Senatda Tramp gərginliyi
Trampın ABŞ prezidenti seçilməsiylə qalmaqalların artacağı barədə
ehtimallar özünü doğrultmaqdadır. Prezidentliyinin ilk günündə gah onu Rusiya
ilə sıx münasibətlərdə ittiham etdilər, gah da müşavirləri istefa verdi. Bu
dəfə isə onun impiçmenti məsələsi gündəmə gətirilib. Qərb mətbuatının yaydığı
məlumata görə, Federal Təhqiqat Bürosunun sabiq direktoru Ceyms Komi ABŞ
qanunvericiləri qarşısında ifadə verib. Federal Təhqiqat Bürosunun sabiq
direktoru Trampın fevral ayının 14-də Maykl Flinnin təhqiqatına dair "burax bu
məsələni” deməsi barədə də danışıb. O deyib ki, Trampın bu sözlərini bir
göstəriş kimi qəbul edərək, hədsiz dərəcədə narahat olub. Onun Trampla görüşünün
mətbuata necə sızmasına dair sualın cavabında Komi bunu yaxın dostu ilə
bölüşdüyünü və məlumatı mətbuata verməsini istədiyini bildirib. Komi prezidentə
3 dəfə onun təhqiqata alınmadığını dediyini bildirib. Lakin bəzi müxalif
demokratlara görə, Trampın Komidən təhqiqatdan əl çəkməsini istəməsi 1974-cü
ildə sabiq prezident Riçard Nikson kimi onun da impiçment edilməsinə əsas
verir.
Tramp milli təhlükəsizlik məsələləri üzrə müşaviri Flinni 24-cü iş günü vitse-prezident Mayk Pensə
Rusiya səfiri ilə görüşü barədə yalan məlumat verdiyinə görə işdən çıxarıb. Kominin
ifadə verdiyi dinləmələr son illər Vaşinqtonda keçirilən ən böyük Konqres
dinləməsi olub.
Beləliklə, bütün dünyanın həyəcanla gözlədiyi dinləmələri bir neçə
aparıcı telekanal canlı yayımlayıb. Xəbər verildiyi kimi, Ceyms Komi
dinləmələrdən əvvəl ifadəsini yazılı təqdim edib və bu mətn mətbuatda yayılıb.
Keçmiş FTB direktoru ifadəsində prezident Donald Trampla iki təkbətək görüşü və
bir neçə telefon danışığı haqda detalları çatdırıb. Trampın ona vəzifədə qalmaq
üçün milli təhlükəsizlik müşaviri Maykl Flinlə bağlı təhqiqatı dayandırmağı
təklif etdiyini deyib. Habelə Tramp Komiyə təzyiq göstərib ki, ictimaiyyət
qarşısına çıxıb, onun Rusiya məsələsinə görə təhqiqat altında olmadığını bəyan
etsin.
C.Kominin dindirilməsi 3 saata yaxın davam edib, senatorlar onu sual
yağışına tutublar.C.Komi ifadəsinin əvvəlində deyib ki, onu Konqres on il
müddətinə FTB direktoru vəzifəsinə təyin etmilşdi:"Lakin mən indi başa
düşürəm ki, prezident məni hər hansı səbəbdən və ya səbəbsiz olaraq işdən
kənarlaşdıra bilərmiş”. Suallara cavab verərkən, C.Komi Rusiyanın ABŞ-dakı
seçki kampaniyasına müdaxiləsinə tam əmin olduğunu bildirib. Keçmiş direktor
deyib ki, belə bir müdaxilənin mövcudluğunu ilk dəfə 2015-ci ilin yayında bilib.
Komi Trampın onu guya işinin öhdəsindən yaxşı gələ bilmədiyinə görə vəzifədən
çıxarmasına dair iddiasını rədd edib. Deyib ki, prezident onu işinin öhdəsindən
gələ bilməməkdə ittiham edərək kollektiv qarşısında nüfuzdan salmaq istəyib.
"Bu sözlər məni sarsıtdı, bunu təhqir kimi qəbul etdim”, - deyə keçmiş direktor
bildirib. Komi əlavə edib ki, Tramp özü daha sonra FTB direktorunun Rusiya
təhqiqatına görə işdən azad edildiyini etiraf edib. C.Komi deyib ki, əvvəllər
prezident Obama ilə hər hansı danışıqlarının qeydiyyatını aparmasa da,
prezident Tramp-a söhbətlərinin qeydiyyatını aparıb, çünki başa düşüb ki, Tramp
bir gün bu söhbətlərin məzmunu barəsində yalan danışa bilər.
Keçmiş FTB direktorunun sözlərinə görə, prezident ona Rusiyaya dair
təhqiqatın dayandırılması barədə birbaşa göstəriş verməyib. Bununla belə,prezident
Maykl Flinnə dair təhqiqatın qurtarmasına ümid etdiyini bildirib. C.Komi deyib
ki, o, bunu hərəkət üçün istiqamət kimi başa düşüb. Keçmiş direktorun sözlərinə
görə, prezidentin onu vəzifədə saxlaması müqabilində nəsə gözlədiyini hiss
edib.
Nə üçün prezidentin Rusiya təhqiqatına və Kominin ona sədaqətli
olmasına dair söhbətlərinin qanunsuz olduğunu prezidentin dərhal və açıq
şəkildə nəzərinə çatdırmadığına dair suallara cavab verərkən keçmiş direktor
sarsıldığını, lakin qətiyyətli reaksiya vermədiyini etiraf edib. Keçmiş FTB
başçısı deyib ki, vəzifədən Rusiyaya dair araşdırmanı apardığına görə
çıxarıldığını düşünür. Kominin bildirdiyinə görə, vəzifədən çıxardılanadək
Tramp onun işi barəsində heç bir tənqid və narazılıq bildirməyib. Komi Trampın
seçki komandası ilə Rusiya rəsmiləri arasında kommunikasiyalara dair suallara
açıq dinləmədə cavab verə bilməyəcəyini deyib.
Dindirmə başa çatdıqdan sonra ABŞ Senatı Kəşfiyyat Komitəsinin sədri
Riçard Barr bəyan edib ki, dinləmələr az sonra bağlı qapılar arxasında davam
etdiriləcək.
Ceyms Kominin ifadəsi ona görə kritik hesab olunurdu ki, Konqres
keçmiş direktorun danışdıqlarına əsasən Trampın barəsində ədalətə müdaxilə
ittihamı ilə impiçment prosedurunu başlada bilər. Doğrudur, Ceyms Komi dindirmə
zamanı Trampın ona Rusiya ilə bağlı təhqiqatı dayandırmaq barədə birbaşa təzyiq
etmədiyini deyib. Lakin onun Maykl Flinnə bağlı xahişi və FTB direktoruna
vəzifədə qalmaq naminə Rusiya təhqiqatını dayandırmaq barədə eyhamlar vurması
kifayət qədər ciddi məsələdir. Bu, prezident Trampın düşdüyü vəziyyəti qat-qat
mürəkkəbləşdirir. Hələlik Tramp özü Kominin ifadəsini şərh etməyib, köməkçiləri
onu Tvitter-dən təcrid etməyə çalışıblar. Bununla belə, Trampın vəkili Mark
Kasovits bildirib ki, onlar Kominin özünə qarşı təhqiqatın başladılmasına
çalışacaqlar. Çünki keçmiş FTB direktoru prezidentlə özəl söhbətinin
detallarını birtərəfli qaydada mətbuata sızdırıb.
Kamran