Teatrlarımızdan yeni mövsümdə yeniliklər gözləyirik
Artıq yeni
mövsüm başladı. Bu mövsüm teatrlarımızda hansı yeniliklərin olacağı ilə bağlı
araşdırma elədik. Öyrəndik ki, teatrlarımız cari mövsümə yeni repertuar planı
hazırlayır. Amma tamaşalar yeni olsa da, eyni əsərlər və fərqli teatrların
siyahısı ilə qarşı-qarşıya qaldıq. "Yenə klassik əsər və müasir baxış” – deyib,
məsələyə başqa tərəfdən yanaşmağa çalışdıq.Ekspertlərimizə
"teatrlarımızdan bu mövsüm nələr gözləyirsiniz” sualı ilə müraciət etdik.
Fərqli cavablar almağı gözlədiyimiz halda, onlardan maraqlı istəklər eşitdik.
Sənətşünaslıq üzrə elmlər doktoru, professor,
teatrşünas Məryəm Əlizadətamaşaçını öyrənməyin, onun arzu və istəklərini teatr səhnələrində realizə
etməyin əsas qayə olduğunu vurğuladı: "Bu mövsüm teatrlarımızdan gözləntilərim
böyükdür. Elə ana teatrımızı götürsək, orada xalq artisti Azərpaşa Nemətov kimi
tanınmış sənətkarımız çalışır. O öz sənətini mükəmməl bilən bir rejissor,
yaradıcı komandasının potensialına bələd olan bədii rəhbərdir. Bundan başqa,
bizim Gənc Tamaşaçılar Teatrı, Akademik
Musiqili Teatrı, Opera və Balet Teatrı, Kukla Teatrı və digər
teatrlarımızın rəhbərləri işinin peşəkarı olan sənətkarlarımızdır. Yeni
mövsümdə onlara zamanın nəbzini daha möhkəm tutmağı arzulayıram. Zaman keçir, həyatda hər şey dəyişir və belə
zamanda müasirhəyatı yeni texnologiyalarsız təsəvvür etmək çox çətindir. Texnologiyalar dəyişdikcə, insanların istək və
estetik tələbləri də dəyişir. Bu tələbatı, ehtiyacı insanlara yalnız teatr
verməlidir. Düzdür, bu gün teatrlarımız bir qədər standartdan çıxaraq axtarış
edir və yeniliklərə meyllidirlər. Bu çox gözəl haldır. Ancaq mən istərdim ki,
teatrlarımız ruh yüksəkliyi ilə inkişafa doğru getsin”.
M.Əlizadə
qeyd etdi ki, bölgə teatrları da öz inkişaf dövrünü yaşayır və bu mövsüm də
onlardan gözləntiləri böyükdür: "Yeni teatr mövsümü başlayır. Bu mövsüm bölgə
teatrlarına baş çəkəcəyəm. Çünki bölgə teatrlarında maraqlı yaradıcı proses baş
verir”.
Xalq artisti Nurəddin Mehdixanlı yeni mövsümdə teatrlarımızın səhnəsində yaxşı
tamaşalar, maraqlı obrazlar, qastrol səfərləri görmək istədiyini vurğuladı. O,
əsas məsələnin özümüzü tanımaq və tanıtmaq olduğunu deyir: "Əsas odur ki,
tamaşalarımız dünyada nümayiş olunsun, öz qazanımızda qaynamayaq, dünya teatr
cameəsi bizi tanısın. Arzu edirəm ki, bu dəfə irihəcmli, ciddi materiallarla
mövsümü başa vuraq. Ana teatrın səhnəsinə fərqli rejissorların dəvətini görmək
istərdim. Çünki yeni yaradıcılıq istiqamətləri bizə hər zaman maraqlı olub. Çox
istərdim ki, teatrlarımızda ömrünü, həyatını bu sənətə həsr etmiş yaşlı
sənətkarlarımızı incitməsinlər, onların hiss və duyğularına toxunmasınlar. Hər
mövsümün əvvəli və sonrası onları yaşları ilə bağlı müqavilə rejiminə
keçirməsinlər. Və "siz getməlisiniz” kimi sözlərlə onların qəlbinə dəyməsinlər.
Bu insanlar ömürlərini, həyatlarını teatra bağlayıblar, məhz teatrda yaşa
dolub, burada qocalıblar. Əgər o aktyorların sağlamlığı, yaddaşı və təfəkkürü
yerindədirsə, heç bir şey onlara mane ola bilməz. Bu gün Azərbaycan dövləti
sənət adamlarına, teatrlara böyük diqqət və qayğı göstərir. Bu o insanlara olan
dəyərin göstəricisidir. Onların yaşamaq imkanlarını, yaradıcılıq fəaliyyətlərini
genişləndirmək deməkdir. Çox istərdim ki, hər kəs prezidentimizdən nümunə
götürsün və sənətə, sənətkara bu şəkildə yanaşsın. Azərbaycan teatrı 150 yaşa
doğru yol alır. Dünya mədəniyyətinin unikal parçasıdır. Ulu öndərimiz Heydər
Əliyev deyirdi ki, "Azərbaycanın teatrı onun milli sərvətidir”. Gəlin, bu
sərvəti qoruyaq”.
Xalq artisti, rejissor Mərahim Fərzəlibəyov deyir ki, çalışdığı Bakı Bələdiyyə Teatrında yeni
mövsüm üçün Nəsiminin 650 illiyi ilə əlaqədar tamaşa hazırlayır: "Mənə elə
gəlir ki, bu, dahi şairin yubileyinə həm də tamaşaçılar üçün böyük hədiyyə
olacaq. Nəsiminin həyatından bəhs edən film çəkilməsinə baxmayaraq, çalışmışam
tamaşada elə səhnələr qurum ki, bu, filmi təkrarlamasın”.
M.Fərzəlibəyov
Azərbaycan teatrının milli ənənələrlə inkişaf etdiyini və bu mövsümdə o inkişaf
xətti ilə paralel olaraq yeniliklər etmək iqtidarında olduğunu bildirdi: "Hər
il Azərbaycan Dövlət Mədəniyyət və İncəsənət Universiteti aktyor və rejissorlar
yetişdirir. Çox istərdim ki, teatrlara gələn gənc rejissorlarımız xarici
rejissorların kurslarına getsin, onlardan yeni nələrsə öyrənsin. Teatrda hər
şey dramaturgiyadan başlayırsa, sonra onun həlli rejissora həvalə olunur.
Rejissorluq böyük sənətdir, bu sənətə yiyələnmək üçünsə böyük təcrübə və təhsil
lazımdır”.
Azərbaycan Dövlət Mədəniyyət və İncəsənət
Universitetinin teatrşünaslıq kafedrasının müəllimi, "Yuğ” Dövlət Teatrının
ədəbi hissə müdiri, teatrşünas Elçin Cəfərov deyir ki, tək bu mövsümdə yox, bütün mövsümlərdə
teatrlarımızdan əsas gözləntisi peşəkarlıqdır: "O səbəbdən ki, Azərbaycan
teatrı 146 ildir peşəkar teatr adlanır və bizim də onlardan peşəkar səviyyə
gözləməyə tam haqqımız çatır. Daha bir təmənnam ondan ibarətdir ki, nəhayət,
hər bir teatrımız öz simasını arasın, tapsın və qoruyub saxlaya bilsin. Mən
müxtəlif teatrlarımızın səhnəsində müxtəlif estetikalar, fərqli sənət
konsepsiyaları görmək istərdim. İstərdim ki, hər bir teatrın özünün bədii
konsepsiyası, fərdi sənət yolu, özünəməxsus repertuarı olsun. Repertuar
demişkən, teatrların afişalarında yeni adlara rast gəlməyi də çox arzulayıram. Axı
dünya, o cümlədən Azərbaycan dramaturgiyası teatrlarımızın repertuarına "daimi
qeydiyyata düşmüş” 10-15 pyesdən ibarət deyil. Çox arzu edirəm ki, teatrlarımız
"məbəd-məbəd” oyununun stixiyasından uzaqlaşaraq, olimpdən çox yox, bir-iki
addım aşağı düşsün, insanları, onların hisslərini, arzularını, istəklərini
öyrənsin və cəmiyyətə toxunan tamaşalar hazırlasın. Arzu edirəm ki, teatr
xadimlərimiz dünya teatrlarındakı yaradıcılıq prosesləri ilə maraqlansınlar,
öyrənsinlər, yenilənsinlər. Məsələn, M.A.P. festivalı çərçivəsində nümayiş
olunan tamaşalarda Azərbaycan teatr ictimaiyyətinin əksəriyyətini görməyi
istərdim”.
E.Cəfərov
qeyd edir ki, hamımıza işləməyə, özümüzü realizə etməyə və öyrənməyə şərait
yaradan sağlam teatr mühiti, teatr prosesinə isə boz rəngin əlli çalarından
qurtulub, rəngarəng dünyaya yelkən açmağı arzulayır: "Optimist nəslin
nümayəndəsi kimi, elə hesab edirəm ki, hər yeni mövsümün başlanması bayramdır.
İnanıram ki, hər şey yaxşı olacaq, hər halda əvvəlkindən daha yaxşı olacaq.
Bayramınız mübarək və uğurlu oyunlar”.
Bəli,
hər mövsümdə eyni istək, eyni arzuları eşidirik. Ancaq fərqli nəticəni görə
bilirikmi?.. Ümid edək ki, bu mövsümdə teatrlarımızdan yeni nəfəs, yeni
ideyalar, dünyada baş verən yeniliklərə adekvat reaksiya görəcəyik.
Xəyalə Rəis
Bu yazı "İntellekt Araşdırmalar Mərkəzi”
İctimai Birliyinin Azərbaycan Respublikasının Prezidenti yanında Qeyri-Hökumət
Təşkilatlarına Dövlət Dəstəyi Şurasının maliyyə yardımı ilə həyata keçirdiyi
"Teatr mədəniyyətinin formalaşması istiqamətində TV və radio proqramların
hazırlanması” layihəsi çərçivəsində hazırlanıb.