Sarkisyanın namizədi Moskvaya əl öpməyə gedib
Gözlənildiyi kimi, forpost ölkənin prezidentliyə namizədi olacaq şəxs
də ənənəni pozmayaraq xeyir-dua almaq üçün Moskvaya yollanıb. Məlumata görə, Ermənistan
Respublikaçılar Partiyasının prezidentliyə namizəd irəli sürdüyü Armen
Sarkisyan Moskvaya səfər edib. Ermənistan KİV-ləri xəbər verir ki, o, Rusiya paytaxtında siyasi
qüvvələr, təşkilatlar və cəmiyyətin müxtəlif təbəqələrinin təmsilçiləri ilə
görüşlər keçirəcək. Məlumat üçün bildirək ki, Ermənistan prezidenti Serj Sarkisyan
yanvarın 19-da başçılıq etdiyi partiyanın bu posta namizədinin səfir Armen
Sarkisyan olduğunu bildirib. Sarkisyanı əvəz edəcək şəxsin xeyir-dua üçün ilk
olaraq Moskvanı seçməsi onun qərbpərəst, Avropa ilə yaxınlaşmağa meyl edən
siyasəti olacağı barədə ehtimalları bir qədər azaldıb. Sözsüz ki, onu Kremldə
də qəbul edib, müəyyən tapşırıqlar verəcəklər. Bir faktı da qeyd edək ki,
Sarkisyanın həm Rusiya, həm də Qərbdəki erməni icması arasında nüfuzu xeyli
aşağı düşüb. Rusiya erməniləri onu xeyriyyə marafonları zamanı yığılan
vəsaitləri mənimsəməkdə ittiham edirlər. Hətta onun keçirdiyi tədbirləri boykot
da ediblər. Özü də bu münasibət tək Rusiyada deyil, Fransada, ABŞ-da da belədir.
Məsələn, Serj Sarkisyan Fransada səfərdə olarkən buradakı erməni lobbisinin
nümayəndələri onunla görüşmək istəməmişdilər.
"Serjik” də yeni prezidentin namizədliyini irəli sürməklə ümid edir
ki, bu nifrəti başqa istiqamətə yönəldəcək. Ümumiyyətlə, hakimiyyətin Armen
Sarkisyana böyük ümidləri olsa da, bu ümidlər doğrulmaya bilər. Hakimiyyət
Londonda Ermənistanı təmsil etmiş bu şəxsin köməyi ilə ölkəyə maliyyə gətirməyi
qarşıya məqsəd qoysa da, bu istəyi alınmayacaq. Hazırda Böyük Britaniya ilə
Ermənistan arasında iqtisadi münasibətlər ürəkaçan deyil. "Joxovurd” qəzeti
yazır ki, Britaniya Ermənistana investisiyanın həcmini xeyli azaldıb.
Ermənistan Milli Statistika İdarəsinin məlumatına görə, ötən ilin üç rübü
ərzində birbaşa investisiyalar 1 mlrd. 846 mln. dram təşkil edib. Halbuki,
2016-cı ilin müvafiq dövründə bu rəqəm 32 mlrd. dram idi. Belə çıxır ki, bu
dövr ərzində Böyük Britaniya Ermənistana investisiyalarının həcmini 30 mlrd.
dram azaldıb. Xatırladaq ki, Serj dəfələrlə səfirlərə Ermənistana investisiyaları
artırmağa nail olmağı tapşırıb. Faktiki olaraq Armen onun tələbini yerinə
yetirə bilməyib.
Yeri gəlmişkən, Armen Sarkisyanın namizədliyinə qarşı çıxan müxalifət
onu ermənilərin problemindən uzaq birisi adlandırır. Prezidentin keçmiş
müşaviri Aşot Manuçaryan hesab edir ki, Ermənistan heç vaxt Baqramyan 26-dan
(prezident iqamətgahının yerləşdiyi bina) idarə olunmayıb: "Bizim ölkə ya
Azadlıq meydanından xalq tərəfindən, ya da xarici qüvvələrin iradəsi ilə idarə
olunub. Bu, ümumi qanunauyğunluqdur”. A.Manuçaryan Armen Sarkisyanı istedadlı
şəxs adlandırsa da, onu uzun müddət ölkədə olmadığını bildirir. "İndi Razdan
çayında dünya boyu hiylə dolu layihələr reallaşdıran "Armen Sarkisyan” gəmisi
peyda olur. Bu şəxs bir vaxtlar Qazaxıstanda prezident Nursultan Nazarbayevin
qızı Dariqa ilə Avrasiya hərəkatını başlatmışdı. Bu, Britaniyanın möhtəşəm bir
layihəsi idi. Lakin Rusiya tərəfindən məhv edildi”, - deyə sabiq müşavir
bildirib.
Müstəqil jurnalist David Petrosyan isə "Vestnik Kafkaza”ya
müsahibəsində bildirib ki, Armen Sarkisyan ümumxalq səsverməsi ilə seçilməyən
ilk prezident olacaq: "Sözsüz ki, onun səlahiyyətləri xeyli məhdudlaşdırılıb.
Bundan çıxış edərək demək olar ki, dördüncü prezidentin ölkədəki ictimai-siyasi
proseslərə təsir imkanları həddən artıq az olacaq”. Lakin bununla yanaşı, dünya
praktikasında parlament respublikalarında az səlahiyyətə malik prezidentlərin
ictimai proseslərə ciddi təsir etmək nümunələri də var. Məsələn, Almaniyanın
indiki və keçmiş prezidentləri Qauk və Ştaynmayer, Çexiya prezidenti Zeman. O
əlavə edir ki, Sarkisyan Ermənistanın daxili problemlərindən - həm siyasi, həm
də sosial mənada çox uzaqdır: "Onun bu problemi üstələyəcəyi də bəlli deyil. Otuz
ildir ki, ölkə hüdudlarından kənarda olub. Sovet Ermənistanından gedib və indi
ölkə tamam başqadır”. Əlavə edib ki, Sarkisyanın fiquru ətrafında uzunmüddətli
proqnozlar etməmək məsləhətdir.
Erməni mediası onu da yazır ki, erməni oliqarxları da hakim
partiyanın namizədinə qarşı çıxmağa hazırlaşırlar. Onlar ölkənin işgüzar
aləmində peyda olacaq Armeni özlərinə rəqib kimi görürlər. Ehtiyat edirlər ki,
yeni prezident onların biznes maraqlarına müdaxilə edəcək. Onların fikrincə,
Armen Sarkisyan biznesin bəzi sahələrini ələ keçirməyə çalışacaq. Erməni mediasının
yazdığına görə, yaxın zamanlarda Armen Sarkisyanı etibardan salacaq məlumatlar
yayıla, bu da onu prezidentlik iddialarından əl çəkməyə vadar edə bilər. Məsələyə
münasibət bildirən politoloq Lilit Avakyan isə hesab edir ki, əslində, ölkədə
prezidentə ehtiyac yoxdur: "Serj Sarkisyan hakimiyyəti əldən verməmək üçün yeni
plan hazırlayaraq, ölkəni parlament tipli respublikaya çevirib, özünü baş nazir
elan etmək istəyir. Parlament tipli respublikanın prezident tipli respublikadan
əsas fərqi ondadır ki, burada hakimiyyət bölgüsü zamanı baş nazirə daha çox
səlahiyyət verilir. Odur ki, Sarkisyan bundan səmərəli istifadə etməyə çalışır.
Hesab edilir ki, narazılıq dalğasının genişlənməsi fonunda Serj Sarkisyanın baş
nazir, Armen Sarkisyanın dövlət başçısı postunu tutması elə də asan olmayacaq. Bütün
bunlar işğalçı ölkədə istər prezident, istərsə də baş nazir seçkilərinin elə də
sabit mühitdə keçməyəcəyini, böyük gərginliklərə yol açacağını göstərir.
Azər