“Səbirsizliklə ilk “Marketinq Sammiti-2017”ni gözləyirik”
İxrac
potensialından düzgün istifadə etmək, dövlətin yaratmış olduğu şəraitdən
səmərəli yararlanmaq və xarici bazarlarda sağlam mövqe tutmaq bu gün hər bir
sahibkar üçün çox vacibdir. Bəs bu zaman nələrə diqqət etmək, hansı
standartları tətbiq etmək lazımdır? Bundan başqa, ixrac siyasətinin düzgün strateji
planlamasının aparılması, marka siyasətinin daha doğru və sağlam qurulması kimi
aktual mövzular da meydana gəlməkdədir.Bütün
bunları nəzərə alaraq 23 dekabr 2017-ci il tarixində AzMarketinq MMC-nin
təşkilatçılığı ilə "Made in Azerbaijan” brendinin inkişafına həsr olunacaq
birinci marketinq sammiti təşkil olunacaq. Sammitlə bağlı geniş məlumat əldə
etmək üçün tədbirin təşkilatçılarından
və spikerlərindən olan Tural Abbaslı ilə həmsöhbət olduq.
- Necə
oldu bu tədbiri keçirmək qərarına gəldiniz? Hazırlıq işləri necə gedir?
- Biz 6 ay
əvvəl bu sammiti keçirmək qərarına gəldik. Müəyyən müşahidələr, xarici bazarda
bir sıra araşdırmalar apardıq. Xarici bazarda araşdırma apararkən bizim
komandada bir sıra fikirlər formalaşdı. Aydın oldu ki, biz yaranmış şəraitdən
heç də lazımınca istifadə edib, məhsulumuzu xaricə çıxarda bilmirik. Burada
daha çox sahibkardan qaynaqlanan problemlərlə üzləşdik. Avropaya çıxmaq
istəyiriksə, dünyada olan marketinq trendlərini tətbiq etmək
məcburiyyətindəyik. Yoxsa, rəqabət
qabiliyyətli məhsul istehsal edə bilmərik. Məhz bütün bunları nəzərə alaraq bir
yol xəritəsi çəkdik və qərara aldıq ki, bu ilin sonunda belə bir tədbir
keçirək. Bu layihə ilə bağlı iki dəfə Türkiyədə olduq. Layihənin işçi qrupunun
formalaşması üçün Azərbaycandakı bir sıra şirkətlərlə görüşdük. Bugünkü durum
ondan ibarətdir ki, biz artıq böyük bir səbirsizliklə 23 dekabrı, Azərbaycanda
keçiriləcək ilk "Marketinq Sammiti-2017”ni gözləyirik. Ümid edirik ki, bu
sammit ölkəmizdə ixrac siyasətinə marketoloqların verdiyi töhfə kimi
yaddaşlarda qalacaq. Tək istəyimiz sammitin nəticəsi olaraq sahibkarlar
eşitdiklərini və gördüklərini işlərində tətbiq etsinlər. Biz bu yolda
Azərbaycan sahibkarı üçün az da olsa xidmət göstərmiş olaq.
- Söhbət zamanı "biz” deyirsiniz. Bu bizə, yəni
təşkilat komitəsinə kimlər daxildir?
- Sevindirici
haldır ki, "biz” deyə bilirik. Bu şəxslər və fərdlər üzərində qurulmuş bir iş
deyil. Bir nəfər də, 5 nəfər də olsaq fərq etməz. Biz bir komadayıq. Birbaşa
"Made in Azərbaycana” xidmət etmək istəyən insanlarıq. Təşkilat Komitəsi 5
nəfərdən ibarətdir. Əyyub Qarabağlı, Rasim Abutalıbov, Seymur Quliyev, Qələndər
Məmmədli və mən. Komitənin sədri Əyyub Qarabağlıdır, Qələndər isə ən gənc
üzvümüzdür, Seymur Quliyev marketinq sahəsində həm praktik, həm də nəzəri
bilikləri ilə fərqlənən insanlardandır. Mən həm Təşkilat Komitəsinin üzvüyəm,
həm də spikerəm. Bu komandanın əsas məqsədi Azərbaycan üçün, milli
iqtisadiyyatımız üçün əlimizdən gəldiyi qədər xidmət göstərmək və gözəl işlər
ortaya qoymaqdır.
-
Sammitin spikerləri kimlərdir?
- Spikerlər
mövzusunda çox həssas davrandıq. Çalışdıq ki, sahibkarlarımız üçün səmərəli,
marketinq sahəsi üçün doğru insanları seçək. Spikerlərimiz 6 nəfərdən
ibarətdir. Hər bir spiker üçün reqlament yarım saat nəzərdə tutulub.
Çıxışçılardan üçü Türkiyədən gələn qonaqlarımız, digər üçü isə yerli
marketoloqlarımızdır. Türkiyədən gələn spikerlərimizdən biri Uğur Batıdır.
Hansı ki, Türkiyədə marketinq sahəsində bir sıra uğurlara imza atıb, bu sahə
üzrə professordur. İkinci türkiyəli spikerimiz Bülent Fidan olacaq. Bu
spikerimiz "BrandSuite” şirkətinin
nümayəndəsi, eyni zamanda "BrandMap” jurnalının təsisçisi kimi çıxış edəcək.
Növbəti spikerimiz Serhan Okdur. "İlk
marka hazreti Adem mi?” kitabının müəllifidir. Bu üç nəfər türk spikerlərimiz
bizə A-dan Z-yə markalaşmaq, "Made in Azərbaycan” konseptinin hazırlanması üçün
şirkətlərə lazım olan əsas mövzulardan danışacaqlar. Yerli spikerlərimizə
gəlincə isə, onlardan biri Ramil Cabbarovdur. Hazırda Azərbaycan İqtisad
Universitetinin rektor köməkçisi vəzifəsində çalışır. İkinci yerli spikerimiz
CRM üzrə gözəl biliklərə sahib olan Əli Xəyyam, üçüncüsü isə mənəm.
- Sammitin proqramında nələr nəzərdə tutulub?
- Bir sıra
tədbirlərin təşkilatçısı kimi deyə bilərəm ki, tədbir təşkilatçılığı çox çətin
bir işdir. Sammitin proqramı haqqında marketingsummit.az saytında ətraflı məlumat əks olunub. Sammit
bir gün olunacaq. 23 dekabr saat 9-da qeydiyyatla başlayacaq və 1 saat davam
edəcək. Ondan sonra isə açılış nitqi olacaq. Ardınca isə spikerlərin çıxışı baş
tutacaq. Bir neçə çıxışdan sonra yarım saatlıq fasilə olacaq, daha sonra
spikerlərin çıxışı davam edəcək.
- Sammiti
keçirməkdə məqsədiniz nədir?
- Məqsəd
birdir. Azərbaycan... Söz Azərbaycandan gedirsə, əlimizdən gəldiyi qədər bu xalq
üçün, bu torpaq üçün xidmət göstərməliyik. Əsas məqsəd dövlətin həyata
keçirdiyi "Made in Azərbaycan” siyasətinə marketoloq olaraq dəstək olmaqdır. Digər
bir məqsədimiz qlobal marketinq konseptləri ilə, lokal marketinq konseptlərini sintez edərək qlobal
marketinq hədəfləri formalaşdırmaq və bunu Azərbaycan sahibkarlarının işinə
adaptasiyasını təmin etməkdir. Biz inanırıq ki, bu adaptasiya prosesinə nə
qədər tez başlasaq, bir o qədər tez müddətdə daha rəqabət qabiliyyətli
məhsullar ortaya çıxarda biləcəyik. Bu, həm ölkə daxili, həm də ölkə xarici
üçün keçərlidir.
- Gözləntiləriniz nədən ibarətdir?
- Təbii
ki, hər kəs gördüyü işdən müsbət nəticələr əldə etmək istəyir. İndiyə qədər sammitimizlə
bağlı gələn reaksiyalardan çox böyük məmnunluq hissi duyuruq. Ümid edirik ki,
bu fikirlər tədbirdən sonra da davam edəcək. Çünki bu günə kimi biz də, dəyərli
dostlarımız da marketinq sahəsində bir çox tədbirlər təşkil etmişik. Marketinq
anlayışının məhz bu gün daha çox ehtiyac duyulmasına zəmin yaradılıb. Bu sahədə çalışan insanların rolu həqiqətən
böyükdür. Bizlər də bunun üçün çalışırıq. Bizim əslində gözləntimiz bu gün
Azərbaycan sahibkarına marketinqin önəmini, funksiyalarını, rolunu əvvəlkinə
nisbətən daha çox anlada bilməkdir. Təbii ki, bunun nəticəsində sağlam iş
görmüş, real nəticələri olan insanlarla yeni bir yola çıxmaq kimi gözləntimiz
də var. Hədəfimiz isə Azərbaycanda sağlam marketinq mühitinin formalaşmasına
dəstək olmaqdır. Ümid edirik ki, buna sammitə dəvət olunan, öz peşəkarlığı ilə
fərqlənən insanlarla, marketinq camiasının üzvləri ilə istəklərimizə nail ola
biləcəyik.
- Son vaxtlar marketinqlə bağlı bir sıra önəmli
tədbirlər, yığıncaqlar keçirildi. Maraqlıdır, sizin sammitin digərlərindən
fərqi nə olacaq?
- Əslində
marketinqlə bağlı tədbirlər 2008-ci ildən başlayıb. O zaman indiki kimi
marketinqə həvəs və maraq geniş deyildi. Lakin sonralar marketinq tədbirləri
artıq 2013-cü ildən intensiv həyata keçirilir. Hətta o tədbirlərdən birində
spiker olmuşam. Məhz bu tədbirlər
cəmiyyətdə marketinq anlayışının təbliğində böyük rola malikdir. Bizim tədbir
digərlərindən yanaşmasına görə fərqli olacaq. Məsələn, keçirilən silsilə
tədbirlərdə müxtəlif sektorlarda çalışan insanların iştirakı mümkün idi. Yəni
həmin tədbirlərə biletini alan hər kəs qatıla bilərdi. Bu tədbirlər sırf
Azərbaycan ictimaiyyətinin maarifləndirilməsi üçün keçirilirdi. Biz həqiqətən
buna çox sevinirdik ki, bizim dostlarımız marketinq sahəsində belə bir xidmət
göstərirlər. Keçirilən tədbirlər sanki digərləri üçün bir yol açdı. Bu yolun nə
dərəcədə uğurlu olub-olmadığına isə cəmiyyət qərar verir. Bizim sammit birbaşa
olaraq geniş kütləyə xitab etmir. Yalnız bu sahə ilə məşğul olan və öz
sahəsində sayılıb seçilən insanlar, ən əsası iş adamları dəvət olunacaq. Çünki
bizim mövzu da fərqlidir. "Made in Azərbaycan”... Biz mütləq şəkildə iş adamına
xitab etməliyik. Son olaraq onu qeyd edim ki, marketinq sahəsində keçirilən
bütün tədbirlər yaxşıdır, yüksək qiymətləndirilməlidir. Həmçinin uzun bir
strateji layihə kimi "Marketinq Sammiti-2017”də
yaxşı olacaq. İnanırıq ki, məhz bu sammitin nəticəsi kimi bütün iş adamları
yavaş-yavaş fərqli formatlara keçid edəcəklər.
- Nəyə
görə sammitə bilet satışı yoxdur?
- Bu,
marketinq sahəsində "Made in Azərbaycan”a istiqamətlənmiş ilk tədbirdir. Tamamilə
şəxsi resursların istifadəsi ilə həyata keçirilir. Biz bilet satışı olmağını
istəmədik. Bu, Təşkilat Komitəsinin birgə qərarıdır. Yəni bu layihə qazanc
məqsədi ilə həyata keçirilmir. Sırf milli-mənəvi dəyərlərdən və ruhdan irəli
gələn bir tədbirdir. 8 ay bundan əvvəl belə bir tədbir keçirməyi düşünmürdük.
Amma sonradan ehtiyacı hiss edirdik. İlk tədbiri bilet satışı olmadan həyata
keçirdirik. İstədik ki, yalnız bu sahəyə aid insanlar qatılsın və bir növ öz
aramızda müzakirələr aparaq, dərdləşib söhbət edək. Növbəti il bu sammitin
nəticəsi kimi meydana çıxacaq hədəfli və məqsədyönlü iş planına uyğun olaraq
formatlar, məkanlar dəyişə bilər. Bu zaman insanlarımız əsl iş prosesi ilə daha
yaxından tanış olub, hadisələrə, yanaşmalara daha doğun reaksiya verə
biləcəklər. Bilet satışı etməməyimizin bir səbəbi isə bu işdə bizə yol yoldaşı
olan dostlarımızdır.
- Onlar kimlərdir və bu işdə nə kimi rolları
var?
- Bizim
sammitin saytına baxsanız görərsiniz ki, orada sponsor, dəstəkçilər kimi
sözlərdən istifadə etməmişik. Bu işdə köməklik göstərənlərin hamısı bizim yol
yoldaşlarımızdır. İdeyanı irəli sürən kimi düşünmədən "biz də sizinlə bu yolda
varıq” dedilər. Ən böyük yol yoldaşımız, bizə bu işdə ürək-dirək verən AzPromodur.
AzPromonun rəhbərliyinə, xüsusən də Rüfət bəyə dərin təşəkkürlərimizi
bildiririk. Onlar bizim layihəmizə təmənnasız dəstək kimi tədbirimizi
keçirməyimiz üçün məkan olaraq Bakı Biznes Mərkəzinin qapılarını üzümüzə açdılar.
Bundan başqa kreativ tərəfdaşımız olan Yello şirkətinə, xüsusilə də Azər
Nəcəfova, Wplus vip service şirkətindən Aytən xanıma, Orient dünya poliqrafiya
şirkətinə minnətdarıq. Saytımızda "Yol yoldaşlarımız” bölməsində adı qeyd
edilən digər şirkətlərə və tədbirimizi işıqlandıran mətbuat orqanlarına,
xüsusilə də geniş müsahibəyə görə "Kaspi” qəzetinə təşəkkür edirik. Yəni
yoldaşlarımız bizim üçün təmənnasız hər cür şəraiti yaratdıqları üçün bilet
satışına ehtiyacımız olmadı.
- İştirakçılar kimlər olacaq?
- Biz
200-230 nəfərlik bir auditoriya nəzərdə tutmuşuq. Saytımızda tədbirdə iştirak etmək istəyənlər
üçün bir sorğu bölməsi yerləşdirmişik. Həmin sorğu bölməsində qeydiyyatdan
keçənlərin elə bir çoxu bizim dəvət etməyi düşündüyümüz insanlardır. Ümumilikdə
tədbirimizin hədəf kütləsi bayaq da qeyd etdiyim kimi iş adamlarıdır. Təqribən
60-70 şirkətdən 100 nəfər iş adamı qonağımız olacaq. Həmçinin marketinq
sahəsində sayılıb-seçilən simalardan da dəvətlilərimiz var. Yəni çalışmışıq əsl
biznes mühiti formalaşdıraq. Saytdakı onlayn sorğudan isə özünü ən yaxşı
şəkildə ifadə edənlər seçiləcək. Ümid edirəm ki, gözəl bir iş görmüş olacağıq.
Günel Azadə