Səbəbi “unudub”, nəticədən danışmaq
Azərbaycana səfər edən Avropa İttifaqının Cənubi Qafqaz və
Gürcüstan üzrə xüsusi nümayəndəsi Toivo Klaar səfər öncəsi müsahibəsində Dağlıq
Qarabağ münaqişəsi ilə bağlı mövqeyini açıqlayıb. O bildirib ki, Dağlıq Qarabağ
münaqişəsi çox zəngin bir region olan Cənubi Qafqaza həm iqtisadi, həm də
sosial və mədəni sahədə öz potensialından tam istifadə etməyə imkan vermir: "Aİ-nin
mövqeyi olduqca aydındır: biz insanların və cəmiyyətlərin öz potensialını tam
həyata keçirə biləcəyi dinc və firavan Cənubi Qafqaz istəyirik”.
Bəxtiyar MƏMMƏDLİ
Aİ təmsilçisi nədənsə, bu münaqişənin Cənubi Qafqazın inkişafına mane
olduğunu dilə gətirsə də, Ermənistanın işğalçılıq siyasətinə toxunmayıb.
İndiyədək nəinki Avropa İttifaqı, bütövlükdə heç bir beynəlxalq qurum
Ermənistana torpaqları azad etmək üçün ciddi təsir göstərməyib.
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, beynəlxalq
təşkilatların Ermənistana münasibətdə qətiyyətli bir siyasət həyata
keçirməmələri bizi narahat edir: "BMT Təhlükəsizlik Şurasının
Ermənistan-Azərbaycan, Dağlıq Qarabağ münaqişəsi ilə bağlı qəbul etdiyi 4 qətnamənin
indiyədək yerinə yetirilməməsi özü bir göstəricidir. Bu günlərdə də Avropa
İttifaqının Cənubi Qafqaz və Gürcüstan üzrə xüsusi nümayəndəsi münaqişə ilə
bağlı verdiyi müsahibəsində qeyd edir ki, bu problem nəticə etibarı ilə regionun
inkişafına mane olan bir faktordur. Təbii ki, bu, bəlli məsələdir. Bizim üçün
maraqlı cəhətdir ki, artıq Avropa İttifaqı rəhbərliyi səviyyəsində də bu
münaqişənin bütün regionun inkişafı üçün təhlükə, maneə olduğu qeyd olunur. Nəticədən
danışılır, lakin səbəb araşdırılmır. Səbəb kimi onu araşdırmaq lazımdır ki, bu
münaqişəni yaradan, Azərbaycan torpaqlarını işğal altında saxlayan kimdir. XXI
əsrdə işğal faktoru varsa, belə olan halda ona qarşı hansı beynəlxalq hüquq
çərçivəsində addımlar atılmalıdır? Bu kimi sualların qarşısında susurlar və
üstündən keçirlər, sadəcə, "region üçün bu münaqişənin qalması təhlükəlidir”,
"inkişafın qarşısını alır” kimi ümumi ifadələrlə fikirlərini yekunlaşdırırlar.
Avropa İttifaqı dəfələrlə bildirib ki, o, birbaşa münaqişənin tənzimlənməsində
iştirak etmir, ATƏT Minsk qrupu bununla məşğuldur. Lakin münaqişənin həlli baş
tutarsa, bu halda Avropa İttifaqı münaqişədən sonrakı şəraitdə iştirak edə
bilər. Yəni, söhbət müharibədən sonrakı bərpa prosesində müəyyən iqtisadi
dəstəkdən gedir. Lakin birbaşa məsələyə müdaxilə etmək və Ermənistana qarşı hər
hansı təsir mexanizmlərini işə salmaq fikri yoxdur. Avropa İttifaqının
Ermənistanla çərçivə sazişi imzalaması bunun bariz nümunəsidir. Hər halda
işğalçı dövlət ilə XXI əsrdə çərçivə sazişi imzalamaq, əlaqələri inkişaf
etdirmək niyyətini ortaya qoymaq və bunu hüquqi baxımdan tənzimləmək özü anomal
bir məsələdir”.
E.Nəsirov əlavə etdi ki, Azərbaycan hər zaman ikili standartlardan
əziyyət çəkib: "Biz bundan narahatıq ki, beynəlxalq siyasətdə ikili standartlar
sanki bir standart kimi qəbul edilir. Bunun özü beynəlxalq hüququn böhranı
deməkdir. Mövcud çətinliklərə baxmayaraq, Azərbaycan öz yolu ilə davam
etməkdədir, güclənməkdəyik. Dövlət başçısının rəhbərliyi altında Azərbaycanda
iqtisadi, siyasi islahatlar dərinləşməkdədir. Bütün bunlara baxmayaraq, yenə də
biz beynəlxalq hüquqa söykənərək Qarabağ münaqişəsini dinc yolla həll etmək
istəyirik. Lakin dinc həll yolu tükənəcəyi təqdirdə, Ali Baş Komandanın
dəfələrlə qeyd etdiyi kimi, bizim səbrimizin bir hüdudu var və bu
nöqteyi-nəzərdən Azərbaycan münaqişəni istənilən yolla həll etmək hüququnu
özündə saxlayır. Yəni indiki vəziyyətdə məsuliyyət daha çox Ermənistanın və ona
himayədarlıq edənlərin, beynəlxalq ictimaiyyətin, xüsusilə ATƏT-in Minsk
qrupunun üzərinə düşür. Rəsmi Yerevanın işğalçılıq siyasətinə qarşı adekvat
addımlar atmalı, onu sülhə məcbur etmək lazımdır. Bu prosesə də Avropa İttifaqı
real köməklik göstərə bilər. Çünki həmsədr ölkələrdən biri olan Fransa məhz
Avropa İttifaqının üzvüdür və münaqişə ilə bağlı müəyyən mexanizmlər hazırlamaq
imkanına malikdirlər. Amma təəssüflər olsun ki, onlar bu məsələdə maraqlı
olmurlar və bəyanatları da daha çox ünvansız olur”.
Politoloq Fikrət Sadıxov bildirdi ki,
Avropa İttifaqı hər zaman Qarabağ probleminin həlli ilə ATƏT-in məşğul olduğunu
bəyan edib: "ATƏT də öz çərçivəsində Minsk qrupu həmsədri formatını seçərək bu
münaqişə ilə məşğul olur. Amma əslində bu, bir bəhanədir. Ona görə ki, Fransa
faktiki olaraq, Minsk qrupunda Avropa İttifaqını təmsil edən bir ölkə kimi
hesab olunur. Vaxtilə Minsk qrupu yarananda, Fransa ora həm Təhlükəsizlik
Şurasının, həm də Avropa İttifaqının üzvü kimi daxil olub. Bunlar isə məsələyə
biganəlik nümayiş etdirir. Faktiki olaraq, Avropa İttifaqı bu münaqişədə
işğalçı ilə bizi bərabərləşdirir və bunların pərdə arxası niyyəti ondan
ibarətdir ki, ermənilərin yeni dövlət qurmaq istəyi hər iki tərəfdən qəbul edilsin.
Amma bu, absurddur və biz heç vaxt bunu edə bilmərik. Çünki Avropanın buna
oxşar problemləri kifayət qədər çoxdur. Onlar yaxşı dərk edirlər ki, separatçılığa
müqavimət göstərib qarşısını almaq lazımdır. Çox təəssüflər olsun ki, Avropanın
bizə qarşı bu siyasəti indiyədək davam edir. Biz Avropa qurumları ilə çox sərt
diplomatik davranış nümayiş etdirməsək, bunlar həmin mövqedə qalacaqlar”.
F.Sadıxov vurğuladı ki, beynəlxalq qurumlar Ermənistana təzyiq etmək
istəmirlər: "Çünki burada müxtəlif səbəblər var. Azərbaycanın güclənməsi,
ölkəmizin Türkiyə ilə yaxınlaşması, dini amil və digər məsələlər var ki, bu da
onları qıcıqlandırır. Eyni zamanda, Avropa İttifaqının Cənubi Qafqaz və
Gürcüstan üzrə nümayəndəsi müsahibəsində ATƏT-in fəaliyyətdə olan sədrinin
şəxsi nümayəndəsinin ofisinin genişləndirilməsi məsələsinə də toxunub. Bu,
tamamilə bizim maraqlarımıza uyğun deyil. Müşahidəçilər o zaman yerləşdirilir
ki, artıq tərəflər arasında bir razılıq əldə olunub. Bu razılığın qüvvədə
qalması üçün əraziyə müşahidəçilər yeridilir. Amma bizdə bu müşahidəçilər işğal
edilmiş torpaqlarla Azərbaycanın hərbi hissələri arasında dayanacaqlar. Yəni,
bizə Azərbaycanla Azərbaycan arasında müşahidəçi lazımdırmı? Bununla ermənilərin
maraqları qorunur və məqsəd budur ki, biz hücum edib torpaqlarımızı azad
etməyək. Hesab edirəm ki, biz heç vaxt buna razılıq verməmişik”.
Bəxtiyar MƏMMƏDLİ