Şərqi Avropada Rusiya küləyi əsir
Moldova və Bolqarıstanda Rusiya ilə əməkdaşlığın güclənməsinin
tərəfdarı olan namizədlərin prezident kürsüsünə əyləşməsi Qərb dairələrində,
mediasında geniş müzakirə olunur. Bəziləri bura Gürcüstanı da daxil edirlər.
Çoxları artıq "Gürcü arzusu”nun böyük fərqlə qələbəsini də Rusiya amili ilə
izah edirlər. Qərbə olan ümidlərin puç olması, vəd edilən avrointeqrasiyanın reallaşmaması
artıq bu ölkələrin əhalisində pessimist əhval-ruhiyyə yaradıb. Deməzdik ki,
Rusiya sevgisi həddən artıq güclüdür, amma hər halda insanlar arzuladıqlarına
çata bilmədikləri, yəni alternativ görmədikləri üçün bu yola üstünlük verirlər.
Son seçkilərin hətta Şərqi Avropa ölkələrininQərbə tam inteqrasiya oluna
bilməmələrini ortaya qoyduğunu da iddia edənlər var.
Qərb mətbuatı və siyasilərini bu tendensiya güclü şəkildə narahat
etməyə başlayıb. "Yoxsulluq, korrupsiya, Avropa ümidlərinin reallaşmaması və
Moskva ilə köhnə əlaqələr. Nə üçün Bolqarıstan və Moldovada Putinyönümlü
namizədlər qalib gəldilər”. Avstriyanın "Die Presse” qəzetində dərc edilən yazının
əsas xətti budur. Müəllif yazır ki, bazar günü baş tutan seçkilər Kremldə
triumf kimi qarşılanıb: "Moldova və Bolqarıstanda keçirilən prezident
seçkilərində Rusiyayönümlü namizədlər qalib gəldilər. İqor Dodon Moldovada
qalib gəldi və dərhal da Moskva ilə strateji tərəfdaşlığa başlanıldığını elan
etdi”. Müəllifə görə, moldovanlar artıq qərbyönümlü siyasətçilərin boş
vədlərindən zinhara gəliblər. "Ən gözlənilməz, açıq səmada ildırım çaxması
effektini isə Avropa İttifaqının üzvü olan Bolqarıstanda keçirilən seçkilərin
nəticələri göstərdi. Qalib namizəd Rusiya ilə praqmatik münasibətlərin
qurulmasını istəyən, hərbi-hava qüvvələrinin keçmiş baş komandanı, Avropa
İttifaqı və NATO-ya üzvlük məsələsində balansın qorunub saxlanılmasına çalışan
Rumen Radev olub. Belə bir prosesi Şərq blokunun digər keçmiş üzvləri ilə bağlı
da eşitmək olar”.
Məqalədə vurğulanır ki, istisna yalnız Polşa, Baltikyanı dövlətlər və
müəyyən mənada Rumıniyadır. Adları çəkilən dövlətlər Rusiyanın regionda işğalçı
siyasət yürütdüyünü israr edərək, bu təhlükənin real olduğunu irəli sürürlər.
Şərqi Avropada rusofilliyin yeni dalğasının yarana biləcəyinin köklü səbəbləri
göstərilir. Lakin hər bir ölkə üçün bu fərqlidir. Məsələn, Moldovada bunu
onunla əsaslandırmaq olar ki, əhali, xüsusən də kənd yerlərində yaşayanlar qərbyönümlü
hakimiyyətin korrupsiyalaşmasından narazıdır. Yaşlı insanlarda sovet dövrünə
nostalji hissləri güclüdür. Yoxsulluq və iqtisadi durğunluq daha yaxşı cəmiyyət
- Avropa cəmiyyətinə ümidləri zəiflədib. Bir sıra hallarda isə bu hissi
tamamilə məhv edib. Bolqarıstanda da bir çoxlarında Rusiyaya nostalji hissi baş
qaldırıb. Avropanın vəd etdikləri artıq real olmayıb. Bundan əlavə, hökumətin
namizədi Çeçka Çaçev keçmiş döyüş pilotuna rəqib ola bilmədi. Bolqarıstanda iki
faktor da əsas rol oynayıb - energetika və xarici ticarət. Ukraynaya görə
Rusiyaya qarşı Aİ-nin sanksiyaları regiona ziyan gətirib. Bundan əlavə,
Bolqarıstanın Rusiya qazından asılılığı daha da güclənib. Bu ölkə uzun müddət
Ukraynadan yan keçəcək və Cənub-Şərqi Avropaya Rusiya qazını aparacaq "Cənub
axını” layihəsinin reallaşmasında maraqlı olub. Lakin ABŞ və Avropa İttifaqının
təzyiqləri altında layihə reallaşmadı. Hazırda isə Rusiya "Türk axını”
layihəsini reallaşdırmağa çalışır. Versiyalardan birinə görə, qaz Türkiyəyə,
sonra isə Bolqarıstandan yan keçməklə Yunanıstana nəql olunacaq. Əgər
Bolqarıstan Rusiyaya qarşı praqmatizmlik nümayiş etdirərsə, bu plan dəyişə
bilər. Ümumiyyətlə, Rusiya da boş dayanmır və Aİ-də narazı olan dövlətləri,
qüvvələri öz tərəfinə cəlb etməyə çalışır. Bu məqsədlə hətta "Putinin dostları
Assosiasiyası” da yaradılıb, ona rəhbərliyi də miqrantlara qarşı sərt mövqeyi
ilə seçilən Macarıstanın baş naziri Viktor Orban edir.
Beləliklə, qeyd olunan faktlar bəlkə də Rusiyanın triumfu, qələbəsi kimi
qarşılana bilər. Lakin məsələ ondadır ki, hər iki ölkə parlament üsul-idarəsi
ilə idarə olunur, yəni prezidentlərin dəyişməsi hələ siyasətin dəyişməsi demək
deyil. Moldova ilə bağlı məsələyə gəldikdə, burada sol qüvvələrin bazası hər
zaman güclü olub. Digər məqam isə Moldovada prezidentin simvolik şəxs
olmasıdır. Yəni əsas söz sahibi baş nazirdir. Parlament seçkilərində
sosialistlər və kommunistlər 46 mandat qazanıb, 3 liberal partiya isə 55 mandat
əldə edərək hökuməti formalaşdırıb. Bu ölkədə dəfələrlə ziddiyyətli nəticələr
əldə olunub - gah qərbpərəst qüvvələr, gah da sosialistlər qələbə qazanıb.
Başqa bir fakt isə moldovan miqrantlarla bağlıdır. Belə ki, Rusiyada on
minlərlə moldovan fəaliyyət göstərir və evlərinə vəsait göndərir. Rusiyanın
mövqeləri Moldovada hər zaman güclü olub.
O ki qaldı Bolqarıstana, bu ölkə Avropa İttifaqı və Şimali Atlantika
Blokunun üzvüdür. Rusiyapərəst keçmiş hərbçinin qalib gəlməsi də xarici siyasət
vektorunun kəskin dəyişəcəyi anlamına gəlməməlidir. Müəyyən düzəlişlər ola
bilər – və burada da əsas amil iqtisadiyyatla bağlıdır. Bolqarıstan Aİ-nin ən
yoxsul ölkəsidir və sosial-iqtisadi problemlər fonunda orada istənilən populist
siyasi qüvvənin iqtidara gəlməsi mümkündür. Sadəcə, rəsmi Sofiya ümid edir ki,
qaz məsələsində Rusiya onun ərazisindən də yararlanacaq.
Azər NURİYEV