Bakı 23°C
“Sən “4” almalı deyildin, bu, ədalətli olmayıb” - Məktəb illəri
Məktəb
illəri ömrün ən qayğısız və mənalı dövrü adlandırılır. Həmin illərdən hər kəsin
o qədər xatirələri olur ki, danışmaqla bitməz. Lakin həmin illəri ümumiləşdirəndə,
o xatirələr içərisində daha yaddaqalanları da olur. Rubrikamızın budəfəki
qonağı keçmiş maliyyə naziri, iqtisad
elmləri doktoru, professor, "Ekonomiks” Beynəlxalq İqtisadi Araşdırmalar
Birliyinin sədri Fikrət Yusifovdur. İqtisadçı tələbəlik illərində başına gələn
maraqlı hadisəni də bizimlə bölüşdü: "Xalq Təsərrüfatı İnstitutunda hər kəsin
tanıdığı Əlihüseyn müəllim var idi. O qədər obyektiv müəllim nadir hallarda
olur. Coğrafiyanı çox sevirdim. İmtahanda necə oldusa, gərginlik keçirdim,
"4” aldım. Yeddi imtahandan beş alıb, səkkizinci imtahandan "4” almışdım.
Çox pis vəziyyətdə idim. Yeni il tətilinə getmişdim. Bir neçə gün sonra pis əhval-ruhiyyə
ilə instituta gəldim. Dekan müavini dedi ki, Əlihüseyn müəllim üç gündür səni
axtarır. O dövrdə telefon əlaqələri çox zəif idi. Gördüm ki, kafedrada təkcə
oturub. Hər gün gəlib burada məni gözləyirmiş. Əsəbi şəkildə məndən harada
olduğumu soruşdu və dedi ki, prorektora demişəm, get, təyinat yazsınlar, səndən
təzədən imtahan götürəcəyəm. Sən "4” almalı deyildin, bu, ədalətli olmayıb. Təyinatını
al, sabah gəl imtahana”. Sabah mən yenidən imtahan verdim. İmtahanda məni sual
atəşinə tutdu və "5” aldım. Bu qədər ədalət sahibi olan müəllimin tələbəsi,
həyatda həmişə, hər məsələdə ədalətli olmağa borcludur”.
Günel Azadə
