Tarixi həqiqətləri tanıtmaq üçün “kədərli turizm” marşrutu
İki gün öncə
xalqımız 20 Yanvar faciəsinin 29-cu ildönümünü qeyd etdi. Şəhidlər Xiyabanını
ziyarətə gələn insanlar arasında ölkəmizə səyahət edən turistlər də vardı.
Onlar ümumxalq hüznünə qoşulub, təkcə Xiyabanı ziyarət etmədilər, həmçinin
xalqımızın başına gətirilən faciədən, qəhrəman övladlarımızın rəşadətindən xəbər
tutdular.
Ölkələrin, keçmiş
və müasir tarixini - qəhrəmanlıq və rəşadətini, xalqın yaşadığı fəlakətləri,
soyqırımını tanıtmaq və əbədiləşdirmək üçün memorial abidə, park, muzey və məzarlıqlara
turizm marşrutları təşkil etməsi artıq yeni deyil. Elmi izahı "Qəmgin turizm”,
"Kədərli turizm” və ya "Qaranlıq turizm” (Dark tourizm) olan turizmin bu
marşrutu dünyada xeyli populyarlaşıb.
Vyetnamın paytaxtı Hanoyda Hoa Lo həbsxana-muzeyini, Londonda "London qəsri”ndə
faraonların məzarlıqlarını, ”Varşavada muzeyə çevrilən "Şindlerin fabriki”ni,
Belarusun Xatın şəhərində "Memorial kompleks”i ziyarət edərkən, dünyanın hər
yerindən turistlərin böyük maraqla həmin tarixi məkanlara baş çəkdiklərinin və
bələdçiləri maraqla dinlədiklərinin şahidi olmuşam. "Turizm marşrutu” adı ilə o
qədər uzlaşmasa da, ölkələr əslində bu marşrutda öz rəşadətləri, mübarizə
tarixləri və faciələri haqqında bilgi verir, tarixlərini dünyaya tanıdırlar. Hər bir memorial kompleksə səfər edəndən
sonra aydın olurdu ki, turizmin bu marşrutunu yaratmaqda səbəb heç də asan
qazanc əldə etmək deyil, öz ölkəsinin tarixini, faciəsini, başına gələnləri
dünyaya tanıtmaqdır.
Faciə, soyqırımı və rəşadət tarixi
"Kədərli və ya
Qaranlıq” turizmin yaranma tarixi 18-ci əsrin sonu -19-cu əsrin əvvəllərinə təsadüf
edir. Belə ki, 1839-cu ildə ilk dəfə olaraq Böyük Britaniyada mühakimə olunan
iki qatilin ölüm yeri olan Kornuellə dəmiryolu ekskursiyası təşkil olunub. 19-cu
əsrin ortalarında Britaniya sahibkarı Tomas Kuk ABŞ-da vətəndaş müharibəsinin olduğu
yerlərə turistlərin səfərlərini təşkil edib. Krım müharibəsindən bir neçə il
keçəndən sonra Amerika yazıçısı Mark Tvenin başçılığı altında turistlər
Sevastopola səyahət ediblər.
1937-ci ildə
«Gindenburq» hava gəmisinin faciəli qəzasından sonra Nyu-Cersi ştatında turist
agentlikləri Leykherstdəki hərbi dəniz bazasına turist səfərləri təşkil etməyə
başlayırlar.
Baxmayaraq ki,
bu cür məkanlara baş çəkmək ənənəsi ta qədim vaxtlardan var, turizmin bu
növünün elmi mənasının o qədər də böyük tarixi yoxdur. 1996-cı ildə ilk dəfə Klarendon Universitetinin qonaqlama, turizm və
menecment fakültəsinin əməkdaşları - Filip Stoun və Riçard Şarpli «Kədərli və
ya Qaranlıq turizm»in elmi ifadəsini tapıblar. Birləşmiş Krallığın Lankaşir Mərkəzi
Universitetinin əməkdaşları turizmin bu marşrutuna bazar prizmasından
yanaşıblar. Onlar "kədərli turizm”in məhsullarını təklif edərək, bazarda
istifadəsini qiymətləndiriblər. Universitetin əməkdaşları bu mövzuda çoxlu nəzəri
işlər görərək Qaranlıq (Qəmgin) Turizm İnstitutunun əsasını qoyublar. Bu termin
Avropa jurnallarında da yer almağa başlayandan sonra artıq turizm marşrutu kimi
səyahət həvəskarlarını cəlb etməyə başlayır. Faciə, ölüm, soyqırımı, qətliamlar
və qəzaları heç kim sevməsə də, bu tip hadisələrin baş vermə səbəbləri, yerləri,
tarixləri ilə maraqlanmağa can atanlar tapılır.
2005-ci ildə
Stoun qeyd edib ki, müasir dövrdə insanlar daim ölüm və iztirabla qarşılaşırlar
və ona görə də onlar turizmin bu marşrutu üzrə hərəkət etməkdə maraqlı görünürlər.
Onlar turizmin bu növünə ölümün sosial mədəni təzahürü kimi baxırlar.
Müntəzəm turist turları
Dünyanın bir çox
yerlərində ölüm və faciələrlə dolu müxtəlif məkanlar var. Bu günlərdə
"Atlasobscura” məşhur portalında kədərli turizmin daha çox səfər edilən 50 istiqaməti qeyd
olunub. Siyahıya Peterburqun məşhur Yusubovski sarayı da daxildir ki, 1916-cı
ilin 16 dekabrında orada Qriqori Rasputini öldürüblər. Deyirlər ki, mərhumun
ruhu o vaxtdan qalanın dəhlizlərində dolaşır.
"Kədərli turizm”
üçün görməli yerlər əsasən qalalar, yeraltı məkanlar, həbsxanalar seçilir. Təbii
fəlakət, antropoloji faciələr üçün Yaponiyanın Xrosima şəhərində memorial park,
Roma "Kolizey”ində qladiatorların döyüşü, ictimai edam və katakombların yerinə
yetirildiyi yerlər, Ukraynada Çernobıl, Nyu-Yorkda "Qraund-Ziro” seçilir.
Bundan əlavə, qəmgin turizm marşrutları soyqırımı və s. vəhşiliklərin həyata
keçirildiyi yerlər üçün də nəzərdə tutulub. Məsələn, Polşada Osvensim hərbi düşərgəsində
hazırda YUNESKO-nun ümumdünya siyahısına daxil olan memorial muzey fəaliyyət
göstərir. Ölənlərin xatirəsini yad etmək üçün bu muzeyə hər il dünyanın bütün
ölkələrindən minlərlə insanlar gəlir. O cümlədən Çernobıla da müntəzəm turist
turları təşkil olunur. Kombociada «Tuolsleng» Soyqırımı Muzeyi, Novosibirsk
Dünya Dəfn Mədəniyyəti Muzeyi, o cümlədən, Per-Laşez, Monparnas, Novodeviçye qəbiristanlığı,
Qrim-Vud və s. qəbiristanlıqlarına turizm agentlikləri tərəfindən turlar təşkil
olunur. Vaşinqtonda turistlər Holokost Memorial Muzeyini ziyarət edərkən,
onlara faciə qurbanlarının yaşı, şəkli, cinsi və adının yazıldığı vəsiqələr təqdim
olunur.
Tariximizi bilmək baxımından
Azərbaycan Turizm Assosiasiyası sədrinin müşaviri
Müzəffər Ağakərimov paytaxt
Bakının ekskursiya marşrutunda sonuncu dayanacağın Dağüstü Park olduğunu bildirərək,
ölkəmizdə səfərdə olan qonaqların və turistlərin mütləq Şəhidlər Xiyabanını
ziyarət etdiklərini deyir: "Ziyarət zamanı ölkəmizin və xalqımızın qəhrəmanlıq
salnaməsindən turistlərə danışılır. O cümlədən, Qubaya səyahət edən, həmçinin
orada qalan turistlər ekskursiya vaxtı rayonun görməli yerləri ilə yanaşı, Quba
Soyqırımı Memorial Kompleksinə də səfər edirlər. Onlara Qubada yaşayan etnik
qrupların soyqırımına məruz qalması ilə bağlı məlumat verilir. Bu məlumatlar
qonaqlarda, erməni vandalizmi haqqında təəssürat yaradır. Təbii ki, başımıza gələn
faciələri, xalqımızın yaşadığı hadisələri daha çox diqqətə çatdırmaq turizm bələdçilərindən
və şirkətlərin fəaliyyətindən də asılıdır. Məsələn, proqrama, həmin məkanlara
turistlər tərəfindən əklillərin qoyulması da daxil edilə bilər. Hesab edirəm
ki, təkcə turistlər üçün deyil, yuxarı sinif şagirdləri, ali və peşə məktəblərində
turizm təhsili alan tələbələr üçün də belə ekskursiyaların keçirilməsi
vacibdir. O cümlədən gənc nəsil üçün tariximizi bilmək baxımından belə
ekskursiyaların təşkili pis olmazdı. Təhsil şöbələri və təhsil ocaqları da
tariximizin təbliği istiqamətində bu barədə düşünməlidirlər”.
Millətlərin ortaq tarixi
"Millenium Turizm-Konqres DMC” şirkətinin rəhbəri
Ruslan Quliyevin sözlərinə görə, turizmin bu marşrutu təkcə
hansısa məzarlığı, soyqırımı məkanını ziyarət etməklə bağlı deyil: "Tutaq ki, hər
hansı bir ailə başçısı hansısa bir ölkədə müharibədə iştirak edib. O, döyüşlərdə
olduğu yerləri göstərmək üçün ailəsi ilə həmin məkana səyahət edir. Və yaxud
kimsə Məkkə və ya Kərbəla ziyarəti zamanı vəfat edibsə, ailə üzvləri onun məzarını
ziyarət etmək üçün ora gedirlər. Çanaqqala savaşında ölən avstraliyalılar indi
də öz əcdadlarını ziyarət etmək üçün ora gəlirlər. Hesab edirəm ki, bunun üçün
millətlərin ortaq tarixləri axtarılmalı və işlənib hazırlanmalıdır. Bu isə
tarixçilərin işidir. Yalnız bundan sonra bu məkanları turizm marşrutuna daxil
etmək olar».
Ölkəmizin tanıdılması istiqamətində
"Luna Travel” şirkətinin direktoru Rəhman
Quliyev bildirdi ki, millətimizin
qürur yeri olan belə məkanları turizm marşrutlarına salmağa çalışırlar: «Bəzən
turistlər belə yerlərdən yayınmaq istəyirlər. Bu, onların psixologiyasından
asılıdır. Əgər turist ildə bir dəfə dincəlməyə gəlirsə, düşünür ki,
xiyabanlara, məzarlıqlara, soyqırımı abidələrinə getməkdənsə, könlü xoş olmaq
üçün başqa marşrutları seçsin. Ölkəmizə gələn türklər, o cümlədən Pakistandan gələnlər
belə məkanlara maraq göstərirlər”. Turiz mütəxəssisinin sözlərinə görə, turistlərin
qaldıqları otelin foyesində bu marşrutlar onlara təklif edilir: "Əlbəttə, gedib
ziyarət etmək istəyənlər də olur, istəməyənlər də. Biz ölkəmizin tarixini,
başımıza gələn faciələri, həmçinin qəhrəmanlıq tariximizi turistlərə anlatmağa
çalışırıq. Çünki gələn qonaq geri qayıdanda ölkəmizlə bağlı məlumatları və təəssüratları
aparır. Mən həmişə tur rəhbərlərinə, bələdçilərə də tapşırıram ki, məsələn, əgər
turistlər Qubadakı Soyqırımı Kompleksinə getmək istəməsələr, heç olmasa onlara
bu barədə yolboyu məlumat verilsin”. R.Quliyev bildirdi ki, ölkəmizə gələn
turistlərin çoxaldığı bir vaxtda, bu sür səyahət Azərbaycanın tanıdılması
istiqamətində çox vacibdir: "Biz onlara ölkəmizin görməli yerlərini, mətbəxini,
mədəniyyətini, təbiətini, dənizini, dağını təqdim etməklə yanaşı, tariximizi də
təqdim etməliyik. İstər taksi sürücüsü, istər otel meneceri, istər turizm əməkdaşları,
istərsə də polis işçiləri gələn turistə fərdi yanaşmalı və onu məlumatlandırmağa
çalışmalıdırlar».
Artıq bir çox
ölkələr hesab edirlər ki, öz faciələrini, xalqlarına qarşı təcavüzü dünyaya
hadisə kimi təqdim etməyə nail olublar. Həqiqətən də, kütləvi faciələrlə müşayiət
olunan belə yerlərə baş çəkmək artıq müasir dünyada turistlərin diqqətini çəkməyə
başlayıb. O baxımdan, biz də tariximizin qəhrəmanlıq və faciəli səhifələrini
elmi, kinemotoqrafik, incəsənət, bədii dildə yaymaqdan savayı, turizm yolu ilə
də təbliğ edə bilərik.
Təranə Məhərrəmova