Sonuncu xəbərdarlıq
Kompromis əldə edilməsə, Avropa Gürcüstana sanksiya
tətbiq edəcək?
Qonşumuz
Gürcüstan özünün müstəqilliyi tarixində hələ indiki kimi çətin duruma düşməyib.
Necə deyərlər, stol üzərinə Gürcüstanın Avropa İttifaqı ilə münasibətlərinin gələcəyi
qoyulub. Avropalı parlamentarilərinin gürcü siyasətçilərinə ünvanladıqları
müraciətin qısa rezyumesi məhz belədir. Məktub bütün düşərgələri təmsil edən
qüvvələrin üzərinə, sanki su çiləmiş olub. Gürcüstan üçün həlledici hesab
edilən məqamda, yeddi avroparlamentari açıq məktubla çıxış edərək qəti şəkildə
bildiriblər – siyasətçilərin tərsliyi sözün əsl mənasında onlara baha başa
gələcək. Görünən də odur ki, siyasi gərginlik səngimək bilmir. Və müxalifətlə
iqtidar arasında parlament seçkilərindən sonra yaşananlar Avropanı ciddi
şəkildə narahat edir. Artıq Avropa açıq şəkildə bəyan edir ki, hakimiyyət
müxalifətlə kompromisə getməlidir. Avropa İttifaqının vasitəçiliyi ilə ikiraundlu
danışıqlar iflasla nəticələndiyindən, Tbilisidə səfərdə olan Avropa Parlamentinin
deputatları belə bir sərt xəbərdarlıqla çıxış ediblər. Avrodeputatlar, artıq
müvafiq təklifi Avropa Komissiyası qarşısında qaldırmağa hazırlaşır. Məktubda
əsas təhlükəli və vacib məqam odur ki, Gürcüstanla Avropa İttifaqı arasında
münasibətlərin gələcəyinin stol üzərinə qoyulduğu qəti şəkildə ortaya qoyulur.
Bu da hər bir gürcünü narahat edir. Əlbəttə ki, bunun məsuliyyəti rəsmi
Tbilisinin üzərinə düşür. Gürcüstan tarixində ilk dəfə olaraq bildirilir ki,
ölkəyə investisiya formasında edilən texniki yardım və proqramlar dayandırıla
bilər. Müxalifət fəalı Aleko Elisaşvili hesab edir ki, məktub tək iqtidara
deyil, müxalifətə qarşı da yönəlib: "Bu, tək utancverici hal deyil, həm də
bizim tərəfimizdən məsuliyyətsizlik və cinayət deməkdir. Bizim tərsliyimiz
ucbatından Qərb cəmiyyətinin gözündə ölkənin imicinə zərbə vurulmayıb, həm də
maliyyə sanksiyası müzakirə olunur. Təsəvvür edin, 60 mln. avro yardımın
verilməsi dayanarsa, hansı zərbə dəymiş olacaq”. Gürcü politoloq Georgi
Xuxaşvili bildirib ki, Avropa gürcüləri əldə olunan razılaşmalara əməletmə
prosesinə qoşulmağa çalışır. Dərhal da əlavə edib ki, Brüssel Avropa siyasi
mədəniyyətinə uyğun olaraq dərhal deyil, mərhələ ilə hərəkət etməyə çalışacaq.
Əvvəlcə nümayişkaranə şəkildə hər hansı bir görüş keçirməkdən imtina edəcək,
səfərlər ləğv ediləcək, sonra isə əgər Gürcüstan hakimiyyəti ağıllanmayacaqsa,
o zaman real sanksiyalar da tətbiq edə bilər.
60 milyon avro verilməsə...
Söhbət ilk
növbədə Gürcüstana ayrılması nəzərdə tutulan 60 milyon avronun verilməsi
prosesinin dondurulmasından gedir. Brüsselin rəsmi Tbilisini cəzalandırmaq
istəyini Avropa Parlamentinin deputatlarının qeyd etdiyimiz kimi, yazdıqları
məktub də göstərir. Avropa Parlamentinin xarici məsələlər üzrə komitəsinin
sədri Devid Makkalisterin, Aİ və Cənubi Qafqaz ölkələri ilə əməkdaşlıq üzrə
parlament komitəsinin həmsədri Marina Kalyurandın, eləcə də, Gürcüstan üzrə
həmməruzəçi Sven Mikserin yazdığı məktubda bildirilir ki, gürcü partiyalarının
qarşılıqlı kompromisə getməkdən imtina etmələrindən sonra siyasi liderlər hər
hansı bir biznes təklifləri gözləməməlidir. Məktub müəllifləri qeyd ediblər ki,
yaxın günlərdə Avropa Komissiyasına Gürcüstanla münasibətləri əks etdirən
kompleks tədbirlər işləyib hazırlamaq üçün müraciət edəcəklər. Səbəb də odur
ki, Avropa Komissiyasının (daha dəqiq desək, Kristian Danielsonun və Avropa
İttifaqı Şurası rəhbəri Şarl Mişelin)
vasitəçiliyi ilə iki dəfə keçirilən danışıqların uğursuzluğa düçar
olması "nəticəsiz” qalmayıb. Bəyanat şübhə yeri qoymur – söhbət hakim "Gürcü
Arzusu” və onunla qarşıdurma vəziyyətində olan "Vahid Milli Hərəkat”ın
cəzalandırılmasından getmir. Söhbət Gürcüstanın dövlət olaraq
cəzalandırılmasından gedir. Lakin bununla belə, əsas məsuliyyət hakim
partiyanın üzərinə düşür. Avropa Parlamentinin üzvləri tək hakimiyyət
partiyasını tənqid etmir, İrakli Qaribaşvili hökumətini, "Vahid Milli Hərəkat”
və yaxud Gürcüstanın birləşmiş müxalifətini deyil, bütövlükdə ölkənin siyasi
sinfini tənqid edirlər. Məktub üzə çıxdıqdan sonra "Gürcü Arzusu”nun Siyasi
Şurası dərhal toplantı keçirib. Eləcə də, intensiv məsləhətləşmələrə müxalifət
partiyalarının liderləri də başlayıb. Buna baxmayaraq, tərəflər iki başlıca
məsələ ilə bağlı kompromisə getməyə hazır deyillər. Bu tələblər də müxalifətin
nail olmaq istədiyi növbədənkənar seçkilərin təyin olunması və "Vahid Milli
Hərəkat”ın lideri Nikanor Meliyanın azad olunmasıdır. Partiya sədri fevralda
məhkəmənin təyin etdiyi girovu vermədiyinə görə həbs edilib. "Gürcü Arzusu”nun
parlament fraksiyasının sədr müavini Qivi Mikanadze bildirib ki, məktub Avropa
parlamentinin mövqeyi demək deyil: "Və xüsusi ilə qeyd etməliyəm ki, maliyyə
sanksiyalarını Avropa Parlamenti tətbiq etmir. Bunu Avropa Komissiyası həyata
keçirir”. Ardınca da, Avropa İttifaqının Gürcüstandakı nümayəndəliyinin
rəhbəri, isveçrəli diplomat Karl Harçel gürcü siyasətçilərini xəbərdarlığa
hörmətlə yanaşmağa çağırıb. Qeyd edək ki, Avropa İttifaqının vəd etdiyi maliyyə
ayırdığı pandemiya şəraitində gürcü iqtisadiyyatının stabilləşməsi üçün nəzərdə
tutulur. Söhbət Avropa İttifaqı ölkələrində gürcü vətəndaşlarının leqal şəkildə
mövsümü kənd təsərrüfatı işlərinə cəlb olunmasından gedir. Artıq bu işlərə 100
mindən artıq insan qoşulmaq istədiyini bildirib.
Süpürgə aksiyası
Gürcü siyasi
gərginliyi isə buna baxmayaraq sərt formada davam edir. Batumidə hakim
partiyanın tərəfdarları müxalif "Vahid Milli Hərəkat”ın ofisini süpürgə və
yumurta atəşinə tutublar. Süpürgəni də ona görə nümayiş etdirmək istəyiblər ki,
bunu keçmiş iqtidar partiyasının güc simvolu hesab edirlər. Müxalifətdə hesab
edirlər ki, hakim qüvvələrin hərəkətləri vətəndaş qarşıdurmasına gətirib
çıxaracaq. 9 il əvvəl süpürgələr həbsxanalarda məhbusların sistemli şəkildə
hüquqlarının pozulmasını əks etdirirdi. Bu kadrların 2012-ci il parlament
seçkilərindən əvvəl nümayiş olunması öz rolunu oynadı. Gürcü seçicilərinin
böyük əksəriyyətinin Mixail Saakaşvilinin "Vahid Milli Hərəkat” partiyasına
deyil, Bidzina İvanişvilinin "Gürcü Arzusu”na səs verməsinə gətirib çıxardı. O
zaman və sonrakı illərdə keçmiş iqtidar partiyası etiraf edirdi ki,
həbsxanalarda sistemli qanun pozuntuları olub, lakin süpürgələrin əks olunduğu
videolar da qondarma olub. Süpürgələrlə məhbusların zorlanması faktını "Gürcü
Arzusu”nun liderlərindən olan Sozar Subari bu gün də təsdiq edir. O, süpürgələri
gürcü siyasətində Nyutonun üçüncü qanununun təzahürü kimi nəzərdən
keçirilməsini təklif edir. Əlavə edib ki, "Gürcü Arzusu”, əgər müxalifət özünü
konstruktiv aparacaqsa, dialoq aparmağa hazırdır. "Əgər bu müxalifət boykotu və
etiraz aksiyalarını davam etdirəcəksə, parlamentə girməyəcəksə, indiki hakimiyyətlə
məhkəmə və seçki islahatları aparmayacaqsa – hansı əməkdaşlıqdan söhbət gedə
bilər”, - deyə əlavə edib. Süpürgənin keçmiş iqtidar partiyasının simvolu
olduğunu hakim partiyanın digər deputatları da təkrarlayıblar.
Batumi
insidentinin əleyhdarları hesab edirlər ki, bu tip tədbirlər baş nazir İrakli
Qaribaşvilinin verdiyi vədin yerinə yetirilməsi anlamına gəlir. Belə ki, ötən həftə Avropa İttifaqı heyəti ilə
görüşdən sonra baş nazir bildirib ki, müxalifətə vaxt itirmək niyyətində deyil.
"Vahid Milli Hərəkat”dan ayrılan "Milli Hərəkat” lideri Xatiya Dekanoidze
bildirib ki, Rustavidə onun həmkarı Georgi Mqebarişvili bıçaqla yaralanıb. Bunu
da Batumi hadisələrinin davamı adlandırıb. Bildirib ki, "Gürcü Arzusu” üçün
siyasi böhranın həlli əhəmiyyətli deyil: "Bütün bunlar hakim partiyanın
idarəçiliyinin doqquzuncu ilində baş verir. Batumidə baş verənlər,
tərəfdarımızın bıçaqlanması onu deməyə əsas verir ki, "Gürcü Arzusu” ölkədəki
qütbləşməyə görə məsuliyyəti öz üzərinə götürmək və böhranı həll etmək istəmir”.
Hakimiyyət fəallarının aktivləşməsi və mobilləşməsini, müxalifət, mayın 15-də
keçirmək istədikləri irimiqyaslı etiraz aksiyası ilə əlaqələndirir. Bu aksiyada
əsas tələb növbədənkənar parlament seçkilərinin keçirilməsi, müxalifət lideri,
"Mtavari” müxalif televiziyasının lideri
Georgi Ruruanın həbsdən azad edilməsi olacaq.
"Süpürgə
aksiyası” və onun hansı məqsədi güddüyünü "Aqmaşenebeli Strategiyası”
hərəkatının lideri Sergo Çiladze də şərh edib. "Hakimiyyət bildirir ki, ölkəni
Avropa İttifaqına doğru aparır. Eyni zamanda, süpürgələrlə hərəkət edir. Bu
süpürgələrlə Avropa İttifaqına daxil ola bilməyəcəyik, qütbləşmə ilə də. Normal
ölkədə müxalifətə qarşı belə bir əks tədbirlər görülməsi yolverilməzdir. Bununla
da hakimiyyət diqqəti digər problemlərin həllindən uzaqlaşdırmağa çalışır. Hələ
regionlara getmək istəyən müxalifətə qarşı baryerlər yaratmağa çalışır. Əks
aksiyalar keçiriləcəyi anonsunu verir. Bütün bunlar məsuliyyətsizlikdir,
hakimiyyətin düşmənçiliyi anlamına gəlir, bununla vətəndaş qarşıdurmasını
gücləndirir”, -deyə bildirib.
Müxalifətin boykot qərarına münasibət necədir?
O da bəlli olur
ki, əhalinin 60 faizi müxalifətin boykot qərarına neqativ yanaşır. Bu nəticə
Beynəlxalq Respublikaçılar İnstitutunun keçirdiyi sorğudan sonra ortaya çıxıb.
Sorğu başqa məsələləri də üzə çıxarıb. Gürcülərin 79%-i hesab edir ki, son bir
ildə ölkədəki iqtisadi vəziyyət pisləşib. Respondentlərin 63%-i ölkədə iqtisadi
vəziyyətin məişət səviyyəsində pisləşdiyini bildirib. Gürcülərə görə, hazırda
ölkə əhalisinin əsas problemi işsizlik (65%), qiymət artımı (37%) və
yoxsulluqdur (26%). Sorğuya əsasən, hazırda Gürcüstanda əhali üçün qəbul olunan
şəxs Patriarx II İlya sayılır. Əhalinin 89%-i II İlyanı dəstəklədiyini bildirib.
Ondan sonrakı yerlərdə keçmiş baş nazir Georgi Qaxariya (65%), Tbilisi meri
Kaxa Kaladze (54%), "Avropa Gürcüstanı” Partiyasının lideri David Bakradze
(52%), "Vahid Milli Hərəkat” Partiyasının lideri Nika Meliya (42%), Bidzina
İvanişvili (40%) və digərləri qərarlaşıb. Respondentlərin 35%-i gələn həftə
seçki olarsa, "Gürcü Arzusu” Partiyasına səs verəcəyini bildirib. Ondan sonrakı
pillələrdə "Vahid Milli Hərəkat” Partiyası (18%), Avropa Gürcüstanı Partiyası
(3%), "Aqmaşenebeli Strategiyası” (3%) qərarlaşıb.
Azər