Separatizmi dəstəkləyən avropalı deputatlarla necə davranmalı?
Avropada fəaliyyət göstərən erməni lobbisi və
diasporunun hər zaman çirkin siyasətini həyata keçirmək üçün Avropa
institutlarındakı deputatlardan "bəhrələnməsi” heç kimə sirr deyil. Ermənilər
bəzi avroparlamentarilərin əli ilə Avropa Parlamentində, AŞ PA, ATƏT PA eləcə
də Avronest PA-da Azərbaycan əleyhinə müxtəlif qərarların qəbul edilməsinə cəhd
edirlər. Eyni zamanda Dağlıq Qarabağ məsələsində separatizm və etnik
təmizləməyə dəstək verən bir sıra avropalı deputatlar müəyyən zamanlarda
Ermənistanın işğal etdiyi Azərbaycan torpaqlarına səfərlər edirlər. Buna misal
olaraq, Avropa Parlamentinin Yunanıstandan olan deputatı Eleni Teoxarusu
göstərmək olar.
Mövzu ilə bağlı "Kaspi” qəzetinə açıqlamasında Milli Məclisin deputatı Sahib Alıyevbildirdi ki, Dağlıq Qarabağa səfər etmiş və separatçılığı təbliğ edən Avropa
Parlamentinin deputatları ilə bağlı artıq Azərbaycan dövlətinin müəyyən
addımları var: "Həmin adamlar anındaca "arzuolunmaz şəxslər siyahı”sına
düşürlər və Azərbaycana səfərlərinə qadağa qoyulur. Bu məsələdə Azərbaycan
dövlətinin nə qədər prinsipial olduğunu Almaniya Bundestaqının üzvü və Angela
Merkelin "Xristian-Demokratlar İttifaqı” partiyasının deputatı olan Albert
Vaylerin kanslerlə birgə Bakıya səfər etmək istəyinin qarşısının alınmasında da
gördük. Açığını deyim ki, bu həddən artıq sərt diplomatik jest idi. Başqa
dövlətlərdən söhbət getsəydi, bəlkə də xanım kansler öz səfərini təxirə salıb
gəlməyə də bilərdi. Amma Azərbaycanın Qafqazda necə önəmli rol oynadığını
nəzərə alaraq, qəbul etdilər ki, Azərbaycan üçün arzuolunmaz bir adam ölkəyə gələ
bilməz. Almaniya kansler Angela Merkelin səfəri baş tutdu, ancaq deputat Albert
Vayler Azərbaycana gələ bilmədi. Yəni, qeyd etdiyim kimi, Azərbaycanın bu cür
sərt addımları var. Burada söhbət təkcə Azərbaycan dövlətinin reaksiyasından
getmir. Söhbət Dağlıq Qarabağa öz deputatlarını, təmsilçilərini, hətta bəzi
hallarda rəsmilərini müxtəlif bəhanələr adı altında göndərən qüvvələrdən gedir.
Onlar, xüsusilə Avropa dövlətləri rəsmi Bakının bu addımından nəticə
çıxarmalıdır”.
Bəxtiyar MƏMMƏDLİ
O, qondarma rejimi Avropada təbliğ edən,
separatçılığı dəstəkləyən yeganə deputat deyil. Məhz bu səbəbdən də Azərbaycan
dövləti onun icazəsi olmadan işğal olunmuş ərazilərə səfər edənləri
"arzuolunmaz şəxslər siyahısı”na əlavə edir və onların ölkəmizə girişinə qadağa
qoyulur. Bu yetərlidirmi və ümumiyyətlə, separatçılığı dəstəkləyən, işğal
olunmuş ərazilərə qanunsuz səfər edən avropalı deputatlarla bağlı Azərbaycan
necə davranmalıdır?
S.Alıyevin sözlərinə görə, Avropa dövlətləri anlamalıdırlar
ki, ikili standartlar məhz özlərində separatçılığın baş qaldırmasına aparıb
çıxarır: "Hansı ki, biz bunu İspaniyada Kataloniya məsələsində gördük. Eyni
zamanda Fransada, Belçikada, İtaliyada, Böyük Britaniyada belə hallar var. Yəni,
bu cür ikili standartlara dayanan hərəkətlər sonradan bumeranq effekti verir.
Əgər fikirləşirlərsə ki bununla Azərbaycana dövlətinə, özəlliklə xalqımıza
işğal altında qalan torpaqlarımızı həzm etdirəcəklər, bunu rəsmiləşdirəcəklər,
çox yanılırlar və bu alınmayacaq”.
Hüquq müdafiəçisi
Sahib Məmmədov bildirdi ki, Azərbaycan statusundan asılı
olmayaraq işğal edilmiş ərazilərə qanunsuz səfərlər edən şəxsləri qarşı "qara
siyahı”ya daxil edir və prinsipial mövqe nümayiş etdirir: "Məsələn, bu
yaxınlarda Almaniya kansleri Angela Merkel Bakıya səfər edərkən onun nümayəndə
heyətində olan deputat Albert Vayleri Azərbaycan ölkəyə buraxmadı və
prinsipiallıq göstərdi. Halbuki kanslerin ilk səfəri idi və Almaniya Avropa
iqtisadiyyatının öncüllərindəndir. Kənardan baxanda, belə bir ölkənin nümayəndə
heyətinə toxunmaq olmazdı. Amma Azərbaycan bu addımı atdı. Eləcə də digərlərinə
də qarşı eyni mövqe sərgilənir. Əslində bundan başqa bir yol da yoxdur.
Deputatlara nə öz ölkələri, nə də Avropanın strukturları təzyiq göstərə bilməz.
Çünki onların immuniteti var. Burada yeganə yol ondan ibarətdir ki, bizim də
Avropa institutlarında, beynəlxalq təşkilatlarda dostlarımız olmalıdır. Təəssüf
ki, Azərbaycanın belə strukturlarda pis-yaxşı topladığı dostlara qarşı
ermənilərin başlatdığı kampaniyanın önündə elə Azərbaycandan olan satqınlar
durur. Bu səbəbdən də bu strukturlarda olan deputatlar çəkinirlər. Avropa
Parlamentində, AŞ PA-da, ATƏT PA-da və ümumiyyətlə beynəlxalq strukturlarda
mövcud olan parlament strukturlarında Azərbaycanla dostluq edən deputatlara
qarşı qarayaxma kampaniyası aparılır. Ən pisi də odur ki, qeyd etdiyim kimi,
azərbaycanlılar cəlb edilir. Bura Azərbaycandan olan müəyyən siyasi qüvvələr,
ictimai təşkilatlar, jurnalistlər, eləcə də mühacirlər daxildir. Amma
ermənilərdə belə hal yoxdur. Özü də ermənilərin içərisində müxalifət də var,
hakimiyyətə qarşı çıxışlar da var, amma belə lobbi məsələlərində onlar vahid
qüvvə kimi özlərini göstərirlər. Biz də isə təəssüf ki, belə hallar var və bu
da müxtəlif şəxslərin ölkəmizi istəməyən müəyyən qüvvələrin təsir agentinə çevrilməsi
və onlara xidmət etməsi nəticəsində baş verir”.
S.Məmmədov vurğuladı ki, Azərbaycanın lobbi
siyasətində də ciddi dəyişikliklər olmalıdır: "Beynəlxalq aləmdə dostların cəlb
edilməsi ayıb sayılmır. Bu siyasət belə olmalıdır: düşmənləri neytrallaşdırmaq,
neytralları dostlaşdırmaq və dostları da əldə möhkəm saxlamaq. Azərbaycan
indiki halda bu siyasəti yürütməlidir. Hesab edirəm ki, Azərbaycanın əleyhinə
olan şəxslərə qarşı əks tədbirlər ilk növbədə bunlardır”. Bəxtiyar MƏMMƏDLİ