SOCAR İstiqrazları üzrə ilk faiz ödənişi həyata keçirilib - Fotolar
Bu gün SOCAR İstiqrazları
üzrə ilk faiz ödənişinin həyata keçirilməsi münasibətilə SOCAR-ın baş ofisində
- SOCAR TOWER-da mətbuat konfransı
keçirilib. Mətbuat konfransında SOCAR-ın və onun struktur bölməsi olan «SOCAR
Capital» şirkətinin rəhbərliyi də iştirak edib.
«SOCAR Capital» şirkətinin
Müşahidə Şurasının sədri SOCAR-ın vitse-prezidenti Süleyman Qasımov bildirib
ki, SOCAR İstiqrazlarının buraxılması və təkrar bazarda tədavülü SOCAR-ın
maliyyə mənbələrini şaxələndirməklə yanaşı, ölkə vətəndaşlarının vəsaitlərinin
daha səmərəli istifadəsinə və Azərbaycanın qiymətli kağızlar bazarının
inkişafına ciddi dəstək olub. «SOCAR İstiqrazlarının buraxılması ilə əhalinin
yığımlarının iqtisadi proseslərə cəlb olunması və istifadəsiz vəsaitlərin öz
sahiblərinə fayda gətirməsi üçün əlverişli imkan yaradılıb. Nəticədə,
istiqrazlara yatırılan vəsaitlər bu gün öz sahiblərinə ilk gəlirlərini gətirib»-deyə
S.Qasımov bildirib.
Mətbuat konfransında
bildirilib ki, yanvarın 17-də həyata keçirilən faiz ödənişi çərçivəsində SOCAR
İstiqrazlarının sahiblərinə ümumilikdə 1 milyon 250 min ABŞ dolları həcmində
faiz ödənilib. Bu vəsait istiqraz sahiblərinin bank hesablarına artıq köçürülüb
və vətəndaşlar bu pulları istədikləri kimi istifadə edə bilərlər.
Mətbuat konfransında
bildirilib ki, SOCAR İstiqrazlarının buraxılmasından əldə edilən vəsaitlər şirkətin
maliyyələşmə imkanlarının şaxələndirilməsi, xaricə faiz ödənişlərinin azaldılması
və faizlərin xaricə deyil, ölkə daxilinə, ölkə vətəndaşlarına ödənilməsi üçün
istifadə edilib.
Mətbuat nümayəndələrinin
suallarına cavab verən SOCAR-ın qiymətli kağızlarının emissiyası üzrə baş məsləhətçisi
və "SOCAR Capital” şirkətinin Məsləhət Şurasının üzvü Əli Ağaoğlu bildirib ki,
hazırda SOCAR İstiqrazları üzrə investorlara təklif olunan şərtlər nəinki Azərbaycanda,
hətta bütün regionda ən əlverişli şərtlər sayıla bilər: «SOCAR bəyan edib ki,
istiqraz sahiblərindən bu kağızları istənilən vaxt nominal qiymətə, yəni 1000
dollara almağa hazırdır. Bu şərtlər investorlar üçün 100 faizlik zəmanət deməkdir
və indiyədək heç bir istiqraz buraxılışında belə bir zəmanət tətbiq
olunmayıb».
SOCAR-ın vitse-prezidenti
S.Qasımov isə bildirib ki, məhz belə əlverişli şərtlərinə görə SOCAR İstiqrazlarının
ilkin buraxılışı zamanı investorlar tərəfindən 200 milyon dollardan artıq tələb
qeydə alınıb. Onun sözlərinə görə, bu da istiqrazların ümumi həcmindən iki dəfə
artıqdır.
Qeyd olunub ki, SOCAR İstiqrazlarının
təkrar bazarı da həddən artıq aktiv olub. Bu kağızların dövriyyəyə
buraxılmasından keçən 3 ay ərzində təkrar bazarda istiqrazlar üzrə 40 milyon
dollara yaxın əməliyyat aparılıb. Təkrar bazarda istiqrazlara fiziki şəxslərin
marağı xüsusilə böyük olub.
Tədbirdə bildirilib ki, təkrar
bazarda istiqrazları Azərbaycan vətəndaşları ilə yanaşı, xarici vətənaşlar da
alırlar. Bu sahədə Gürcüstan, Türkiyə və Rusiya vətəndaşları daha fəaldırlar.
Mətbuat konfransında qeyd
olunub ki, ölkə vətəndaşları, eləcə də yerli və xarici fiziki, hüquqi şəxslər
SOCAR İstiqazlarını təkrar bazardan əldə edə bilərlər. Bunun üçün onlar ASAN
Xidmətin 1 və 5 saylı Xidmət Mərkəzlərinə, eləcə də *19 99 qaynar xəttə müraciət
etməlidirlər.
Xatırladaq ki, Dövlət
Neft Şirkətinın (SOCAR) daxili bazar üçün nəzərdə tutulmuş SOCAR İstiqrazları
2016-cı ilin sentyabr ayında buraxılıb.
İstiqrazlar 100 milyon
dollar həcmində, 5 illik müddətə və illik 5% gəlirliliklə emissiya edilib.
İlkin olaraq abunə yazılışı yolu ilə satılan istiqrazlara investorlar tərəfindən
tələbat 2 dəfədən artıq olub.
Oktyabr ayının 17-dən isə
SOCAR İstiqrazlarının təkrar bazarda dövriyyəsinə başlanılıb. Faiz ödənişləri
ildə 4 dəfə həyata keçiriləcək. İlk faiz ödənişi 17 yanvar 2017-cı ildə həyata
keçirilib.