“Strateji Yol Xəritəsi”nə dair əməkdaşlıq
Binəqədi rayonunun M.Ə.Rəsulzadə bələdiyyəsində
Azərbaycan Dövlət İqtisad Universitetinin professorları ilə görüş keçirilib.
Görüşdə Azərbaycan Qəsəbə Bələdiyyələrinin Milli
Assosiasiyasının sədri, M.Ə.Rəsulzadə Bələdiyyəsinin sədri Hümbət Hüseynov, sədrin
müavinləri Ayət Nağıyev və Leyli Tahirova, bələdiyyənin komissiya sədrləri və
şöbə müdirləri, Azərbaycan Dövlət İqtisad Universitetinin "Menecment” kafedrasının müdiri, iqtisad elmləri doktoru, professor Kamil
Şahbazov və kafedranın dosenti, iqtisad elmləri namizədi Zakir Mirzəyev iştirak
ediblər.
Görüşdə Prezident İlham Əliyevin Fərmanı ilə təsdiq
edilmiş "Azərbaycan Respublikasının milli iqtisadiyyat perspektivi üzrə
Strateji Yol Xəritəsi”ndən irəli gələrək tərəflər arasında əməkdaşlığa dair
müzakirələr aparılıb. M.Ə.Rəsulzadə Bələdiyyəsinin sədri Hümbət Hüseynov qeyd
edib ki, Azərbaycanda qeyri-neft sektorunun davamlı və rəqabətqabiliyyətli
inkişafı dövlətin iqtisadi siyasətinin prioritet istiqamətidir. Əsası Azərbaycan
xalqının ümummilli lideri Heydər Əliyev tərəfindən qoyulan, uzunmüddətli dövr
üçün düşünülmüş iqtisadi siyasət ölkədə makroiqtisadi sabitlik və dinamik
iqtisadi inkişaf üçün əsaslı zəmin yaradıb. Nəticədə geniş sahibkarlar təbəqəsi
formalaşıb, ölkənin sosial-iqtisadi inkişafında özəl sektorun rolu daha da artıb
və ümumdünya iqtisadi sisteminə inteqrasiya sahəsində mühüm nailiyyətlər əldə
olunub. M.Ə.Rəsulzadə bələdiyyəsi "Strateji
Yol Xəritəsi”nin həyata keçirilməsi istiqamətində üzərinə düşən öhdəlikləri
yerinə yetirməyə hazırdır və bu istiqamətdə öz töhvələrini verəcəkdir.
"Strateji Yol Xəritəsi”ndə göstərildiyi kimi hədəfdə
elektron bələdiyyə sisteminin formalaşdırılması, yerli vergilər və ödənişlərin
elektronlaşdırılması, təsərrüfat fəaliyyəti ilə məşğul olan tərəflərin təhsilin
inkişafına və onun səviyyəsinin bazar münasibətlərinin yüksək tələblərinə
uyğunlaşdırılması, ali təhsilin maddi-texniki bazasının möhkəmləndirilməsi və
dünya standartlarına müvafiq şəkildə hazırlanmış mütəxəssislərin işlə təmin
edilməsinə qayğı və diqqətin artırılmasıdır.
Azərbaycan Dövlət İqtisad Universitetinin "Menecment” kafedrasının müdiri iqtisad elmləri
doktoru, professor Kamil Şahbazov və kafedranın dosenti Zakir Mirzəyev "Strateji
Yol Xəritəsi”nin həyata keçirilməsi istiqamətində M.Ə.Rəsulzadə Bələdiyyəsi tərəfindən
universitetlə əməkdaşlığa dair təklif
edilməsini yüksək dəyərləndiriblər. Onlar vurğulayıblar ki, bu, bələdiyyələrdən
gələn ilk təşəbbüsdür və bu təqdirəlayiqdir. Görüşdə bildirilib ki, əməkdaşlıq
çərçivəsində ölkə iqtisadiyyatının
inkişafı sahəsində problemlərin həllinə yönəldilmiş birgə elmi-tədqiqat işlərinin
aparılmasını, elmi konfrasların, forumların, simpoziumların keçirilməsi, bələdiyyə
əməkdaşlarının universitetdə ixtisaslarının artırılması və yenidən hazırlanması
işinin təşkili, universitetin tələbələrinə, gənc alim – aspirantlara bələdiyyədə
istehsalat təcrübəsi keçməsi üçün imkanlar və şəraitin yaradılması, təcrübə
keçmək və təhlil aparılması nəzərdə tutulub.
Müzakirələr nəticəsində M.Ə.Rəsulzadə Bələdiyyəsi
ilə Azərbaycan Dövlət İqtisad Universiteti arasında qarşılıqlı əməkdaşlığa dair
müqavilənin imzalanması, tədbirlər planının hazırlanması qərara gəlinib.