“Sənaye potensialının inkişafı ilə bağlı ciddi addımlar atılmalıdır”
Azərbaycan XX əsrdə ikinci dəfə müstəqilliyini bərpa
edəndən bir neçə il sonra ümummilli lider Heydər Əliyevin xalqın tələbə ilə siyasi
hakimiyyətə gəlməsi sabitliyin bərpa olunması ilə bərabər, geniş islahatların həyata
keçirilməsi ilə də yadda qalıb. Ölkə iqtisadiyyatının əsas sahələrindən hesab
olunan kənd təsərrüfatının inkişaf etdirilməsi üçün torpaq islahatlarının
aparılması, kəndliyə özəl pay torpaqlarının verilməsi, kəndli-fermer təsərrüfatlarının
yaradılması kimi mühüm addımlar atılıb. Azərbaycan zəngin karbohidrogen sərvətlərə
sahib olduğundan, elə həmin illərdə ulu öndərin rəhbərliyi ilə ölkənin gələcək
inkişafına hesablanan neft strategiyası hazırlanıb. Dünyaca məşhur şirkətlər Azərbaycana
dəvət olunub, "Əsrin müqaviləsi” və sair bu kimi neft-qaz kontraktları
imzalanıb, ölkə iqtisadiyyatına xarici sərmayənin cəlb edilməsi prosesinə
başlanılıb. Bu kimi proseslərlə paralel olaraq, ümummilli lider Heydər Əliyev
ölkədə sahibkarlığın inkişaf etdirilməsini də diqqət mərkəzində saxlayıb,
sahibkarlıq fəaliyyətinin tənzimlənməsi üçün möhkəm hüquqi baza yaradılıb. Ulu
öndərin siyasi kursunun layiqli davamçısı, prezident İlham Əliyevin ölkəyə rəhbərlik
etdiyi illərdə isə qara qızılın insan kapitalına çevrilməsi istiqamətində
uzaqgörən, gələcəyə hesablanan mühüm tədbirlər görülüb. Qısa zamanda Azərbaycanda
qeyri-neft sektorunun inkişafı özünü göstərib, hər il yeni-yeni istehsal müəssisələri,
zavodlar, fabriklər istifadəyə verilib, çoxsaylı infrastruktur layihələr həyata
keçirilib, yüz minlərlə yeni iş yerləri yaradılıb. Beləliklə, ölkə
iqtisadiyyatında qeyri-neft sektorunun çəkisi zaman keçdikcə daha da artıb.
Bütün
bunlar sayəsində Azərbaycan 2008-ci ildə baş verən dünya iqtisadi böhranından
minimal itkilərlə çıxıb, ölkə vətəndaşlarının sosial rifahının daha da
yaxşılaşdırılması istiqamətində davamlı tədbirlər görülüb. 2014-cü ilin ikinci
yarısından etibarən neftin qiymətinin aşağı enməsi, siyasi proseslər səbəbindən
2015-ci ildə neftin qiymətinin daha da ucuzlaşması dünyada yeni bir iqtisadi böhranın
yaranmasına səbəb olub. Həmin il milli valyutamız manat iki dəfə devalvasiyaya
uğrayıb. Bu, qaçılmaz bir hal olsa da, neftin qiymətinin sabit olduğu illərdə
yaradılan və qurulan müəssisələr, yeni iş yerlərinin yaradılması, ümumən
qeyri-neft sektorunun inkişaf etdirilməsi budəfəki böhranın da ölkə
iqtisadiyyatına ağır zərbə vurmasına mane olub. Bununla belə, Azərbaycan
prezidenti İlham Əliyev tərəfindən yeni iqtisadi prioritetlər elan olunub,
çoxsaylı islahatların həyata keçirilməsi üçün bir sıra fərman və sərəncamlar
imzalanıb. Beləliklə də, 2016-cı il ölkə iqtisadiyyatının daha da inkişaf
etdirilməsi anlamında islahatlar ili kimi də yadda qalıb.
Yanvarın 10-da Nazirlər Kabinetinin 2016-cı ilin
sosial-iqtisadi inkişafının yekunlarına və qarşıda duran vəzifələrə həsr olunan
iclasında Prezident İlham Əliyev bir daha bu mövzuya diqqət çəkərək bildirib
ki, qeyri-neft sektorunun inkişafı, o cümlədən tikinti sektorunda həyata
keçirilən tədbirlər nəticəsində yaxın gələcəkdə on minlərlə yeni iş yerləri
yaradılacaq. Ölkə başçısı Bakının qanunsuz tikililərdən təmizlənəcəyini, Mənzil
İnşaatı Dövlət Agentliyinin birinci layihəsi çərçivəsində yeni şəhərcik, hündür
mərtəbəli 29 yaşayış binası, məktəb, uşaq bağçası tikiləcəyini, yeni
infrastruktur yaradılacağını, yollar çəkiləcəyini diqqətə çatdırıb. Prezident
bildirib ki, bu işlər nəticəsində iki minə yaxın mənzil tikiləcək və güzəştli şərtlərlə
vətəndaşlara, xüsusilə maddi imkanları məhdud olan ailələrə uzunmüddətli
kreditlər veriləcək. Prezident köhnəlmiş mənzil fondunun yerində müasir
binaların tikintisi prosesinə də start verildiyini vurğulayıb. Bildirib ki, bu
məqsədlə Bakı şəhərində və digər böyük şəhərlərdə boş yerlərin ayrılmasına çox
ciddi nəzarət ediləcək: "Təkcə sadalanan layihələrin icrası nəticəsində minlərlə,
on minlərlə yeni iş yeri yaradılacaq. İnşaat sektorunun inkişafı bütün bölgələrdə
də nəzərdə tutulmalıdır. Sahibkarlar bilməlidir ki, bu layihələr çərçivəsində
çox böyük işlər görüləcək. Biz özümüzü hansı inşaat materialları ilə təmin edə
bilmiriksə, o sahələr yaradılmalıdır. Ümumiyyətlə, bu il də Azərbaycanda
makroiqtisadi sabitlik təmin edilməli, inflyasiya birrəqəmli olmalıdır”.
Prezident İlham Əliyev deyib ki, Azərbaycanın
valyuta ehtiyatları qorunacaq və onun artımına da nail olunacaq. Prezident keçən
il bank sektorunun sağlamlaşdırılması istiqamətində mühüm addımlar atıldığını,
nəzarətin gücləndirildiyini, şəffaflıqla bağlı tədbirlər görüldüyünü, habelə
inzibati və cəza metodlarının tətbiq edildiyini vurğulayıb. Prezident
vurğulayıb ki, bank sektorunun beynəlxalq standartlara uyğunlaşması istiqamətində
bu il də ciddi addımlar atılacaq, qanunu pozan şəxslərə qarşı bundan sonra da
mübarizə aparılacaq. Ölkə başçısı çıxışı zamanı qeyd edib ki, 2017-ci ildə sənaye
potensialının inkişafı ilə bağlı da addımlar atılmalıdır. Prezident İlham
Əliyev Sumqayıtdakı Texnologiyalar Parkı və Kimya Sənaye Parkında böyük müəssisələrin
yaradılması prosesinin davam etdirildiyini xatırladıb. Bildirib ki, ora qoyulan
investisiyaların həcmi bir milyard dolları ötüb: "Keçən il təməli qoyulmuş Mingəçevir
Sənaye Parkında gələn aydan etibarən bütün inşaat işləri də başlanmalıdır.
Birinci mərhələdə doqquz müasir fabrik tikiləcək və minlərlə iş yeri
yaradılacaqdır. Pirallahı adasında həm yeni sənaye zonası, həm də turizm
infrastrukturu yaradılır. Neftçala sənaye zonasının inkişafı ilə bağlı çox
ciddi addımlar atılıb. İranlı tərəfdaşlarla birlikdə avtomobil istehsalı
zavodunun təməli qoyulub. Balaxanı Sənaye Parkında işlər yaxşı səviyyədə davam
etdirilir. Masallı şəhərində sənaye zonası üçün yer ayrılıb və indi
infrastruktur işləri gedir”.
Prezident İlham Əliyevin söylədiklərindən də aydın
olduğu kimi gələcək illərdə Azərbaycanda qeyri-neft sektorunun daha da inkişaf
etdirilməsi üçün mühüm tədbirlər həyata keçirilir. Heç şübhə etmirik ki, bütün
bu tədbirlər Cənubi Qafqazın lider dövləti Azərbaycanın hərtərəfli tərəqqisinə
səbəb olmaqla bərabər, vətəndaşlarımızın sosial rifahını daha da
yaxşılaşdıracaqdır.
Rufik
İSMAYILOV