“Sarsılmaz dissident” Leyla Yunus ifşa olundu
Ötən həftə vəkil Elçin Qəmbərovun "Leyla
Yunusun parlaqlığı və səfaləti" kitabının təqdimatı keçirildi. Bu kitabda
"hüquq müdafiəçisi" L.Yunusun məhkəmə və istintaq zamanı azadlıq
naminə dostları ilə həmfikirlərinə xəyanət etməsindən, Azərbaycan hakimiyyəti
qarşısında alçalaraq öz xidmətlərini təklif etdiyindən bəhs olunur.
Müəllif kitabda insan hüquqlarının müdafiəsini
qazanc mənbəyinə çevirən və özünü "sarsılmaz dissident” kimi qələmə verən bir
adamın iç üzünü açır. Eyni zamanda kitabdakı məlumatlar sənədlərə əsaslanır,
hadisələr hazırkı dövrdə baş verir.
Əslində Leyla Yunus hələ "hüquq müdafiəçisi” kimi
Bakıda fəaliyyət göstərərkən onun Azərbaycan əleyhinə beynəlxalq təşkilatlarda
maraqlı qüvvələrlə birgə iş aparması heç kimə sirr deyildi. Maraqlıdır ki, bu
məsələni onun diqqətinə çatdırdıqda, Leyla Yunus həmin insanları hədəf almaqdan
belə çəkinmirdi. Lakin vəkil E.Qəmbərov bu kitabı ilə Leyla Yunusun əsl
simasını və əslində onun "hüquq müdafiəçisi” adını alver predmetinə çevirməsini
ortaya qoymuş oldu.
"Leyla Yunusun parlaqlığı və səfaləti"
kitabı ilə bağlı Milli Məclisin deputatı
Sahib Alıyev bildirdi ki, Leyla Yunus həmişə Azərbaycan əleyhinə iş aparıb,
öz maraqları naminə hər kəsi satıb. Onun sözlərinə görə, kitabda L.Yunusun
bütün iç üzü açılıb: "Leyla Yunus Azərbaycan dövlətini satan bir adamdır. Bu
xanım tanıdığı bütün hüquq müdafiəçilərini satıb, zərbə altında qoyub. Leyla
Yunusu maliyyələşdirən, ona bir çox ölkələrdə imarətlər, villalar alan, külli
miqdarda bank hesabına sahib olmağa imkan yaradan çevrələr məhz Leyla Yunus
kimi ictimai viruslardan ictimai rəy lideri yaradırlar. Onun kimi ictimai bir
virusu da Azərbaycan cəmiyyətinə ictimai rəy lideri kimi sırımağa
çalışırdılar”.
S.Alıyev vurğuladı ki, L.Yunus Azərbaycana qarşı ən
iyrənc yollara əl atıb: "O, Avopa Oyunları ərəfəsində deyirdi ki, Avropadakı
qurumlara demək lazımdır, Ermənistanın sülh tərəfdarı olmasını, Azərbaycanın
isə əksinə olduğunu qabartsınlar. Yəni, bu sadəcə bir epizoddur. Bunu edən
adamın nələrə gedə bilməsi aydın məsələdir”.
Millət vəkili
Çingiz Qənizadə isə qeyd etdi ki, Leyla Yunusun heç bir hüquq
müdafiəçisi ilə normal münasibəti olmayıb: "O öz maraqlarını hər şeydən üstün
tutub. Leyla Yunus heç zaman hər hansı vətəndaşın hüquqlarını müdafiə etməyib,
hər hansı məhbusun azadlığa qovuşmasında rol oynamayıb. Biz həmişə düşünürdük
ki, hər hansı məhbusa görə gedib xaricdə kimlərləsə oturub danışmaqla məsələ həll
etmək düzgün deyil, məsələ ölkə daxilində həll olunmalıdır. Ancaq o bu
məsələləri xaricə çıxarmaqla pul qazanmaq məqsədi güdürdü. Leyla Yunusun
məqsədi o olub ki, hüquq müdafiəçisi adı altında varlansın, Azərbaycan əleyhinə
iş aparmaqla qrantlar alsın. O, özünün görmədiyi hadisəni qələmə alıb və onu
xaricə satmaqla pul qazanıb”.
Deputatın fikrincə, L.Yunusun məqsədi həmişə özünün
şəxsi maraqlarına xidmət etmək olub: "Bir adama kömək etmədiyi halda, "Saxarov
mükafatı” almağı düşünür. Bu adam özünün maraqları üçün ətrafdakıları həmişə
zərbə altında qoyub. Leyla Yunus müxtəlif adlar altında xaricdən qrantlar alıb
və o pulları ölkədən çıxarıb. O həmişə ədəbsiz hərəkətləri ilə yadda qalıb.
Onun haqqında yazılan kitabda da bütün bu məqamlar öz əksini tapıb”.
"Azəri-Türk”
Qadınlar Birliyinin sədri Tənzilə Rüstəmxanlı bildirdi ki,
əslində Leyla Yunusun iç üzü çoxdan hər kəsə bəlli idi: "Şəxsən özüm Leyla
Yunusu uzun illərdir tanıyıram və onun mövqeyi, ermənilərlə, bir sıra
beynəlxalq qurumlarla birgə işləməsi mənə bəlli idi. Çox təəssüflər olsun ki,
Azərbaycanın əleyhinə harada bir hərəkat varsa, Leyla Yunus mütləq onun
içərisində yer alır. Azərbaycandan kənarda olan tədbirlərdə bunun dəfələrlə
şahidi olmuşdum. İndi isə Elçin Qəmbərovun məhz Leyla Yunusla bağlı kitabı ilə
yaxından tanış oldum. Elçin Qəmbərov vəkildir, insanları müdafiə edir. Özünün
də qeyd etdiyi kimi, bir hüquqşünas olaraq, Leyla Yunus ona şər və böhtan atana
qədər bütün qaydaları gözləyib. O, L.Yunusun içində Azərbaycana, millətimizə,
torpağımıza qarşı nə qədər nifrət olduğunu açıq şəkildə gördüyünü qeyd edib.
Çox maraqlıdır ki, Elçin Qəmbərov Leyla Yunusa "siz azərbaycanlısınız” deyəndə,
o qətiyyətlə inkar edib, "mən yəhudiyəm” deyirmiş. Əslində bu kitabda kifayət
qədər dəlillər və faktlar var. Leyla Yunusun Azərbaycana qarşı fəaliyyətləri, o
cümlədən rəhbəri olduğu təşkilatın beynəlxalq qurumlarla birgə işi nəticəsində
külli miqdarda vəsait əldə etməsi faktlardan biridir. Hətta özünü həbsdən azad
etdirmək üçün öz qızını belə silah kimi istifadə edib. Yəni, əslində bu kitabda
Leyla Yunusun öz şəxsiyyətini necə alçaltdığının nümunəsi var. Kitab olduğu
kimi Leyla Yunusun iç üzünü ortaya qoyub”.
T.Rüstəmxanlı əlavə etdi ki, Leyla Yunusun "hüquq
müdafiəçisiyəm” deməyə haqqı yoxdur: "Bu ölkədə fəaliyyət göstərən digər hüquq
müdafiəçiləri yetərincə öz işlərinin öhdəsindən gəlirlər. Hətta bir dəfə
beynəlxalq tədbirlərdən birində şahidi oldum ki, Leyla Yunusun Azərbaycan
əleyhinə çıxışına digər hüquq müdafiəçiləri dözə bilmədilər və buna etiraz
etdilər. L.Yunus "hüquq müdafiəçisi” statusunu, rəhbəri olduğu qurumun adından
istifadə edərək, şəxsi ambisiyalarına qurban verib. Bütün bunlar da Leyla Yunusun
hüquq müdafiəçisi olmasından daha çox, var-dövlət toplamağa xidmət etməsini
ortaya qoydu”.
AZAD