Sosial sahədəki problemlərin həllinə doğru
"Sosial təminat sahəsində ciddi islahatlar
aparılmalıdır. Əmək və Əhalinin Sosial Müdafiəsi Nazirliyinin yeni rəhbərliyi
qarşısında belə vəzifələr qoyulub. Bu sahədə buraxılmış səhvlər, pozuntular tam
aradan qaldırılmalıdır. Sosial ədalət tam bərqərar olmalıdır və şəffaflıq tam
təmin edilməlidir. Dövlət bu sahəyə çox böyük diqqət göstərir və mən dəfələrlə
demişəm ki, bizim siyasətimizin mərkəzində Azərbaycan vətəndaşı dayanır,
xüsusilə sosial cəhətdən az təmin edilmiş vətəndaş. Məhz buna görə biz ünvanlı
sosial yardım sisteminə keçmişik. Məhz buna görə yüz minlərlə ailə dövlətdən bu
təminatı alır. Ancaq bir çox hallarda vətəndaşların hüquqları pozulur,
ədalətsizlik hökm sürür, yardıma ehtiyacı olan yardım almır, yardıma ehtiyacı
olmayan yardımı alır və ondan sonra o vəsaiti dövlət məmurları ilə bölüşür.
Belə hallar kifayət qədər çoxdur, indi ciddi araşdırma aparılır. Sosial təminat
sahəsində tam şəffaflıq təmin edilməlidir, sosial ədalət tam bərqərar olmalıdır”.
Günel Azadə
Bu fikirləri Prezident İlham
Əliyev Nazirlər Kabinetinin 2018-ci ilin birinci yarısının sosial-iqtisadi
inkişafının yekunlarına və qarşıda duran vəzifələrə həsr olunan iclasında
söyləyib.
Prezident vurğulayıb ki, bununla
bərabər, sosial sahənin şəffaflaşdırılması və beynəlxalq təcrübə əsasında
fəaliyyət göstərməsi bizim iqtisadi inkişafımıza da böyük təkan verəcək: "Çünki
qeyri-formal məşğulluq Azərbaycanda kütləvi xarakter daşıyır. İndi hökumət bu
məsələ ilə ciddi məşğul olur, nazirlik də məşğul olur və biz buna son
qoymalıyıq. Buna son qoymaq üçün mexanizmlər var, işlənilir və hesab edirəm ki,
yaxın gələcəkdə böyük irəliləyiş olacaqdır. Biz qeyri-formal məşğulluqla bağlı
çox ciddi addımlar atırıq və atacağıq”.
Prezidentin
müşavirədəki çıxışına münasibət bildirən
Konstitusiya Araşdırmaları Fondunun rəhbəri, Əmək və Əhalinin Sosial Müdafiəsi
Nazirliyinin yanında İctimai şuranın üzvü Əliməmməd Nuriyev bu sahədə həllini gözləyən problemlərdən danışdı:
"Əmək və Əhalinin Sosial Müdafiəsi Nazirliyinin bu istiqamətdə gördüyü işlərin
sayı artmaqdadır. Bir çox sahələrdə
vəzifələr müəyyənləşdirilib. Şəffaflığın təmin edilməsi üçün görüləcək əsas
işlərdən biri ünvanlı sosial yardımın verilməsi prosesində yaranan problemlərin
aradan qaldırılmasıdır. Belə ki, cənab prezident də öz çıxışında qeyd edib ki,
bəzi hallarda bu kimi sosial yardımlar ehtiyacı olanlara yox, olmayanlara
verilir. Bu, həllini gözləyən ən vacib məsələlərdəndir. Digər tərəfdən,
əhalinin məşğulluq proqramına başlanması da vacib sayılan məqamlardandır.
Məşğulluq sahəsində həyata keçiləcək islahatlar əhali arasında yoxsulluğun
həlli istiqamətində çox əhəmiyyətli olacaq. Onu da qeyd edim ki, nazirlik bu
məsələ ilə bağlı böyük tədbirlər planı hazırlayıb. Həllini gözləyən digər vacib
bir məsələ isə qeyri rəsmi məşğulluqla əlaqəlidir. Belə ki, bəzi müəssisələrdə
işçi sayı olduğundan az göstərilir. Rəsmi işçi sayı ilə real işçi sayı üst üstə
düşmür. Bu da gələcəkdə pensiyaların verilməsində problemlərin yaranmasına
şərait yaradır. Bu addım həmçinin qeyri formal iş mühitinin formalaşmasına
səbəb olur”.
Müsahibimiz
bildirir ki, qeyri şəffaflığın müşahidə olunduğu sahələrdən biri də əlliliyin
müəyyən olunmasıdır: "Bu sahədə də bəzi problemlər olub. Əlil olmayan insanlara
əlillik dərəcələrinin verilməsi bu sahədə olan şəffaflığın elə də yaxşı
olmadığının göstəricisidir. Bildirim ki, Səhiyyə Nazirliyi ilə Əmək və Əhalinin
Sosial Müdafiəsi Nazirliyi bu istiqamətdə şəffaflığı təmin etmək üçün birgə
tədbirlər planı hazırlayıb. Mərkəzləşdirmə siyasəti güclənəcək. Həmçinin
kadrların yerləşdirilməsi məsələsində də yeni addımların atılmasına böyük
ehtiyac var. Düşünürəm ki, bu məsələ də, yaxın zamanda öz həllini
tapacaq”.
Vətəndaşların Əmək Hüquqlarının Müdafiə Liqasının
rəhbəri Sahib Məmmədov qeyd etdi ki, sosial yardımlarının verilməsində ünvanlılığın pozulması həmişə
prezidenti narahat edib: "Bizdə
əhalinin təminatsız təbəqəsinə ünvanlı sosial yardımların verilməsi prosesinə
2006-cı ildən başlanılıb. Həmin dövrdən bu yana dəfələrlə bu sahədə şəffaflığın
artırılması ilə bağlı həm qanunvericiliyə dəyişiklik edilib, həm də müxtəlif
mexanizmlər yaradılıb. Yardımların müəyyən edilməsi ilə bağlı fəaliyyət
göstərən qurumların və şəxslərin təminatı ilə bağlı ayrıca prezident fərmanı
olub. 2012-ci ildə ünvanlı sosial yardım proqramına alternativ olaraq özünü
dəstək proqramı işə salındı. Baxmayaraq ki, pilot mərhələ uğurla başa çatdı,
amma nazir dəyişikliyindən sonra proyekt dayandırıldı. Bir neçə il bundan əvvəl
özünüməşğulluq proqramına start verildi. Əslində əvvəlki proqram da çox maraqlı
idi. Bir sözlə, ünvanlı dövlət sosial yardımlarının verilməsində ünvanlılığın
pozulması həmişə prezidenti narahat edib və daim bu məsələlərə toxunub.
Toxunmaqla yanaşı, qanunvericilik təşəbbüsü ilə çıxışlar edib, öz fərmanları
ilə bu məsələləri tənzimləməyə çalışıb. Təəssüf doğuran odur ki, hələ də bu
məsələ sona qədər həllini tapmayıb”.
S.
Məmmədov bildirdi ki, şəffaflığın təmin olunması üçün geniş işlər görülməlidir:
"Bütün məsələlərin həllində, o cümlədən qərarların qəbul edilməsində vətəndaş
cəmiyyətinin iştirakçılığı, kütləvi informasiya vasitələrinin çıxışı təmin
edilməlidir. Vəsaitlərin kimlərə, hansı məqsədlərə, hansı işlərə görə ayrılması
məsələsi və bütün məlumatlar bazada olmalıdır və bunu istənilən şəxs əldə edə
bilməlidir. İstər dövlət vəsaiti, istərsə də dövlət sığorta şirkətinin
vəsaitindən ayrılan pulun ünvanına dəqiq çatması, prezidentin ən böyük
istəyidir”.
Günel Azadə