Sarkisyanın məsuliyyətsiz bəyanatları Ermənistanı fəlakətə sürükləyir
Ermənilər "İsgəndər”dən istifadə etmək üçün Rusiyadan icazə almalıdırsa, Azərbaycan heç kimlə hesablaşmadan istənilən düşmən təxribatına ən müasir silahlarla dərhal cavab vermək iqtidarındadır
Azərbaycanın 20 faiz ərazisinin işğalı prosesində,
eləcə də Xocalıda azərbaycanlılara qarşı tərədilən soyqırımında bilavasitə
iştirak edən, sonradan Ermənistanda siyasi hakimiyyəti hərbi yolla ələ keçirən Serj
Sarkisyan işğal altındakı Dağlıq Qarabağ ərazisinə bir neçə gün bundan öncə səfər
edib. Səfər çərçivəsində o, işğalçı ordunun hərbçiləri ilə də görüşüb, hətta
onlar qarşısında çıxış edərək geniş nitq söyləyib. Adəti üzrə Sarkisyan bu dəfə
də sərsəmləyib, Azərbaycanın ünvanına hədyan dolu bəyanatlar səsləndirməkdən də
çəkinməyib.
Hərbi cinayətkar Sarkisyan işğalçı ordunun əsgər və
zabitlərinin qarşısında cuşa gələrək, Azərbaycan Silahlı Qüvvələrinə qarşı "İsgəndər”
operativ-taktiki raketlərindən istifadə edilməsinə dair əmr verəcəyini də söyləyib.
Bildirib ki, lazım olsa, Ermənistanın baş komandanı gözünü qırpmadan bu barədə əmr
verə bilər. Hərbi xuntanın başçısı bir qədər də irəliyə gedərək bildirib ki,
Ermənistandakı müasir silahlar Azərbaycan torpaqlarındakı ən əhəmiyyətli
infrastruktur və obyektlər başda olmaqla, bütün istiqamətləri hədəf almağa
qadirdir. Təbii ki, bütün bunlar Sarkisyanın növbəti cəfəng açıqlamalarıdır.
Bu, daxili auditoriyanı sakitləşdirməyə, parlament seçkiləri öncəsi erməni
xalqının səsini ələ keçirməyə hesablanmış boğazdan yuxarı sözlərdir.
Azərbaycan Müdafiə Nazirliyi də Ermənistan prezidenti
Serj Sarkisyanın "İsgəndər” raketlərindən istifadə edilməsinə əmr verəcəyi barədə
bəyanatına elə bu cür yanaşıb. Nazirliyin mətbuat xidmətinin yaydığı məlumatda
qeyd olunub ki, Serj Sarkisyanın bəyanatı öz cinayətkar dəstəsinin itirilmiş
nüfuzunu bərpa etmək və seçkiqabağı xal toplamaqla reytinqini yüksəltmək məqsədilə
daxili auditoriyaya hesablanmış primitiv bir addımdır: "Düşmən tərəf
anlamalıdır ki, Azərbaycanın işğal edilmiş əraziləri, o cümlədən Ermənistanda
yerləşən bütün hərbi təyinatlı və digər strateji əhəmiyyətli obyektlər
ordumuzun son illər ərzində əldə etdiyi ən müasir raket və artilleriya
qurğularının daim hədəfindədir. Ermənistan tərəfindən yarana biləcək istənilən
təhdid və hədələrin qarşısı dərhal və qətiyyətlə alınacaq. Görüləcək cəza tədbirləri
nəticəsində Ermənistanın məruz qalacağı irimiqyaslı itkilər və dağıntılar
qaçılmaz olacaq, onun üçün faciəvi və bərpası mümkün olmayan fəsadlara gətirib
çıxaracaq. Odur ki, Ermənistanın rəhbərliyi belə məsuliyyətsiz bəyanatlar verməzdən
əvvəl əhalisinin aqibətinidüşünməlidir”.
Milli
Məclisin Müdafiə, təhlükəsizlik və korrupsiya ilə mübarizə komitəsinin üzvü Fərəc
Quliyev mövzu ilə
bağlı fikirlərini "Kaspi”yə bölüşərkən istənilən hərbi texnikanı, silah-sursatı
istifadə edənin insan olmasına diqqət çəkib. Bildirib ki, Ermənistanda "İsgəndər”dən
də üstün silahlar olsa belə, ötən ilin aprel döyüşləri erməni hərbçilərinin,
ordusunun nəyə qadir olduğunu real olaraq ortaya qoyub: "Cəmi bir neçə gün
davam edən həmin döyüşlər zamanı Azərbaycan Silahlı Qüvvələri cəbhəyanı ərazidə
bir neçə post yaratmışdı ki, əhali döyüş bölgəsinə gəlməsin. Çünki xaricdəki
diaspor üzvlərimizdən başlamış, ölkə daxilində böyükdən-kiçiyədək hər kəs Azərbaycan
ordusuna dəstək verir, cəbhədə düşmənlə döyüşmək istədiyini bildirirdi. Müdafiə
Nazirliyinə, eləcə də Ali Baş Komandana bu məqsədlə kütləvi müraciətlər olurdu.
Amma bizdən fərqli olaraq Ermənistanda cəbhəyanı ərazilərdə postlar qoyulmuşdu
ki, erməni əsgərlər döyüş mövqeyini tərk edib qaçmasınlar. Bu iki mənzərə real
vəziyyəti tam çılpaqlığı ilə nümayiş etdirir”.
Millət vəkili deyib ki, insanlarımızdakı yurda, elə-obaya
bağlılıq hissləri, vətənpərvərlik, həmçinin hərbçilərimizdəki yüksək mənəvi-psixoloji
durum, döyüş ruhu, peşəkarlıq cəmi bir həftə ərzində işğal altındakı
torpaqlarımızı azad etməyə, hətta İrəvana qədər irəliləməyə imkan verir: "Bizim
bu cür imkanlarımız var. Üstəlik, Azərbaycanın hərbi potensialı Ermənistanın hərbi
gücündən dəfələrlə üstündür. Cənubi Qafqaz regionunda Azərbaycanın Silahlı Qüvvələri
bütün parametrlərinə görə ən güclü ordudur. Bu gün Azərbaycan hərbi tələbatını
özünün istehsal etdiyi silah-sursatla təmin edir. Azərbaycan ordusu paradda öz
bayrağı altında, ən müasir silah və texnika ilə qürurla addımlayır. Ermənistanda
isə paradda hərbçilər Rusiya bayrağı altında, rus maşını və silahı ilə
addımlayır. Bu fakt da Ermənistan ordusunun "gücünü” nümayiş etdirir. Bu kimi
faktları qiymətləndirərək onu demək mümkündür ki, Sarkisyanın növbəti bəyanatı
reallıqdan uzaq, yalnız daxili auditoriyanı sakitləşdirməyə, seçki ərəfəsində səs
toplamağa hesablanan əsassız fikirlərdir”.
"Atlas”
Araşdırmalar Mərkəzinin rəhbəri Elxan Şahinoğlu hesab edir ki, Ermənistanda hər dəfə vəziyyət gərginləşəndə,
hərbi xuntanın rəhbəri Sarkisyan qeyri-qanuni olaraq Dağlıq Qarabağa gəlir, bu
yolla həm ölkə daxilində, həm də separatçılar arasında sakitliyi təmin etməyə
çalışır. Politoloq bizimlə söhbətində bunun səbəbsiz olmadığını söyləyib:
"Dağlıq Qarabağdakı separatçılar bilirlər ki, Azərbaycan heç zaman
torpaqlarının işğalı ilə barışmayacaq və öz ərazi bütövlüyünü istənilən yolla təmin
etməyə çalışacaq. Bu da onları qorxudur. Ona görə də Sarkisyan mütəmadi olaraq
Dağlıq Qarabağa gəlir, separatçıları sakitləşdirməyə çalışır. Bu dəfə də o, ənənəvi
səfərini etməklə bərabər, "İsgəndər” raketlərindən Azərbaycana qarşı istifadə
edilə biləcəyini də dilə gətirib. Sarkisyana əks cavab dərhal verilib. Ermənistan
prezidenti bilməlidir ki, o, "İsgəndər”dən istifadə etmək üçün Rusiyadan icazə
almalıdırsa, Azərbaycan heç kimdən icazə almadan, istənilən düşmən təxribatına
qarşı ən müasir silahlarla dərhal cavab vermək iqtidarındadır. Digər tərəfdən,
"İsgəndər” raketləri Ermənistan ərazisindədir. Bu silahdan istifadə müharibənin
Ermənistan ərazisinə keçməsinə imkan yaradacaq. Bu zaman isə Azərbaycan özünü
müdafiə etmək üçün Ermənistandakı strateji nöqtələri də məhv etmək şansı
qazanacaq, bu imkanı əldən verməyəcək. Vaxtilə Ermənistan müdafiə naziri də bəyanat
vermişdi ki, müharibə başlayacağı təqdirdə, hətta Mingəçevir Su Elektrik
Stansiyasını da vura bilərlər. Azərbaycan tərəfi də dərhal açıqlama verdi ki, belə
təhlükə olarsa, Metsamor Atom Elektrik Stansiyası cavab zərbəsi ilə məhv ediləcək.
Bundan sonra qarşı tərəfdən heç bir açıqlama gəlmədi”.
Hərbi
ekspert Arzu Nağıyevdə qəzetimizə açıqlamasında bildirib ki, aprel ayının 2-ə kimi Ermənistan rəsmiləri
tərəfindən bu tip açıqlamaların dilə gətirilməsi gözləniləndir. Onun sözlərinə
görə, bütün bu fikirlər, hətta Sarkisyanın işğal altında saxlanılan Dağlıq
Qarabağ ərazisinə qanunsuz səfəri, separatçılar qarşısında çıxışı da siyasi məqsəd
daşıyır: "Sarkisyan Dağlıq Qarabağ kartından parlament seçkiləri öncəsi də
istifadə etmək istəyir. Buna görə də əsası olmayan bəyanatlar səsləndirir.
Rusiya ilə Ermənistan arasında hava məkanının birgə qorunması ilə bağlı bir
müddət əvvəl imzalanmış razılaşmanı nəzərə alaraq belə bir fikir yürütmək
mümkündür ki, rəsmi Moskvanın icazəsi olmadan Sarkisyan komandası "İsgəndər”i
yerindən tərpədə bilməz. Çünki bu raketlər Rusiyaya məxsusdur və rus ordusunun
forpost Ermənistandakı bazasında yerləşdirilib. Kreml rəhbərliyi yaxşı başa
düşür ki, əgər Azərbaycana qarşı hər hansı raketdən istifadə edilərsə, bunu zərərsizləşdirmək,
hətta cavab tədbirlər görmək üçün rəsmi Bakının, ordumuzun hərtərəfli imkanları
var. Azərbaycan Silahlı Qüvvələri düşmənin istənilən təxribatının, zərbəsinin
havada və quruda qarşısını almağa, cavab zərbəsi endirməklə Ermənistanın istənilən
döyüş mövqeyini, hərbi-strateji məntəqəsini, canlı qüvvəsini və hərbi
texnikasını məhv etməyə qadirdir”.
Sonda bir daha qeyd edək ki, ötən ilin aprel döyüşləri
Ermənistan ordusunun real gücünü tam çılpaqlığı ilə ortaya qoyub. Həmin vaxt təxribat
məqsədi ilə mövqelərimizə soxulmağa cəhd edən düşmənin qarşısı alınıb, Silahlı Qüvvələrimizin
ön xəttdəki kiçik bir bölməsi əks-hücuma keçərək Ermənistan ordusuna sarsıdıcı
zərbə vurub. Nəticədə erməni hərbçilər çoxsaylı canlı qüvvə və texnika,
silah-sursat itkisi verərək geri çəkilməyə, hətta əllərində olan bir sıra
strateji yüksəklikləri itirməyə məcbur olublar. Həmin hadisədən sonra düşmən
ordusu fasilələrlə bir neçə dəfə mövqelərimizə hücum etməyə, əldən verdikləri əraziləri
geri qaytarmağa çalışıblar. Lakin Azərbaycan ordusu düşmənin bütün təxribat və
hücum cəhdlərinin qarşısını qətiyyətlə alıb, erməni əsgərlərini daha böyük
itkiyə məruz qoyub. Belə olan halda hərbi cinayətkar Serj Sarkisyanın
açıqlamaları, "İsgəndər” raketindən istifadə etmək barədə xülyaları, müharibə və
hədə-qorxu bəyanatları yalnız boşboğazlığı, "yağa bilməsə də, guruldamaq” məşhur
el məsəlini xatırladır.
Rufik
İSMAYILOV