Şəhid ailələrinə böyük qayğı - Fotolar
Prezident İlham Əliyevin məqsədyönlü siyasətinə
uyğun olaraq, hərbi sahəyə ayrılan xərclər son illər ərzində əhəmiyyətli
dərəcədə artırılıb. Bu, ölkəmizin müdafiə potensialının güclənməsi ilə yanaşı, Silahlı
Qüvvələrdə xidmət edən hərbi qulluqçuların etibarlı sosial müdafiəsinin təmin
edilməsinə, mənzil-məişət problemlərinin həll olunmasına, onlara verilən
imtiyaz və güzəştlərin miqyasının genişləndirilməsinə şərait yaradıb. Bu sahədə
dövlət siyasətinin mühüm istiqamətlərindən biri də hərbi qulluqçulara dövlət
icbari sığortasının tətbiqidir.
Sözügedən siyasətin tərkib hissəsi olaraq, dövlət
başçısı İlham Əliyev cari ilin 19 aprel tarixində "Azərbaycan Respublikasının
ərazi bütövlüyü uğrunda həlak olmuş, ölmüş və hərbi əməliyyatlarla əlaqədar
xəbərsiz itkin düşdüyünə görə ölmüş elan edilmiş hərbi qulluqçuların ailə
üzvlərinin sosial müdafiəsinin yaxşılaşdırılması ilə bağlı əlavə tədbirlər
haqqında” Fərman imzalayıb. Həmin sənədə əsasən, 1997-ci il avqustun 2-dək
Azərbaycanın ərazi bütövlüyü uğrunda həlak olmuş, ölmüş və hərbi əməliyyatlarla
əlaqədar xəbərsiz itkin düşdüyünə görə ölmüş elan edilmiş hərbi
qulluqçuların vərəsələrinə bu Fərmanla müəyyənləşdirilmiş qaydada 11.000 manat
məbləğində birdəfəlik ödəmə verilməsi nəzərdə tutulub.
Şübhəsiz ki, bu Fərman Azərbaycan Prezidentinin humanist
siyasətinin, Azərbaycanın ərazi bütövlüyü uğrunda həlak olmuş hərbi
qulluqçuların ailələrinə, vərəsələrinə yüksək diqqət və qayğısının bariz
nümunəsidir. Xatırladaq ki, hələ Prezident seçkiləri ərəfəsində İlham Əliyev
uzun illərdir gündəlikdə duran bu məsələnin həll olunacağını vəd etmişdi. O, bu
vədinə sadiq qalaraq sözügedən fərmanı imzalayıb. Bu, Azərbaycan Prezidentinin
hər bir vətəndaşın qayğı və probleminə xüsusi həssaslıqla yanaşdığını, onların
tez bir zamanda aradan qaldırılması üçün əməli tədbirlər gördüyünü əyani
şəkildə təsdiq edir.
Qeyd edək ki, 1997-ci il avqustun 2-də "Hərbi
qulluqçuların dövlət icbari şəxsi sığortası haqqında” Qanun qüvvəyə mindikdən
sonra hərbi qulluqçuların həlak olması, itkin düşməsi və ya xəsarət alması
zamanı sığorta ödənişlərinin verilməsinə dair normativ hüquqi baza
formalaşdırılıb, belə ödənişlərlə bağlı maliyyə təminatı məsələsi həll edilib və
Qanuna uyğun olaraq sığorta ödənişlərinin verilməsinə başlanılıb. Həmin Qanunun
tətbiqindən əvvəl Azərbaycanın ərazi bütövlüyü uğrunda həlak olmuş və itkin
düşmüş hərbi qulluqçuların ailə üzvlərinin sosial müdafiəsinin
yaxşılaşdırılması məsələləri açıq qalıb. Buna görə də Azərbaycan
Prezidentinin 2018-ci il 19 aprel tarixli Fərmanı məhz bu kateqoriyaya aid
hərbi qulluqçuların vərəsələrinə aiddir.
Onu da əlavə etmək yerinə düşər ki, artıq noyabrın
14-dən birdəfəlik ödəmənin verilməsi prosesi qanunvericiliyin tələblərinə ciddi
riayət olunmaqla və şəffaflıq tam təmin edilməklə həyata keçirilir. Şəhid hərbi
qulluqçuların vərəsələri nazirliyin rəsmi saytında sorğu verərək ödəmə almaq
hüquqlarını öyrəndikdən sonra notariat kontorlarına müvafiq sənədləri təqdim
edir, vərəsəlik şəhadətnaməsi əldə edirlər. Sənədlər notariat kontorları
tərəfindən elektron qaydada nazirliyə təqdim olunur. Nazirlikdəki müvafiq işçi
qrupu həmin sənədlərin təhlilini aparır. Sənədləşmə proseduru tam başa
çatdıqdan sonra vərəsələrə Fərmanda göstərilən məbləğdə birdəfəlik ödəmənin
verilməsinə başlanılır. Bu günə kimi 150-yə yaxın şəhid hərbi qulluqçunun
vərəsələrinə müvafiq vəsaitin verilməsi deyilənlərin əyani sübutudur.
Lakin çox təəssüflər olsun ki, bəzi şəxslər dövlətin
humanist siyasətindən haqsız şəkildə bəhrələnmək üçün müxtəlif cəhdlər edirlər.
Bu kateqoriyaya aid insanlar əsasən 1997-ci il avqustun 2-də "Hərbi
qulluqçuların dövlət icbari şəxsi sığortası haqqında” Qanun qüvvəyə mindikdən
sonra artıq müvafiq ödəmələri almış, yaxud da bu ödəmələri almaq üçün qanuna
uyğun əsasları olmayan şəxslərdir. Onlar öz maraqlarını təmin etmək üçün
əsassız fikirlər dilə gətirir, sosial və onlayn medianın, internetin
azadlığından öz məqsədləri naminə istifadə etməyə, haqsız iddialarına haqlı don
geyindirməyə, ictimai rəyi çaşdırmağa cəhdlər edirlər. Düzdür, aidiyyəti dövlət
qurumlarının araşdırması zamanı konkret dəlillərə istinad edilməklə bu
iddiaların əsassız olduğu tam çılpaqlığı ilə üzə çıxır.
Acınacaqlı hal həm də ondan ibarətdir ki, Azərbaycan
Prezidentinin humanist siyasətini gözdən salmaq, bu nəcib addıma ləkə yaxmaq
istəyən bəzi siyasi qruplar, ayrı-ayrı fərdlər bəhs etdiyimiz şəxslərin əsassız
iddialarından sui-istifadə etməyə çalışırlar. Özünü guya Vətən, millət, xalq
təəssübkeşi kimi göstərən, şəhidlərin – onların vərəsələrinin haqqını müdafiə
edirmiş kimi davranan belə şəxslər də əsassız ittihamlar irəli sürməklə, özlərini
"haqqın müdafiəçisi” kimi cəmiyyətə sırımağa çalışırlar. Əslində isə bununla
onlar Azərbaycanın ərazi bütövlüyü uğrunda canlarını fəda edən, şəhidlik
zirvəsinə ucalan qəhrəman oğul-qızlarımızın ruhuna sayğısızlıq nümayiş etdirir,
öz merkantel maraqları naminə əsassız narazılıq yaradanlardan bəhrələnməyə
çalışırlar. Əlbəttə ki, bu, yolverilməzdir!
Rufik İSMAYILOV