Siyasətçi potensialı olmayanın siyasi liderlik arzusu
Azərbaycanda özünü
müxalifətçi hesab edən, radikal çıxışlarla cəmiyyətdə çaşqınlıq yaratmaq
istəyən əksəriyyət şəxslərin bu və ya digər formada xarici ölkələrin xüsusi
xidmət orqanları ilə bağlılığı artıq heç kəsdə şübhə doğurmur. Onların xaricdən
siyasi sifarişlər aldığı və bu sifarişləri yerinə yetirmək üçün
maliyyələşdirildikləri də hamıya gün kimi aydındır. Azərbaycanda yalnız
seçkidən-seçkiyə, yaxud da hansısa beynəlxalq əhəmiyyətli tədbirin keçirilməsi
ərəfəsində "fəallaşan” bu "5-ci kolon” təmsilçilərinin əsl məqsədlərini
gizlətmək üçün uydurduqları yalanlar isə hətta bağçaya gedən uşaqlarda da gülüş
doğurur. Çünki, zaman o zaman deyil. İnsanlarımız 90-cı illərin əvvəlində
olduğu kimi müxalifət liderlərinin boğazdan yuxarı sözlərinə inanacaq, onları
dəstəkləyəcək durumda deyillər. Azərbaycan inkişaf edib, insanlarımızın dünya
görüşü daha da artıb. İndi xalq, hər bir vətəndaş ağı-qaradan seçməyi yaxşı
bacarır. Lakin reallıq hissini itirən, öz ayıbına kor olmayan bəzi "müxalifət
liderləri” olanlardan nəticə çıxarmır, hərdən varlıqlarını sürdürmək üçün,
yaxud da aldıqları sifariş əsasında qeyri-obyektiv, həqiqətlə uzlaşmayan
fikirlər söyləyib gündəmə gəlirlər. REAL Partiyasının həbsdən yaxın vaxtlarda
azad olunmuş sədri İlqar Məmmədov da belələrindəndir.
Xatırladaq ki, vaxtilə
Azərbaycan Milli İstiqlal Partiyasında təmsil olunan, müxalifətçi kimi görünmək
istəyən İ.Məmmədov Qərb dairələrindən ciddi maliyyə dəstəyi alan şəxs kimi
tanınır. Bir müddət ABŞ-ın Azərbaycandakı səfirliyində işləməsi, daha doğrusu
bəslənməsi, təlimatlanması, həmçinin dünyaca məşhur maliyyə fırıldaqçısı, Şərq
ölkələrini bürüyən "Facebook inqilabları”nın – "Ərəb baharının” əsas
maliyyəçisi Corc Sorosun təşkilatı ilə bağlılığı İ.Məmmədovun böyük məbləğdə
qrantlar almasına hər zaman "yaşıl işıq” yandırıb. Bu şəxs 2006-cı ildən
etibarən Soros Fondunun Azərbaycandakı Açıq Cəmiyyət İnstitutunun İdarə
Heyətinin üzvü olub. Belə bir tərcümeyi-hala sahib olan, daim xaricdən aldığı
sifarişləri yerinə yetirən İ.Məmmədov bu gün keçirdiyi mətbuat konfransında
Azərbaycan reallıqları barədə qeyri-obyektiv fikirlər səsləndirib, hətta özünün
həbsinə "siyasi çalarlar” qatmağa cəhd edib. O jurnalistlər qarşısında çıxış
edərək deyib ki, guya onun həbsinin bir nömrəli səbəbi 2013-cü il prezident
seçkilərində iştirak edəcəyi barədə açıq niyyəti, həmçinin bu barədə verdiyi
açıqlamalar olub.
Halbuki, o, 2013-cü il yanvarın
23-də İsmayıllı şəhərində baş verən iğtişaşları qızışdırmaqda günahlandırılıb. Baş
Prokurorluq və Daxili İşlər Nazirliyinin həmin vaxt yaydığı məlumata görə, aparılmış
araşdırmalarla müəyyən edilib ki, Müsavat Partiyası başqanının müavini Tofiq
Yaqublu və REAL hərəkatının həmsədri İlqar Məmmədov 2013-cü il yanvarın 24-də
İsmayıllıya gedərək, rayon sakinləri arasında polisə müqavimət göstərmək, heç
kimə tabe olmamaq, nəqliyyat vasitələrinin yolunu bağlamaq kimi ictimai-siyasi
sabitliyin pozulmasına yönələn çağırışlar ediblər.
Məhz bu səbəbdən, yəni sırf
cinayət əməlinə yol verdiklərinə görə bir sıra şəxslərlə bərabər, T.Yaqublu və İ.Məmmədova
qarşı da ittiham irəli sürülüb.
Göründüyü kimi İ.Məmmədov konkret
cinayət əməlinə görə həbs olunub, həbsdə olduğu müddətdə hüququn aliliyinə
söykənərək davamlı surətdə hüquqlarının müdafiəsini təşkil edib, növbəti
məhkəmə instansiyasının birində azad olunması barədə qərar qəbul edilib. Amma
həyatı boyu yalan danışmağa, həyata qara eynək arxasından baxmağa vərdiş edən
bu şəxs həbsdən azad olunandan sonra bir qrup jurnalisti başına toplayaraq
absurd bəyanatlar verib, təkrar gündəmə gəlməyə çalışıb. Yaşadığı illərdə
Azərbaycan naminə hər hansı fəaliyyətə imza atmayan, faydalı işlə məşğul
olmayan, ictimai-siyasi fəaliyyət adı altında xarici dairələrin əlaltısına
çevrilən İ.Məmmədov öz "köhnə peşəsinə” sadiq qaldığını nümayiş etdirib.
Məlumdur ki, xarici dairələrlə əlaqəsi olan bu "müxalifət liderinə” xaricdən
ötürülən pullar heç vaxt məqsədsiz olmayıb. Çünki, indiki dönəmdə hər yoldan
ötənə minlərlə, yüzminlərlə dollar və ya avronu peşkəş etmirlər. "Pulu verən
sifarişini də verir”, - məsəli İ.Məmmədovun nə üçün "bəslənməsini” gün işığına
çıxarır. İ.Məmmədov ona verilən tapşırıqları vaxtilə canla-başla yerinə
yetirdiyi üçün, hətta vaxtilə cinayət əməlinə yol verərək ictimai-siyasi
sabitliyin pozulmasına yönələn çağırışlar etdiyi üçün indi də ağalarının ona
"etimadı” var.
Belə görünür xarici
dairələrin agenti, pul müqabilində buyruq qulu olan İ.Məmmədov yenidən
dövriyyəyə buraxılır. Lakin İ.Məmmədovun ağaları unudur ki, bu adamda siyasətçi
potensialı yoxdur. Gedib 1-2 il xaricdə "təhsil almaq”, daha doğrusu
təlimatlanmaq, yaxud da 1-2 xarici dil bilmək siyasətdə uğur qazanmaq üçün
kifayət etməz. Ancaq bu reallığı anlamaq istəməyən İ.Məmmədov aldığı sifarişi
yerinə yetirməyə, müxalifətin yeni "lideri” kimi özünü cəmiyyətə sırımağa
çalışır. Bu yolla ağalarından aldığı pulun həcmini də artırmaq istəyir. Yəni, böyük
pullar alıb böyük oyunlar oynamağa həvəs göstərir. Cəmiyyətdə baş verənləri
qısaca təhlil etsək görərik ki, REAL sədrinin heç "müxalifət lideri” olmaq
potensialı da yoxdur. Çünki, siyasətdə var olmaq, müxalifətçi olub elektorat
toplamaq üçün yaşadığın, mübarizə apardığın ölkəni qəlbən sevmək əsas meyardır.
İ.Məmmədov isə bütün fəaliyyəti boyu Azərbaycanı deyil, pulunu verənləri, onu
yönəldənləri sevib.
F.Qəhrəmanlı