Suriyada sabitliyin bərpasının postsovet məkanına da xeyri olacaq
Ötən gün Soçidə Suriya böhranının həlli yollarının müzakirəsi ilə
bağlı Rusiya, İran və Türkiyə prezidentlərin iştirakı ilə sammit keçirilib.
Tədbirin əsas məqsədi hər üç ölkənin dəstəyi ilə Suriya böhranının aradan
qaldırılması olub. Qeyd edək ki, hazırda Suriya problemi ilə bağlı bu üç
ölkənin bir sıra məsələlərdə razılaşma əldə etmədiyi məlumdur. Məhz bu səbəbdən
üç ölkənin iştirakı ilə Suriyanın 7 illik yol xəritəsi layihəsi hazırlanıb.
Sammitlə bağlı Rusiyaya gələn Bəşər Əsəd
təkliflər paketini qəbul edib. Təkliflər arasında Konstitusiyaya və
seçki sisteminə dəyişiklik, həmçinin ümumi əfv də var. Layihənin 19 maddəsi ilə
bağlı razılıq əldə olunub və sənədin 2018-ci il yanvarın 15-də
təkmilləşdiriləcəyi gözlənilir.
Amma Soçi görüşündə razılaşdırılmayan iki məsələ də müzakirə
olunacaq. Onlardan biri terrorçu PKK-nın Suriyadakı qolu PYD-nin gələcəyi və
ABŞ-ın bu ölkədəki hərbi bazalarının taleyidir.
Mövzu ilə bağlı "Kaspi” qəzetinə açıqlamasında politoloq Tofiq Abbasov bildirdi ki, Suriyadakı hərbi əməliyyatların
ən qızğın fazası sona yetib: "Suriyanın şimalında, şimal-şərqində və İraqın
şimalında təmizləmə əməliyyatlarının son mərhələsidir. Yəni, "islam dövləti”
adlanan təşkilat demək olar ki, məğlub edilib və onun qalıq dəstələri taktiki
baxımdan yerdəyişmələr edirlər, eləcə də müqavimət göstərirlər. Həm Rusiya, həm
də İranın hərbi komandanlıqlarının rəhbərləri prezidentlər Putinə və Ruhaniyə,
eləcə də ali dini lider Xamneyiyə qələbə əldə olunması ilə bağlı hesabat
veriblər. Bu onu göstərir ki, faktiki olaraq Yaxın Şərq bölgəsinin postmüharibə
dövrünün planları cızılır. Yəni, söhbət dağıdılmış infrastrukturun, yerli
hakimiyyət orqanlarının fəaliyyətinin eləcə də bu ölkələrin dünyada və regionda
itirilmiş əlaqələrinin bərpasından gedir. Təbii ki, üç ölkə İraqın və Suriyanın
yenidən inteqrasiya xətlərinə qayıdışını təmin etmək vəzifələrini öz üzərilərinə
götürməlidirlər. Düzdür, rəsmi Ankara ilə Moskva arasında hələ də bəzi
ixtilaflar öz qüvvəsini saxlayır. Bunlar eskalasiya zonalarının təmin edilməsi,
xarici qoşunların Suriyada qalıb-qalmaması, qalarsa, onların səlahiyyətlərinin
müəyyən edilməsi və Bəşər Əsəd hakimiyyətinin gələcəyidir. Ancaq digər strateji
problemlərin həlli sona yetmək üzrədir və proseslərin gedişatında bunlar aradan
qalxacaq”.
T.Abbasov vurğuladı ki, vaxtı ilə region üçün təhlükəli olan silahlı
qruplar artıq tərki-silah ediliblər: "Artıq onlara xüsusi dəhlizlər vasitəsilə
çıxış imkanları yaradılıb. Bu o deməkdir ki, dağıdılmış böyük arealda artıq
sabitlik yaranmaq üzrədir. İndi isə siyasi liderlər regionun bərpası, dünyaya
inteqrasiyası və eləcə də öz aralarında mövcud olan problemlərin həlli ilə
bağlı yekun qərarlara imza atmalıdırlar. Təbii ki, hər üç dövlətin marağında
olan əsas məqam odur ki, sabitlik müvəqqəti yox, daimi hal alsın və Suriyada,
İraqda, eyni zamanda Livanda öz maraqlarını təmin etmək üçün bir-birilərindən
və digər dövlətlərdən zəmanət alsınlar. Bu regionda həqiqətən də problemli
vəziyyət aradan qaldırılırsa, demək ki, sabitliyin faydasının rasional tərəfini
bütün bölgə dövlətləri də görəcək, eləcə də postsovet məkanına da bunun böyük
xeyri olacaq. Çünki İŞİD təhdidlər edirdi ki, məqsədlərinə Yaxın Şərqdə nail
olduqdan sonra postsovet məkanındakı müsəlman dövlətlərinə də yayılacaqlar. İndi
həmin şüarlar, təhdidlər öz qüvvəsini itirib və qüvvələr həm siyasi, həm də
hərbi səhnədən yığışdırılırlar. Türkiyə, İran və Rusiyanın Soçi görüşünün
nəticələrinə gəlincə, pozitiv tərəfə transformasiyaları gözləməyə dəyər”.
"Atlas” Araşdırmalar
Mərkəzinin rəhbəri, politoloq Elxan Şahinoğlu bildirdi ki, Suriyada
müharibə başladıqda və terrorçu qruplar orada tüğyan etdikdə böyük dövlətlərin
marağı var idi: "Hətta bir ara Türkiyə ilə Rusiyanın maraqları da kəsişirdi,
iki dövlətin münasibətləri gərginləşmişdi. Sonra hər şey yoluna qoyuldu və Türkiyə,
Rusiya və İranın iştirakı ilə üçlü ittifaq formalaşdı. Hər üç ölkənin müəyyən
dərəcədə silahlı qüvvələri Suriyada var. Birinci mərhələdə çox faydalı
əməkdaşlıq oldu və demək olar ki, İŞİD Suriyada əsas mövqelərini itirib. Bundan
sonra isə ən ağır mərhələ gəlir. Yəni, Suriyada terror bitdikdən sonra seçkilər
keçirilməli, hökumət formalaşmalı və prezidentlik institutu ilə bağlı
müzakirələr başlamalıdır. Çünki Rusiya Bəşər Əsədə, Türkiyə isə Suriya Azadlıq
Ordusuna və digər müxalif qruplara dəstək verir. Bu mərhələdə Əsəd güzəştə
getməsə, onda fikirlər haçalanacaq və Rusiya-Türkiyə münasibətləri yenidən
gərginləşə bilər. Həmçinin, kürd məsələsində Türkiyə ilə İranın maraqları da
üst-üstə düşür. Amma Əsədə dəstək məsələsində maraqlar ayrılır. Rusiya
çalışırdı ki, dialoqda kürdlərdə iştirak etsin. Hətta Soçidə bir konfransda
təyin ediblər. Amma Türkiyə buna etiraz edir. Bilinmir ki, Rusiya bu etirazı
nəzərə alacaq, ya yox. Çünki Türkiyə haqlı olaraq deyir ki, oradakı silahlı
kürdlər PKK terror təşkilatının qanadıdır. Bu baxımdan, növbəti mərhələ üçlü
ittifaq üçün daha çətin olacaq”.
E.Şahinoğlunun sözlərinə görə, bu mərhələ keçilərsə, Suriyada
sabitlik və normal hakimiyyət qurularsa, üçlü ittifaq güclənə bilər və başqa
problemlərin həllində də böyük rol oynaya bilər: "Bu üç dövlət Azərbaycanla
qonşudur. Hesab edirəm ki, Suriyada əməkdaşlıq uğurla davam edərsə, üçlü
ittifaqı Dağlıq Qarabağ məsələsinə transformasiya da etmək mümkündür”.
Bəxtiyar MƏMMƏDLİ