İmişlidə Şəkər Bayramı qeyd olunub.
"Azərsun Holdinq” mütəxəssisləri tərəfindən qışlıq
şəkər çuğundurunun əkinləri istiqamətində aparılmış elmi-tədqiqat işləri və təcrübələr
uğurla nəticələnib. Həyata keçirilmiş bu yeniliyin hesabına artıq qış mövsümündə
də şəkər çuğunduru yetişdiriləcək, nəticədə İmişli Şəkər Zavodunun xammal ilə təmin
edilməsində yerli məhsulun nisbətində artım qeydə alınacaq. Əgər əvvəllər adıçəkilən
müəssisəyə istehsal üçün ildə bir dəfə şəkər çuğunduru verilirdisə, indi bu say
ikiyə çatdırılacaq. Eyni zamanda Şirkətlər
Qrupu Şəmkir rayonu ərazisində şəkər
çuğunduru əkinlərini həyata keçirib ki, bu addım da uğurla nəticələnib, gələn
ildən isə bu sahələr genişləndiriləcək və yeni Şəkər Emalı zavodu inşa ediləcək.
Nəticədə isə ətraf bölgələrdə də şəkər çuğunduru əkinləri geniş vüsat alacaq.
Beləliklə Şəmkir və digər rayonlarda yaşayan insanların sosial-rifah halının
yüksəlməsinə və işlə təmin olunmasına mühüm töhfə verilmiş olacaq. Şəkər
çuğunduru əkini ilə məşğul olan fermerlər isə məhsullarını daha yaxın ərazidə
yerləşən müəssisəyə təhvil verə biləcəklər ki, nəticədə daha az zaman itirərək
daha çox gəlir əldə edə biləcəklər. Bu yeniliklər barədə məlumat şəkər
çuğunduru qəbulu mövsümünün başlanılması ilə əlaqədar olaraq "Azərsun Holdinq”
və İmişli rayonu İcra Hakimiyyətinin təşkilatçılığı ilə keçirilən Şəkər
Bayramında verilib. Tədbir çərçivəsində millət vəkilləri, rayon icra hakimiyyətinin
nümayəndələri və Şirkətlər Qrupunun rəhbər şəxsləri Ümummilli Lider Heydər
Əliyevin abidəsini ziyarət edərək xatirəsini hörmətlə yad ediblər. Daha sonra İmişli
Mədəniyyət evində konsert proqramı təşkil edilib. Tədbirdə İmişli rayonu İcra
Hakimiyyətinin başçısı Vilyam Hacıyev çıxış edərək, son illər ərzində əldə edilən
uğurlar, yaradılan yeni iş yerləri barədə ətraflı məlumat verib, sakinləri bu
bayram münasibəti ilə təbrik edib: "İmişli Şəkər Zavodu rayonun həyatında çox əhəmiyyətli
rol oynayıb. Bu zavod 3000 nəfərdən çox rayon sakinini işlə təmin edib, onun
hesabına İmişli yerli büdcədən maliyyələşən şəhər və rayonlar sırasına daxil
olub”.
"Azərsun Holdinq”in baş direktoru Savaş Uzan isə şəkər
çuğunduru sahələrinin ildən ilə genişləndirildiyini, bununla da İmişli və ətraf
rayonlarda yaşayan insanların sosial-rifah halının yüksəldilməsinə mühüm töhfə
veriləcəyini bildirib. Tədbirdə ölkənin 29 rayonunda 3000-ə yaxın fermer təsərrüfatları
tərəfindən yetişdirilən şəkər çuğundurunun qəbuluna start verildiyi
bildirilib.
Qeyd edək ki, "Azərsun Holdinq” əkin ərazilərini
mövcüd 7500 hektardan 10 000 hektara yüksəltməyi nəzərdə tutub ki, ki, burada
da təxminən 400 min ton çuğundurun yetişdirilməsi planlaşdırılır. Daha bir diqqətçəkən
məqam isə ondan ibarətdir ki, sahələrin genişləndirilməsi nəticəsində çoxlu
sayda insanın işlə təmin olunması həyata keçiriləcək, hazırda 100 min nəfər qədər
olan bu rəqəmin daha da artırılması mümkün olacaq.
Aygün ƏZİZ