Teatra həvəskar kimi gəlib, peşəkar kimi ayrılan aktrisa
Görkəmli aktyor və rejissor
Mehdi Məmmədov Azərbaycan teatrının aktrisalarını gül çələnginə bənzədir,
«Hərəsinin öz ətri, öz xarakteri və təravəti var» - deyirdi. Mərziyə Davudova,
Fatma Qədri, Leyla Bədirbəyli, Nəcibə Məlikova, Hökumə Qurbanova, Ətayə
Əliyeva… Xalq artisti Məhluqə Sadıqovanın da bu aktrisalar arasında öz yeri
olub. 100 illik yubileyi qeyd olunan aktrisanın xatirəsi uzun illər çalışdığı
Akademik Milli Dram Teatrında da anılıb.
Onu səhnədə görənlər,
ecazkar səsinin dinləyicisi olanlar aktrisa haqqında sanki o yaşayırmış kimi
danışırlar. Onun uzun illər çalışdığı xüsusən köhnə nəsli aktrisa haqqında xoş
xatirələrini danışırlar.
Xarakterik
səhnə surətləri
Məhluqə Sadıqova Şuşa
şəhərində doğulub. Şuşadakı Qız məktəbində beş il oxuyandan sonra ailəsi Bakıya
köçüb. Məhluqə xanım 6 saylı sovet məktəbində yeddinci sinfi bitirib. Bakı Tibb
Texnikumunun diş texniki fakültəsində oxuduğu illərdə rəqs və dram
dərnəklərində məşğul olub. Məhluqə Sadıqova 1936-cı il sentyabr ayında Akademik
Milli Dram Teatrının truppasına qəbul olunub. Aktrisa bu sənət məbədinə
həvəskar kimi gəlsə də, onun səhnəsində əsil peşəkara və tamaşaçıların
sevimlisinə çevrilib. Sənətə sevgisi onu ömürlük teatra bağlayıb. Aktrisa 54 il
bu teatrda çalışıb.
M.Sadıqovanın Milli Dram
Teatrının səhnəsində ilk rolu "Firdovsinin "Şahnamə” əsərində Firuzə obrazı
olub. Bu rol gənc aktrisanın səhnə uğurlarının açarına çevrilib. Aktrisanın
sənətinə sevgisi, işgüzarlığı, məsuliyyəti bu teatrın səhnəsində bir-birindən
maraqlı rollar oynamasına səbəb olub. O, qəlbinin sevgisini rollarına qatıb.
Özü sevdiyi qədər onları tamaşaçılara da sevdirib. Aktrisa Milli Dram Teatrının
səhnəsində hazırlanan "Oqtay Eloğlu”, "Solğun çiçəklər”, "Almaz”, "Sevil”,
"Dönüş” və "1905-ci ildə”, Süd”, "Skapenin kələkləri”, "Pəri cadu”, "Vaqif”, "Fərhad və Şirin” və "Xanlar”,
"Günahsız müqəssirlər”, "Şeyx Sənan”,
"Qış nağılı”, "Vanya dayı”, "Şeytanın şagirdi”,
"Nazirin xanımı”, "Lənkəran xanının vəziri”, "Qadın faciəsi” və s. tamaşalarda baş və
epizodik rollarla səhnəyə çıxıb. Bu teatrın səhnəsində müxtəlif janrlarda
yaratdığı rollar uzun illər tamaşaçıların xatirindən silinməyib. Aktrisa əsas
uğurlarını daha çox xarakterik səhnə surətlərinin ifasında qazanıb. Aydın və
səlis diksiyası, ifadəli səhnə danışığı onun oynadığı rollara rəng qatıb. M.Sadıqova bütünobrazlarını,ocümlədənana rollarını içindən gələn sevgi ilə
oynamağı bacarır və tamaşaçılara sevdirirdi.
M.Sadıqova 1992-ci ildə yenicə
yaradılanBakı Bələdiyyə Teatrındaçalışıb. Bu teatrın səhnəsində
də maraqlı rollarla yadda qalıb. Peşəkarlığını, ustalığını, sənətinə
məhəbbətini, insanlara xoş təmasını bu səhnəyə gətirib.
"Bulaq”dan
axan səs
Məhluqə Sadıqova qırx ildən
çox Azərbaycan radiosunun "Bulaq” folklor-etnoqrafik verilişinin əvəzsiz
ifaçılarından biri kimi tanınıb. Onun məlahətli səsi radio dalğalarından ev-ev,
oba-oba, şəhər-şəhər ölkəmizin bütün guşələrinə yayılıb. Xalq yaradıcılığının
inciləri onun səsində yeni üslubda və formadadinləyicilərə
təqdimolunub.
"Bulaq” dövrününənçoxsevilən verilişlərindən biri kimi həm
də aparıcıları olan ecazkar səsli Məhluqə Sadıqova ilə Səməndər Rzayevə sevgi
qazandırıb.
Məhluqə
Sadıqova həmçinin bədii qiraət ustası kimi də tanınırdı. Aktrisa
"Azərbaycanfilm” kinostudiyasının dublyajşöbəsindəbirçoxfilmlərin səsləndirilməsində də
yaxındaniştirakedib.
Gözəl
intonasiya, məlahətli səs...
Məhluqə Sadıqovanı yaxından
tanıyanlar, vaxtilə onunla səhnədə tərəfmüqbil və ya tərəfdaş olanlar aktrisanı
təkcə peşəsinin vurğunu deyil, həm də səmimi insan kimi xatırlayırlar.
Məhluqə xanımla bir neçə
tamaşada rol oynadığını deyən Xalq
artisti Rafiq Əzimov onunla ilk dəfə Bernard Şounun «Şeytanın şagirdi» tamaşasında
oynadığını deyir: "Həmin tamaşada Məhluqə xanım mənim anam rolunu oynayırdı. Daha
sonra birlikdə «Vaqif» tamaşasında oynadıq. Məhluqə xanımın ən yaxşı
obrazlarından biri Cəfər Cabbarlının «Solğun çiçəklər»indəki Pəri surəti idi. Onunla
bir tamaşada rol almasam belə, Məhluqə xanımın bütün rollarını, oynadığı
tamaşaları izləyirdim. Məhluqə xanım çox maraqlı aktrisa idi. Onun əsas ifa
etdiyi rollar həyat yoldaşı Ələsgər Şərifovun quruluş verdiyi tamaşalarda idi”.
M.Sadıqovanı xarakterik aktrisa adlandıran R.Əzimov onu həmçinin gözəl
diksiyası, məlahətli səsi ilə fərqləndirir: "Məhluqə xanım radio tamaşalarında
həm aparıcı, həm də müxtəlif pyeslərdə rollar oynayırdı. Onun mərhum aktyor
Səməndər Rzayevlə apardığı «Bulaq» radio tamaşası aktrisanı daha çox tanıdırdı.
Bu veriliş uzun illər radio dalğalarında səslənib. O dövrdə demək olar ki,
uşaqdan böyüyə qədər hamı bu verilişin adını əzbərdən bilirdi. Aktrisanın istər
komediya janrında və ya faciəvi janrlarda oynadığı rollar tamaşaçıların yaxşı
yaddaşındadır. Həyat yoldaşı Ələsgər Şərifov onu həmişə "Məşədi Məhluqə” deyə
çağırardı. Biz onunla çoxlu qastrol səfərlərində olmuşuq. Onun gözəl yol
yoldaşı olmasının da səfərlərimiz zamanı şahidi olmuşam”.
"Nə
yaxşı ki, bu sənətkarlar hamısı varmış...”
Rejissor
Ramiz Həsənoğlu Məhluqə Sadıqova ilə işbirliyində olmasa da, o
dövrün aktrisaları içərisində onu yaxşı xatırlayır: «Məhluqə xanım anam Ətayə
Əliyeva ilə rəfiqə idi. Tez-tez zəngləşirdilər. Anam onun haqqında həmişə xoş
sözlər danışırdı. Bir dəfə işbirliyimiz olmalı idi, ancaq Məhluqə xanım imtina
etdi. «Günahsız Abdulla» televiziya tamaşasında əvvəlcə rolu Məhluqə Sadıqovaya
təklif etmişdim. Ancaq sonra Sofya Bəsirzadə oynamalı oldu. Məhluqə xanım
«Balaca roldur» - deyə roldan imtina etsə də, sonradan tamaşanı görüb «Gərək
imtina etməzdim» - deyə peşmançılığını bildirmişdi. Məhluqə xanımın gözəl səsi
vardı. Biz hamımız onun dinləyicisi idik. «Bulaq»dakı səsi indi də
qulağımızdadır. Azərbaycan radiosu hərdən həmin verilişdən bəzi süjetləri
xatırladır. Adam həmin süjetlərə qulaq asdıqca o illəri, o sənətkarları yadına
salır və «Nə yaxşı ki, bu sənətkarlar hamısı varmış və mədəniyyətimiz bu günə
qədər gəlib çıxıb» - deyə düşünür.
Milli Dram Teatrının
korifey aktyorları sırasında Məhluqə Sadıqovanın xüsusi yeri olduğunu deyən Xalq artisti Ramiz Məlik «Məhluqə xanım
deyəndə ilk növbədə sanki «Bulaq» verilişinə qulaq asırıq. Elə bil aktrisanın
mehriban, ürəklərə yatan, ecazkar səsi indi də
tamaşaçıların qulaqlarında səslənir” deyə xatırlayır: «O zaman "Bulaq”
verilişi həm Məhluqə xanımın, həm də Səməndər Rzayevin ahəngdar səsi ilə tamaşaçıların
ürəyinə yatmışdı. Mənim teatra gəldiyim 67-ci ildən ta Məhluqə xanımın teatrdan
getdiyi günə qədər bir yerdə işləmişik. Biz bir çox tamaşalarda tərəfmüqabil
olmuşuq, bir sıra tamaşalarda isə birgə çalışmışıq». Teatra ilk gəldiyi illərdə
Məhluqə xanımla Səməd Vurğunun «Vaqif» pyesində oynadığını deyən R.Məlik
aktrisanın Qarı rolunu yaxşı xatırlayır: «Həmin tamaşada mənə Əli bəy rolunu
verdilər. Daha sonra aktrisa ilə «Xanuma» əsərində tərəfmüqabili olduq. Həmin
tamaşa aktrisanın həyat yoldaşı, rejissor Ələsgər Şərifov tərəfindən səhnəyə qoyulmuşdu.
Həmin tamaşada teatrın korifey aktyorları oynayırdılar. Hökumə Qurbanova,
Ağasadıq Gəraybəyli, Əliağa Ağayev kimi görkəmli aktyor ansamblının təqdim
etdiyi tamaşa çox sevilirdi». R.Məlik Məhluqə xanımın özünəməxsus aktrisa
olduğunu deyir: «O, istər teatr yaradıcılığında, istər radio verilişlərində
özünəməxsus rolları ifa edib və tamaşaçıların rəğbətini qazanıb. Məhluqə xanım xaraktercə
çox ciddi, həm də mehriban qadın idi. Onun səmimiyyəti gənc nəslə münasibətində
özünü büruzə verirdi. O, bizə ana kimi qayğı göstərirdi, məsləhətlərini
verirdi. Peşəkar aktrisa kimi bizim fəaliyyətimizi həmişə diqqətində saxlayır
və müşahidə edirdi. Sonra bizə yaxınlaşıb öz fikirlərini söyləyirdi. Demək olar
ki, onun oynadığı bütün tamaşalara böyük məmnuniyyətlə baxırdım. Məhluqə xanım həmçinin gözəl ana idi. Sənətindən əlavə, övladlarına
qayğı ilə yanaşırdı. Onların ailəsi bir növ teatr ailəsi idi. Bu ailənin başçıları
tanınmış aktrisa və görkəmli rejissor idi. Mənə elə gəlir ki, o, öz
yaradıcılığı ilə həm teatrda, həm də Azərbaycan televiziya və radiosunda öz
yerini qoruyub saxlamış aktrisa idi».
Məhluqə
Sadıqova deyəndə yenə qulağımıza "Bulaq” kimi saf, təmiz səs süzülür. İllər
keçir, nə o məlahətli səs unudulur, nə də aktrisanın özünəməxsus ifası....
Təranə Məhərrəmova