Sənət əhli ictimai məsələlərdə niyə aktiv deyil?
Dünyanın məşhur sənət adamlarının bəzən yaşadıqları
cəmiyyətdə gördükləri, üzləşdikləri problemlərə, haqsızlıqlara etiraz edərək, bir
vətəndaş kimi fikirlərini səsləndirdiklərinin şahidi oluruq. Elə qonşu ölkə Türkiyədə
tanınan sənət adamlarının cəmiyyətdə müşahidə olunan çatışmazlıqlara öz yanaşma
tərzləri var və problemlərin həlli üçün müxtəlif fikirlər səsləndirməkdən
çəkinmirlər. Biz isə ölkəmiz üçün əhəmiyyətli
olan bir çox taleyüklü məsələlərdə tanınmış sənət adamlarımızın fikirlərini
görə bilmirik.Adətən sənət əhli gündəmə
çıxardığı ucuz, şou xarakterli qalmaqallar, bir-birilərinə ünvanladıqları
atmacalarla yadda qalmağa səy göstərir. Sosial şəbəkələrdə açdıqları
səhifələrdə yazdıqları şərhlərdə də kimlərəsə söz atmaq kimi bir missiyaları
var. Yalnız barmaqla sayılası sənətkarlar var ki, onlar cəmiyyətdə baş verən
məsələlərdə öz vətəndaş mövqeyini sərgiləyirlər.Mövzu ilə bağlı sənət adamlarına müraciət
etdik. İncəsənət nümayəndələri əslində belə məsələlərdə susmaq lazım
olmadığının fərqində olduqlarını, ancaq tək əldən səs çıxmadığını dedilər.
Zamanı və məqamı gələndə...
Xalq artisti Mənsum
İbrahimov sənətindən, peşəsindən asılı olmayaraq, hər bir
vətəndaşın ölkəsində gedən ictimai proseslərlə bağlı mövqeyini bildirməsinin
vacibliyini qeyd etdi: "Tanınmış sənətçilər cəmiyyətdə baş verən proseslərə öz
mövqeyini bildirməlidirlər. Zamanı və məqamı gələndə, mən də nəinki bir sənətçi,
həm də azad ölkənin vətəndaşı olaraq öz mövqeyimi bildirir, cəmiyyətdəki
problemlərin həlli üçün fikirlərimi səsləndirirəm. Efirlərdə, mətbuatda bu
mövzularla bağlı mənə sual ünvanlananda rahat şəkildə öz mövqeyimi bildirirəm.
Biz hamımız eyni cəmiyyətdə yaşayırıq və burda bizim övladlarımız yaşayır. Biz
sənət adamları xalq arasında azdan-çoxdan tanınırıqsa, bizim sözümüzə daha çox
inanırlarsa, niyə də yaşanan problemlərə susaq? Bu mənim şəxsi mövqeyimdir”.
"Hamıdan ideal olmağı tələb etmək olmaz”
Xalq artisti Faiq
Ağayev isə dünyada çox az sayda tanınmış sənət adamlarının
ictimai məsələlərə münasibət bildirdiyini dedi: "Dünyanın ən çox inkişaf etmiş
ölkələrində belə, hər bir müğənni ictimai məsələlərə münasibət bildirmir. Bizdə
də ictimai məsələlərə münasibət bildirən sənətçilərimiz elə dünyadakı qədərdir.
ABŞ-ın ümumi əhalisini nəzərə alsaq və ictimai məsələlərə münasibət bildirən
sənət adamlarını götürsək, onlarla eyni nisbətdəyik. ABŞ-da ona görə çox görünür
ki, əhalisinin sayı, ərazisi çox böyükdür. Bizdə də ictimai məsələlərə
münasibət bildirən sənətçilər kifayət qədərdir və hamı ideal ola bilməz.
Hamıdan ideal olmağı da tələb etmək olmaz. Sənət adamlarını hər bir məsələnin
ön sırasına salmaq da bir az qərəzlidir. 10 milyon üçün kifayət qədər sənətçilərimiz
var ki, onlar ictimai məsələlərdə münasibət bildirirlər. Onlardan say artırmaq
üçün istifadə etməyin. Siz sənətçilərdən ideal olmağı tələb edirsiniz, bu da
düzgün deyil”.
"Hamımız özümüzü çəkib kənara qoyduq”
Bəstəkar, aparıcı Murad
Arifin "Youtube” üzərindən hazırladığı "Popumuz var”
verilişində ictimai məsələlərə
məşhurların nə üçün müraciət etmədiklərini, yaşanan məsələlərə heç bir reaksiya
vermədiklərini soruşanda, verilişin qonağı xalq artisti Zülfiyyə Xanbabayeva əvvəllər rastlaşdığı problemlərlə bağlı çox
tez-tez açıqlamalar verdiyini, sonra tək əldə səs çıxmadığını görərək
danışmaqdan imtina etdiyini deyib: "Deyinmək istəmirəm. Qoy bu barədə başqaları
danışsın. Mən nəyə görə boşboğazlıq edib çənəmi yormalıyam? Faktiki olaraq
efirlərə çıxmıram, heç kəsdən qorxum da yoxdur ki, kimsə nəyəsə görə mənə nəsə
desin. Yəqin ictimai məsələlərə münasibət bildirmək xasiyyətdən də irəli gəlir.
Hamımız özümüzü çəkib kənara qoyduq, mübarizə aparmadıq. Bir ara çox danışdım,
sonra gördüm fikir verən də yoxdur. Bu mənim işim deyil, bununla bağlı müxtəlif
təşkilatlar, qurumlar fəaliyyət göstərir. Mənim işim konsert vermək, keyfiyyətli
musiqi təqdim etmək, ifaçı kimi yaradıcı proseslə məşğul olmaqdır”.
"Səsimizi çıxarmalıyıq ki, sözümüzü hər kəs duysun”
Tanınmış ifaçı
Eldar Qasımov bizimlə söhbətində ölkədə baş verən ictimai proseslərə
çox böyük önəm verdiyini və bu məsələdə məşhurların rəylərinin böyük önəm kəsb
etdiyini dedi: "İctimai məsələlərin bizim məşhurların, sənət adamlarının
köməkliyi ilə həll yolunu tapmağını çox istərdim. Buradan həmkarlarıma
səslənirəm ki, cəmiyyətimizin üzləşdiyi problemlərə biganə qalmasınlar. Hərdən
cəmiyyətdə baş verən hər hansı haqsızlığı, ədalətsizliyi görəndə səsinizi
çıxarın, susmayın. İnanın ki, bizim səsimiz çox vacibdir. Çünki biz hamımız
eyni cəmiyyətdə yaşayırıq. Şəxsən mən ictimai və sosial məsələlərə biganə
qalmıram. Çalışıram ki, ətrafımda olan insanlara, izləyicilərimə səslənərək öz
mövqeyimi bildirim. Şərt deyil ki, hər kəs mənimlə razılaşsın. Sosial şəbəkə
vasitəsi ilə insanların nədənsə narazı olduqlarını görürəm və mən də iradımı
bildirirəm. Əlimdən gəldiyi qədər onlara kömək etməyə çalışıram. Çox istərdim
ki, həmkarlarım da ictimai funksiyalarını, sadəcə toylara gedib pul kisəsini
doldurmaqla deyil, həm də ictimai məsələlərə münasibət bildirməklə yerinə
yetirsinlər. Biz çox mərd xalqıq. Hər bir haqsızlığı, yolunda getməyən bir
məsələni ictimailəşdirib onun çözüm yollarını tapa biləcək gücdəyik”.
İfaçı bu məsələdə mətbuat nümayəndələrinin
sənətçilərə dəstəyini əsirgədiyini deyir: "Bizim səsimizə media nümayəndələri
də səs verməlidirlər. Təəssüf hissi ilə qeyd edim ki, bəzi bayağı media
nümayəndələri qalmaqal yazaraq, şou adamlarını gözdən salmağa çalışırlar. Ancaq
düşünmürlər ki, onlar sənət adamlarının qalmaqallarını, neqativ tərəflərini
işıqlandırmaqla yetişən gənclərimizin, evdə böyüyən uşaqlarımızın zövqünü korlayırlar.
O saytlar insanlarımıza mənəvi soyqırımı edirlər, fərqində deyillər. Bu mənə
çox toxunan bir mövzudur. Çox istəyərdim ki, bizim sözləri keçən, insanların
örnək kimi baxdığı nəinki müğənnilərimiz, ictimai xadimlərimiz də bu məsələni
dərk etsinlər. Əgər biz bu peşəni seçmişiksə, demək onun hər xüsusiyyətini
qəbul etmişik. Sənətçi xalqa məxsus olmalıdır. Missiyamız xalqa xidmət etməkdir
və bu cür məsələlərdə özümüzü kənara çəkə bilmərik. Biz səsimizi çıxarmalıyıq
ki, sözümüzü hər kəsə çatdıra bilək. Yetər ki, içimizdə istək olsun”.
Xəyalə Rəis