Sosial şəbəkə “qəhrəmanları” arasında “yorğan” davası
ABŞ-da Helsinki Komissiyasında keçirilən dinləmələr zamanı orada
iştirak edən bəzi "siyasi mühacirlər”in etdiyi çıxışlar radikal müxalifətdə
təmsil olunanlar və bəzi sosial şəbəkə "qəhrəmanları” arasında fikir ayrılığı
yaradıb. Hətta tərəflər arasında gedən "virtual savaş” qarşılıqlı ittihamlara səbəb
olub. Xüsusilə Emin Millinin "müxalifət marginallaşıb” ifadəsi ölkədəki radikalları
qəzəbləndirib. Əli Kərimlinin və Cəmil Həsənlinin tərəfdarları E.Millini
ayrılan qrantları təkbaşına mənimsəməkdə ittiham ediblər. E.Millinin ətrafında
olan "mühacir fəallar” isə Meydan TV-də C.Həsənli və Ə.Kərimliyə qadağa
qoyaması ilə bağlı ittihamlara qarşılıq veriblər. Hər iki tərəfin sosial
şəbəkədə "virtual savaşı” isə bir çox mətləblərə işıq salıb.
Bundan başqa daha bir "radikal cəbhədə” vəziyyət gərginləşib. Belə
ki, Xədicə İsmayılla hazırda ABŞ-da yaşayan Sevinc Osmanqızı arasında münaqişə
olub. Söz davasına çıxan tərəflərdən biri X.İsmayıl S.Osmanqızını Meydan TV-nin
direktoru olmağa çalışmaqda ittiham edib. O, həmçinin S.Osmanqızının indi
internet üzərindən hazırladığı verilişlərin sponsorunun Rəsul Quliyev olduğunu
deyib.
Sosial şəbəkədə digər bir qarşıdurma isə AXCP üzvləri ilə vəkil Aslan
İsmayılov və Qurban Məmmədov arasındadır. Burada da maraqlı tərəflər
biri-birini müxtəlif siyasi qruplara yönəlik fəaliyyət göstərməkdə ittiham
edir.
Bütün bunlar onu deməyə əsas verir ki, "demokratiya, söz və fikir
azadlığı”ndan danışanlar heç də ümumi məqsədə, əqidəyə xidmət etməyib. Bundan
əvvəl də Leyla Yunusun hansısa dairələrdən kitab yazmaq üçün küllü miqdarda pul
alması elə ona yaxın insanlar tərəfindən sosial şəbəkədə tənqid edildiyinin
şahidi olduq. Buradan belə bir qənaətə gəlmək olar ki, "radikal düşərgə”də baş
verənlər elə əslində "yorğan” davasıdır. Yəni, verilən qrantları bölüşdürə
bilmədikləri üçün indi biri-biriləri ittiham edirlər.
Mövzu ilə bağlı Milli Məclisin
deputatı, politoloq Hikmət Məmmədov bildirdi ki, müxtəlif antiazərbaycan mərkəzlərdən qrant
alan qruplar artıq öz aralarında maliyyə vəsaitlərinin bölüşdürülməsi ilə bağlı
razılığa gələ bilmirlər və bir-birilərini ittiham etməyə başlayıblar: "Bu
mərkəzlər bu və ya digər formada müxtəlif dəyərləri istismar etməklə
Azərbaycana qarşı daim təxribatçı mövqe tuturlar və çox təəssüf ki, bu prosesdə
ölkəmizdə qeyri-hökumət təşkilatları adı altında fəaliyyət göstərən, siyasi
baxışlarının guya fərqli olduğunu irəli sürən, ayrı-ayrı adamları şantaj edən
qruplardan da istifadə edirlər. Ancaq əlbəttə ki, Azərbaycana qarşı bu
düşünülmüş, məqsədyönlü strategiya uğurlu olmur, çünki Azərbaycan cəmiyyəti
nəyin baş verdiyinin fərqindədir və ona qarşı necə mübarizə aparmağın yollarını
bilir. Artıq bu uğursuz, yəni şantaj taktikası nəticə vermir və müxtəlif
antiazərbaycan mərkəzlərdən qrant alan qruplar özləri öz aralarında maliyyə
vəsaitlərinin bölüşdürülməsi ilə bağlı razılığa gələ bilmirlər, bir-birilərini
qısqanırlar və onlara tapşırılan işi əslində yarıtmadığına görə "ağaları”
tərəfindən bir növ cəzalandırılırlar. Nəticədə onların maliyyə mənbələri
kəsilir. Son dövrlərdə sosial şəbəkələrdə bir-birilərini qarşılıqlı şəkildə
ittiham etmələri, verilən qrantın mənimsənilməsi ilə bağlı iddialar irəli
sürmələri bununla bağlıdır”.
H.Məmmədov əlavə etdi ki, əlbəttə, öz xalqının, öz millətinin
iradəsinə, maraqlarına qarşı çıxış etmək yaxşı hal deyil: "Bu hadisə bir daha
onu göstərir ki, bu cür addımların perspektivi yoxdur və Azərbaycanda olan
sabitliyi pozmağa heç kəs qadir deyil. Çünki Azərbaycanda sabitliyin
təminatçısı Azərbaycan xalqıdır. Azərbaycan əleyhinə olan mərkəzlər də, onlara
xidmət edənlər də bu həqiqəti nə qədər tez dərk etsələr, bir o qədər yaxşı
olar”.
Politoloq Elçin Mirzəbəyli "Kaspi”
qəzetinə açıqlamasında bildirdi ki, bu insanların indiyədək korporativ
maraqları olub: "Bu şəxslərin bu günədək qrantla bağlı narazılıqlarının olduğu
hər kəsə bəllidir. Diqqət yetirsək, mütəmadi olaraq Qənimət Zahid, Əli Kərimli
və digər şəxslər haqqında bu cür məlumatlar yayılıb. Son olaraq bir il öncə 175
min avroluq qrantla bağlı Əli Kərimli ilə Qənimət Zahid arasında konflikt
barədə məlumatlar yayılmışdı və bu ciddi faktlarla mətbuata açıqlanmışdı.
Bundan öncə də belə proseslər baş verib. Şübhəsiz ki, bu insanların öz
korporativ maraqlar var. Belə olmasaydı ideyalarına, prinsiplərinə dönük
çıxmazdılar. Məsələn, zamanında dünyəvi-demokratik dövlət quruluşundan dəm
vuran insanlar sonradan konstitusion dövlət quruluşunu dəyişməyə cəhd etməyə
çalışan radikal ekstremistlərin müdafiəsinə qalxdılar. Bütün bu faktlar sübuta
yetirir ki, belə insanlar üçün dəyərlər, ideoloji faktorlar yoxdur”.
E.Mirzəbəyli qeyd etdi ki, bir siyasətçi üçün ideoloji faktorlar
yoxdursa, o, sadəcə, alverçidən başqa bir şey deyil, xırda spekulyantdır:
"Belələrinin fəaliyyəti yalnız özünün maddi maraqlarının təmin olunmasına
yönəlir. Onların bu günədək yürütdüyü siyasətin, eləcə də gördükləri işlərin
mahiyyətində də bu dayanır. Bu baxımdan da virtual aləmdə, sosial şəbəkələrdə belə
insanların qarşılıqlı ittihamlarla çıxış etməsini tamamilə təbii qəbul edirəm. Bu
cəbhədə deqradasiya prosesi çoxdan baş verib. İndiki halda özlərini ifşa
etmələri, əslində bu şəxslərin fəaliyyətinin, düşüncəsinin və əqidələrinin
mahiyyətini ortaya qoyur”.
AZAD