Şərəf və insani hisslərdən məhrum ölkə
Ermənistan Avropa tarixində
ilk dəfə olaraq ballistik raketlərlə dinc insanları atəşə tutdu
Ermənistanın Azərbaycana qarşı başlatdığı müharibədən bir ay keçdi. Bu müddət ərzində işğalçı dövlətin nəzarətində olan ərazilərin böyük bir qismini müzəffər ordumuz azad edib və etməkdə davam edir. Nəticələr, tək Ermənistan və Azərbaycan üçün deyil, bütövlükdə Avropa kontingenti, ola bilsin onun hüdudlarından da kənarda dramatik və heyranedicidir. Rusiyanın "Vestnik Kafkaza” nəşrində dərc edilən məqalədə bildirilir ki, hərbi əməliyyatlar erməni vəhşiliyi, vandalizmi ilə yadda qalır. Dinc şəhərlərin hədəfə alınması, insanların gecə yatdıqları yerdə qətlə yetirilməsi ermənilər üçün adi hala çevrilib. Özü də ən maraqlısı odur ki, bombardmanlar hərbi əməliyyatların aparıldığı yerdən xeyli uzaq yaşayış məntəqələrini hədəfə alır. Bərdədə baş verən vandalizm isə xüsusi seçilir. Avropa tarixində ilk dəfə Ermənistan ballistik raketlərdən dinc sakinlərə qarşı istifadə edib. Bu vandalizm aktı, eləcə də bundan əvvəl Gəncə, Tərtər, Mingəçevir, Goranboy, Ağcabədi və digər ərazilərin kaset bombaları ilə atəşə tutulması nəticəsində 70 nəfər həlak olub, yüzlərlə insan yaralanıb. Beynəlxalq kütləvi informasiya vasitələri Ermənistan xarici işlər nazirinə bununla bağlı təzyiq dolu sual ünvanlayanda, o, sualdan yayınmağa çalışıb. Ermənistan prezidenti isə Avropa ölkələrinə səfər edəndə Avropa liderlərini dini hissləri ilə oynamaqdan başqa bir variant fikirləşə bilməyib. Hərbi xuntanın baş naziri isə daha uzağa gedərək bu münaqişənin diplomatik həllinin olmadığını bildirib. Azərbaycana qarşı sona kimi döyüşəcəklərini deyib. Eyni zamanda erməni-Azərbaycan münaqişəsinin "sivilizasiya” xarakteri barədə də danışmağa çalışıb. Burdan gələn nəticə aydındır – Ermənistan rəhbərliyi üçün dinc sakinlərin kütləvi qırğın silahlarından istifadə etməklə öldürülməsini təmizə çıxarmaq olar - əgər hədəfdə müsəlmanlardısa. Bəs görəsən digərləri Ermənistanın mövqeyini bölüşürlərmi? Çox güman ki, yox. Dünya liderləri bu cinayət faktlarını pisləməli və ortaya öz mövqelərini qoymalıdırlar.
Yeri gəlmişkən, ermənilərin, dinc şəhərləri, insanları hədəfə alan
vandalizmi dünya mediasında diqqət çəkir. BBC yazır ki, Azərbaycan, Ermənistanı
raket zərbələrilə Bərdədə 21 mülki vətəndaşı öldürməkdə ittiham edir: "Hadisə
mübahisəli Dağlıq Qarabağ regionu uğrunda döyüşlərin qızğın vaxtında baş verib.
Tərəflər arasında hərbi qarşıdurmanın davam etdiyi ərazidən çox da uzaqda
yerləşməyən Bərdə şəhərinə zərbələr nəticəsində onlarla şəxs yaralanıb. Yerli
sakin Ülviyyə Babayeva deyir ki, o, hadisə zamanı avtomobillə həmin ərazinin
yaxınlığından keçirmiş. Babayevanın sözlərinə görə, həmin vaxt o, ard-arda 3
partlayış səsi eşidib və səsin gəldiyi istiqamətə yollanıb”. "Yanğın gördük...
Oraya bomba düşmüşdü”, - deyə Ülviyyə Babayeva BBC-yə bildirib: "Bombalardan
biri bankın yaxınlığında yerləşən avtomobilin üzərinə düşmüşdü. Hər yerdə raket
qalıqları, qırılmış şüşələr var idi. Raketlərdən biri isə yanğınsöndürmə
stansiyasının yaxınlığına düşübmüş. Orada da ölən və yaralananlar var. Beləliklə,
regionda sentyabrın sonlarında başlamış hərbi qarşıdurma artıq genişmiqyaslı
müharibəyə çevrilib. Nəticədə, günlərdir şəhərlər, rayonlar atəşə tutulur. Bu
zaman qadağan edilmiş kasetli bombalardan da istifadə olunur”.
"Financial Times”, "Al-Monitor”, "Foreign Affairs”, EURACTIV də
münaqişə ilə bağlı məqalələr dərc edib.
Ermənistan silahlı birləşmələrinin Bərdəyə xain hücumu və dinc
əhalini hədəfə almasına gürcü mediasında da yer verilib. Bu ölkənin
"report.ge", "gaxa.ge", "24news.ge",
"aktual.ge" informasiya portalları erməni terrorçularının humanitar
atəşkəs rejimini kobud şəkildə pozaraq Azərbaycanın Bərdə şəhərini qadağan
olunmuş silahlardan atəşə tutması barədə xəbərlər yayıb. Azərbaycan, rus,
ingilis və gürcü dillərində yayılan xəbərlədə oktyabrın 28-də Bərdədə dinc
sakinlərin erməni silahlı birləşmələri tərəfindən yenidən raket atəşinə
tutulduğu, sakinlərin sıx olduğu əraziyə beynəlxalq hüquqla qadağan olunmuş
kaset bombalardan istifadə edilməklə zərbələr endirildiyi bildirilib. Diqqətə
çatdırılıb ki, nəticədə 20-dən çox dinc sakin həlak olub, 70-ə yaxın mülki şəxs
yaralanıb. Şəhərdə yerləşən mülki infrastruktur obyektlərinə və nəqliyyat
vasitələrinə ciddi ziyan dəyib. "Ermənistanın Azərbaycan şəhərlərinə artilleriya və raket zərbələri
Bakını cavab tədbirlərinə təhrik etmək istəyi ilə bağlıdır. Nəticədə, Moskvanı
münaqişəyə cəlb etmək və İrəvana dəstək verməyə məcbur etmək istəyirlər”. Bunu
ABŞ dövlət katibinin sabiq müşaviri Pol Qobl "Kafkazskiy uzel"ə
müsahibəsində bildirib. "Bu hadisələr Azərbaycanın Dağlıq Qarabağı geri almaqla
bağlı qətiyyətini daha da möhkəmləndirir”, – o qeyd edib.
ABŞ-ın "The New York Times” qəzeti Bərdə terroru barədə geniş
material hazırlayıb. Məqalənin müəllifi Şarlotta Qall bildirib ki, iki ölkə
arasında münaqişə hələ 80-ci illərin sonlarında başlayıb. Belə ki, Ermənistan
bir milyona yaxın azərbaycanlını öz evlərindən didərgin salıb, ərazi
istilalarına nail olub. İndi isə Azərbaycan öz ərazilərini geri qaytarmaq üçün
genişmiqyaslı əks-hücum həyata keçirir. Jurnalistin sözlərinə görə, ilk
partlayış onlardan 20 metr aralıda baş verib. "İlk partlayış, bizi maşını
dayandırmağa məcbur edəcək qədər güclü idi. Buna görə cəld divarın altına
atıldıq və əyildik. Daha sonra anladım ki, dayanmasaydıq, yoldan 20 metr
irəlidə partlayışlardan birinin ortasına girirdik”, - deyə o qeyd edib. Jurnalist
bildirir ki, Azərbaycanda cəbhəyə yaxın bir sıra yaşayış məntəqələri, demək
olar ki, gündəlik raket zərbələrinə məruz qalıb: "Cəbhədən bir az aralıda
yerləşən Bərdəyə hücum olunması isə gərginliyin artdığını göstərir”. "Görürsən,
ermənilər bizə nə edir?!”, - deyə 55 yaşlı Kamil Kərimov soruşur. "Burada
hərbçilərdən kimisə görürsən? Bunu niyə edirlər? Burda yalnız mülki insanlar
görürsən. Xaos yaratmaq istəyirlər”.
Klinikanın zirzəmisində sığınacaq tapan 44 yaşlı kardioloq Yaqubiya
Həmidova buranın daha təhlükəsiz olacağını düşünərək, cəbhə bölgəsindəki
Tərtərdən gəldiyini söyləyib:"Xahiş edirəm, bizə kömək edin. Dünyada heç
kim bizə nə olduğunu bilmir”. "New- York Times”ın əməkdaşı Bərdədə baş verən
terror aktını bütün dəhşəti ilə dilə gətirib: "Bayırda, yol ayrıcında maşın
hələ də tüstülənirdi. Qan səkiyə, ofis binasının qapısına yayılmışdı.
Bombaların zərərsizləşdirilməsi üzrə zabitlər kombinezon və kaskada
partladılmış döyüş sursatlarının üzərində dayanmışdılar”. Yalnız Malayziyada
deyil, həmçinin Cənub-Şərqi Asiya regionunda ən tanınmış nəşrlərdən olan "New
Straits Times” qəzeti Ermənistan silahlı qüvvələri tərəfindən Azərbaycanın
Bərdə rayonuna raket hücumu barədə xəbər yayıb. Azərbaycan Xarici İşlər
Nazirliyinin bəyanatına əsasən qeyd edilib ki, bu, son günlər ərzində
beynəlxalq vasitəçilərin davamlı səyləri ilə üçüncü dəfə əldə edilən humanitar
atəşkəs razılaşdırılmasını kobud şəkildə pozan Ermənistanın beynəlxalq
humanitar hüquq öhdəliklərini heçə sayaraq törətdiyi növbəti müharibə
cinayətidir. Vurğulanıb ki, Azərbaycanın dinc əhalisinə qarşı insanlıq əleyhinə
cinayətin törədilməsinə görə, Ermənistanın siyasi-hərbi rəhbərliyi məsuliyyət
daşıyır. Məlumatın sonunda cinayətkarların ədalət məhkəməsi qarşısında cavab
verməsini təmin etmək üçün beynəlxalq ictimaiyyət qəti mövqe nümayiş etdirməyə
çağırılıb.
Azər NURİYEV