Belə ki, Ermənistan hakimiyyəti beynəlxalq
hüququn prinsiplərinə, ölkələrin ərazi bütövlüyü məsələsinə etinasız yanaşır, BMT
Təhlükəsizlik Şurasının münaqişə ilə bağlı qətnamələrini yerinə yetirmir, danışıqlar
prosesini süni şəkildə uzadır. Düşmən ölkədə 2018-ci ilin aprelində inqilab
yolu ilə hakimiyyətə gələn, hazırda Ermənistanın baş naziri olan Nikol Paşinyan
da sələflərindən geri qalmır. Siyasətə küçədən gələn bu erməni ziddiyyətli
bəyanatlar verməklə, Ermənistanın işğalçı siyasət yürütdüyünü bir daha bütün
dünyaya nümayiş etdirir. Onun arvadı Anna Hakopyan isə bir çardaq altında
yaşadığı Paşinyana züy tutmaqla işğalçılara xas xislətini ortaya qoyur. Misal
üçün, A.Hakopyanın öz oğlunu Azərbaycanın işğal olunmuş Dağlıq Qarabağ
bölgəsində hərbi xidmətə yola salmasının ardınca sülh çağırışları etməsi,
obrazlı desək, timsahın göz yaşlarını xatırladır. Çünki Paşinyan-Hakopyan
cütlüyü bir tərəfdən öz oğullarını işğal altındakı Dağlıq Qarabağda səngərə yola
salır, azərbaycanlı əsgərlərə, dinc əhalimizə qarşı silah işlətdirir, digər
tərəfdən də sülhün bərqərar olmasından danışırlar.
Belə faktlar işğalçı
Ermənistanın indiki hakimiyyətinin Dağlıq Qarabağ münaqişəsinin sülh yolu ilə
tənzimlənməsində maraqlı olmadığını göstərir. Erməni baş nazirin arvadı
A.Hakopyan bu günlərdə daha bir addımı ilə gündəmə gəlib. O, "Qadınlar sülh
naminə” təşəbbüsü ilə çıxış edərək, bu çərçivədə Rusiyadan olan bir qrup
qadının Azərbaycanın işğal olunmuş Dağlıq Qarabağ bölgəsinə səfərini təşkil
edib. A.Hakopyan işğal olunmuş Azərbaycan torpaqlarından azərbaycanlı qadınlara
çağırış edib. İlk növbədə qeyd edək ki, onun və rusiyalı həmcinslərinin
Azərbaycan ərazilərinə səfəri qeyri-qanunidir, ölkələrin ərazi bütövlüyü,
suverenliyi prinsipinə hörmətsizlikdir. Digər tərəfdən, əgər A.Hakopyan
həqiqətən də sülh tərəfdarıdırsa, erməni əsgərlərinin ölməsi istəmirsə, o zaman
əri N.Paşinyandan tələb etməlidir ki, Ermənistan silahlı qüvvələri işğal
altında saxladıqları ərazilərdən qeyd-şərtsiz geri çəkilsinlər. Lakin
A.Hakopyan qeyri-adekvat davranır.
Azərbaycan Xarici İşlər
Nazirliyinin mətbuat xidməti də A.Hakopyanın Rusiyadan olan bir qrup qadın ilə
ölkəmizin işğal olunmuş Dağlıq Qarabağ bölgəsinə səfəri barədə açıqlama yayıb.
Bildirilib ki, A.Hakopyan humanitar missiyası üçün hədəfləri düzgün seçməyib,
gənc insanların ölümünün qarşısını almaq üçün o, ilk növbədə Ermənistan
cəmiyyətindən başlamalı, Ermənistan tərəfindən Azərbaycan torpaqlarının
işğalına son qoymağa çağırmalı və erməni qadınlarını və analarını övladlarını
Azərbaycanın işğal olunmuş torpaqlarına göndərməkdən çəkindirməlidir:
"Hakopyanın bu addımı hazırkı vəziyyətdə, xüsusilə də seçkilər öncəsi
Ermənistanın daxili auditoriyasına hesablanıb. Lakin nəzərə almaq lazımdır ki,
bu kimi təşəbbüslər, xüsusilə də bu çərçivədə "humanitar missiya" adı
altında Rusiya Federasiyasından bir qrup qadının Azərbaycanın işğal olunmuş
ərazilərinə səfərlərini təşviq etmək, Rusiyanın ATƏT-in Minsk qrupunun həmsədr
ölkəsi kimi mandatına uyğun gəlmir, münaqişənin həllinə xidmət etmir və
Azərbaycan Prezidenti ilə Ermənistanın baş naziri arasında Düşənbədə aparılmış
söhbətin ruhuna cavab vermir. Bu məsələ Azərbaycanın Moskvadakı səfirliyi
tərəfindən Rusiya Xarici İşlər Nazirliyi qarşısında qaldırılacaq".
XİN-in açıqlamasında bir
daha bəyan edilib ki, sülh istəyənlər müharibəni davam etdirməməli, insan
itkisinin qarşısını almaq istəyənlər digər dövlətin ərazilərini hərbi işğal
altında saxlamamalı və nəhayət, qadınları və anaları sülhə dəvət edənlər şəxsən
öz övladlarını Azərbaycanın beynəlxalq səviyyədə tanınmış ərazilərinə hərbi
xidmətə göndərməməlidirlər. Azərbaycan qanunlarını ciddi pozaraq ölkəmizin
işğal edilmiş ərazilərinə qanunsuz səfər edən əcnəbi vətəndaşlara gəldikdə, XİN-dən
bildirilib ki, hazırda onlarla bağlı məlumat araşdırılır və bu şəxslər
müəyyənləşdirildikdən sonra onların adlarının ölkəmizə girişi arzu olunmayan
şəxslər siyahısına əlavə edilməsi ilə bağlı müvafiq qərar qəbul olunacaq.
Milli
Məclisin deputatı, politoloq Rasim Musabəyov mövzu ilə bağlı qeyd edib
ki, Azərbaycan XİN-in mövqeyini dəstəkləyir və bölüşür. Onun sözlərinə görə,
Ermənistan tərəfindən ölkəmizin işğal edilmiş ərazilərinə xarici vətəndaşların
qanunsuz səfərləri təşkil edilir. Millət vəkili deyib ki, bu, Azərbaycan
qanunlarının ciddi şəkildə pozulmasıdır: "Azərbaycanın icazəsi, razılığı
olmadan işğal edilmiş Dağlıq Qarabağ ərazisinə edilən bütün səfərlər separatçı
rejimi və işğalı təbliğ edir. Ona görə də Xarici İşlər Nazirliyi bu məsələyə
tamamilə doğru olan mənfi münasibətini nümayiş etdirib. Mən də bu mövqeyi
dəstəkləyir və bölüşürəm”.
Siyasi
şərhçi Aydın Quliyev isə hesab edir ki, Ermənistanın baş naziri
N.Paşinyanın həyat yoldaşı A.Hakopyan təcavüzkar dövlətin sülhsevər imicini
yaratmaq ssenarisi oynayır. Onun sözlərinə görə, Ermənistanın "məxməri inqilab”dan
sonrakı siyasi elitasının fəaliyyətində populizm mütləq üstünlük təşkil etməyə
başlayıb: "Sarkisyanın dövründə nadir hallarda rast gəlinən bu siyasi davranış
forması Paşinyanın dövründə sistem halını almaqdadır. Paşinyan hakimiyyətin bir
hissəsini ictimai təzyiq dalğası altında ələ keçirdi, sonra konkret işlər
görməyin mümkünsüzlüyünü anlayanda populist siyasət kursunu daha da
gücləndirdi. Ən sonda oğlunu işğal edilmiş Azərbaycan torpaqlarında yaradılmış
qanunsuz rejimin hərbi xidmətinə göndərdi və bunu erməni cəmiyyətinə ən müasir
vətənpərvərlik nümunəsi kimi təqdim etməyə çalışdı. Paşinyan bu taktika ilə
nələrsə əldə edə bilsə də, erməni xalqının hələlik nəsə əldə edə bildiyini
söyləmək mümkünsüzdür. Hakopyanın Azərbaycanın işğal olunmuş Dağlıq Qarabağ
bölgəsinə gələrək məqsədi və ünvanı bəlli olmayan sülh çağırışı etməsi də yeni
erməni siyasi elitasının genişlənməkdə olan populist siyasətinin davamıdır. Azərbaycan
anaları öz tarixi ərazilərini itirmiş bir xalqın nümayəndələri olduğu halda
Hakopyanın onlara sülh çağırışı etməsinin məntiqini anlamaq mümkün deyil. Ümumiyyətlə,
burada məntiq yoxdur. Hakopyanın Azərbaycan analarına etdiyi müraciət əslində
"övladlarınızı vətənin müdafiəsindən geri çəkin” kimi absurd bir məzmuna
malikdir”.
Siyasi şərhçi deyib ki, A.Hakopyan
Rusiyadan da şəxsi tanışlıq çərçivəsində cəlb etdiyi bir qrup qadını "sülh missiyası”
adı ilə Dağlıq Qarabağa gətirsə də, bu missiyanın mahiyyəti sülh pərdəsinə
bürünmüş təcavüzün yeni formasıdır: "Rusiyadan bircə nəfər belə dövlət nümayəndəsinin
bu aksiyaya qoşulmaması onun mahiyyətinin çox yaxşı başa düşüldüyünü göstərir.
Hakopyan həqiqətən sülh istəsəydi, onun baş nazir postu tutan həyat yoldaşı
oğlunu işğal olunmuş Azərbaycan ərazisinə hərbi xidmətə göndərəndə buna mane
olardı. Hakopyanın məqdəsi sülhsevərlik olsaydı, bu çağırışı Azərbaycan
qadınlarına yox, erməni analarına edərdi, həm də Azərbaycanın işğal olunmuş
torpaqlarına gəlməzdi və hay-küylü "Ana Terezalığını” Ermənistan-Azərbaycan
sərhədlərində dayanaraq edərdi. Nəhayət, Hakopyan bilməmiş deyil ki, erməni
analarına daha konkret sülh çağırışını ilk dəfə 2017-ci ilin əvvəlində
Azərbaycanın Birinci vitse-prezidenti Mehriban Əliyeva edib. Hakopyan məntiqsiz
yeni çağırış etmək əvəzində Mehriban Əliyevanın erməni analarına "oğullarınızı
Azərbaycan torpaqlarına hərbi xidmətə göndərməkdən çəkinin” məzmunlu çağırışına
uyğun hərəkət etsəydi, azacıq sülhpərvər görünə bilərdi”.
Alpər
TURAN