"Teatr adamına mükafatdan başqa nə verərlər?" - Fotolar
Azərbaycan Dövlət Gənc
Tamaşaçılar Teatrının ötən ildə əldə etdiyi nailiyyətlərdən və 2017-ci ildə
görəcəyi işlərdən xəbər tutmaq üçün dünən teatra üz tutduq. Teatrın direktoru, əməkdar
incəsənət xadimi Mübariz Həmidovla görüşüb söhbət etdik.
- Mübariz müəllim, geridə qoyduğumuz 2016-cı ili Azərbaycan Dövlət Gənc Tamaşaçılar
Teatrı üçün məhsuldar hesab etmək olarmı?
- 2016-cı ili bizim teatr
üçün həm uğurlu, həm də məhsuldar hesab edə bilərik. 2016-cı ildə bizim bir çox
uğurlarımız oldu. Belə ki, ilk olaraq 8 yeni tamaşaya quruluş verdik. 4 tamaşa ilə
beynəlxalq festivallarda mütəmadi iştirak etdik. 2016-cı ilin may ayının sonu, iyun
ayının əvvəllərində 4 xarici ölkələrdə səfərdə olduq.Əvvəla, onu qeyd edim ki, ötən
il Dövlət Gənc Tamaşaçılar Teatrında Milli Teatrın 143 illiyi və Beynəlxalq
Teatr günləri qeyd edilib. Hər iki əlamətdar gün münasibətilə repertuardakı
maraqlı tamaşalarımız nümayiş olunub. 10
mart Milli Teatr Günü ilə əlaqədar teatrımızın istedadlı aktyorları, xalq artistləri
Yasin Qarayev, Ağaxan Salmanlı, əməkdar artist Şəfəq Əliyeva, aktrisa Məsumə
Babayeva Azərbaycan Teatr Xadimləri İttifaqının təsis etdiyi "Sənətkar” medalı ilə
təltif olunublar.Elə həmin ayda rus xalq
nağılı olan "Turpun nağılı”nın motivləri əsasında tamaşa səhnələşdirmişik. Belə
ki, "Möcüzəli turp” tamaşamız Novruz bayramı günlərində azyaşlı tamaşaçılara
təqdim edilib.Aprel ayının 29-dan may
ayının 2-dək Dövlət Gənc Tamaşaçılar Teatrının yaradıcı heyəti Türkiyə Cümhuriyyətinin
Trabzon şəhərində keçirilən XVII Qaradəniz ölkələri Beynəlxalq Teatr
Festivalında, may ayının 21-dən 26-dək Moskva vilayətinin Lobnya şəhərində
keçirilən "Rus klassikası” XXI Beynəlxalq Gənclər Teatr Festivalında, may
ayının 27-dən iyun ayının 2-dək Rusiya Federasiyası Orenburq vilayətində
keçirilmiş "Qostinıy dvor” VIII Beynəlxalq Teatr Festivalında, may ayının
28-dən iyun ayının 3-dək Böyük Britaniyada
fəaliyyət göstərən "UMUD Ltd Company” şirkətinin dəvəti ilə həyata
keçirilən qastrol səfərlərində iştirak etmişik. Bu heç də asan məsələ deyildi.May ayının 7-də "Mehmanxana
sahibəsi” adlı tamaşamızın premyerası oldu. Maarifçilik ideyalarını öz
dramaturgiyasının əsas hədəfinə çevirən italyan dramaturqu Karlo Qaldoninin
"Mehmanxana sahibəsi” əsəri əsasında hazırlanan eyniadlı tamaşaya xalq artisti
Cənnət Səlimova quruluş vermişdi.İyun ayının 24-də isə 88-ci
teatr mövsümünün son, yeni uşaq tamaşamızın premyerası oldu. Tamaşa 2016-cı
ilin "Multikulturalizm ili” elan olanması çərçivəsində Azərbaycanın dağ yəhudi
əsilli şairi, Azərbaycan Yazıçılar Birliyinin üzvü, maraqlı uşaq şeirlərinin
müəllifi Simax Şeydanın "Tülkü, tülkü tünbəki” pyesi əsasında hazırlanmışdı.
Eyniadlı səhnə əsərinə teatrın gənc və istedadlı rejissoru Gülnar Hacıyeva
quruluş verib.Ötən ildə görkəmli İsveç
dramaturqu Astrid Lindqrenin "Uzuncorab Peppi” əsəri əsasında isveçli rejissor
Roni Danielson və əməkdar incəsənət xadimi Bəhram Osmanov Azərbaycan Dövlət
Gənc Tamaşaçılar Teatrı, İsveç səfirliyi və Azercell MMC-nin birgə layihəsi
çərçivəsində tamaşa hazırladılar. Bu tamaşa çox böyük maraqla oynanıldı.
Fürsətdən istifadə edib, bizə dəstək olan Azercellə və İsveç səfirliyinə
minnətdarlığımı bildirirəm. Uşaqlar üçün əyləncəli, maraqlı, tərbiyəvi
əhəmiyyətə malik olan bir tamaşa hazırlandı. Bu bir layihə idi. Həmin ərəfədə
Mədəniyyət və Turizm Nazirliyinin xətti ilə bir qrup gənc imtahan verərək
Rusiyanın Şukin adına teatr məktəbinə daxil oldular. Onların içərisində bizim
istedadlı aktyorumuz Vüsal Mehrəliyev də var. O, rejissorluq üzrə təhsil alır.
5 ildən sonra ixtisaslı kadr kimi vətənə qayıtdıqdan sonra biz onunla tamaşalar
üzərində çalışacağıq. Əlbət ki, bütün
bunlar teatrımızın uğurudur.Məlumat üçün bildirim ki, 89-cu
mövsümün əvvəlindən teatrda iki uşaq və bir böyük tamaşası hazırlandı. Bunlar
Astrid Lindqrenin "Uzuncorab Peppi”, Xanımana Əlibəylinin "Aycan” və Məhəmməd
Füzulinin "Leyli və Məcnun” əsərləri əsasında hazırlanmış eyniadlı tamaşalardır.Mövsüm başlayandan artıq
bir neçə xarici səfərlərimiz baş tutdu. Bunlardan ilki RF-in Perm şəhərində
keçirilən, oktyabr ayının 1-dən 7-dək davam edən II Beynəlxalq Martin MakDonax
Teatr Festivalıdır. Kollektiv artıq ikinci dəfə qatıldığı festivalda ölkəmizi
adıçəkilən müəllifin "Lineynin trilogiyası”na daxil olan "Gözəllik kraliçası”
tamaşası ilə təmsil edib. Festivalın beynəlxalq səviyyəli münsiflər heyəti və
tənqidçilər qrupu "Gözəllik kraliçası”nı müzakirə edərək tamaşa, aktyor oyunu,
rejissor həlli haqqında maraqlı fikirlər səsləndiriblər. Tamaşamız festivalın
xüsusi diplomuna layiq görülüb. Heydər Əliyev Fondunun vitse-prezidenti və
Fondun Rusiya nümayəndəliyinin rəhbəri, Rusiyadakı Azərbaycanlı Gənclər Təşkilatının
sədri Leyla xanım Əliyevanın baş redaktorluğu ilə Moskvada nəşr olunan "Baku”
jurnalının noyabr-dekabr sayında tamaşamızın uğuru haqqında məqalə dərc olunub.Noyabr ayındakı növbəti
əlamətdar hadisə "Kontrabas” tamaşasının beynəlxalq festivalda iştirakı ilə
bağlıdır. Patrik Züskindin eyniadlı əsəri əsasında hazırlanmış tamaşa Moldova
Respublikasının Kişinyov şəhərində keçirilən kiçik həcmli tamaşaların
"MOLDFEST.RAMPA.RU” VIII Beynəlxalq Teatr Festival-laboratoriyasında ölkəmizi
təmsil edib. Azərbaycan Respublikası Mədəniyyət və Turizm Nazirliyinin dəstəyi
ilə reallaşan festivalda Moldova, Belarus, Pribaltika ölkələri, Rusiya, İsrail,
Serbiya və digər ölkə teatrlarının kollektivləri iştirak ediblər. Bu siyahını
uzada da bilərəm.
- Bəs, 2017-ci ildə hansı
işləri görməyi planlaşdırırsınız?
- Artıq 4 yeni əsər üzərində
iş gedir. Ötən il Azərbaycan Respublikasının xalq artisti Yasin Qarayevin 70, Ağaxan
Salmanlının 75 yaşı tamam oldu. Özlərinin istəkləri ilə belə məsləhət olundu ki,
onların ifasında bir tamaşa hazırlansın. Məlumat üçün bildirim ki, həmin
sənətkarların yubileyi ilə əlaqədar prezidentimiz onları "Prezident təqaüdü”nə layiq
gördü. Güman edirəm ki, bu onların yubileylərinə ən böyük hədiyyə idi. Biz ayrı-ayrılıqda
təmtəraqlı yubiley gecəsi də təşkil edə bilərdik. Həmin sənətkarlarla məsləhətləşdik
və onlarla tamaşa hazırlamaq qərara gəldik. Belə ki, Əhməd Orucoğlunun "Açarını
itirənlər” komediyasının son məşqləri gedir. Bu gün (8 fevral) sənətkarların yubileylərinin
benefis tamaşasıdır.Teatrın repertuarına
gəlincə, daha çox tematik mövzulara üstünlük veririk. Hazırda teatrımızın baş
rejissoru Bəhram Osmanovun quruluşunda Əli Əmirlinin "Ünvansız qatar” tamaşasının
məşqləri gedir. Tamaşanın mart ayının 31–də - Azərbaycanlıların Soyqırımı Günündə
premyerası keçiriləcək. Tamaşa öz ata-baba yurdundan didərgin düşən soydaşlarımızın
həyatından bəhs edir. Hesab edirəm ki, hər bir teatrın repertuarında bu tip tamaşalar
olmalıdır. Digər bir əsərimiz Vaqif Əsədovun quruluşunda hazırlanan "Yarımçıq qalmış”
tamaşasıdır. Bildiyiniz kimi, aprel döyüşlərində cəbhə xəttində şəhidlər
verdik. Orada bizim rəşadətli əsgərlərimiz müəyyən ərazilərimizi işğaldan azad etdi.
Həmin döyüşlərdə istedadlı memar, Rəssamlıq Akademiyasının məzunu Samir Kaçayev
qəhrəmancasına həlak oldu. Bu tamaşa aprel döyüşlərində qəhrəmancasına həlak olan
təkcə Samir Kaçayevin deyil, digər şəhidlərimizin əziz xatirəsinə ithaf olunur.
Əsərin müəllifi Yefim Abramov və Leyla Bəyimdir. Abramov Bakı yəhudisidir. O, İsraildə
yaşayır. Bizim həmyerlilərimiz vətəndən kənarda yaşasalar da, vətənin problemləri
onları maraqlandırır, narahat edir. Bu tamaşanı aprelin 5-də Vaqif Əsədovun 70 illik
yubileyində təqdim etmək istəyirik.Bilirsiniz ki, teatrımızda
azyaşlı uşaqların da zövqünə uyğun olaraq tamaşalar hazırlanır. Biz də bu il "Qulliver
liliputlar ölkəsində” tamaşasını hazırlayacağıq. Bu tamaşa üçüncü rübdə hazırlanacaq.
Bu əsəri gənc rejissor Elşad Rəhimzadə quracaq.Daha sonra Cənnət Səlimovanın
quruluşunda Fridrix Düzenbantın "Fiziklər” əsərini səhnələşdirəcəyik. Biz əsərin
adını dəyişib "Dahi dəlilər” qoyacağıq.
-
Gənc Tamaşaçılar Teatrının nailiyyətləri haqqında mütəmadi şəkildə məlumatlar
əldə edirik. Diqqətimizi çəkən əsas məqamlardan biri də odur ki, ötən il
teatrın bir çox əməkdaşı Kalmıkiya Respublikası tərəfindən mükafat və fəxri
fərmanla təltif olundu. Onların bu uğuru teatr camesindən olan bir sıra insanlar
tərəfindən heç də birmənalı qarşılanmadı.
- Sözün düzü, bu mənə bir qədər
qəribə və gülməli gəldi. Bildiyiniz qədəri ilə, bir neçə il bundan əvvəl mənə və
Bəhram Osmanova Kalmıkiyanın əməkdar incəsənət xadimi adı verildi. Həmin zaman
çıxışımda da qeyd etdim ki, bu təkcə mənə və kollektivimizə verilən qiymət deyil.
Bu, Azərbaycan teatrına başqa ölkə tərəfindən verilən qiymətdir. Sonuncu qastrol
səfərimizdə aktyorlarımızın mükafata layiq görülməsinə gəlincə isə, deyə
bilərəm ki, biz qastrol səfərinə gedəndə, təşkilatçılardan xahiş etməmişdik ki,
bizə fəxri ad və ya mükafat verilsin. Görülən əməyin qiymətləndirilməsinin nəyi
pisdir ki? Biz gedib orda teatr sənətimizi təbliğ edirik. Biz Azərbaycan teatrını
ən yüksək səviyyədə təqdim etdiyimizə görə bu mükafatlara layiq görülmüşük. Teatr
adamına mükafatdan başqa nə verərlər? Onda bu mükafatı bizə verəndə deməli idik
ki, yox, biz bunu istəmirik? Biz inkişafa doğru gedirik. Bunun üçün bizə heç nə
mane ola bilməz. Bu gün Gənc Tamaşaçılar Teatrının 4 əməkdaşı başqa ölkənin
fəxri adını daşıyır. Bu, faktdır, bu, Azərbaycan teatrına verilən yüksək
qiymətdir. Bu gün teatrlarımızın hər hansı birinin xarici ölkədə uğurlu çıxışı olursa,
həmin ölkənin mətbuatı, rəhbərliyi bizim teatr haqqında müsbət fikir bildirirsə,
mən buna sevinirəm.Bu gün teatrımız intibah dövrünü
yaşayır. Gəlin, müqayisə edək ki, 10 il bundan qabaq Azərbaycan teatrı hansı vəziyyətdə
idi? İndi teatrlarımız müasir standartlara uyğun təchizatlarla təmin olunub. İstilik
sistemi yüksək şəkildə təmin olunub. Bunların hamısı uğurdur. Hansı ölkədə Prezident
sənət adamlarına ayda 500 manat mükafat verir?
-
Son zamanlar sosial şəbəkələrdə və bəzi saytlarda yayılan söz-söhbətlərə
toxunmaq istəyirik. 3 xalq artistinin teatrda ştatdan çıxarılması və onların
işsiz qalması haqda yayılan xəbərlərlə bağlı sizin fikirləriniz maraqlıdır.
- Əslində üç xalq artisti deyil.
Yaşı 65-dən 75-ə qədər olan 12 nəfər əməkdaşımızdan gedir söhbət. Həmin saytlar
məlumatları da yarımçıq verirlər. Yanvarın əvvəli Bədii Şurada müzakirə etdik.
Onların hər birinin əldə etdikləri nailiyyətləri diqqətimizdə saxlayırıq.
Ümumiyyətlə, ölkə başçımızın çalışma yaş həddinə görə müvafiq sərəncamı var. Bizim
hər bir aktyor ilə müqavilələrimiz var. Onların hamısı fəxri adları nəzərə alınaraq
fəaliyyətlərini davam etdiriblər, bu gün də davam etdirirlər. Kimisi çox, kimisi
az - tamaşalarda rol alırlar. Bu insanların hamısı dövlətdən təqaüd alır. 30-40
il ömürlərini bu sənətə həsr ediblər. Onun müqabilində də nazirliyin təqdimatı ilə
ölkə rəhbərliyi tərəfindən xalq, əməkdar artist adlarına, Prezident təqaüdünə
layiq görülüblər. Bu gün teatrda çalışan o qədər istedadlı gənclərimiz var ki,
onlar çox cüzi əməkhaqqı alırlar. Onların bəziləri ailəlidir, mənzili yoxdur, uzaqda
yaşayır. Ancaq teatrda bəzən bir gündə 4-5 tamaşada oynayırlar, uğurlu
çıxışları var. Biz yaşı 65-dən yuxarı olan sənətkarlarımızın məşğulluğuna da baxdıq.
Onların bəziləri iki və ya üç tamaşada rol alıblar. Əslində 70 yaşını haqlayan
aktyorlarla fərdi müqavilə ilə də çalışmaq olardı. Əgər aktyor bir tamaşada iştirak
edirsə, digər tamaşalardakı məbləğ toplanır. Baxdıq ki, onların o qədər də məşğulluğu
yoxdur. Yarımştata ona görə keçirtdik ki, hər ay əməkhaqqı alsınlar. Onlar bu teatrda
canlarını qoyublar. Ola bilər ki, bir ay onların tamaşası olmasın. Onda onlar maaş
almasınlar? Ancaq bu sistemlə onlar hər ay maaş alacaqlar. Əslində bunu ictimailəşdirməyin
də mənası yox idi. Məsələnin ən düzgün yolu bu idi. 72 yaşlı aktyorlara necə birdən-birə
deyək ki, çıxın teatrdan? Onlar dahi sənətkarlarımızın məktəbini keçiblər, öyrəndiklərini
indiki gənc nəslə öyrədirlər. Hamısı bizim üçün çox önəmlidir. Burda elə də böyük
bir məsələ görmürəm. Teatr prosesinə yaxından bələd olan insanlar bunu gözəl başa
düşürlər. Kənardan bu düzgün anlaşılmaya bilər. Ancaq bunu heç zaman
unutmasınlar ki, yaşlı aktyorlarımıza hər zaman hörmətimiz olub, sabah da olacaq.
Xəyalə Rəis