Sığorta bazarına “barışıq sazişi” bağlayacaq mediatorlar gəlir
Azərbaycan
Sığortaçılar Assosiasiyasının (ASA) təşkilatçılığı ilə sığortaçılarla
sığortalılar arasında mübahisələrin məhkəməyə qədər həlli ilə bağlı görüş
keçirilib. Görüşdə ASA-nın sədri Mustafa Abbasbəyli, birliyin digər
nümayəndələri, sığorta və təkrarsığorta şirkətlərinin rəhbər şəxsləri, o
cümlədən, mübahisələrin məhkəmədən kənar həllini həyata keçirməyi nəzərdə tutan
mediasiya şirkətinin nümayəndələri iştirak edib. Görüşdə sığorta
mübahisələrinin məhkəmədən kənar həlli sistemi ilə bağlı sığorta şirkətləri
üçün təqdimat edilib, daha sonra geniş müzakirə aparılıb. Mediator şirkətin
təklif etdiyi həll üsulu ilə sığorta mübahisələrinin operativ qaydada - bir gün
ərzində həlli nəzərdə tutulub. Mürəkkəb və xüsusi araşdırma tələb edilən
hallarda bu müddət 30 günə qədər uzadıla bilər. Belə ki təklif edilən həll
mexanizmi sığorta mübahisəsinin həlli istiqamətində mediator şirkətə müraciət
edilən zaman mediatorun əvvəlcə hər iki tərəflə - sığortalı və sığortaçı ilə
birlikdə, sonra isə onlarla ayrılıqda görüşünü nəzərdə tutur. Tərəflərlə
birlikdə yenidən görüş keçirilməsi və razılaşma əldə edildiyi təqdirdə,
"Barışıq sazişi”nin bağlanması, sistemin fəaliyyətində növbəti addım olaraq
müəyyən edilib.
Yekunda sığortaçılar
arasında mediasiya sisteminin müəyyən müddət ərzində pilot layihə olaraq həyata
keçirilməsi barədə razılıq əldə edilib.
Qeyd edək ki, mediasiyadan
beynəlxalq təcrübədə sığorta mübahisələrinin həllində çox geniş şəkildə
istifadə edilir. Mediasiya sisteminin mahiyyətini və sığorta
bazarına necə təsir edəcəyini öyrənməyə çalışdıq.
Hüquq sahəsi üzrə sığorta eksperti İlkin İbrahimovdeyir ki, bu təkliflə Azərbaycan Sığortaçılar Assosiasiyası (ASA) bitərəf
mövqe tutmağa çalışır, amma bu, mümkün deyil: "Mediasiya sistemi odur ki,
vətəndaşla sığortaçı şirkət arasındakı anlaşmazlıqları həll etmək üçün bir neçə
müstəqil ekspert dəvət edilir və onlar məsələni araşdırıb tərəflər arasında
"barışıq sazişi” əldə olunmasına nail olurlar. Bu mediasiya sistemi ilə
bağlı mən öz mövqeyimi bildirmişdim ki,
Azərbaycan Sığortaçılar Assosiasiyası burada bitərəf mövqe tutmağa
çalışır. Amma əslində bu, hüquqi baxımdan mümkün deyil. Çünki ASA adından da
göründüyü kimi birbaşa sığortaçıların mənafeyini qoruyan qurumdur. Bu qurumda
ancaq sığorta işçiləri təmsil olunur. Başqa bitərəf adamlar yoxdur. ASA bu
sahədə yaranmış problemi həll etmək üçün müstəqil sığorta ekspertini dəvət
edir. O isə müştərinin şikayətinə baxıb, məsələni araşdırır. Əgər burada problem
aşkarlanarsa, bu zaman digər tərəfi, yəni sığorta şirkətinin nümayəndəsini
dəvət edib görüşürlər. Hər iki tərəflə görüşdükdən sonra ortaq razılıq əldə
olunur. Ortaq razılıq da odur ki, nə sığorta şirkətinin, nə də müştərinin
dediyi məbləğ olur. Burada ortaq məbləğ çıxarılır. Əgər həqiqəti demək
lazımdırsa, bu, sığorta şirkətinə daha çox sərf edir. Çünki onsuz da, hazırda
bir çox sığorta şirkətləri qiymət kəsiminə gedirlər. Yəni onlar sığorta ödənişi
edirlərsə, 20-30 faiz qeyri-rəsmi kəsim edirlər. Ona görə də, bu addım daha çox
şirkətlərin, mənafeyinə xidmət edir, nəinki vətəndaşların. Düşünürəm ki, bu
sahədə bir sıra problemlər yaranacaq. Ona görə ki, bəzi şirkətlər ödəmədən süni
olaraq imtina verməyə başlayacaqlar. Bu da müştərinin ziyanına işləyəcək”.
Ekspert məsələnin başqa bir həlli yolunu təklif edir:
"Əlbəttə ki, bu məsələnin həlli yolu vardır. Bu işləri ASA deyil, Maliyyə
Bazarlarına Nəzarət Palatası şəffaf və mərkəzçi mövqe tutmaqla, öz tərkibində
həll edə bilər”.
Azərbaycan Sığortaçılar
Assosiasiyasının (ASA) sədri Mustafa Abbasbəyliqeyd edir ki, bu gün sığorta bazarındakı ən böyük problemlərdən biri də
müştərilərin sığorta şirkətinə etimadsızlığıdır: "Mediasiya sistemindən istifadədə
əsas məqsəd sığorta sahəsində yaranmış problemlərin qısa müddətdə ədalətli
şəkildə həll olunmasına nail olmaqdır. Biz düşünürük ki, bu gün sığorta
bazarının ən böyük problemlərindən biri insanlarda olan müəyyən etimadsızlıq və
narazılıqlardır. Bunun səbəbi isə bu sahədə yaranmış problemlərin həllinin uzun
çəkməsidir. Çünki məhkəmələrə gedən işin həll olunması üçün təxminən bir ilə
yaxın vaxt tələb olunur. Ona görə də, xaricdə geniş istifadə edilən bu sistemin
tətbiqini ölkəmizdə həyata keçirmək istəyirik. Əlbəttə ki, bunun bazara müsbət
nəticələri gözlənilir. Çünki bu sistemin
tətbiqi ilə xırda problemlərin həlli bir gün, ciddi məsələlərin həlli isə bir
həftə, on gün, ən çox isə bir ay çəkə bilər. Mediatorun işi isə tərəflərlə görüşüb, məsələnin həlli
yollarını müzakirə edib, onları "barışıq sazişi” imzalamağa razı salmaqdır”.
Günel
Azadə